'ਬੰਗਾਲ 'ਚ ਜੋ ਹੋਇਆ ਉਹ ਆਜ਼ਾਦ ਭਾਰਤ 'ਚ ਕਦੇ ਨਹੀਂ ਹੋਇਆ', BJP ਨੇ ਮਮਤਾ ਬੈਨਰਜੀ ਨੂੰ ਪੁੱਛਿਆ- ਤੁਹਾਨੂੰ ਇੰਨੀ ਘਬਰਾਹਟ ਕਿਉਂ ਹੈ?

ਡਿਜੀਟਲ ਡੈਸਕ, ਨਵੀਂ ਦਿੱਲੀ : ਵੀਰਵਾਰ ਨੂੰ ਕੋਲਕਾਤਾ 'ਚ ਚੋਣ ਸਲਾਹਕਾਰ ਸੰਸਥਾ IPAC ਦੇ ਮੁਖੀ ਪ੍ਰਤੀਕ ਜੈਨ ਦੇ ਘਰ ਛਾਪੇਮਾਰੀ ਦੌਰਾਨ ਮਮਤਾ ਬੈਨਰਜੀ ਭੜਕ ਉੱਠੀ। ਕਾਰਵਾਈ ਦੌਰਾਨ ਮੌਕੇ 'ਤੇ ਪਹੁੰਚੀ ਮਮਤਾ ਬੈਨਰਜੀ ਉੱਥੋਂ ਇਕ ਫਾਈਲ ਤੇ ਲੈਪਟਾਪ ਆਪਣੇ ਨਾਲ ਲੈ ਗਈ। ਇਸ ਨੂੰ ਲੈ ਕੇ ਭਾਜਪਾ ਆਗੂ ਰਵੀਸ਼ੰਕਰ ਪ੍ਰਸਾਦ ਨੇ ਕਿਹਾ ਕਿ ਆਜ਼ਾਦ ਭਾਰਤ ਦੇ ਬੰਗਾਲ 'ਚ ਅੱਜ ਤਕ ਅਜਿਹਾ ਕਦੇ ਨਹੀਂ ਹੋਇਆ।

ਦਰਅਸਲ, ਈਡੀ (ED) ਦੀ ਕਾਰਵਾਈ ਦੌਰਾਨ ਮਮਤਾ ਬੈਨਰਜੀ ਵੱਲੋਂ ਕੀਤੀ ਗਈ ਦਖ਼ਲਅੰਦਾਜ਼ੀ 'ਤੇ ਭਾਜਪਾ ਸੰਸਦ ਮੈਂਬਰ ਰਵੀਸ਼ੰਕਰ ਪ੍ਰਸਾਦ ਨੇ ਕਿਹਾ ਕਿ ਕੱਲ੍ਹ ਬੰਗਾਲ 'ਚ ਜੋ ਹੋਇਆ, ਉਹ ਆਜ਼ਾਦ ਭਾਰਤ 'ਚ ਪਹਿਲਾਂ ਕਦੇ ਨਹੀਂ ਹੋਇਆ। ਮੁੱਖ ਮੰਤਰੀ ਮਮਤਾ ਬੈਨਰਜੀ ਦਾ ਪੂਰਾ ਕਦਮ ਨਾ ਸਿਰਫ਼ ਅਨੈਤਿਕ, ਗੈਰ-ਜ਼ਿੰਮੇਵਾਰਾਨਾ ਤੇ ਗੈਰ-ਸੰਵਿਧਾਨਕ ਹੈ, ਸਗੋਂ ਉਨ੍ਹਾਂ ਨੇ ਪੂਰੀ ਲੋਕਤੰਤਰੀ ਪ੍ਰਕਿਰਿਆ ਨੂੰ ਸ਼ਰਮਸਾਰ ਕਰ ਦਿੱਤਾ ਹੈ।

ਆਜ਼ਾਦ ਭਾਰਤ ਦੇ ਬੰਗਾਲ 'ਚ ਜੋ ਹੋਇਆ...

