ਜਿਸ ਨੂੰ ਸਮਝਿਆ 'ਨਣਾਨ', ਉਹ ਨਿਕਲੀ ਪਤੀ ਦੀ ਪਤਨੀ; ਸਾਫਟਵੇਅਰ ਇੰਜੀਨੀਅਰ ਕੁੜੀ ਨਾਲ 1.53 ਕਰੋੜ ਦੀ ਠੱਗੀ

ਡਿਜੀਟਲ ਡੈਸਕ, ਨਵੀਂ ਦਿੱਲੀ: ਬੇਂਗਲੁਰੂ ਵਿੱਚ ਇੱਕ ਮੈਟਰੀਮੋਨੀਅਲ (ਵਿਆਹ ਕਰਵਾਉਣ ਵਾਲੀ) ਵੈੱਬਸਾਈਟ ਰਾਹੀਂ ਧੋਖਾਧੜੀ ਦਾ ਵੱਡਾ ਮਾਮਲਾ ਸਾਹਮਣੇ ਆਇਆ ਹੈ। ਇੱਥੇ ਖ਼ੁਦ ਨੂੰ ਕਰੋੜਾਂ ਦਾ 'ਬਿਜ਼ਨੈੱਸ ਟਾਈਕੂਨ' ਦੱਸਣ ਵਾਲੇ ਵਿਜੇ ਰਾਜ ਗੌੜਾ ਨੇ ਵਿਆਹ ਦਾ ਝਾਂਸਾ ਦੇ ਕੇ 29 ਸਾਲਾ ਸਾਫਟਵੇਅਰ ਇੰਜੀਨੀਅਰ ਨਵਿਆ ਸ਼੍ਰੀ ਨਾਲ 1.53 ਕਰੋੜ ਰੁਪਏ ਦੀ ਧੋਖਾਧੜੀ ਕੀਤੀ।

ਮੁਲਜ਼ਮ ਵਿਜੇ ਰਾਜ ਗੌੜਾ ਪਹਿਲਾਂ ਹੀ ਵਿਆਹਿਆ ਹੋਇਆ ਹੈ। ਉਸ ਨੇ ਨਾ ਸਿਰਫ਼ ਵਿਆਹ ਦਾ ਝਾਂਸਾ ਦੇ ਕੇ ਪੀੜਤਾ ਅਤੇ ਉਸ ਦੇ ਪਰਿਵਾਰ ਤੋਂ ਮੋਟੀ ਰਕਮ ਨਿਵੇਸ਼ ਕਰਵਾਈ, ਸਗੋਂ ਆਪਣੀ ਪਤਨੀ ਨੂੰ 'ਭੈਣ' ਅਤੇ ਪਿਤਾ ਨੂੰ 'ਰਿਟਾਇਰਡ ਤਹਿਸੀਲਦਾਰ' ਦੱਸ ਕੇ ਇਸ ਪੂਰੀ ਸਾਜ਼ਿਸ਼ ਵਿੱਚ ਸ਼ਾਮਲ ਕੀਤਾ।

ਪੜ੍ਹੋ ਪੂਰਾ ਮਾਮਲਾ: ਮਾਰਚ 2024 ਵਿੱਚ ਵ੍ਹਾਈਟਫੀਲਡ ਦੀ ਰਹਿਣ ਵਾਲੀ ਨਵਿਆ ਸ਼੍ਰੀ ਦੀ ਮੁਲਾਕਾਤ ਇੱਕ ਮੈਟਰੀਮੋਨੀਅਲ ਸਰਵਿਸ ਰਾਹੀਂ ਵਿਜੇ ਰਾਜ ਗੌੜਾ ਉਰਫ਼ ਵਿਜੇ ਬੀ ਨਾਲ ਹੋਈ। ਵਿਜੇ ਨੇ ਕਥਿਤ ਤੌਰ 'ਤੇ ਖ਼ੁਦ ਨੂੰ 'ਵੀ.ਆਰ.ਜੀ. ਐਂਟਰਪ੍ਰਾਈਜ਼ਿਜ਼' ਦਾ ਮਾਲਕ ਦੱਸਿਆ ਅਤੇ ਬੇਂਗਲੁਰੂ ਦੇ ਪਾਸ਼ ਇਲਾਕਿਆਂ ਵਿੱਚ ਰਿਹਾਇਸ਼ੀ ਜਾਇਦਾਦਾਂ ਦਾ ਮਾਲਕ ਹੋਣ ਦਾ ਦਾਅਵਾ ਕੀਤਾ।

