ਹੁਣ ਘਰ ਖਰੀਦਣਾ ਹੋਇਆ ਮਹਿੰਗਾ; ਸਰਕਾਰ ਨੇ ਅਫੋਰਡੇਬਲ ਫਲੈਟਾਂ ਦੀਆਂ ਕੀਮਤਾਂ 'ਚ 12% ਤੱਕ ਕੀਤਾ ਵਾਧਾ

ਰਾਜ ਬਿਊਰੋ, ਚੰਡੀਗੜ੍ਹ: ਹਰਿਆਣਾ ਦੇ ਸ਼ਹਿਰਾਂ ਵਿੱਚ ਹੁਣ ਲੋਕਾਂ ਨੂੰ ਅਫੋਰਡੇਬਲ ਗਰੁੱਪ ਹਾਊਸਿੰਗ ਪ੍ਰੋਜੈਕਟਾਂ ਵਿੱਚ ਫਲੈਟ ਲੈਣ ਲਈ ਵੱਧ ਕੀਮਤ ਦੇਣੀ ਪਵੇਗੀ। ਸੂਬਾ ਸਰਕਾਰ ਨੇ ਅਫੋਰਡੇਬਲ ਹਾਊਸਿੰਗ ਪਾਲਿਸੀ ਵਿੱਚ ਬਦਲਾਅ ਕਰਦਿਆਂ ਫਲੈਟਾਂ ਦੀਆਂ ਦਰਾਂ ਵਿੱਚ 10 ਤੋਂ 12 ਫੀਸਦੀ ਤੱਕ ਵਾਧਾ ਕਰ ਦਿੱਤਾ ਹੈ।

ਨਗਰ ਅਤੇ ਗ੍ਰਾਮ ਯੋਜਨਾਬੰਦੀ ਵਿਭਾਗ ਦੇ ਵਧੀਕ ਮੁੱਖ ਸਕੱਤਰ ਅਨੁਰਾਗ ਅਗਰਵਾਲ ਨੇ ਕੀਮਤਾਂ ਵਿੱਚ ਵਾਧੇ ਦਾ ਨੋਟੀਫਿਕੇਸ਼ਨ ਜਾਰੀ ਕਰ ਦਿੱਤਾ ਹੈ। ਨਵੀਆਂ ਦਰਾਂ ਤੁਰੰਤ ਪ੍ਰਭਾਵ ਨਾਲ ਲਾਗੂ ਹੋਣਗੀਆਂ। ਗੁਰੂਗ੍ਰਾਮ ਵਿੱਚ ਫਲੈਟਾਂ ਦੀ ਵੱਧ ਤੋਂ ਵੱਧ ਅਲਾਟਮੈਂਟ ਦਰ 5000 ਰੁਪਏ ਤੋਂ ਵਧਾ ਕੇ 5575 ਰੁਪਏ ਪ੍ਰਤੀ ਵਰਗ ਫੁੱਟ ਕਰ ਦਿੱਤੀ ਗਈ ਹੈ।

ਬਾਲਕਨੀ ਲਈ ਵੱਖਰੇ ਤੌਰ 'ਤੇ 1300 ਰੁਪਏ ਪ੍ਰਤੀ ਵਰਗ ਫੁੱਟ (ਅਧਿਕਤਮ 1.30 ਲੱਖ ਰੁਪਏ) ਤੱਕ ਵਾਧੂ ਰਾਸ਼ੀ ਦੇਣੀ ਪਵੇਗੀ। ਇਹ ਨਿਯਮ ਸਾਰੇ ਸ਼ਹਿਰਾਂ ਵਿੱਚ ਬਰਾਬਰ ਲਾਗੂ ਰਹੇਗਾ। ਫਰੀਦਾਬਾਦ ਅਤੇ ਸੋਹਾਣਾ ਵਿੱਚ ਪਹਿਲਾਂ 5000 ਰੁਪਏ ਪ੍ਰਤੀ ਵਰਗ ਫੁੱਟ ਦੀ ਦਰ ਸੀ, ਜਿਸ ਨੂੰ ਹੁਣ 5450 ਰੁਪਏ ਪ੍ਰਤੀ ਵਰਗ ਫੁੱਟ ਕਰ ਦਿੱਤਾ ਗਿਆ ਹੈ।

