ਇਰਾਕ ਜਹਾਜ਼ ਹਾਦਸਾ: ਪੈਂਟਾਗਨ ਨੇ ਹਾਦਸੇ 'ਚ ਮਾਰੇ ਗਏ 6 ਅਮਰੀਕੀ ਹਵਾਈ ਫ਼ੌਜੀਆਂ ਦੀ ਕੀਤੀ ਪਛਾਣ

ਡਿਜੀਟਲ ਡੈਸਕ, ਨਵੀਂ ਦਿੱਲੀ : ਅਮਰੀਕੀ ਰੱਖਿਆ ਮੰਤਰਾਲੇ (ਪੈਂਟਾਗਨ) ਨੇ ਜਹਾਜ਼ ਹਾਦਸੇ 'ਚ ਜਾਨ ਗੁਆਉਣ ਵਾਲੇ ਛੇ ਅਮਰੀਕੀ ਹਵਾਈ ਫ਼ੌਜ ਦੇ ਮੁਲਾਜ਼ਮਾਂ ਦੀ ਅਧਿਕਾਰਤ ਪਛਾਣ ਸਾਂਝੀ ਕੀਤੀ ਹੈ। ਇਹ ਸੈਨਿਕ ਕੇਸੀ-135 (KC-135) ਸਟ੍ਰੈਟੋਟੈਂਕਰ ਈਂਧਨ ਭਰਨ ਵਾਲੇ ਜਹਾਜ਼ 'ਚ ਸਵਾਰ ਸਨ।

ਦਰਅਸਲ, ਅਮਰੀਕੀ ਰੱਖਿਆ ਮੰਤਰਾਲੇ ਨੇ ਦੱਸਿਆ ਕਿ ਵੀਰਵਾਰ ਨੂੰ ਪੱਛਮੀ ਇਰਾਕ 'ਚ ਇਕ ਜਹਾਜ਼ ਹਾਦਸੇ 'ਚ ਇਨ੍ਹਾਂ ਦੀ ਮੌਤ ਹੋ ਗਈ। ਇਨ੍ਹਾਂ ਛੇ ਅਮਰੀਕੀ ਹਵਾਈ ਫ਼ੌਜ ਦੇ ਜਵਾਨਾਂ 'ਚ ਇਕ ਸਕੁਐਡਰਨ ਆਪਰੇਸ਼ਨ ਮੁਖੀ ਸ਼ਾਮਲ ਸੀ, ਜਿਸ ਨੇ ਹਾਲ ਹੀ 'ਚ ਪਾਇਲਟ ਵਜੋਂ ਆਪਣੀ ਯੋਗਤਾ ਪੂਰੀ ਕੀਤੀ ਸੀ। ਪੈਂਟਾਗਨ ਨੇ ਸ਼ਨੀਵਾਰ ਨੂੰ ਜਹਾਜ਼ ਚਾਲਕਾਂ ਦੀ ਪਛਾਣ ਕੀਤੀ, ਜਦੋਂ ਕਿ ਹਾਦਸੇ ਦੀ ਜਾਂਚ ਅਜੇ ਵੀ ਜਾਰੀ ਹੈ।

