ਜਬਲਪੁਰ ਹਾਦਸਾ: 'ਲਾਈਫ ਜੈਕੇਟ ਜ਼ਰੂਰੀ ਨਹੀਂ', ਮੱਧ ਪ੍ਰਦੇਸ਼ ਟੂਰਿਜ਼ਮ ਕਾਰਪੋਰੇਸ਼ਨ ਦੇ ਅਧਿਕਾਰੀ ਦੇ ਬਿਆਨ 'ਤੇ ਵਿਵਾਦ

100 ਸੀਟਾਂ ਵਾਲੀ ਇਹ ਕਿਸ਼ਤੀ ਮੌਸਮ ਵਿਭਾਗ ਦੀ ਚਿਤਾਵਨੀ ਦੇ ਬਾਵਜੂਦ ਰਵਾਨਾ ਹੋਈ ਸੀ ਅਤੇ 30 ਅਪ੍ਰੈਲ ਨੂੰ ਪਲਟ ਗਈ। ਇਸ ਘਟਨਾ ਨੇ ਆਪਣੇ ਪਿੱਛੇ ਬੇਜਾਨ ਸਰੀਰ, ਸੋਗ ਵਿੱਚ ਡੁੱਬੇ ਪਰਿਵਾਰ ਅਤੇ ਕਈ ਅਣਸੁਲਝੇ ਸਵਾਲ ਛੱਡ ਦਿੱਤੇ ਹਨ।

'ਲੋਕਾਂ ਦੀ ਜਾਨ ਬਚਾਉਣ ਲਈ ਕੋਸ਼ਿਸ਼ ਕੀਤੀ'

ਕਰੂਜ਼ ਆਪਰੇਟਰਾਂ 'ਤੇ ਦੋਸ਼ ਹੈ ਕਿ ਉਨ੍ਹਾਂ ਨੇ ਸੁਰੱਖਿਆ ਨਿਯਮਾਂ ਨੂੰ ਅਣਗੌਲਿਆ ਕੀਤਾ, ਜਿਸ ਕਾਰਨ ਜਬਲਪੁਰ ਵਿੱਚ ਕਿਸ਼ਤੀ ਪਲਟਣ ਦੀ ਦੁਖਦਾਈ ਘਟਨਾ ਵਾਪਰੀ। ਜਦੋਂ ਉਨ੍ਹਾਂ ਤੋਂ ਪੁੱਛਿਆ ਗਿਆ ਕਿ ਕੀ ਡੂੰਘੇ ਪਾਣੀ ਵਿੱਚ ਯਾਤਰੀਆਂ ਦੀ ਸੁਰੱਖਿਆ ਯਕੀਨੀ ਬਣਾਉਣ ਲਈ ਲੋੜੀਂਦੇ ਪ੍ਰਬੰਧ ਸਨ, ਤਾਂ ਉਨ੍ਹਾਂ ਕਿਹਾ ਕਿ ਬਚਾਅ ਕਾਰਜਾਂ ਲਈ 'ਲਾਈਫ-ਬੋਟਸ' ਮੌਜੂਦ ਸਨ।

ਜਦੋਂ ਪੁੱਛਿਆ ਗਿਆ ਕਿ ਕੀ ਕਰੂਜ਼ ਡੁੱਬਣ ਦੌਰਾਨ ਉਹ ਲਾਈਫ-ਬੋਟਸ ਲੋਕਾਂ ਦੀ ਜਾਨ ਬਚਾਉਣ ਵਿੱਚ ਨਾਕਾਮ ਰਹੀਆਂ, ਤਾਂ ਨਿਗਮ ਨੇ ਕਿਹਾ, "ਮੌਸਮ ਅਚਾਨਕ ਬਦਲ ਗਿਆ, ਜਿਸ ਕਾਰਨ ਕਿਸੇ ਨੂੰ ਵੀ ਕੁਝ ਸੋਚਣ-ਸਮਝਣ ਜਾਂ ਪ੍ਰਤੀਕਿਰਿਆ ਦੇਣ ਦਾ ਮੌਕਾ ਨਹੀਂ ਮਿਲਿਆ। ਲਾਈਫ-ਬੋਟਸ ਭੇਜੀਆਂ ਗਈਆਂ ਸਨ, ਪਰ ਉਦੋਂ ਤੱਕ ਜਹਾਜ਼ ਪਹਿਲਾਂ ਹੀ ਡੁੱਬ ਚੁੱਕਾ ਸੀ। ਫਿਰ ਵੀ ਅਸੀਂ ਲੋਕਾਂ ਦੀ ਜਾਨ ਬਚਾਉਣ ਲਈ ਜੀ-ਤੋੜ ਕੋਸ਼ਿਸ਼ ਕੀਤੀ।"

'ਹਮੇਸ਼ਾ ਨਹੀਂ ਦੇਖ ਪਾਉਂਦੇ ਮੌਸਮ ਵਿਭਾਗ ਦੀ ਚਿਤਾਵਨੀ'

ਮੌਸਮ ਦੇ ਅਲਰਟ ਬਾਰੇ ਉਨ੍ਹਾਂ ਕਿਹਾ, "ਮੌਸਮ ਵਿਭਾਗ ਦੀਆਂ ਚਿਤਾਵਨੀਆਂ ਆਸਾਨੀ ਨਾਲ ਉਪਲਬਧ ਨਹੀਂ ਹੁੰਦੀਆਂ। ਅਸੀਂ ਉਨ੍ਹਾਂ ਨੂੰ ਹਮੇਸ਼ਾ ਦੇਖ ਨਹੀਂ ਪਾਉਂਦੇ।" ਹਾਲਾਂਕਿ, ਜਦੋਂ ਉਨ੍ਹਾਂ ਤੋਂ ਵੱਖ-ਵੱਖ ਸਾਈਜ਼ ਦੀਆਂ ਲਾਈਫ ਜੈਕਟਾਂ ਦੀ ਕਮੀ ਬਾਰੇ ਪੁੱਛਿਆ ਗਿਆ, ਤਾਂ ਨਿਗਮ ਨੇ ਆਪਣੀਆਂ ਮਜਬੂਰੀਆਂ ਸਵੀਕਾਰ ਕਰ ਲਈਆਂ।

ਉਨ੍ਹਾਂ ਕਿਹਾ, "ਸਾਡੇ ਕੋਲ ਸਟੈਂਡਰਡ ਛੋਟੇ, ਮੀਡੀਅਮ ਅਤੇ ਵੱਡੇ ਸਾਈਜ਼ ਹੁੰਦੇ ਹਨ, ਪਰ ਭਾਰ ਵਿੱਚ ਜ਼ਿਆਦਾ ਫਰਕ ਹੋਣ 'ਤੇ (ਜਿਵੇਂ 100 ਕਿੱਲੋ ਬਨਾਮ 50 ਕਿੱਲੋ) ਅਸੀਂ ਸਹੀ ਜੈਕਟ ਨਹੀਂ ਦੇ ਪਾਉਂਦੇ।" ਉਨ੍ਹਾਂ ਅੱਗੇ ਕਿਹਾ ਕਿ ਅਗਲੀ ਵਾਰ ਜਦੋਂ ਲਾਈਫ ਜੈਕਟ ਖਰੀਦਣ ਲਈ ਟੈਂਡਰ ਕੱਢਿਆ ਜਾਵੇਗਾ, ਤਾਂ ਉਸ ਵਿੱਚ ਵੱਖ-ਵੱਖ ਤਰ੍ਹਾਂ ਦੇ ਵਿਕਲਪ ਸ਼ਾਮਲ ਕੀਤੇ ਜਾਣਗੇ।