Exis Poll 2026 : ਬੰਗਾਲ ’ਚ ਬਦਲਾਅ ਦੀ ਹਵਾ, ਅਸਾਮ ’ਚ ਭਾਜਪਾ ਤੇ ਤਾਮਿਲਨਾਡੂ ’ਚ ਡੀਐੱਮਕੇ ਅੱਗੇ; ਕੇਰਲਮ ’ਚ ਸੱਤਾ ਬਦਲਣ ਦੀ ਸੰਭਾਵਨਾ, ਪੁਡੂਚੇਰੀ ’ਚ ਐੱਨਡੀਏ ਸਰਕਾਰ ਬਣੇ ਰਹਿਣ ਦੇ ਆਸਾਰ

ਜਾਗਰਣ ਬਿਊਰੋ, ਨਵੀਂ ਦਿੱਲੀ : ਪੰਜ ਸੂਬਿਆਂ ਦੀਆਂ ਵਿਧਾਨ ਸਭਾ ਚੋਣਾਂ ਦੇ ਐਗਜ਼ਿਟ ਪੋਲ ਨੇ ਵੱਡੇ ਸਿਆਸੀ ਬਦਲਾਅ ਦੇ ਸੰਕੇਤ ਦਿੱਤੇ ਹਨ। ਬੰਗਾਲ ’ਚ ਤੀਜੀ ਵਾਰੀ ਸੱਤਾ ’ਚ ਵਾਪਸੀ ਦੀ ਕੋਸ਼ਿਸ਼ ਕਰ ਰਹੀ ਤ੍ਰਿਣਮੂਲ ਕਾਂਗਰਸ ਦੇ ਨਾਲ ਭਾਜਪਾ ਦਾ ਸਖ਼ਤ ਮੁਕਾਬਲਾ ਹੈ, ਜਿੱਥੇ ਜ਼ਿਆਦਾਤਰ ਏਜੰਸੀਆਂ ਨੂੰ ਸੱਤਾ ਬਦਲਾਅ ਦਾ ਅਨੁਮਾਨ ਹੈ। ਅਸਾਮ ’ਚ ਭਾਜਪਾ ਗੱਠਜੋੜ ਮਜ਼ਬੂਤ ਦਿਖ ਰਿਹਾ ਹੈ ਤੇ ਹਿਮੰਤ ਬਿਸਵਾ ਸਰਮਾ ਸਰਕਾਰ ਦੀ ਵਾਪਸੀ ਹੋ ਸਕਦੀ ਹੈ। ਇਸੇ ਤਰ੍ਹਾਂ ਤਾਮਿਲਨਾਡੂ ’ਚ ਡੀਐੱਮਕੇ ਦੀ ਵਾਪਸੀ ਦੀ ਸੰਭਾਵਨਾ ਹੈ, ਜਦਕਿ ਕੇਰਲਮ ’ਚ ਸੱਤਾ ਬਦਲਾਅ ਦੇ ਸੰਕੇਤ ਹਨ। ਪੁਡੂਚੇਰੀ ’ਚ ਐੱਨਡੀਏ ਨੂੰ ਬੜ੍ਹਤ ਮਿਲਦੀ ਦਿਖ ਰਹੀ ਹੈ। ਹਾਲਾਂਕਿ, ਇਹ ਹਾਲੇ ਸਿਰਫ਼ ਅਨੁਮਾਨ ਹੈ। ਅਸਲੀ ਤਸਵੀਰ ਚਾਰ ਮਈ ਨੂੰ ਵੋਟਾਂ ਦੀ ਗਿਣਤੀ ਦੇ ਬਾਅਦ ਹੀ ਸਾਫ਼ ਹੋਵੇਗੀ।