ਇਹ ਹਨ ਹਵਾਈ ਫੌਜੀ

33 ਸਾਲਾ ਮੇਜਰ ਜੌਨ ਏ ਕਲਿਨਰ, ਜੋ ਔਬਰਨ, ਅਲਾਬਾਮਾ ਦੇ ਰਹਿਣ ਵਾਲੇ ਹਨ।

31 ਸਾਲਾ ਕੈਪਟਨ ਏਰੀਆਨਾ ਜੀ. ਸੈਵਿਨੋ, ਜੋ ਕੋਵਿੰਗਟਨ, ਵਾਸ਼ਿੰਗਟਨ ਦੀ ਰਹਿਣ ਵਾਲੀ ਹੈ।

34 ਸਾਲਾ ਟੈਕਨੀਕਲ ਸਾਰਜੈਂਟ ਐਸ਼ਲੇ ਬੀ. ਪਰੂਇਟ, ਜੋ ਬਾਰਡਸਟਾਊਨ, ਕੈਂਟਕੀ ਦੀ ਰਹਿਣ ਵਾਲੀ ਹੈ।

38 ਸਾਲਾ ਕੈਪਟਨ ਸੇਥ ਆਰ. ਕੋਵਲ, ਜੋ ਮੂਰਸਵਿਲ, ਇੰਡੀਆਨਾ ਦੇ ਰਹਿਣ ਵਾਲੇ ਹਨ।

30 ਸਾਲਾ ਕੈਪਟਨ ਕਰਟਿਸ ਜੇ. ਐਂਗਸਟ, ਜੋ ਵਿਲਮਿੰਗਟਨ, ਓਹਾਇਓ ਦੇ ਰਹਿਣ ਵਾਲੇ ਹਨ।

28 ਸਾਲਾ ਟੈਕਨੀਕਲ ਸਾਰਜੈਂਟ ਟਾਈਲਰ ਐਚ. ਸਿਮੰਸ, ਜੋ ਕੋਲੰਬਸ, ਓਹਾਇਓ ਦੇ ਰਹਿਣ ਵਾਲੇ ਹਨ।

ਹੁਣ ਤਕ 13 ਅਮਰੀਕੀ ਫੌਜੀਆਂ ਦੀ ਮੌਤ

ਚਾਲਕ ਦਲ ਦੇ ਮੈਂਬਰਾਂ ਦੀ ਮੌਤ ਦੇ ਨਾਲ ਹੀ ਈਰਾਨ ਨਾਲ ਜਾਰੀ ਤਣਾਅ ਦੌਰਾਨ ਮਾਰੇ ਗਏ ਅਮਰੀਕੀ ਫ਼ੌਜੀਆਂ ਦੀ ਗਿਣਤੀ 13 ਹੋ ਗਈ ਹੈ। ਅਲਾਬਾਮਾ ਰਾਜ ਦੀ ਗਵਰਨਰ ਕੇ ਇਵੇ ਨੇ X (ਪਹਿਲਾਂ ਟਵਿੱਟਰ) 'ਤੇ ਮਾਰੇ ਗਏ ਫ਼ੌਜੀਆਂ ਬਾਰੇ ਕਿਹਾ, “ਉਹ ਨਾ ਸਿਰਫ਼ ਸ਼ਾਨਦਾਰ ਹਵਾਈ ਫ਼ੌਜੀ ਸਨ, ਸਗੋਂ ਸਾਡੇ ਗੁਆਂਢੀ – ਸਾਡੇ ਸਾਥੀ ਅਲਾਬਾਮਾ ਵਾਸੀ ਵੀ ਸਨ। ਉਨ੍ਹਾਂ ਦੀ ਅਤੇ ਉਨ੍ਹਾਂ ਦੇ ਪਰਿਵਾਰਾਂ ਦੀ ਸੇਵਾ ਨੂੰ ਕਦੇ ਵੀ ਭੁਲਾਇਆ ਨਹੀਂ ਜਾਣਾ ਚਾਹੀਦਾ।”

ਓਹਾਇਓ ਦੇ ਗਵਰਨਰ ਮਾਈਕ ਡੇਵਾਈਨ ਨੇ ਕਿਹਾ ਕਿ ਉਹ ਸੂਬੇ ਦੇ ਬਾਕੀ ਲੋਕਾਂ ਦੇ ਨਾਲ-ਨਾਲ ਸਾਰੇ ਹਵਾਈ ਫ਼ੌਜੀਆਂ ਦੇ ਦੇਹਾਂਤ 'ਤੇ ਸੋਗ ਪ੍ਰਗਟ ਕਰ ਰਹੇ ਹਨ, ਜਿਨ੍ਹਾਂ ਵਿਚ ਓਹਾਇਓ ਏਅਰ ਨੈਸ਼ਨਲ ਗਾਰਡ ਦੇ ਵਿਸ਼ੇਸ਼ ਮੈਂਬਰ ਵੀ ਸ਼ਾਮਲ ਹਨ।

ਈਰਾਨ ਦੇ ਹਮਲੇ 'ਚ ਨਹੀਂ ਹੋਇਆ ਹਾਦਸਾ

ਅਮਰੀਕੀ ਫ਼ੌਜ ਨੇ ਦੱਸਿਆ ਕਿ ਚਾਲਕ ਦਲ ਦੇ ਮੈਂਬਰ ਅਮਰੀਕੀ ਹਵਾਈ ਫ਼ੌਜ ਦੇ ਕੇਸੀ-135 ਸਟ੍ਰੈਟੋਟੈਂਕਰ ਈਂਧਨ ਭਰਨ ਵਾਲੇ ਜਹਾਜ਼ 'ਚ ਸਵਾਰ ਸਨ, ਜਦੋਂ ਵੀਰਵਾਰ ਨੂੰ ਪੱਛਮੀ ਇਰਾਕ 'ਚ ਇਹ ਜਹਾਜ਼ ਹਾਦਸਾਗ੍ਰਸਤ ਹੋ ਗਿਆ। ਫੌਜ ਨੇ ਇਹ ਵੀ ਕਿਹਾ ਕਿ ਇਹ ਘਟਨਾ "ਦੁਸ਼ਮਣ ਦੀ ਗੋਲੀਬਾਰੀ ਜਾਂ ਦੋਸਤਾਨਾ ਗੋਲੀਬਾਰੀ (friendly fire) ਕਾਰਨ ਨਹੀਂ ਹੋਈ।"