70 ਫੁੱਟ ਡੂੰਘੇ ਬੋਰਵੈੱਲ 'ਚ ਡਿੱਗਿਆ ਤਿੰਨ ਸਾਲਾ ਬੱਚਾ, NDRF ਤੇ SDRF ਦੀਆਂ ਟੀਮਾਂ ਕਰ ਰਹੀਆਂ ਹਨ ਰੈਸਕਿਊ

ਡਿਜੀਟਲ ਡੈਸਕ, ਨਵੀਂ ਦਿੱਲੀ: ਉਜੈਨ ਦੀ ਬੜਨਗਰ ਤਹਿਸੀਲ ਦੇ ਝਲਾਰੀਆ ਵਿੱਚ ਖੇਡਦੇ ਸਮੇਂ 3 ਸਾਲ ਦਾ ਇੱਕ ਬੱਚਾ ਭਾਗੀਰਥ ਬੋਰਵੈੱਲ ਵਿੱਚ ਡਿੱਗ ਗਿਆ। ਇਹ ਘਟਨਾ ਵੀਰਵਾਰ ਰਾਤ ਕਰੀਬ 7 ਵਜੇ ਦੀ ਦੱਸੀ ਜਾ ਰਹੀ ਹੈ। ਬੱਚੇ ਨੂੰ ਬਾਹਰ ਕੱਢਣ ਲਈ ਰੈਸਕਿਊ ਆਪ੍ਰੇਸ਼ਨ ਜਾਰੀ ਹੈ। ਜਾਣਕਾਰੀ ਅਨੁਸਾਰ ਭੋਪਾਲ ਤੋਂ NDRF ਦੀ ਟੀਮ ਮੌਕੇ 'ਤੇ ਪਹੁੰਚ ਚੁੱਕੀ ਹੈ, ਜੋ ਹਰਦਾ, ਇੰਦੌਰ ਅਤੇ ਉਜੈਨ ਦੀਆਂ SDRF ਟੀਮਾਂ ਨਾਲ ਮਿਲ ਕੇ ਸਾਂਝੇ ਬਚਾਅ ਕਾਰਜ ਵਿੱਚ ਜੁਟੀ ਹੋਈ ਹੈ। ਜੇਸੀਬੀ (JCB) ਮਸ਼ੀਨਾਂ ਦੀ ਮਦਦ ਨਾਲ ਬਚਾਅ ਮੁਹਿੰਮ ਚਲਾਈ ਜਾ ਰਹੀ ਹੈ।

70 ਫੁੱਟ ਦੀ ਡੂੰਘਾਈ ਵਿੱਚ ਫਸਿਆ ਹੈ ਭਾਗੀਰਥ

NDRF ਦੀ ਟੀਮ ਅਨੁਸਾਰ ਭਾਗੀਰਥ ਕਰੀਬ 70 ਫੁੱਟ ਦੀ ਡੂੰਘਾਈ ਵਿੱਚ ਫਸਿਆ ਹੋਇਆ ਹੈ। ਉਸ ਤੱਕ ਪਹੁੰਚਣ ਲਈ ਬੋਰਵੈੱਲ ਦੇ ਬਰਾਬਰ ਇੱਕ ਹੋਰ ਟੋਇਆ ਪੁੱਟਿਆ ਜਾ ਰਿਹਾ ਹੈ। ਹੁਣ ਤੱਕ ਕਰੀਬ 40 ਫੁੱਟ ਖੁਦਾਈ ਹੋ ਚੁੱਕੀ ਹੈ, ਜਿਸ ਤੋਂ ਬਾਅਦ ਚੱਟਾਨਾਂ ਨੇ ਮੁਸ਼ਕਲਾਂ ਵਧਾ ਦਿੱਤੀਆਂ ਹਨ। ਬੋਰਵੈੱਲ ਵਿੱਚ ਕੈਮਰਾ ਪਾ ਕੇ ਬੱਚੇ ਦੀ ਹਾਲਤ 'ਤੇ ਨਜ਼ਰ ਰੱਖੀ ਜਾ ਰਹੀ ਹੈ ਅਤੇ ਉਸ ਨੂੰ ਆਕਸੀਜਨ ਦੀ ਸਪਲਾਈ ਵੀ ਦਿੱਤੀ ਜਾ ਰਹੀ ਹੈ। ਮੌਕੇ 'ਤੇ 2 ਐਂਬੂਲੈਂਸਾਂ ਵੀ ਤਾਇਨਾਤ ਕੀਤੀਆਂ ਗਈਆਂ ਹਨ।

ਮਾਂ ਨੇ ਬਚਾਉਣ ਦੀ ਕੋਸ਼ਿਸ਼ ਕੀਤੀ ਸੀ

ਭਾਗੀਰਥ ਦੇ ਪਿਤਾ ਪ੍ਰਵੀਨ ਦੇਵਾਸੀ, ਰਾਜਸਥਾਨ ਦੇ ਪਾਲੀ ਜ਼ਿਲ੍ਹੇ ਦੇ ਰਹਿਣ ਵਾਲੇ ਹਨ। ਇਨ੍ਹਾਂ ਦਾ ਪਰਿਵਾਰ ਪਿਛਲੇ ਤਿੰਨ ਦਿਨਾਂ ਤੋਂ ਇਲਾਕੇ ਵਿੱਚ ਭੇਡਾਂ ਚਰਾਉਣ ਲਈ ਰੁਕਿਆ ਹੋਇਆ ਸੀ। ਪਰਿਵਾਰਕ ਮੈਂਬਰਾਂ ਅਨੁਸਾਰ, ਬੱਚਾ ਕੰਧ ਦੇ ਕੋਲ ਖੇਡ ਰਿਹਾ ਸੀ। ਉਸ ਨੇ ਪੱਥਰ ਹਟਾ ਕੇ ਬੋਰਵੈੱਲ ਦਾ ਢੱਕਣ ਖੋਲ੍ਹਿਆ ਅਤੇ ਬਾਲਟੀ ਸਮਝ ਕੇ ਪੈਰ ਅੰਦਰ ਪਾ ਦਿੱਤਾ, ਜਿਸ ਕਾਰਨ ਉਹ ਸਿੱਧਾ ਅੰਦਰ ਜਾ ਡਿੱਗਿਆ। ਮਾਂ ਨੇ ਉਸ ਨੂੰ ਡਿੱਗਦੇ ਦੇਖਿਆ ਅਤੇ ਬਚਾਉਣ ਦੀ ਕੋਸ਼ਿਸ਼ ਵੀ ਕੀਤੀ, ਪਰ ਉਦੋਂ ਤੱਕ ਉਹ ਕਾਫੀ ਡੂੰਘਾਈ ਵਿੱਚ ਜਾ ਚੁੱਕਾ ਸੀ।