320 ਕਿਲੋਮੀਟਰ ਦੀ ਰਫ਼ਤਾਰ, 508 ਕਿਲੋਮੀਟਰ ਦਾ ਸਫ਼ਰ: 15 ਅਗਸਤ 2027 ਨੂੰ ਪਟੜੀ 'ਤੇ ਦੌੜੇਗੀ ਦੇਸ਼ ਦੀ ਪਹਿਲੀ ਬੁਲੇਟ ਟ੍ਰੇਨ!

ਡਿਜੀਟਲ ਡੈਸਕ, ਨਵੀਂ ਦਿੱਲੀ: ਦੇਸ਼ ਵਿੱਚ ਬੁਲੇਟ ਟ੍ਰੇਨ ਚਲਾਉਣ ਦਾ ਸੁਪਨਾ ਜਲਦੀ ਹੀ ਪੂਰਾ ਹੋਣ ਜਾ ਰਿਹਾ ਹੈ। ਰੇਲ ਮੰਤਰੀ ਅਸ਼ਵਿਨੀ ਵੈਸ਼ਨਵ ਨੇ ਨਵੇਂ ਸਾਲ ਦੇ ਪਹਿਲੇ ਦਿਨ ਦੇਸ਼ ਵਾਸੀਆਂ ਨੂੰ ਵੱਡੀ ਖੁਸ਼ਖਬਰੀ ਦਿੱਤੀ ਹੈ। ਇਸ ਦੀ ਤਾਰੀਖ਼ ਦਾ ਐਲਾਨ ਕਰਦਿਆਂ ਉਨ੍ਹਾਂ ਦੱਸਿਆ ਕਿ 15 ਅਗਸਤ 2027 ਤੋਂ ਦੇਸ਼ ਵਿੱਚ ਬੁਲੇਟ ਟ੍ਰੇਨ ਦੌੜਨ ਲੱਗੇਗੀ।

ਉਨ੍ਹਾਂ ਨੇ ਮਜ਼ਾਕੀਆ ਲਹਿਜੇ ਵਿੱਚ ਕਿਹਾ ਕਿ ਅਗਲੇ ਸਾਲ ਦੇ ਸੁਤੰਤਰਤਾ ਦਿਵਸ ਦੇ ਮੌਕੇ 'ਤੇ ਬੁਲੇਟ ਟ੍ਰੇਨ ਦੀ ਸਵਾਰੀ ਕਰਨ ਲਈ ਅਜੇ ਤੋਂ ਹੀ ਟਿਕਟ ਖਰੀਦ ਲਓ। ਪਹਿਲੇ ਪੜਾਅ ਵਿੱਚ ਸੂਰਤ ਤੋਂ ਵਾਪੀ ਦੇ ਵਿਚਕਾਰ 100 ਕਿਲੋਮੀਟਰ ਦੀ ਦੂਰੀ ਵਿੱਚ ਇਹ ਟ੍ਰੇਨ ਚਲਾਈ ਜਾਵੇਗੀ।

ਬੁਲੇਟ ਟ੍ਰੇਨ ਵਿੱਚ ਸਫਰ ਦਾ ਸੁਪਨਾ ਦੇਖ ਰਿਹਾ ਹਰ ਭਾਰਤੀ ਇਸ ਦੇ ਚੱਲਣ ਦਾ ਬੇਸਬਰੀ ਨਾਲ ਇੰਤਜ਼ਾਰ ਕਰ ਰਿਹਾ ਹੈ। ਇਹ ਟ੍ਰੇਨ ਨਾ ਸਿਰਫ਼ ਮਾਣ ਦਾ ਪ੍ਰਤੀਕ ਹੈ, ਸਗੋਂ ਬਦਲਦੇ ਭਾਰਤ ਦੀ ਤਸਵੀਰ ਵੀ ਬਿਆਨ ਕਰੇਗੀ। ਦੱਸ ਦੇਈਏ ਕਿ ਦੇਸ਼ ਦੀ ਪਹਿਲੀ ਬੁਲੇਟ ਟ੍ਰੇਨ ਅਹਿਮਦਾਬਾਦ ਅਤੇ ਮੁੰਬਈ ਦੇ ਵਿਚਕਾਰ ਚਲਾਉਣ ਦੀ ਯੋਜਨਾ ਹੈ।