ਪੰਚਕੂਲਾ ਅਤੇ ਹੋਰ ਹਾਈ ਤੇ ਮੀਡੀਅਮ ਪੋਟੈਂਸ਼ੀਅਲ ਟਾਊਨ ਵਿੱਚ ਦਰਾਂ 4500 ਤੋਂ ਵਧਾ ਕੇ 5000 ਰੁਪਏ ਪ੍ਰਤੀ ਵਰਗ ਫੁੱਟ ਅਤੇ ਲੋ-ਪੋਟੈਂਸ਼ੀਅਲ ਟਾਊਨ ਵਿੱਚ ਦਰਾਂ 3800 ਤੋਂ ਵਧਾ ਕੇ 4250 ਰੁਪਏ ਪ੍ਰਤੀ ਵਰਗ ਫੁੱਟ ਤੈਅ ਕੀਤੀਆਂ ਗਈਆਂ ਹਨ। ਜਿਨ੍ਹਾਂ ਪ੍ਰੋਜੈਕਟਾਂ ਵਿੱਚ ਅਜੇ ਤੱਕ ਅਲਾਟਮੈਂਟ ਨਹੀਂ ਹੋਈ ਹੈ, ਉੱਥੇ ਨਵੀਆਂ ਦਰਾਂ ਸਿੱਧੇ ਤੌਰ 'ਤੇ ਲਾਗੂ ਹੋਣਗੀਆਂ। ਹਾਲਾਂਕਿ ਜਿਨ੍ਹਾਂ ਪ੍ਰੋਜੈਕਟਾਂ ਵਿੱਚ ਪਹਿਲਾਂ ਹੀ ਅਰਜ਼ੀਆਂ ਮੰਗੀਆਂ ਜਾ ਚੁੱਕੀਆਂ ਹਨ, ਉੱਥੇ ਪੁਰਾਣੇ ਨਿਯਮ ਹੀ ਰਹਿ ਸਕਦੇ ਹਨ।

ਕਾਰ ਪਾਰਕਿੰਗ ਹੋਈ ਲਾਜ਼ਮੀ

ਪਾਰਕਿੰਗ ਨਿਯਮਾਂ ਵਿੱਚ ਵੀ ਸੋਧ ਕੀਤੀ ਗਈ ਹੈ। ਹੁਣ ਹਰੇਕ ਫਲੈਟ ਲਈ ਇੱਕ ਲਾਜ਼ਮੀ ਕਾਰ ਪਾਰਕਿੰਗ ਯਕੀਨੀ ਬਣਾਉਣੀ ਹੋਵੇਗੀ, ਜਿਸ ਦੀ ਲਾਗਤ ਫਲੈਟ ਦੀ ਕੀਮਤ ਦਾ 10 ਫੀਸਦੀ ਤੱਕ ਹੋ ਸਕਦੀ ਹੈ।

ਇਸ ਬਦਲਾਅ ਦਾ ਉਦੇਸ਼ ਪ੍ਰੋਜੈਕਟਾਂ ਵਿੱਚ ਬਿਹਤਰ ਬੁਨਿਆਦੀ ਢਾਂਚਾ ਅਤੇ ਸਹੂਲਤਾਂ ਯਕੀਨੀ ਬਣਾਉਣਾ ਦੱਸਿਆ ਗਿਆ ਹੈ। ਸਰਕਾਰ ਨੂੰ ਉਮੀਦ ਹੈ ਕਿ ਇਸ ਸੋਧ ਤੋਂ ਬਾਅਦ ਬਿਲਡਰ ਮੁੜ ਅਫੋਰਡੇਬਲ ਹਾਊਸਿੰਗ ਪ੍ਰੋਜੈਕਟਾਂ ਵਿੱਚ ਦਿਲਚਸਪੀ ਦਿਖਾਉਣਗੇ ਅਤੇ ਨਵੇਂ ਪ੍ਰੋਜੈਕਟ ਲਾਂਚ ਹੋਣਗੇ।