ਨਵਾਂ ਨਿਯਮ: ਹੁਣ ਆਂਡਿਆਂ 'ਤੇ ਲਿਖੀ ਹੋਵੇਗੀ 'ਐਕਸਪਾਇਰੀ ਡੇਟ', 1 ਅਪ੍ਰੈਲ ਤੋਂ ਸਖ਼ਤੀ ਨਾਲ ਲਾਗੂ ਹੋਣਗੇ ਹੁਕਮ

ਸਟੇਟ ਬਿਊਰੋ, ਜਾਗਰਣ, ਲਖਨਊ : ਉੱਤਰ ਪ੍ਰਦੇਸ਼ ਵਿਚ ਇਕ ਅਪ੍ਰੈਲ ਤੋਂ ਐਕਸਪਾਇਰੀ ਡੇਟ ਲਿਖੇ ਆਂਡਿਆਂ ਦੀ ਹੀ ਵਿਕਰੀ ਕੀਤੀ ਜਾਵੇਗੀ। ਪਹਿਲਾਂ ਤੋਂ ਬਣੇ ਇਸ ਨਿਯਮ ਦਾ ਹੁਣ ਸਖ਼ਤੀ ਨਾਲ ਪਾਲਣ ਕਰਵਾਇਆ ਜਾਵੇਗਾ। ਉਤਪਾਦਕਾਂ ਲਈ ਹਰ ਆਂਡੇ 'ਤੇ 'ਲੇਇੰਗ ਡੇਟ' (ਆਂਡਾ ਦੇਣ ਦੀ ਤਾਰੀਖ) ਅਤੇ 'ਐਕਸਪਾਇਰੀ ਡੇਟ' ਲਿਖਣਾ ਲਾਜ਼ਮੀ ਹੋਵੇਗਾ। ਇਸਦੀ ਪਾਲਣਾ ਲਈ ਪਸ਼ੂ ਪਾਲਣ ਵਿਭਾਗ, ਖੁਰਾਕ ਅਤੇ ਦਵਾਈ ਪ੍ਰਸ਼ਾਸਨ (ਐਫਐਸਡੀਏ) ਅਤੇ ਬਾਗਬਾਨੀ ਵਿਭਾਗ ਮਿਲ ਕੇ ਕਾਰਵਾਈ ਕਰਨਗੇ। ਆਂਡਿਆਂ ਨੂੰ ਕੋਲਡ ਸਟੋਰੇਜ ਵਿਚ ਰੱਖਣ ਦੇ ਮਿਆਰਾਂ ਦਾ ਵੀ ਸਖਤੀ ਨਾਲ ਪਾਲਣ ਕਰਵਾਇਆ ਜਾਵੇਗਾ। ਇਸ ਨਾਲ ਆਂਡਿਆਂ ਦੇ ਤਾਜ਼ਾ ਅਤੇ ਸੁਰੱਖਿਅਤ ਹੋਣ ਦਾ ਪਤਾ ਲਗਾਉਣਾ ਆਸਾਨ ਹੋ ਜਾਵੇਗਾ। ਖੁਰਾਕ ਸੁਰੱਖਿਆ ਅਤੇ ਮਿਆਰ ਅਥਾਰਟੀ ਅਨੁਸਾਰ, ਆਮ ਤਾਪਮਾਨ 30 ਡਿਗਰੀ ਸੈਲਸੀਅਸ (ਪੰਜ ਡਿਗਰੀ ਘੱਟ ਜਾਂ ਵੱਧ) 'ਤੇ ਆਂਡਿਆਂ ਦੀ ਵਰਤੋਂ 14 ਦਿਨਾਂ ਦੇ ਅੰਦਰ ਕਰ ਲਈ ਜਾਣੀ ਚਾਹੀਦੀ ਹੈ, ਜਦਕਿ, 2 ਤੋਂ 8 ਡਿਗਰੀ ਸੈਲਸੀਅਸ ਤਾਪਮਾਨ ਵਿਚ ਰੱਖੇ ਜਾਣ ਵਾਲੇ ਆਂਡਿਆਂ ਦਾ ਸੇਵਨ 35 ਦਿਨਾਂ ਦੇ ਅੰਦਰ ਕਰ ਲਿਆ ਜਾਣਾ ਚਾਹੀਦਾ ਹੈ।