'ਆਪਰੇਸ਼ਨ ਸਿੰਦੂਰ' ਦੇ ਇੱਕ ਸਾਲ ਪੂਰੇ ਹੋਣ 'ਤੇ ਪ੍ਰਧਾਨ ਮੰਤਰੀ ਮੋਦੀ ਨੇ 'X' 'ਤੇ ਬਦਲੀ DP, ਪਾਕਿਸਤਾਨ ਨੂੰ ਦਿੱਤਾ ਸਖ਼ਤ ਸੰਦੇਸ਼

ਕੀ ਹੈ ਆਪਰੇਸ਼ਨ ਸਿੰਦੂਰ?

ਇਹ ਮੁਹਿੰਮ ਅਪ੍ਰੈਲ 2025 ਵਿੱਚ ਪਹਿਲਗਾਮ ਵਿੱਚ ਹੋਏ ਇੱਕ ਵੱਡੇ ਅੱਤਵਾਦੀ ਹਮਲੇ ਤੋਂ ਬਾਅਦ ਇੱਕ ਨਿਰਣਾਇਕ ਅਤੇ ਹਮਲਾਵਰ ਫੌਜੀ ਜਵਾਬ ਵਜੋਂ 7 ਮਈ, 2025 ਨੂੰ ਸ਼ੁਰੂ ਕੀਤੀ ਗਈ ਸੀ।

ਇਸ ਦੇ ਤਹਿਤ ਭਾਰਤੀ ਹਥਿਆਰਬੰਦ ਸੈਨਾਵਾਂ ਨੇ ਬਹੁਤ ਹੀ ਤਾਲਮੇਲ ਵਾਲੇ ਅਤੇ ਸਟੀਕ ਹਮਲੇ ਕੀਤੇ, ਜਿਸ ਵਿੱਚ ਸਰਹੱਦ ਪਾਰ ਸਥਿਤ ਕਈ ਅੱਤਵਾਦੀ ਮੁੱਖ ਦਫਤਰਾਂ ਅਤੇ ਲਾਂਚਪੈਡਾਂ ਨੂੰ ਸਫਲਤਾਪੂਰਵਕ ਨਿਸ਼ਾਨਾ ਬਣਾ ਕੇ ਤਬਾਹ ਕਰ ਦਿੱਤਾ ਗਿਆ।

ਪਾਕਿਸਤਾਨ ਨੇ 88 ਘੰਟਿਆਂ ਵਿੱਚ ਹੀ ਟੇਕੇ ਗੋਡੇ

ਆਪਰੇਸ਼ਨ ਸਿੰਦੂਰ ਦੌਰਾਨ ਭਾਰਤੀ ਸੈਨਾ ਅਤੇ ਵਾਯੂ ਸੈਨਾ (ਏਅਰ ਫੋਰਸ) ਦੀ ਸਟੀਕਤਾ ਅਤੇ ਹਮਲਾਵਰਤਾ ਬੇਮਿਸਾਲ ਸੀ। ਇਸ ਆਪਰੇਸ਼ਨ ਦੀ ਸ਼ੁਰੂਆਤ 6 ਅਤੇ 7 ਮਈ ਦੀ ਅੱਧੀ ਰਾਤ ਨੂੰ ਹੋਈ, ਜਦੋਂ ਭਾਰਤੀ ਵਾਯੂ ਸੈਨਾ ਨੇ ਮਹਿਜ਼ 23 ਮਿੰਟਾਂ ਦੇ ਅੰਦਰ ਪਾਕਿਸਤਾਨ ਅਤੇ ਪੀਓਕੇ ਵਿੱਚ 9 ਅੱਤਵਾਦੀ ਟਿਕਾਣਿਆਂ ਨੂੰ ਮਲਬੇ ਵਿੱਚ ਤਬਦੀਲ ਕਰ ਦਿੱਤਾ, ਜਿਸ ਵਿੱਚ ਲਗਪਗ 100 ਅੱਤਵਾਦੀ ਮਾਰੇ ਗਏ। ਇਸ ਦੇ ਜਵਾਬ ਵਿੱਚ 8 ਮਈ ਨੂੰ ਪਾਕਿਸਤਾਨ ਨੇ ਗੁਜਰਾਤ ਤੋਂ ਲੈ ਕੇ ਕੱਛ ਤੱਕ 1,000 ਡਰੋਨਾਂ ਨਾਲ ਹਮਲਾ ਕਰਨ ਦੀ ਕੋਸ਼ਿਸ਼ ਕੀਤੀ ਸੀ।