...'ਤੇ ਇਕ ਪਲ 'ਚ ਸਭ ਕੁਝ ਗਾਇਬ, ਜੰਮੂ ਕਸ਼ਮੀਰ ਦੇ ਕਿਸ਼ਤਵਾੜ 'ਚ ਬਰਫੀਲੇ ਤੂਫ਼ਾਨ ਦੀ ਖੌਫਨਾਕ ਵੀਡੀਓ ਆਈ ਸਾਹਮਣੇ

ਸ੍ਰੀਨਗਰ: ਜੰਮੂ-ਕਸ਼ਮੀਰ ਦੇ ਕਿਸ਼ਤਵਾੜ ਜ਼ਿਲ੍ਹੇ ਦੀ ਦੂਰ-ਦੁਰਾਡੇ ਸਥਿਤ ਵਾਰਵਾਨ ਘਾਟੀ ਵਿੱਚ ਮੰਗਲਵਾਰ ਨੂੰ ਇੱਕ ਵੱਡਾ ਬਰਫ਼ੀਲਾ ਤੂਫ਼ਾਨ (ਏਵਾਲਾਂਚ) ਆਇਆ। ਵਾਰਵਾਨ ਦੇ ਐੱਸ.ਐੱਚ.ਓ. ਜ਼ਹੀਰ ਇਕਬਾਲ ਨੇ ਦੱਸਿਆ ਕਿ ਇਸ ਘਟਨਾ ਵਿੱਚ ਕਿਸੇ ਦੇ ਜ਼ਖ਼ਮੀ ਹੋਣ ਜਾਂ ਜਾਇਦਾਦ ਦੇ ਨੁਕਸਾਨ ਦੀ ਕੋਈ ਖ਼ਬਰ ਨਹੀਂ ਹੈ। ਇਸ ਬਰਫ਼ੀਲੇ ਤੂਫ਼ਾਨ ਦੀ ਇੱਕ ਵੀਡੀਓ ਸੋਸ਼ਲ ਮੀਡੀਆ 'ਤੇ ਵੀ ਕਾਫ਼ੀ ਵਾਇਰਲ ਹੋ ਰਹੀ ਹੈ।

ਸੋਨਮਰਗ ਵਿੱਚ ਵੀ ਦਿਖਿਆ ਕੁਦਰਤ ਦਾ ਕਹਿਰ

ਵਾਰਵਾਨ ਦੀ ਘਟਨਾ ਤੋਂ ਇੱਕ ਦਿਨ ਪਹਿਲਾਂ ਕੇਂਦਰੀ ਕਸ਼ਮੀਰ ਦੇ ਸੋਨਮਰਗ ਇਲਾਕੇ ਵਿੱਚ ਵੀ ਤੇਜ਼ ਬਰਫ਼ੀਲਾ ਤੂਫ਼ਾਨ ਆਇਆ ਸੀ। ਇਸ ਕਾਰਨ ਘਰਾਂ ਅਤੇ ਗੱਡੀਆਂ 'ਤੇ ਬਰਫ਼ ਦੀ ਚਾਦਰ ਵਿਛ ਗਈ। ਸੋਨਮਰਗ ਦੇ ਇੱਕ ਹੋਟਲ ਮਾਲਕ ਨਜ਼ੀਰ ਅਹਿਮਦ ਸ਼ੇਖ ਦੇ ਹੋਟਲ ਵਿੱਚ ਲੱਗੇ ਸੀਸੀਟੀਵੀ ਫੁਟੇਜ ਵਿੱਚ ਇਸ ਤੂਫ਼ਾਨ ਦੀ ਭਿਆਨਕਤਾ ਨੂੰ ਸਾਫ਼ ਦੇਖਿਆ ਜਾ ਸਕਦਾ ਹੈ। ਇਸ ਘਟਨਾ ਤੋਂ ਬਾਅਦ ਸੈਲਾਨੀਆਂ ਵਿੱਚ ਕਾਫ਼ੀ ਦਹਿਸ਼ਤ ਫੈਲ ਗਈ।

