ਯੂਪੀ 'ਚ ਅਜੀਬੋ-ਗਰੀਬ ਘਟਨਾ: ਕਬਰਸਤਾਨ 'ਚੋਂ 15 ਫੁੱਟ ਡੂੰਘਾ ਟੋਇਆ ਪੁੱਟ ਕੇ ਕੱਢੀਆਂ ਮੁਰਦੇ ਦੀਆਂ ਹੱਡੀਆਂ, ਇਲਾਕੇ 'ਚ ਦਹਿਸ਼ਤ

ਬਦਾਯੂੰ : ਉੱਤਰ ਪ੍ਰਦੇਸ਼ ਦੇ ਬਦਾਯੂੰ ਜ਼ਿਲ੍ਹੇ ਦੇ ਬਿਲਸੀ ਦੇ ਈਦਗਾਹ ਕਬਰਸਤਾਨ ਵਿਚ ਲਗਪਗ 150 ਸਾਲ ਪੁਰਾਣੀ ਇਕ ਕਬਰ ’ਚੋਂ ਹੱਡੀਆਂ ਗ਼ਾਇਬ ਹੋ ਗਈਆਂ ਹਨ। ਸਥਾਨਕ ਲੋਕਾਂ ਨੇ ਸ਼ੱਕ ਪ੍ਰਗਟਾਇਆ ਹੈ ਕਿ ਕਈ ਦਿਨਾਂ ਤੋਂ ਕਬਰਸਤਾਨ ਵਿਚ ਆ ਰਹੇ ਤਾਂਤ੍ਰਿਕਾਂ ਨੇ ਇਹ ਹੱਡੀਆਂ ਚੋਰੀ ਕਰ ਲਈਆਂ ਹੋਣਗੀਆਂ। ਐਤਵਾਰ ਨੂੰ ਪੁਲਿਸ ਨੇ ਕਬਰਸਤਾਨ ਦਾ ਦੌਰਾ ਕਰ ਕੇ ਮਾਮਲੇ ਦੀ ਜਾਣਕਾਰੀ ਪ੍ਰਾਪਤ ਕੀਤੀ ਪਰ ਕਿਸੇ ਨੇ ਵੀ ਕਾਰਵਾਈ ਲਈ ਕੋਈ ਸ਼ਿਕਾਇਤ ਨਹੀਂ ਦਿੱਤੀ। ਹੁਣ ਆਸ-ਪਾਸ ਦੇ ਤਾਂਤ੍ਰਿਕਾਂ ਬਾਰੇ ਜਾਣਕਾਰੀ ਇਕੱਠੀ ਕੀਤੀ ਜਾ ਰਹੀ ਹੈ ਤਾਂ ਜੋ ਕਬਰ ’ਚੋਂ ਹੱਡੀਆਂ ਚੋਰੀ ਕਰਨ ਦਾ ਕਾਰਨ ਪਤਾ ਲਗਾਇਆ ਜਾ ਸਕੇ। ਕਬਰਸਤਾਨ ਕਮੇਟੀ ਦੇ ਸਕੱਤਰ ਅਨੀਸ ਖਾਨ ਨੇ ਦੱਸਿਆ ਕਿ ਜਿੱਥੋਂ ਹੱਡੀਆਂ ਚੋਰੀ ਹੋਈਆਂ, ਉਸ ਕਬਰ 'ਤੇ ਸਾਲਾਂ ਪੁਰਾਣੀਆਂ ਇੱਟਾਂ ਲੱਗੀਆਂ ਹੋਈਆਂ ਸਨ। ਇਸ ਆਧਾਰ 'ਤੇ ਇਸ ਨੂੰ 150 ਸਾਲ ਪੁਰਾਣੀ ਕਬਰ ਮੰਨਿਆ ਜਾ ਰਿਹਾ ਹੈ। ਕੁਝ ਤਾਂਤ੍ਰਿਕ ਕਈ ਦਿਨਾਂ ਤੋਂ ਕਬਰਸਤਾਨ ’ਚ ਆ ਕੇ ਬੈਠਦੇ ਰਹੇ ਪਰ ਉਸ ਸਮੇਂ ਉਨ੍ਹਾਂ 'ਤੇ ਕੋਈ ਸ਼ੱਕ ਨਹੀਂ ਹੋਇਆ। ਐਤਵਾਰ ਸਵੇਰੇ ਜਦੋਂ ਲੋਕ ਆਪਣੇ ਬਜ਼ੁਰਗਾਂ ਦੀਆਂ ਕਬਰਾਂ 'ਤੇ ਫੁੱਲ ਚੜ੍ਹਾਉਣ ਪਹੁੰਚੇ ਤਾਂ ਉਨ੍ਹਾਂ ਨੇ ਕਬਰ ਪੁੱਟੀ ਹੋਈ ਪਾਈ। ਉਥੇ 15 ਫੁੱਟ ਡੂੰਘਾ ਟੋਇਆ ਪੁੱਟ ਕੇ ਹੱਡੀਆਂ ਕੱਢੀਆਂ ਗਈਆਂ ਸਨ।