55 ਫ਼ੀਸਦੀ ਕੰਮ ਮੁਕੰਮਲ

ਪ੍ਰੋਜੈਕਟ ਪੂਰਾ ਹੋਣ ਤੋਂ ਬਾਅਦ ਦੋਵਾਂ ਮੈਟਰੋ ਸ਼ਹਿਰਾਂ ਵਿਚਕਾਰ 508 ਕਿਲੋਮੀਟਰ ਦਾ ਸਫ਼ਰ ਮਹਿਜ਼ ਦੋ ਘੰਟੇ 17 ਮਿੰਟ ਵਿੱਚ ਪੂਰਾ ਕੀਤਾ ਜਾ ਸਕੇਗਾ। ਟ੍ਰੇਨ ਪ੍ਰੋਜੈਕਟ ਦਾ ਲਗਪਗ 55 ਫ਼ੀਸਦੀ ਕੰਮ ਪੂਰਾ ਹੋ ਚੁੱਕਾ ਹੈ। ਪਿਛਲੇ ਸਾਲ ਨਵੰਬਰ ਵਿੱਚ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਸੂਰਤ ਵਿੱਚ ਇਸ ਪ੍ਰੋਜੈਕਟ ਦੀ ਸਮੀਖਿਆ ਵੀ ਕੀਤੀ ਸੀ।

ਪੂਰੇ ਰੂਟ ਵਿੱਚ 352 ਕਿਲੋਮੀਟਰ ਹਿੱਸਾ ਗੁਜਰਾਤ ਅਤੇ ਦਾਦਰਾ-ਨਗਰ ਹਵੇਲੀ ਦੇ ਵਿਚਕਾਰ ਹੈ ਅਤੇ 156 ਕਿਲੋਮੀਟਰ ਹਿੱਸਾ ਮਹਾਰਾਸ਼ਟਰ ਵਿੱਚ ਪੈਂਦਾ ਹੈ। ਇਸ ਪ੍ਰੋਜੈਕਟ ਨੂੰ ਨੈਸ਼ਨਲ ਹਾਈ-ਸਪੀਡ ਰੇਲ ਕਾਰਪੋਰੇਸ਼ਨ ਲਿਮਟਿਡ (NHSRCL) ਜਾਪਾਨ ਦੇ ਸਹਿਯੋਗ ਨਾਲ ਤਿਆਰ ਕਰਵਾ ਰਿਹਾ ਹੈ।

320 ਕਿਲੋਮੀਟਰ ਦੀ ਰਫ਼ਤਾਰ

ਇਹ ਟ੍ਰੇਨ ਜਾਪਾਨ ਦੀ ਸ਼ਿੰਕਾਨਸੇਨ (Shinkansen) ਹਾਈ-ਸਪੀਡ ਟ੍ਰੇਨ ਦੀ ਤਰਜ਼ 'ਤੇ ਚੱਲੇਗੀ। ਇਸ ਦੀ ਅਧਿਕਤਮ ਰਫ਼ਤਾਰ 320 ਕਿਲੋਮੀਟਰ ਪ੍ਰਤੀ ਘੰਟਾ ਹੋਵੇਗੀ। ਪੂਰੇ ਪ੍ਰੋਜੈਕਟ ਵਿੱਚ ਕੁੱਲ 12 ਸਟੇਸ਼ਨ ਹੋਣਗੇ, ਜਿਨ੍ਹਾਂ ਵਿੱਚ ਅਹਿਮਦਾਬਾਦ, ਵਡੋਦਰਾ, ਭੜੂਚ, ਸੂਰਤ, ਵਾਪੀ, ਠਾਣੇ ਅਤੇ ਮੁੰਬਈ ਪ੍ਰਮੁੱਖ ਹਨ। ਪ੍ਰੋਜੈਕਟ ਦਾ 85 ਫ਼ੀਸਦੀ ਹਿੱਸਾ ਯਾਨੀ ਲਗਪਗ 465 ਕਿਲੋਮੀਟਰ 'ਐਲੀਵੇਟਿਡ' (ਜ਼ਮੀਨ ਤੋਂ ਉੱਚਾ) ਹੋਵੇਗਾ, ਜਿਸ ਵਿੱਚੋਂ 326 ਕਿਲੋਮੀਟਰ ਦਾ ਕੰਮ ਪੂਰਾ ਹੋ ਚੁੱਕਾ ਹੈ।