ਹਾਲਾਂਕਿ, ਹੋਟਲ ਮਾਲਕ ਨਜ਼ੀਰ ਸ਼ੇਖ ਨੇ ਕਿਹਾ ਕਿ ਉਹ ਘਬਰਾਏ ਨਹੀਂ ਕਿਉਂਕਿ ਇੱਥੇ ਹਰ ਸਾਲ ਅਜਿਹੇ ਬਰਫ਼ੀਲੇ ਤੂਫ਼ਾਨ ਆਉਂਦੇ ਰਹਿੰਦੇ ਹਨ।

ਅੱਧਾ ਕਿਲੋਮੀਟਰ ਦੂਰ ਸੀ ਤੂਫ਼ਾਨ ਦਾ ਕੇਂਦਰ

ਸ਼ੇਖ ਨੇ ਦੱਸਿਆ ਕਿ ਮੁੱਖ ਤੂਫ਼ਾਨ ਸੋਨਮਰਗ ਪਿੰਡ ਤੋਂ ਲਗਭਗ ਅੱਧਾ ਕਿਲੋਮੀਟਰ ਦੂਰ ਦੂਜੀ ਪਾਸੇ ਆਇਆ ਸੀ। ਤੂਫ਼ਾਨ ਕਾਰਨ ਚੱਲੀਆਂ ਤੇਜ਼ ਹਵਾਵਾਂ ਨੇ ਨਰਮ ਬਰਫ਼ ਨੂੰ ਉਡਾਇਆ ਅਤੇ ਪੂਰੇ ਪਿੰਡ ਵਿੱਚ ਫੈਲਾ ਦਿੱਤਾ। ਇਸ ਕਾਰਨ ਅਜਿਹਾ ਲੱਗ ਰਿਹਾ ਸੀ ਜਿਵੇਂ ਤੂਫ਼ਾਨ ਸਿੱਧਾ ਪਿੰਡ ਵਿੱਚ ਹੀ ਆਇਆ ਹੋਵੇ। ਜ਼ਿਕਰਯੋਗ ਹੈ ਕਿ ਇਸ ਇਲਾਕੇ ਵਿੱਚ ਵੱਡੀ ਗਿਣਤੀ ਵਿੱਚ ਹੋਟਲ, ਰੈਸਟੋਰੈਂਟ ਅਤੇ ਦੁਕਾਨਾਂ ਮੌਜੂਦ ਹਨ।

ਪ੍ਰਸ਼ਾਸਨ ਵੱਲੋਂ ਲੋਕਾਂ ਨੂੰ ਸਲਾਹ

ਐੱਸ.ਐੱਚ.ਓ. ਜ਼ਹੀਰ ਇਕਬਾਲ ਨੇ ਖ਼ਰਾਬ ਮੌਸਮ ਦੇ ਮੱਦੇਨਜ਼ਰ ਲੋਕਾਂ ਨੂੰ ਬਰਫ਼ੀਲੇ ਤੂਫ਼ਾਨ ਵਾਲੇ ਇਲਾਕਿਆਂ ਤੋਂ ਦੂਰ ਰਹਿਣ ਦੀ ਸਲਾਹ ਦਿੱਤੀ ਹੈ। ਇਸ ਦੇ ਨਾਲ ਹੀ ਬਰਫ਼ੀਲੇ ਰਸਤਿਆਂ 'ਤੇ ਯਾਤਰਾ ਕਰਨ ਦੀ ਮਨਾਹੀ ਕੀਤੀ ਗਈ ਹੈ ਅਤੇ ਲੋਕਾਂ ਨੂੰ ਵਾਹਨ ਬਹੁਤ ਸਾਵਧਾਨੀ ਨਾਲ ਚਲਾਉਣ ਦੀ ਅਪੀਲ ਕੀਤੀ ਗਈ ਹੈ।