ਪੂਰੇ ਦੇਸ਼ ਦੀਆਂ ਨਜ਼ਰਾਂ ਬੰਗਾਲ ’ਤੇ ਟਿਕੀਆਂ ਹਨ, ਜਿੱਥੇ 294 ਸੀਟਾਂ ਵਾਲੀ ਵਿਧਾਨ ਸਭਾ ’ਚ ਬਹੁਮਤ ਲਈ 147 ਸੀਟਾਂ ਚਾਹੀਦੀਆਂ ਹਨ। ਏਜੰਸੀਆਂ ਨੇ ਬੰਗਾਲ ਦੀ ਵੱਖਰੀ ਤਸਵੀਰ ਪੇਸ਼ ਕੀਤੀ ਹੈ। ਕੁਝ ਐਗਜ਼ਿਟ ਪੋਲ ਮਮਤਾ ਬੈਨਰਜੀ ਦੀ ਅਗਵਾਈ ਵਾਲੀ ਤ੍ਰਿਣਮੂਲ ਕਾਂਗਰਸ ਦੀ ਬੜ੍ਹਤ ਦਿਖਾ ਰਹੇ ਹਨ, ਪਰ ਜ਼ਿਆਦਾਤਰ ਏਜੰਸੀਆਂ ਦੇ ਅਨੁਮਾਨਾਂ ’ਚ ਭਾਜਪਾ ਦੀ ਫ਼ੈਸਲਾਕੁੰਨ ਬੜ੍ਹਤ ਦਿਖਾਈ ਜਾ ਰਹੀ ਹੈ। ਇੱਥੋ ਦੋ ਗੇੜਾਂ ’ਚ ਹੋਏ ਮਤਦਾਨ ਤੇ ਭਾਰੀ ਵੋਟਿੰਗ ਫ਼ੀਸਦ ਨੇ ਮੁਕਾਬਲੇ ਨੂੰ ਜ਼ਿਆਦਾ ਗੁੰਝਲਦਾਰ ਬਣਾ ਦਿੱਤਾ ਹੈ। ਜੇਕਰ ਐਗਜ਼ਿਟ ਪੋਲ ਦੇ ਕੁਝ ਆਕਲਣ ਸਹੀ ਸਾਬਿਤ ਹੁੰਦੇ ਹਨ ਤਾਂ ਬੰਗਾਲ ’ਚ ਸੱਤਾ ਬਦਲਾਅ ਸੰਭਵ ਹੈ, ਜਿਹੜਾ ਰਾਸ਼ਟਰੀ ਸਿਆਸਤ ’ਤੇ ਵੀ ਅਸਰ ਪਾਏਗਾ।

ਮੈਟ੍ਰਿਜ ਨੇ ਬੰਗਾਲ ’ਚ ਭਾਜਪਾ ਨੂੰ 146-161, ਤ੍ਰਿਣਮੂਲ ਨੂੰ 125-140 ਤੇ ਹੋਰਨਾਂ ਨੂੰ 6-10 ਸੀਟਾਂ ਜਿੱਤਣ ਦਾ ਅਨੁਮਾਨ ਲਗਾਇਆ ਹੈ। ਪੀ ਮਾਰਕ ਨੇ ਭਾਜਪਾ ਨੂੰ 150-175, ਤ੍ਰਿਣਮੂਲ ਨੂੰ 118-138 ਤੇ ਹੋਰਨਾਂ ਨੂੰ 2-6 ਸੀਟਾਂ ਜਿੱਤਣ ਦਾ ਅਨੁਮਾਨ ਲਗਾਇਆ ਹੈ। ਹਾਲਾਂਕਿ ਜਨਮਤ ਪੋਲਸ ਤੇ ਪੀਪਲਜ਼ ਪਲਸ ਨੇ ਤ੍ਰਿਣਮੂਲ ਸਰਕਾ ਦੇ ਬਣੇ ਰਹਿਣ ਦੀ ਭਵਿੱਖਬਾਣੀ ਕੀਤੀ ਹੈ।

ਅਸਾਮ ’ਚ ਤਸਵੀਰ ਕੁਝ ਸਾਫ਼ ਦਿਖਦੀ ਹੈ। 126 ਸੀਟਾਂ ਵਾਲੀ ਵਿਧਾਨ ਸਭਾ ’ਚ ਬਹੁਮਤ ਦਾ ਅੰਕੜਾ 64 ਹੈ। ਐਗਜ਼ਿਟ ਪੋਲ ਮੁਤਾਬਕ ਹਿਮੰਤ ਬਿਸਵਾ ਸਰਮਾ ਦੀ ਅਗਵਾਈ ’ਚ ਐੱਨਡੀਏ ਸਰਕਾਰ ਦੀ ਵਾਪਸੀ ਲਗਪਗ ਤੈਅ ਮੰਨੀ ਜਾ ਰਹੀ ਹੈ। ਕਾਂਗਰਸ ਗੱਠਜੋੜ ਇੱਥੇ ਕਾਫ਼ੀ ਪਿੱਛੇ ਦਿਖ ਰਿਹਾ ਹੈ। ਪਿਛਲੀਆਂ ਚੋਣਾਂ ਦੇ ਮੁਕਾਬਲੇ ਭਾਜਪਾ ਦੀ ਸਥਿਤੀ ਹੋਰ ਮਜ਼ਬੂਤ ਹੁੰਦੀ ਨਜ਼ਰ ਆ ਰਹੀ ਹੈ। ਐਕਸਿਸ ਮਾਏ ਇੰਡੀਆ ਨੇ ਭਾਜਪਾ ਨੂੰ 88-100, ਕਾਂਗਰਸ ਨੂੰ 24-36 ਤੇ ਹੋਰਨਾਂ ਨੂੰ 0-3 ਸੀਟਾਂ ਮਿਲਣ ਦੀ ਸੰਭਾਵਨਾ ਪ੍ਰਗਟਾਈ ਹੈ। ਮੈਟ੍ਰਿਜ਼ ਨੇ ਭਾਜਪਾ ਨੂੰ 85-95, ਕਾਂਗਰਸ ਨੂੰ 25-32 ਤੇ ਹੋਰਨਾਂ ਨੂੰ 6-12 ਸੀਟਾਂ ਦਿੱਤੀਆਂ ਹਨ।