ਭਾਜਪਾ ਐੱਮਪੀ ਰਵੀਸ਼ੰਕਰ ਪ੍ਰਸਾਦ ਨੇ ਕਿਹਾ ਕਿ ਇਕ ਨਿੱਜੀ ਜਾਇਦਾਦ (ਪ੍ਰਾਈਵੇਟ ਪ੍ਰਾਪਰਟੀ) 'ਚ ਜਿੱਥੇ ਈਡੀ ਵੱਲੋਂ ਮਨੀ ਲਾਂਡਰਿੰਗ 'ਤੇ ਕਾਰਵਾਈ ਚੱਲ ਰਹੀ ਸੀ, ਉੱਥੇ ਇਕ ਮੌਜੂਦਾ ਮੁੱਖ ਮੰਤਰੀ ਚਲੀ ਜਾਵੇ ਤੇ ਈਡੀ ਦੇ ਅਧਿਕਾਰੀਆਂ ਨੂੰ ਧਮਕਾ ਕੇ ਕਾਗਜ਼ਾਤ ਖੋਹ ਕੇ ਲੈ ਜਾਵੇ—ਇਹ ਹੈਰਾਨੀਜਨਕ ਹੈ। ਕੋਲੇ ਦੀ ਸਮਗਲਿੰਗ ਤੇ ਹਵਾਲਾ ਟ੍ਰਾਂਜੈਕਸ਼ਨ ਨੂੰ ਲੈ ਕੇ ਈਡੀ ਕਾਰਵਾਈ ਕਰ ਰਹੀ ਹੈ, ਜਿਸ ਤਹਿਤ ਕਈ ਥਾਵਾਂ 'ਤੇ ਛਾਪੇਮਾਰੀ ਹੋਈ।

ਪ੍ਰਤੀਕ ਜੈਨ ਦੀ ਕੰਸਲਟੈਂਸੀ ਫਰਮ ਨੂੰ ਲੈ ਕੇ ਸ਼ਿਕਾਇਤ ਆਈ ਸੀ ਕਿ ਇੱਥੋਂ ਕਰੋੜਾਂ ਰੁਪਏ ਦਾ ਲੈਣ-ਦੇਣ ਹੋਇਆ ਹੈ। ਇਹ ਅਸੀਂ ਨਹੀਂ ਕਹਿ ਰਹੇ, ਈਡੀ ਨੇ ਆਪਣੇ ਅਧਿਕਾਰਤ ਬਿਆਨ 'ਚ ਕਿਹਾ ਹੈ, ਜੋ ਉਨ੍ਹਾਂ ਦੀ ਵੈੱਬਸਾਈਟ 'ਤੇ ਮੌਜੂਦ ਹੈ।

ਇਹ ਛਾਪੇਮਾਰੀ ਇਕ ਨਿੱਜੀ ਫਰਮ 'ਤੇ ਸੀ

ਭਾਜਪਾ ਆਗੂ ਰਵੀਸ਼ੰਕਰ ਪ੍ਰਸਾਦ ਨੇ ਕਿਹਾ, "ਤੁਹਾਨੂੰ ਪਤਾ ਹੈ ਕਿ ਬੰਗਾਲ ਕੋਲੇ ਦੀ ਸਮਗਲਿੰਗ ਦਾ ਬਹੁਤ ਵੱਡਾ ਹੌਟ ਸਪਾਟ ਹੈ ਜਿਸ ਵਿਚ ਸੱਤਾਧਾਰੀ ਪਾਰਟੀ ਦੇ ਲੋਕ ਵੀ ਸ਼ਾਮਲ ਹਨ। ਮੈਂ ਤੁਹਾਨੂੰ ਦੱਸ ਦਿਆਂ ਕਿ ਇਹ ਛਾਪੇਮਾਰੀ ਨਾ ਤਾਂ ਮਮਤਾ ਬੈਨਰਜੀ ਦੇ ਘਰ ਸੀ, ਨਾ ਉਨ੍ਹਾਂ ਦੇ ਦਫ਼ਤਰ 'ਚ, ਨਾ ਹੀ TMC ਦੇ ਦਫ਼ਤਰ 'ਚ ਅਤੇ ਨਾ ਹੀ ਕਿਸੇ ਨੇਤਾ ਜਾਂ ਮੰਤਰੀ ਦੇ ਘਰ 'ਤੇ ਸੀ। ਇਹ ਛਾਪੇਮਾਰੀ ਇਕ ਪ੍ਰਾਈਵੇਟ ਕੰਸਲਟੈਂਸੀ ਫਰਮ 'ਤੇ ਸੀ, ਜਿਸ ਦੇ ਖਿਲਾਫ ਕਰੋੜਾਂ ਰੁਪਏ ਦੀ ਮਨੀ ਲਾਂਡਰਿੰਗ ਦੀ ਸ਼ਿਕਾਇਤ ਆਈ ਸੀ।

