LPG ਸੰਕਟ: ਮੁਸ਼ਕਲ 'ਚ ਰੈਸਟੋਰੈਂਟ, ਗੈਸ ਸਪਲਾਈ ਠੱਪ; ਕੀ ਬੰਦ ਹੋ ਜਾਣਗੇ 60% ਹੋਟਲ?

ਡਿਜੀਟਲ ਡੈਸਕ, ਨਵੀਂ ਦਿੱਲੀ: ਮੁੰਬਈ ਵਿੱਚ ਐਲ.ਪੀ.ਜੀ. ਗੈਸ ਦੀ ਸਪਲਾਈ ਪ੍ਰਭਾਵਿਤ ਹੋਣ ਕਾਰਨ ਰੈਸਟੋਰੈਂਟ ਮਾਲਕਾਂ ਦੀਆਂ ਮੁਸ਼ਕਲਾਂ ਲਗਾਤਾਰ ਵਧ ਰਹੀਆਂ ਹਨ। ਹੋਟਲ ਮਾਲਕਾਂ ਮੁਤਾਬਕ, ਕਰੀਬ 60% ਰੈਸਟੋਰੈਂਟ ਉਦੋਂ ਤੱਕ ਬੰਦ ਕਰਨ ਦੀ ਤਿਆਰੀ ਵਿੱਚ ਹਨ ਜਦੋਂ ਤੱਕ ਉਨ੍ਹਾਂ ਨੂੰ ਰੋਜ਼ਾਨਾ ਮਿਲਣ ਵਾਲੀ ਕਮਰਸ਼ੀਅਲ ਐਲ.ਪੀ.ਜੀ. ਦੀ ਸਪਲਾਈ ਮੁੜ ਸ਼ੁਰੂ ਨਹੀਂ ਹੋ ਜਾਂਦੀ।

ਬਾਕੀ ਰੈਸਟੋਰੈਂਟ ਫਿਲਹਾਲ ਸੀਮਤ ਮੈਨਿਊ (Limited Menu) ਨਾਲ ਕੰਮ ਕਰ ਰਹੇ ਹਨ, ਜਿਸ ਵਿੱਚ ਕਈ ਪਕਵਾਨ ਉਪਲਬਧ ਨਹੀਂ ਹਨ। ਹੋਟਲ ਮਾਲਕਾਂ ਦਾ ਕਹਿਣਾ ਹੈ ਕਿ ਗੈਸ ਦੀ ਕਮੀ ਕਾਰਨ ਉਨ੍ਹਾਂ ਨੂੰ ਆਪਣੇ ਮੈਨਿਊ ਅਤੇ ਕੰਮ ਦੇ ਸਮੇਂ ਵਿੱਚ ਕਟੌਤੀ ਕਰਨੀ ਪੈ ਰਹੀ ਹੈ।

ਕਈ ਰੈਸਟੋਰੈਂਟਾਂ ਨੇ ਮੈਨਿਊ ਘਟਾਇਆ

ਬੋਰਾਬਾਜ਼ਾਰ ਵਿੱਚ ਸੀ.ਐਸ.ਟੀ. (CST) ਟਰਮੀਨਸ ਦੇ ਸਾਹਮਣੇ ਸਥਿਤ 'ਪੰਚਮ ਪੂਰੀਵਾਲਾ' ਦੇ ਸੰਦੀਪ ਸ਼ਰਮਾ ਨੇ ਦੱਸਿਆ ਕਿ ਉਨ੍ਹਾਂ ਦੇ ਰੈਸਟੋਰੈਂਟ ਨੇ ਮੈਨਿਊ ਲਗਪਗ 70% ਤੱਕ ਘਟਾ ਦਿੱਤਾ ਹੈ ਅਤੇ ਕੰਮ ਦੇ ਸਮੇਂ ਵਿੱਚ ਵੀ ਕਟੌਤੀ ਕੀਤੀ ਹੈ। ਉਨ੍ਹਾਂ ਕਿਹਾ ਕਿ ਗਾਹਕਾਂ ਨੂੰ ਸੇਵਾ ਜਾਰੀ ਰੱਖਣ ਲਈ ਹੋਟਲ ਹੁਣ ਇੰਡਕਸ਼ਨ ਸਟੋਵ ਖਰੀਦਣ ਦੀ ਯੋਜਨਾ ਬਣਾ ਰਿਹਾ ਹੈ।

ਕਾਲਬਾਦੇਵੀ ਦੇ 'ਸ਼੍ਰੀ ਠਾਕਰ ਭੋਜਨਾਲਿਆ' ਦੇ ਕ੍ਰਿਸ਼ਨਾ ਪੁਰੋਹਿਤ ਨੇ ਦੱਸਿਆ ਕਿ ਗੈਸ ਦੀ ਜ਼ਿਆਦਾ ਖਪਤ ਵਾਲੇ ਪਕਵਾਨ ਜਿਵੇਂ ਹਲਵਾ, ਦਾਲ ਬਾਟੀ, ਪੂੜੀ ਪਰੋਸਣਾ ਫਿਲਹਾਲ ਬੰਦ ਕਰ ਦਿੱਤਾ ਗਿਆ ਹੈ।

ਹੋਟਲ ਉਦਯੋਗ 'ਤੇ ਵਧਦਾ ਸੰਕਟ

ਭਾਰਤੀ ਹੋਟਲ ਅਤੇ ਰੈਸਟੋਰੈਂਟ ਸੰਘ ਦੇ ਪ੍ਰਧਾਨ ਵਿਜੇ ਸ਼ੈੱਟੀ ਨੇ ਕਿਹਾ ਕਿ ਮੁੰਬਈ ਮਹਾਨਗਰ ਖੇਤਰ ਦੇ ਕਈ ਹੋਟਲ ਮਾਲਕਾਂ ਨੂੰ ਕੋਲਾ ਅਤੇ ਮਿੱਟੀ ਦਾ ਤੇਲ (ਕੈਰੋਸੀਨ) ਵੀ ਨਹੀਂ ਮਿਲ ਰਿਹਾ, ਜਿਸ ਕਾਰਨ ਚੂਲ੍ਹੇ ਚਲਾਉਣਾ ਮੁਸ਼ਕਲ ਹੋ ਗਿਆ ਹੈ। ਉਨ੍ਹਾਂ ਕਿਹਾ ਕਿ ਸ਼ਹਿਰ ਦੇ ਬਹੁਤ ਸਾਰੇ ਲੋਕ ਆਪਣੇ ਖਾਣੇ ਲਈ ਰੈਸਟੋਰੈਂਟਾਂ 'ਤੇ ਨਿਰਭਰ ਹਨ ਅਤੇ ਇਸ ਸੰਕਟ ਕਾਰਨ ਉਨ੍ਹਾਂ ਨੂੰ ਭਾਰੀ ਪਰੇਸ਼ਾਨੀ ਹੋ ਰਹੀ ਹੈ।