ਤਾਮਿਲਨਾਡੂ ’ਚ 234 ਸੀਟਾਂ ਹਨ ਤੇ ਬਹੁਮਤ ਲਈ 118 ਸੀਟਾਂ ਦਾ ਅੰਕੜਾ ਜ਼ਰੂਰੀ ਹੈ। ਇੱਥੇ ਐਗਜ਼ਿਟ ਪੋਲ ਡੀਐੱਮਕੇ ਦੀ ਅਗਵਾਈ ਵਾਲੇ ਗੱਠਜੋੜ ਨੂੰ ਬੜ੍ਹਤ ਦੇ ਰਹੇ ਹਨ। ਇਸ ਹਾਲਤ ’ਚ ਸੱਤਾਧਾਰੀ ਡੀਐੱਮਕੇ ਦੇ ਦੁਬਾਰਾ ਸਰਕਾਰ ਬਣਾਉਣ ਦੀ ਸੰਭਾਵਨਾ ਪ੍ਰਗਟਾਈ ਜਾ ਰਹੀ ਹੈ। ਅੰਨਾਡੀਐੱਮਕੇ ਤੇ ਭਾਜਪਾ ਗੱਠਜੋੜ ਨੂੰ ਚੁਣੌਤੀਪੂਰਨ ਸਥਿਤੀ ’ਚ ਦਿਖਾਇਆ ਗਿਆ ਹੈ। ਨਾਲ ਹੀ ਅਦਾਕਾਰ ਵਿਜੇ ਦੀ ਨਵੀਂ ਪਾਰਟੀ ਵੀ ਕੁਝ ਸੀਟਾਂ ’ਤੇ ਅਸਰ ਪਾਉਂਦੀ ਦਿਖ ਰਹੀ ਹੈ, ਜਿਸ ਨਾਲ ਮੁਕਾਬਲਾ ਤਿਕੋਣੀ ਰੰਗ ਲੈਂਦਾ ਨਜ਼ਰ ਆਉਂਦਾ ਹੈ।

ਕੇਰਲਮ ’ਚ 140 ਸੀਟਾਂ ਦੀ ਵਿਧਾਨ ਸਭਾ ਹੈ ਤੇ ਇੱਥੇ ਬਹੁਮਤ ਦਾ ਅੰਕੜਾ 71 ਹੈ। ਹਰ ਪੰਜ ਸਾਲਾਂ ’ਚ ਇੱਥੇ ਸੱਤਾ ਬਦਲਦੀ ਰਹੀ ਹੈ ਤੇ ਇਸ ਵਾਰੀ ਵੀ ਉਹੀ ਰੁਝਾਨ ਦਿਖ ਰਿਹਾ ਹੈ। ਐਗਜ਼ਿਟ ਪੋਲ ਕਾਂਗਰਸ ਦੀ ਅਗਵਾਈ ਵਾਲੇ ਯੂਡੀਐੱਫ ਨੂੰ ਬੜ੍ਹਤ ਦਿਖਾ ਰਹੇ ਹਨ। ਹਾਲਾਂਕਿ ਸੱਤਾਧਾਰੀ ਖੱਬੇ ਪੱਖੀ ਮੋਰਚਾ (ਐੱਲਡੀਐੱਫ) ਵੀ ਪੂਰੀ ਤਰ੍ਹਾਂ ਬਾਹਰ ਨਹੀਂ ਹੈ, ਪਰ ਮੁਕਾਬਲਾ ਕਰੀਬੀ ਮੰਨਿਆ ਜਾ ਰਿਹਾ ਹੈ। ਇੱਥੇ ਆਖਰੀ ਨਤੀਜੇ ਤੱਕ ਤਸਵੀਰ ਬਦਲ ਵੀ ਸਕਦੀ ਹੈ, ਕਿਉਂਕਿ ਸੂਬੇ ’ਚ ਵੋਟਰਾਂ ਦਾ ਰੁਝਨ ਅਕਸਰ ਆਖਰੀ ਸਮੇਂ ਹੈਰਾਨ ਕਰਦਾ ਹੈ। ਐਕਸਿਸ ਮਾਏ ਇੰਡੀਆ ਨੇ ਯੂਡੀਐੱਫ ਨੂੰ 78-90, ਐੱਲਡੀਐੱਫ ਨੂੰ 49-62 ਤੇ ਭਾਜਪਾ ਨੂੰ 0-3 ਸੀਟਾਂ ਦਿੱਤੀਆਂ ਹਨ। ਪੀਪਲਜ਼ ਪਲਸ ਨੇ ਯੂਡੀਐੱਫ ਨੂੰ 75-85, ਐੱਲਡੀਐੱਫ ਨੂੰ 55-65 ਤੇ ਭਾਜਪਾ ਨੂੰ 0-3 ਸੀਟਾਂ ਮਿਲਣ ਦਾ ਅਨੁਮਾਨ ਲਗਾਇਆ ਹੈ।