ਇੰਨਾ ਹੀ ਨਹੀਂ, ਉਸ ਨੇ 2019 ਦੇ ਇਨਫੋਰਸਮੈਂਟ ਡਾਇਰੈਕਟੋਰੇਟ (ED) ਕੇਸ ਨਾਲ ਸਬੰਧਤ ਜ਼ਮਾਨਤ ਆਰਡਰ ਦੀ ਇੱਕ ਕਾਪੀ ਵੀ ਸਾਂਝੀ ਕੀਤੀ। 715 ਕਰੋੜ ਰੁਪਏ ਦੀ ਜਾਇਦਾਦ ਦਾ ਦਾਅਵਾ ਕਰਕੇ ਉਸ ਨੇ ਨਵਿਆ ਨੂੰ ਭਰੋਸੇ ਵਿੱਚ ਲੈ ਲਿਆ। ਇਸ ਤੋਂ ਬਾਅਦ ਉਸ ਨੇ ਨਵਿਆ ਸ਼੍ਰੀ ਦੇ ਪਰਿਵਾਰ ਤੋਂ ਲੱਖਾਂ ਰੁਪਏ ਆਪਣੇ ਕਾਰੋਬਾਰ ਵਿੱਚ ਨਿਵੇਸ਼ ਕਰਵਾਏ ਅਤੇ ਉਨ੍ਹਾਂ ਤੋਂ ਕਰਜ਼ਾ ਵੀ ਲਿਆ।

ਇੰਝ ਸ਼ੁਰੂ ਕੀਤੀ ਠੱਗੀ: ਵਿਜੇ ਨੇ ਕਥਿਤ ਤੌਰ 'ਤੇ ਬੈਂਕ ਖਾਤੇ ਦੀ ਸਮੱਸਿਆ ਦਾ ਹਵਾਲਾ ਦਿੰਦੇ ਹੋਏ 4 ਅਪ੍ਰੈਲ ਨੂੰ ਨਵਿਆ ਤੋਂ 15,000 ਰੁਪਏ ਉਧਾਰ ਲਏ। ਇਸ ਤੋਂ ਬਾਅਦ, ਉਸ ਨੇ ਨਵਿਆ ਨੂੰ ਮਿਲ ਕੇ ਵਪਾਰ ਕਰਨ ਦੇ ਨਾਂ 'ਤੇ ਦੋਸਤਾਂ ਤੋਂ ਲੋਨ ਲੈਣ ਅਤੇ ਪੈਸੇ ਉਧਾਰ ਲੈਣ ਲਈ ਰਾਜ਼ੀ ਕਰ ਲਿਆ।

ਪਰਿਵਾਰ ਨਾਲ ਵੀ ਕਰਵਾਇਆ ਮੇਲ-ਜੋਲ: ਵਿਜੇ ਨੇ ਮੈਟਰੋ ਸਟੇਸ਼ਨ 'ਤੇ ਆਪਣੇ ਪਰਿਵਾਰਕ ਮੈਂਬਰਾਂ—ਪਿਤਾ ਕ੍ਰਿਸ਼ਣੱਪਾ, ਭੈਣ ਸੁਸ਼ੀਦੀਪਾ ਅਤੇ ਮਾਂ ਨੇਤਰਾਵਤੀ ਨਾਲ ਮੁਲਾਕਾਤ ਕਰਵਾਈ। ਇਸ ਦੌਰਾਨ ਉਸ ਨੇ ਆਪਣੀ ਪਤਨੀ ਦੀ ਪਛਾਣ ਭੈਣ ਵਜੋਂ ਕਰਵਾਈ। ਉਸ ਦੇ ਪਿਤਾ ਨੇ ਖ਼ੁਦ ਨੂੰ ਸੇਵਾਮੁਕਤ ਤਹਿਸੀਲਦਾਰ ਦੱਸਿਆ ਅਤੇ ਚੈੱਕ ਜਾਰੀ ਕਰਕੇ ਭੁਗਤਾਨ ਦਾ ਭਰੋਸਾ ਦਿੱਤਾ।