ਜਾਪਾਨ ਪਹਿਲੇ ਨੰਬਰ 'ਤੇ, ਚੀਨ ਸਭ ਤੋਂ ਅੱਗੇ

ਚੀਨ, ਜਾਪਾਨ, ਸਪੇਨ, ਫਰਾਂਸ, ਜਰਮਨੀ, ਦੱਖਣੀ ਕੋਰੀਆ, ਇਟਲੀ ਅਤੇ ਤਾਈਵਾਨ ਵਿੱਚ ਬੁਲੇਟ ਟ੍ਰੇਨਾਂ ਚੱਲਦੀਆਂ ਹਨ। ਇਨ੍ਹਾਂ ਵਿੱਚੋਂ ਚੀਨ ਕੋਲ ਇਸ ਦਾ ਸਭ ਤੋਂ ਲੰਬਾ ਨੈੱਟਵਰਕ ਹੈ। ਜਾਪਾਨ ਨੇ 1964 ਵਿੱਚ ਸਭ ਤੋਂ ਪਹਿਲਾਂ ਬੁਲੇਟ ਟ੍ਰੇਨ ਦੀ ਸ਼ੁਰੂਆਤ ਕੀਤੀ ਸੀ। ਦੂਜੇ ਪਾਸੇ ਫਰਾਂਸ ਅਤੇ ਜਰਮਨੀ ਵੀ ਹਾਈ-ਸਪੀਡ ਰੇਲ ਦੇ ਮਾਮਲੇ ਵਿੱਚ ਪ੍ਰਮੁੱਖ ਦੇਸ਼ ਹਨ। ਅਮਰੀਕਾ, ਇੰਡੋਨੇਸ਼ੀਆ ਅਤੇ ਮੋਰੋਕੋ ਵਿੱਚ ਵੀ ਬੁਲੇਟ ਟ੍ਰੇਨ ਪ੍ਰੋਜੈਕਟਾਂ 'ਤੇ ਕੰਮ ਚੱਲ ਰਿਹਾ ਹੈ।

ਗੁਹਾਟੀ-ਕੋਲਕਾਤਾ ਵਿਚਕਾਰ ਚੱਲੇਗੀ ਪਹਿਲੀ ਸਲੀਪਰ ਵੰਦੇ ਭਾਰਤ

ਰੇਲ ਮੰਤਰੀ ਅਸ਼ਵਿਨੀ ਵੈਸ਼ਨਵ ਨੇ ਦੱਸਿਆ ਕਿ ਦੇਸ਼ ਦੀ ਪਹਿਲੀ ਸਲੀਪਰ ਵੰਦੇ ਭਾਰਤ ਟ੍ਰੇਨ ਦਾ ਟ੍ਰਾਇਲ ਰਨ (Trial Run) ਮੁਕੰਮਲ ਕਰ ਲਿਆ ਗਿਆ ਹੈ। ਇਹ ਟ੍ਰੇਨ 18-19 ਜਨਵਰੀ ਤੋਂ ਗੁਹਾਟੀ ਅਤੇ ਕੋਲਕਾਤਾ ਵਿਚਕਾਰ ਚਲਾਈ ਜਾ ਸਕਦੀ ਹੈ। ਟ੍ਰਾਇਲ ਰਨ ਦੌਰਾਨ ਟ੍ਰੇਨ ਨੇ 16 ਕੋਚਾਂ ਦੇ ਨਾਲ 182 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਵੱਧ ਤੋਂ ਵੱਧ ਰਫ਼ਤਾਰ ਫੜੀ। ਇਸ ਨੂੰ ਜਲਦੀ ਹੀ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਹਰੀ ਝੰਡੀ ਦਿਖਾ ਕੇ ਰਵਾਨਾ ਕਰਨਗੇ।

ਵੈਸ਼ਨਵ ਨੇ ਦੱਸਿਆ ਕਿ ਗੁਹਾਟੀ-ਹਾਵੜਾ ਵਿਚਕਾਰ ਸਲੀਪਰ ਵੰਦੇ ਭਾਰਤ ਦੇ ਥਰਡ ਏਸੀ (3rd AC) ਦਾ ਕਿਰਾਇਆ ਲਗਪਗ 2300 ਰੁਪਏ ਹੋ ਸਕਦਾ ਹੈ। ਉਨ੍ਹਾਂ ਕਿਹਾ ਕਿ ਜੇਕਰ ਹਵਾਈ ਕਿਰਾਏ ਦੀ ਗੱਲ ਕਰੀਏ ਤਾਂ ਉਹ 6 ਤੋਂ 8 ਹਜ਼ਾਰ ਦੇ ਵਿਚਕਾਰ ਹੁੰਦਾ ਹੈ ਅਤੇ ਕਦੇ-ਕਦੇ 10 ਹਜ਼ਾਰ ਤੱਕ ਵੀ ਪਹੁੰਚ ਜਾਂਦਾ ਹੈ।

ਸੈਕੰਡ ਏਸੀ (2nd AC) ਕੋਚ ਦਾ ਕਿਰਾਇਆ 3000 ਰੁਪਏ ਅਤੇ ਫਸਟ ਏਸੀ (1st AC) ਦਾ ਕਿਰਾਇਆ 3600 ਰੁਪਏ ਤੱਕ ਜਾ ਸਕਦਾ ਹੈ। ਉਨ੍ਹਾਂ ਦੱਸਿਆ ਕਿ ਸਾਲ ਦੇ ਅੰਤ ਤੱਕ ਦੇਸ਼ ਵਿੱਚ 12 ਸਲੀਪਰ ਵੰਦੇ ਭਾਰਤ ਟ੍ਰੇਨਾਂ ਚੱਲਣ ਲਈ ਤਿਆਰ ਹੋ ਜਾਣਗੀਆਂ।