ਪੁਡੂਚੇਰੀ ਦੀਆਂ 30 ਸੀਟਾਂ ਵਾਲੀ ਵਿਧਾਨ ਸਭਾ ’ਚ ਵੀ ਦਿਲਚਸਪ ਮੁਕਾਬਲਾ ਹੈ। ਐਗਜ਼ਿਟ ਪੋਲ ਮੁਤਾਬਕ ਇੱਥੇ ਐੱਨਡੀਏ ਦੀ ਸਰਕਾਰ ਬਰਕਰਾਰ ਰਹਿਣ ਦੀ ਸੰਭਾਵਨਾ ਹੈ। ਡੀਐੱਮਕੇ-ਕਾਂਗਰਸ ਗੱਠਜੋੜ ਨੂੰ ਸੀਮਤ ਸੀਟਾਂ ਮਿਲਣ ਦਾ ਅਨੁਮਾਨ ਹੈ। ਛੋਟੀਆਂ ਪਾਰਟੀਆਂ ਦੀ ਭੂਮਿਕਾ ਵੀ ਇੱਥੇ ਮਹੱਤਵਪੂਰਨ ਹੋ ਸਕਦੀ ਹੈ।

ਬੰਗਾਲ (ਕੁੱਲ ਸੀਟਾਂ 294)

ਭਾਜਪਾ+ ਟੀਐੱਮਸੀ+ ਹੋਰ

ਜਨਮਤ ਪੋਲਸ 80-90 195-205 4-9

ਪੀਪਲਸ ਪਲਸ 95-110 177-187 ਖੱਬੀਆਂ ਪਾਰਟੀਆਂ 0-1, ਕਾਂਗਰਸ 1-3

ਮੈਟ੍ਰਖਿਜ਼ 146-161 125-140 6-10

ਪੀ ਮਾਰਕ 150-175 118-138 2-6

ਪ੍ਰਜਾ ਪੋਲਸ 178-208 85-110 0-5

ਪੋਲ ਡਾਇਰੀ 142-171 99-127 5-9

ਅਸਾਮ (ਕੁੱਲ ਸੀਟਾਂ: 126)

ਭਾਜਪਾ + ਕਾਂਗਰਸ + ਹੋਰ

ਪੋਲ ਡਾਇਰੀ, 86-101, 15-26, 0

ਜੇਵੀਸੀ, 88-101, 23-33 ਏਆਈਯੂਡੀਐਫ +2-5

ਐਕਸਿਸ ਮਾਈ ਇੰਡੀਆ, 88-100, 24-36, 0-3

ਓਪੀਨੀਅਨ ਪੋਲ: 87-98, 29-30

ਲੋਕਾਂ ਦੀ ਸੂਝ: 88-96, 30-34, 2-4

ਕਾਮਾਖਿਆ ਵਿਸ਼ਲੇਸ਼ਣ: 85-95, 26-39, 0-3

ਮੈਟ੍ਰਿਜ: 85-95, 25-32, 6-12

ਕੇਰਲ (ਕੁੱਲ ਸੀਟਾਂ: 140)

ਯੂਡੀਐਫ: ਐਲਡੀਐਫ: ਭਾਜਪਾ

ਐਕਸਿਸ ਮਾਈ ਇੰਡੀਆ, 78-90, 49-62, 0-3

ਲੋਕਾਂ ਦੀ ਨਬਜ਼: 75-85, 55-65, 0-3

ਵੋਟ ਵਾਈਬ: 70-80, 58-68, 0-4

ਲੋਕਾਂ ਦੀ ਸੂਝ: 66-76, 58-68, 10-14 ਹੋਰ, 0-1