FIR ਅਨੁਸਾਰ, ਵਿਜੇ ਨੇ ਨਵਿਆ ਦੇ ਦੋਸਤਾਂ ਨੂੰ ਵੀ ਨਿਵੇਸ਼ ਕਰਨ ਲਈ ਉਕਸਾਇਆ, ਜਿਸ ਤੋਂ ਬਾਅਦ ਵੱਖ-ਵੱਖ ਦਿਨਾਂ ਵਿੱਚ ਕ੍ਰਮਵਾਰ 66 ਲੱਖ ਅਤੇ 23 ਲੱਖ ਰੁਪਏ ਦਾ ਨਿਵੇਸ਼ ਕੀਤਾ ਗਿਆ। ਦਸੰਬਰ 2024 ਅਤੇ ਫਰਵਰੀ 2025 ਦੇ ਵਿਚਕਾਰ, ਨਵਿਆ ਦੇ ਪਿਤਾ ਨੇ 10.5 ਲੱਖ ਅਤੇ ਉਸਦੀ ਮਾਂ ਨੇ ਆਪਣੇ ਰਿਟਾਇਰਮੈਂਟ ਫੰਡ ਵਿੱਚੋਂ 18 ਲੱਖ ਰੁਪਏ ਦਿੱਤੇ।

ਇੰਝ ਖੁੱਲ੍ਹੀ ਪੋਲ: ਜਦੋਂ ਨਵਿਆ ਕਰਜ਼ਾ ਵਾਪਸ ਲੈਣ ਲਈ ਉਸ ਦੇ ਘਰ ਪਹੁੰਚੀ ਤਾਂ ਸਾਰੀ ਸੱਚਾਈ ਸਾਹਮਣੇ ਆ ਗਈ। ਪਤਾ ਲੱਗਾ ਕਿ ਉਹ ਪਹਿਲਾਂ ਹੀ ਵਿਆਹਿਆ ਹੋਇਆ ਸੀ। ਜਿਸ ਔਰਤ ਨੂੰ ਉਹ ਆਪਣੀ 'ਨਣਾਨ' ਸਮਝ ਰਹੀ ਸੀ, ਉਹ ਅਸਲ ਵਿੱਚ ਉਸ ਦੇ ਪਤੀ ਦੀ ਪਤਨੀ ਨਿਕਲੀ।

ਮੁਲਜ਼ਮ ਵਿਜੇ ਦੀ ਪਤਨੀ ਸਮੇਤ ਉਸ ਦਾ ਪੂਰਾ ਪਰਿਵਾਰ ਇਸ ਧੋਖਾਧੜੀ ਵਿੱਚ ਸ਼ਾਮਲ ਸੀ। ਫਿਲਹਾਲ ਵਿਜੇ, ਉਸ ਦੇ ਪਿਤਾ ਅਤੇ ਪਤਨੀ ਦੇ ਖਿਲਾਫ ਧੋਖਾਧੜੀ, ਅਪਰਾਧਿਕ ਸਾਜ਼ਿਸ਼ ਅਤੇ ਧਮਕਾਉਣ ਦਾ ਮਾਮਲਾ ਦਰਜ ਕਰ ਲਿਆ ਗਿਆ ਹੈ ਅਤੇ ਅਗਲੇਰੀ ਜਾਂਚ ਜਾਰੀ ਹੈ।