ਗੈਰ-ਸੰਵਿਧਾਨਕ ਤੇ ਸ਼ਰਮਨਾਕ

ਅਜਿਹੇ ਵਿਚ ਮਮਤਾ ਬੈਨਰਜੀ ਉੱਥੇ ਜਾਂਦੀ ਹੈ, ਉਨ੍ਹਾਂ ਦੇ ਪੁਲਿਸ ਅਧਿਕਾਰੀ ਜਾਂਦੇ ਹਨ, ਈਡੀ ਦੇ ਲੋਕਾਂ ਨੂੰ ਧਮਕਾਉਂਦੇ ਹਨ, ਮਮਤਾ ਬੈਨਰਜੀ ਉਨ੍ਹਾਂ ਨਾਲ ਬਹਿਸ ਕਰਦੀ ਹੈ ਤੇ ਪੇਪਰ ਖੋਹ ਕੇ ਚਲੀ ਜਾਂਦੀ ਹੈ। ਉਨ੍ਹਾਂ ਦਾ ਇਹ ਵਤੀਰਾ ਨਾ ਸਿਰਫ਼ ਗ਼ੈਰ-ਮਰਿਆਦਤ, ਗੈਰ-ਸੰਵਿਧਾਨਕ ਤੇ ਸ਼ਰਮਨਾਕ ਹੈ, ਸਗੋਂ ਉਨ੍ਹਾਂ ਨੇ ਇਸ ਨਾਲ ਸੰਵਿਧਾਨਕ ਮਰਿਆਦਾਵਾਂ ਦੀਆਂ ਵੀ ਧੱਜੀਆਂ ਉਡਾਈਆਂ ਹਨ।

ਉਨ੍ਹਾਂ ਅੱਗੇ ਕਿਹਾ ਕਿ ਮਮਤਾ ਜੀ, ਤੁਹਾਨੂੰ ਇੰਨੀ ਘਬਰਾਹਟ ਕਿਉਂ ਹੈ? ਮਮਤਾ ਬੈਨਰਜੀ ਸੀਨੀਅਰ ਨੇਤਾ ਹਨ, 14 ਸਾਲਾਂ ਤੋਂ ਮੁੱਖ ਮੰਤਰੀ ਰਹੀ ਹਨ, ਕੇਂਦਰੀ ਮੰਤਰੀ ਵੀ ਰਹਿ ਚੁੱਕੀ ਹਨ ਤੇ ਸ਼ਾਸਨ (Governance) ਨੂੰ ਸਮਝਦੀ ਹਨ। ਜੇਕਰ ਉਨ੍ਹਾਂ ਨੇ ਸਾਰੇ ਨਿਯਮਾਂ, ਕਾਨੂੰਨਾਂ ਤੇ ਲੋਕਤੰਤਰੀ ਮਰਿਆਦਾਵਾਂ ਨੂੰ ਤੋੜ ਕੇ ਉੱਥੇ ਜਾਣਾ ਜ਼ਰੂਰੀ ਸਮਝਿਆ ਤਾਂ ਉੱਥੇ ਕੁਝ ਅਜਿਹਾ ਸ਼ੱਕੀ ਜ਼ਰੂਰ ਸੀ ਜਿਸ ਨੂੰ ਕੱਢਣਾ ਜ਼ਰੂਰੀ ਸੀ।