- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
ਕੌਣ ਹਨ ਮੇਨਕਾ ਗੁਰੂਸਵਾਮੀ? ਬਣ ਸਕਦੇ ਹਨ ਦੇਸ਼ ਦੇ ਪਹਿਲੇ LGBTQ ਸੰਸਦ ਮੈਂਬਰ; TMC ਨੇ ਰਾਜ ਸਭਾ ਲਈ ਬਣਾਇਆ ਉਮੀਦਵਾਰ
TMC ਦੀ ਉਮੀਦਵਾਰ ਅਤੇ ਸੀਨੀਅਰ ਐਡਵੋਕੇਟ ਮੇਨਕਾ ਗੁਰੂਸਵਾਮੀ ਜੇਕਰ ਰਾਜ ਸਭਾ ਚੋਣ ਜਿੱਤ ਜਾਂਦੇ ਹਨ, ਤਾਂ ਉਹ ਦੇਸ਼ ਦੇ ਪਹਿਲੇ LGBTQ ਰਾਜ ਸਭਾ ਮੈਂਬਰ ਬਣ ਸਕਦੇ ਹਨ।
Posted By Sandip Kaur
Publish Date: Sat, 28 Feb 2026 12:22 PM (IST)
Updated Date: Sat, 28 Feb 2026 12:25 PM (IST)
ਡਿਜੀਟਲ ਡੈਸਕ, ਨਵੀਂ ਦਿੱਲੀ: ਤ੍ਰਿਣਮੂਲ ਕਾਂਗਰਸ (TMC) ਨੇ 16 ਮਾਰਚ ਨੂੰ ਹੋਣ ਵਾਲੀਆਂ ਰਾਜ ਸਭਾ ਚੋਣਾਂ ਲਈ ਸੀਨੀਅਰ ਐਡਵੋਕੇਟ ਮੇਨਕਾ ਗੁਰੂਸਵਾਮੀ ਨੂੰ ਨਾਮਜ਼ਦ ਕੀਤਾ ਹੈ।
TMC ਨੇ ਗੁਰੂਸਵਾਮੀ ਤੋਂ ਇਲਾਵਾ, ਮੰਤਰੀ ਬਾਬੁਲ ਸੁਪ੍ਰੀਓ, ਬੰਗਾਲ ਦੇ ਸਾਬਕਾ DGP ਰਾਜੀਵ ਕੁਮਾਰ ਅਤੇ ਅਦਾਕਾਰਾ ਕੋਇਲ ਮਲਿਕ ਨੂੰ ਉਮੀਦਵਾਰ ਬਣਾਇਆ ਹੈ।
TMC ਦੀ ਉਮੀਦਵਾਰ ਅਤੇ ਸੀਨੀਅਰ ਐਡਵੋਕੇਟ ਮੇਨਕਾ ਗੁਰੂਸਵਾਮੀ ਜੇਕਰ ਰਾਜ ਸਭਾ ਚੋਣ ਜਿੱਤ ਜਾਂਦੇ ਹਨ, ਤਾਂ ਉਹ ਦੇਸ਼ ਦੇ ਪਹਿਲੇ LGBTQ ਰਾਜ ਸਭਾ ਮੈਂਬਰ ਬਣ ਸਕਦੇ ਹਨ।
ਕੌਣ ਹਨ ਮੇਨਕਾ ਗੁਰੂਸਵਾਮੀ?
ਮੇਨਕਾ ਗੁਰੂਸਵਾਮੀ ਸੁਪਰੀਮ ਕੋਰਟ ਵਿੱਚ ਸੀਨੀਅਰ ਵਕੀਲ ਹਨ। ਉਨ੍ਹਾਂ ਨੇ ਇਤਿਹਾਸਕ ਸੰਵਿਧਾਨਕ ਕੇਸਾਂ ਵਿੱਚ ਬਹਿਸ ਕੀਤੀ ਸੀ, ਜਿਸ ਦੇ ਨਤੀਜੇ ਵਜੋਂ 2018 ਵਿੱਚ ਭਾਰਤੀ ਦੰਡਾਵਲੀ ਦੀ ਧਾਰਾ 377 ਦੇ ਰੱਦ ਹੋਣ ਤੋਂ ਬਾਅਦ ਭਾਰਤ ਵਿੱਚ ਸਮਲਿੰਗਤਾ (Homosexuality) ਨੂੰ ਅਪਰਾਧ ਦੀ ਸ਼੍ਰੇਣੀ ਤੋਂ ਬਾਹਰ ਕਰ ਦਿੱਤਾ ਗਿਆ ਸੀ।
ਮੇਨਕਾ ਗੁਰੂਸਵਾਮੀ ਨੇ 1997 ਵਿੱਚ ਭਾਰਤ ਦੇ ਸਾਬਕਾ ਅਟਾਰਨੀ ਜਨਰਲ ਅਸ਼ੋਕ ਦੇਸਾਈ ਤੋਂ ਕੰਮ ਸਿੱਖਣਾ ਸ਼ੁਰੂ ਕੀਤਾ। ਮੇਨਕਾ ਉਨ੍ਹਾਂ ਨੂੰ ਆਪਣਾ ਮੈਂਟਰ (ਗੁਰੂ) ਮੰਨਦੇ ਹਨ।
