ਮੁੰਬਈ ਦੇ ਮੁਲੁੰਦ 'ਚ ਮੈਟਰੋ ਪਿੱਲਰ ਦਾ ਹਿੱਸਾ ਡਿੱਗਣ ਕਾਰਨ ਕਈ ਵਾਹਨ ਲਪੇਟ 'ਚ ਆਏ, ਚਾਰ ਲੋਕ ਜ਼ਖ਼ਮੀ

ਡਿਜੀਟਲ ਡੈਸਕ, ਨਵੀਂ ਦਿੱਲੀ : ਉੱਤਰ-ਪੂਰਬੀ ਮੁੰਬਈ ਦੇ ਮੁਲੁੰਦ ਇਲਾਕੇ 'ਚ ਅੱਜ ਇਕ ਵੱਡਾ ਹਾਦਸਾ ਵਾਪਰ ਗਿਆ, ਜਿੱਥੇ ਉਸਾਰੀ ਅਧੀਨ ਮੈਟਰੋ ਰੇਲ ਦੇ ਪਿੱਲਰ ਦਾ ਇਕ ਹਿੱਸਾ ਅਚਾਨਕ ਡਿੱਗ ਗਿਆ। ਇਸ ਦੇ ਹੇਠਾਂ ਕਈ ਗੱਡੀਆਂ ਦਬ ਗਈਆਂ ਹਨ। ਹਾਦਸੇ 'ਚ 4 ਲੋਕਾਂ ਦੇ ਜ਼ਖ਼ਮੀ ਹੋਣ ਦੀ ਖ਼ਬਰ ਹੈ। ਫਾਇਰ ਬ੍ਰਿਗੇਡ ਦੇ ਇਕ ਅਧਿਕਾਰੀ ਨੇ ਦੱਸਿਆ ਕਿ ਸ਼ਨੀਵਾਰ ਦੁਪਹਿਰ ਨੂੰ ਉੱਤਰ-ਪੂਰਬੀ ਮੁੰਬਈ ਦੇ ਮੁਲੁੰਦ 'ਚ ਇਕ ਨਿਰਮਾਣ ਅਧੀਨ ਮੈਟਰੋ ਰੇਲ ਰੂਟ ਦੇ ਪਿੱਲਰ ਦਾ ਹਿੱਸਾ ਡਿੱਗਣ ਕਾਰਨ ਤਿੰਨ ਤੋਂ ਚਾਰ ਲੋਕਾਂ ਦੇ ਜ਼ਖ਼ਮੀ ਹੋਣ ਦਾ ਖ਼ਦਸ਼ਾ ਹੈ। ਅਧਿਕਾਰੀ ਨੇ ਦੱਸਿਆ ਕਿ ਇਹ ਘਟਨਾ ਦੁਪਹਿਰ ਕਰੀਬ 12:20 ਵਜੇ ਜੌਹਨਸਨ ਐਂਡ ਜੌਹਨਸਨ ਫੈਕਟਰੀ ਦੇ ਸਾਹਮਣੇ ਐਲਬੀਐਸ (LBS) ਰੋਡ 'ਤੇ ਵਾਪਰੀ।

ਪਿੱਲਰ ਦਾ ਇਕ ਸੀਮਿੰਟ ਸਲੈਬ ਟੁੱਟ ਕੇ ਹੇਠਾਂ ਇਕ ਆਟੋਰਿਕਸ਼ਾ 'ਤੇ ਡਿੱਗ ਗਿਆ ਜਿਸ ਨਾਲ ਰਿਕਸ਼ਾ ਪੂਰੀ ਤਰ੍ਹਾਂ ਚਕਨਾਚੂਰ ਹੋ ਗਿਆ। ਇਸ ਘਟਨਾ 'ਚ ਤਿੰਨ ਤੋਂ ਚਾਰ ਲੋਕਾਂ ਦੇ ਜ਼ਖ਼ਮੀ ਹੋਣ ਦਾ ਖ਼ਦਸ਼ਾ ਹੈ। ਫਾਇਰ ਬ੍ਰਿਗੇਡ ਅਤੇ ਪੁਲਿਸ ਦੇ ਕਰਮਚਾਰੀ, ਅਤੇ ਨਾਲ ਹੀ ਮੈਟਰੋ ਰੇਲ ਰੂਟ (ਲਾਈਨ 4) ਬਣਾਉਣ ਵਾਲੀ ਕੰਪਨੀ ਦੇ ਕਰਮਚਾਰੀ ਘਟਨਾ ਤੋਂ ਬਾਅਦ ਰਾਹਤ ਕਾਰਜਾਂ ਦੀ ਨਿਗਰਾਨੀ ਕਰਨ ਲਈ ਮੌਕੇ 'ਤੇ ਮੌਜੂਦ ਹਨ।