ਹੋਲੀ 'ਤੇ ਪਾਣੀ ਦੇ ਗੁਬਾਰੇ ਸੁੱਟਣ ਤੋਂ ਰੋਕਿਆ, ਫਿਰ ਤੋੜ ਦਿੱਤਾ ਨੌਜਵਾਨ ਦਾ ਹੱਥ; ਪੁਲਿਸ ਨੇ ਕੇਸ ਕੀਤਾ ਦਰਜ

ਜਾਗਰਣ ਸੰਵਾਦਦਾਤਾ, ਪੰਚਕੂਲਾ: ਮਾਰਕੀਟ 'ਚ ਦੁੱਧ ਲੈਣ ਗਏ ਇੱਕ ਨੌਜਵਾਨ ਵੱਲੋਂ ਧੁਲੇਂਡੀ (ਹੋਲੀ) ਵਾਲੇ ਦਿਨ ਪਾਣੀ ਦੇ ਗੁਬਾਰੇ ਸੁੱਟਣ ਤੋਂ ਰੋਕਣ 'ਤੇ ਨਸ਼ੇੜੀਆਂ ਦੇ ਇੱਕ ਝੁੰਡ ਨੇ ਉਸ ਉੱਤੇ ਹਮਲਾ ਕਰਕੇ ਉਸ ਦੀ ਬਾਂਹ ਤੋੜ ਦਿੱਤੀ। ਦੋਸ਼ ਹੈ ਕਿ ਸਾਰੇ ਹਮਲਾਵਰ ਗਾਂਜੇ ਦੇ ਨਸ਼ੇ ਵਿੱਚ ਸਨ। ਪੀੜਤ ਦੀ ਸ਼ਿਕਾਇਤ ਦੇ ਆਧਾਰ 'ਤੇ ਸੈਕਟਰ-20 ਥਾਣੇ ਵਿੱਚ ਕੇਸ ਦਰਜ ਕਰ ਲਿਆ ਗਿਆ ਹੈ।

ਪੁਲਿਸ ਨੂੰ ਦਿੱਤੀ ਸ਼ਿਕਾਇਤ ਵਿੱਚ ਸੈਕਟਰ-19 ਦੇ ਰਹਿਣ ਵਾਲੇ ਨਰੇਸ਼ ਕੁਮਾਰ ਨੇ ਦੱਸਿਆ ਕਿ ਉਹ ਧੁਲੇਂਡੀ ਵਾਲੇ ਦਿਨ ਆਪਣੇ ਘਰੋਂ ਦੁੱਧ ਲੈਣ ਲਈ ਬਾਜ਼ਾਰ ਜਾ ਰਿਹਾ ਸੀ। ਕੁਝ ਲੜਕੇ ਪਾਣੀ ਦੇ ਗੁਬਾਰੇ ਅਤੇ ਟਮਾਟਰ ਸੁੱਟ ਰਹੇ ਸਨ। ਜਦੋਂ ਉਸ ਨੇ ਉਨ੍ਹਾਂ ਨੂੰ ਰੋਕਿਆ ਤਾਂ ਉਹ ਉਸ ਨਾਲ ਝਗੜਾ ਕਰਨ ਲੱਗ ਪਏ।

ਇਸੇ ਦੌਰਾਨ ਇੱਕ ਨੌਜਵਾਨ ਨੇ ਕਮਰ ਵਿੱਚੋਂ ਚਾਕੂ ਕੱਢ ਕੇ ਉਸ 'ਤੇ ਹਮਲਾ ਕਰਨ ਦੀ ਕੋਸ਼ਿਸ਼ ਕੀਤੀ। ਜਦੋਂ ਉਸ ਨੇ ਆਪਣਾ ਬਚਾਅ ਕੀਤਾ ਤਾਂ ਉੱਥੇ ਕਰੀਬ 20 ਲੜਕੇ ਆ ਗਏ, ਜੋ ਉਸ ਨਾਲ ਕੁੱਟਮਾਰ ਕਰਨ ਲੱਗੇ। ਹਮਲਾ ਕਰਨ ਆਏ ਨੌਜਵਾਨਾਂ ਨੇ ਕੁੱਟਮਾਰ ਦੌਰਾਨ ਉਸ ਦੀ ਬਾਂਹ ਤੋੜ ਦਿੱਤੀ।

ਸਾਰੇ ਹਮਲਾਵਰ ਸੈਕਟਰ ਦੇ ਹੀ ਇੱਕ ਮਕਾਨ ਵਿੱਚ ਗਾਂਜੇ ਦਾ ਨਸ਼ਾ ਕਰਦੇ ਹਨ। ਦੋਸ਼ ਹੈ ਕਿ ਇਹ ਨੌਜਵਾਨ ਉੱਥੋਂ ਲੰਘਣ ਵਾਲੀਆਂ ਕੁੜੀਆਂ ਅਤੇ ਔਰਤਾਂ 'ਤੇ ਵੀ ਫ਼ਬਤੀਆਂ ਕੱਸਦੇ ਹਨ। ਹਮਲਾਵਰਾਂ ਵਿੱਚ ਨਿਤਿਨ ਕੁਮਾਰ, ਮਨੀਸ਼, ਮੋਨੂੰ, ਵਿਸ਼ਾਲ ਅਤੇ ਮੋਹਿਤ ਸ਼ਾਮਲ ਹਨ।

ਸੈਕਟਰ-20 ਪੁਲਿਸ ਥਾਣੇ ਦੇ ਜਾਂਚ ਅਧਿਕਾਰੀ ਸਤੀਸ਼ ਕੁਮਾਰ ਅਨੁਸਾਰ ਸ਼ਿਕਾਇਤ ਦੇ ਆਧਾਰ 'ਤੇ ਕੇਸ ਦਰਜ ਕਰ ਲਿਆ ਗਿਆ ਹੈ। ਮਾਮਲੇ ਦੀ ਜਾਂਚ ਜਾਰੀ ਹੈ ਅਤੇ ਜਲਦੀ ਹੀ ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕਰ ਲਿਆ ਜਾਵੇਗਾ।