ਕਿਰਨ ਮਨਰਾਲ ਦੀ ਕਿਤਾਬ 'Rising: 30 Women Who Changed India' ਵਿੱਚ ਮੇਨਕਾ ਗੁਰੂਸਵਾਮੀ ਨੂੰ ਸ਼ਾਮਲ ਕੀਤਾ ਗਿਆ ਹੈ।
ਉਨ੍ਹਾਂ ਨੇ ਅਸ਼ੋਕ ਦੇਸਾਈ ਦੇ ਨਾਲ ਮੁੱਖ ਤੌਰ 'ਤੇ ਲਿਟੀਗੇਸ਼ਨ ਅਤੇ ਸੰਵਿਧਾਨਕ ਮਾਮਲਿਆਂ 'ਤੇ ਕੰਮ ਕੀਤਾ। ਕਰੀਬ ਡੇਢ ਸਾਲ ਕੰਮ ਸਿੱਖਣ ਤੋਂ ਬਾਅਦ ਮੇਨਕਾ ਅਗਲੀ ਪੜ੍ਹਾਈ ਲਈ ਆਕਸਫੋਰਡ ਚਲੇ ਗਏ।
ਆਕਸਫੋਰਡ ਤੋਂ ਗ੍ਰੈਜੂਏਸ਼ਨ ਅਤੇ ਹਾਰਵਰਡ ਤੋਂ ਮਾਸਟਰਜ਼
ਮੇਨਕਾ ਗੁਰੂਸਵਾਮੀ ਨੇ 2001 ਵਿੱਚ ਆਕਸਫੋਰਡ ਤੋਂ ਸਿਵਲ ਲਾਅ ਵਿੱਚ ਗ੍ਰੈਜੂਏਸ਼ਨ (BCL) ਅਤੇ ਹਾਰਵਰਡ ਤੋਂ ਲਾਅ ਵਿੱਚ ਮਾਸਟਰਜ਼ (LLM) ਦੀ ਪੜ੍ਹਾਈ ਪੂਰੀ ਕੀਤੀ।
ਇਸ ਤੋਂ ਬਾਅਦ ਉਨ੍ਹਾਂ ਨੇ ਨਿਊਯਾਰਕ ਵਿੱਚ 'ਡੇਵਿਸ ਪੋਲਕ ਐਂਡ ਵਾਰਡਵੈਲ' ਵਿੱਚ ਕੁਝ ਸਮੇਂ ਲਈ ਐਸੋਸੀਏਟ ਵਜੋਂ ਕੰਮ ਕੀਤਾ।
ਗੁਰੂਸਵਾਮੀ ਦੀ ਤਸਵੀਰ (Portait) ਆਕਸਫੋਰਡ ਯੂਨੀਵਰਸਿਟੀ ਦੇ 'ਰੋਡਸ ਹਾਊਸ' ਦੇ 'ਮਿਲਨਰ ਹਾਲ' ਵਿੱਚ ਲੱਗੀ ਹੋਈ ਹੈ, ਜਿਸ ਨਾਲ ਉਹ ਇਹ ਸਨਮਾਨ ਪਾਉਣ ਵਾਲੇ ਪਹਿਲੇ ਭਾਰਤੀ ਅਤੇ ਦੁਨੀਆ ਦੀ ਸਿਰਫ਼ ਦੂਜੀ ਮਹਿਲਾ ਬਣ ਗਏ ਹਨ।
ਪੜ੍ਹਾਈ ਪੂਰੀ ਕਰਨ ਤੋਂ ਬਾਅਦ ਉਹ ਭਾਰਤ ਪਰਤ ਆਏ ਅਤੇ ਨਵੀਂ ਦਿੱਲੀ ਵਿੱਚ ਵੱਸ ਗਏ। ਉਨ੍ਹਾਂ ਨੂੰ 'ਫੋਰਨ ਪਾਲਿਸੀ' ਮੈਗਜ਼ੀਨ ਦੀ 2019 ਦੀ '100 ਸਭ ਤੋਂ ਪ੍ਰਭਾਵਸ਼ਾਲੀ ਗਲੋਬਲ ਥਿੰਕਰਜ਼' ਦੀ ਸੂਚੀ ਅਤੇ 'ਟਾਈਮ' ਮੈਗਜ਼ੀਨ ਦੀ 2019 ਦੀ '100 ਸਭ ਤੋਂ ਪ੍ਰਭਾਵਸ਼ਾਲੀ ਲੋਕਾਂ' ਦੀ ਸੂਚੀ ਵਿੱਚ ਵੀ ਸ਼ਾਮਲ ਕੀਤਾ ਗਿਆ ਸੀ।
ਮੇਨਕਾ ਗੁਰੂਸਵਾਮੀ ਦਾ TMC ਨਾਲ ਕਨੈਕਸ਼ਨ
ਮੇਨਕਾ ਗੁਰੂਸਵਾਮੀ ਨੇ ਹਾਲ ਹੀ ਵਿੱਚ I-PAC ਦੇ ਦਫ਼ਤਰ ਵਿੱਚ ਇਨਫੋਰਸਮੈਂਟ ਡਾਇਰੈਕਟੋਰੇਟ (ED) ਦੀ ਤਲਾਸ਼ੀ ਨੂੰ ਚੁਣੌਤੀ ਦੇਣ ਵਾਲੀ ਅਦਾਲਤੀ ਕਾਰਵਾਈ ਵਿੱਚ TMC ਦੀ ਪ੍ਰਤੀਨਿਧਤਾ ਕੀਤੀ ਸੀ।
TMC ਨੇ ਹੁਣ ਮੇਨਕਾ ਗੁਰੂਸਵਾਮੀ ਨੂੰ ਰਾਜ ਸਭਾ ਚੋਣਾਂ ਲਈ ਆਪਣਾ ਉਮੀਦਵਾਰ ਬਣਾਇਆ ਹੈ। ਜੇਕਰ ਉਹ ਚੋਣ ਜਿੱਤ ਜਾਂਦੇ ਹਨ, ਤਾਂ ਉਹ ਭਾਰਤ ਦੇ ਪਹਿਲੇ LGBTQ ਰਾਜ ਸਭਾ ਸੰਸਦ ਮੈਂਬਰ ਹੋਣਗੇ।