ਨਸ਼ੇ ਦੀ ਲੋਰ ਨੇ ਉਜਾੜੇ ਹੱਸਦੇ-ਵਸਦੇ ਪਰਿਵਾਰ: ਸਾਬਕਾ ਗ੍ਰਹਿ ਮੰਤਰੀ ਦੀ ਧੀ ਤੇ ਕਾਂਗਰਸੀ ਨੇਤਾ ਦੇ ਪੁੱਤਰ ਸਮੇਤ ਤਿੰਨ ਨੌਜਵਾਨਾਂ ਦੀ ਸੜਕ ਹਾਦਸੇ ’ਚ ਮੌਤ

ਨਈਦੁਨੀਆ ਪ੍ਰਤੀਨਿਧੀ, ਇੰਦੌਰ : ਜਨਮਦਿਨ ਦੀ ਪਾਰਟੀ ਕਰ ਕੇ ਘਰ ਵਾਪਸ ਆ ਰਹੇ ਚਾਰ ਨੌਜਵਾਨ ਸ਼ੁੱਕਰਵਾਰ ਨੂੰ ਤੜਕੇ ਇੰਦੌਰ ਦੇ ਤੇਜਾਜੀ ਨਗਰ ਖੇਤਰ ਵਿਚ ਖੰਡਵਾ ਰੋਡ 'ਤੇ ਸੜਕ ਹਾਦਸੇ ਦਾ ਸ਼ਿਕਾਰ ਹੋ ਗਏ। ਤਿੰਨ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ ਅਤੇ ਇਕ ਨੌਜਵਾਨ ਲੜਕੀ ਗੰਭੀਰ ਜ਼ਖਮੀ ਹੋ ਗਈ। ਉਹ ਨਸ਼ੇ ਵਿਚ ਸਨ। ਇਸ ਕਾਰਨ ਉਨ੍ਹਾਂ ਦੀ ਤੇਜ਼ ਰਫ਼ਤਾਰ ਕਾਰ ਬੇਕਾਬੂ ਹੋ ਕੇ ਅੱਗੇ ਜਾ ਰਹੇ ਟਰੱਕ ਦੇ ਪਿੱਛੇ ਜਾ ਟਕਰਾਈ। ਹਾਦਸੇ ਵਾਲੀ ਕਾਰ ਵਿਚ ਸ਼ਰਾਬ ਦੀਆਂ ਕਈ ਬੋਤਲਾਂ, ਡਿਸਪੋਜ਼ੇਬਲ ਗਲਾਸ ਅਤੇ ਕੋਲਡ ਡ੍ਰਿੰਕਸ ਮਿਲੀਆਂ ਹਨ। ਇਸ ਨਾਲ ਇਹ ਅੰਦਾਜ਼ਾ ਲਗਾਇਆ ਗਿਆ ਹੈ ਕਿ ਨੌਜਵਾਨਾਂ ਨੇ ਜਨਮਦਿਨ ਦੀ ਪਾਰਟੀ ਵਿਚ ਹੀ ਨਹੀਂ, ਸਗੋਂ ਕਾਰ ਵਿਚ ਵੀ ਸ਼ਰਾਬ ਪੀਤੀ ਅਤੇ ਨਸ਼ੇ ਵਿਚ ਹੀ ਹਾਦਸੇ ਨੂੰ ਅੰਜਾਮ ਦੇ ਦਿੱਤਾ।

ਹਾਦਸੇ ਵਿਚ ਮੱਧ ਪ੍ਰਦੇਸ਼ ਦੀ ਕਮਲ ਨਾਥ ਸਰਕਾਰ ਵਿਚ ਗ੍ਰਹਿ ਮੰਤਰੀ ਰਹੇ ਰਾਜਪੁਰ ਤੋਂ ਕਾਂਗਰਸ ਵਿਧਾਇਕ ਬਾਲਾ ਬੱਚਨ ਦੀ ਧੀ ਪ੍ਰੇਰਨਾ ਬੱਚਨ, ਕਾਂਗਰਸ ਦੇ ਸੂਬਾ ਬੁਲਾਰਾ ਆਨੰਦ ਕਾਸਲੀਵਾਲ ਦੇ ਪੁੱਤਰ ਪ੍ਰਖਰ ਕਾਸਲੀਵਾਲ ਅਤੇ ਟਰਾਂਸਪੋਰਟਰ ਮਨ ਸਿਮਰਨ ਸੰਧੂ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ। ਇਸ ਦੌਰਾਨ ਸੀਆਰਪੀਐੱਫ ਦੇ ਸੇਵਾਮੁਕਤ ਏਐਸਪੀ ਆਨੰਦ ਰਾਠੀ ਦੀ ਧੀ ਅਨੁਸ਼ਕਾ ਜ਼ਖਮੀ ਹੋ ਗਈ। ਨਿੱਜੀ ਹਸਪਤਾਲ ਵਿਚ ਉਸਦੀ ਹਾਲਤ ਗੰਭੀਰ ਹੈ।

ਡੀਸੀਪੀ ਕ੍ਰਿਸ਼ਨ ਲਾਲਚੰਦਾਨੀ ਦੇ ਅਨੁਸਾਰ, ਵੀਰਵਾਰ ਨੂੰ ਮਰਨ ਵਾਲੇ ਪ੍ਰਖਰ ਕਾਸਲੀਵਾਲ ਦਾ ਜਨਮਦਿਨ ਸੀ। ਉਹ ਚਾਰੇ ਖੰਡਵਾ ਰੋਡ 'ਤੇ ਸਥਿਤ ਰਾਣਾਮੰਡਲ ਦੇ ਕੋਕੋ ਫਾਰਮ ਵਿਚ ਹੋਈ ਸ਼ਰਾਬ ਪਾਰਟੀ ਵਿਚ ਰਾਤ ਭਰ ਸ਼ਾਮਲ ਰਹੇ। ਉਥੋਂ ਚਾਰੇ ਸ਼ੁੱਕਰਵਾਰ ਤੜਕੇ ਕਾਰ ’ਤੇ ਵਾਪਸ ਆ ਰਹੇ ਸਨ। ਕਾਰ ਮਨ ਸਿਮਰਨ ਸੰਧੂ ਚਲਾ ਰਿਹਾ ਸੀ। ਪ੍ਰਖਰ ਵਪਾਰ ਕਰਦਾ ਸੀ। ਪ੍ਰੇਰਨਾ ਐਮਬੀਏ ਕਰਨ ਦੇ ਬਾਅਦ ਮੁਕਾਬਲੇ ਵਾਲੀ ਪ੍ਰੀਖਿਆ ਦੀ ਤਿਆਰੀ ਕਰ ਰਹੀ ਸੀ। ਮਨ ਸਿਮਰਨ ਹੱਤਿਆ ਦੇ ਮਾਮਲੇ ਵਿਚ ਜੇਲ੍ਹ ਤੋਂ ਛੁੱਟਣ ਦੇ ਬਾਅਦ ਪਿਤਾ ਦਾ ਵਪਾਰ ਸੰਭਾਲ ਰਿਹਾ ਸੀ। ਸੇਵਾਮੁਕਤ ਏਐਸਪੀ ਆਨੰਦ ਰਾਠੀ ਦੀ ਧੀ ਅਨੁਸ਼ਕਾ ਇੰਦੌਰ ਦੀ ਇਕ ਨਿੱਜੀ ਕੰਪਨੀ ਵਿਚ ਨੌਕਰੀ ਕਰਦੀ ਹੈ।