ਵਰਮਾਲਾ ਤੋਂ ਬਾਅਦ ਅਜੀਬ ਸ਼ਰਤ ਰੱਖ ਕੇ ਤਪਦੀ ਧੁੱਪ ’ਚ ਧਰਨੇ 'ਤੇ ਬੈਠੀਆਂ ਲਾੜੀਆਂ, ਸੋਫ਼ਿਆਂ 'ਤੇ ਘੁਰਾੜੇ ਮਾਰਦੇ ਲਾੜਿਆਂ ਨੇ ਲੰਘਾਈ ਰਾਤ
ਨਰਹੌਲੀ ਵਿੱਚ ਬਰਾਤ ਦੌਰਾਨ ਹੋਏ ਹੰਗਾਮੇ ਤੋਂ ਬਾਅਦ ਵੀਰਵਾਰ ਸਵੇਰੇ ਲਾੜੀਆਂ ਨੇ ਇੱਕ ਅਜੀਬ ਸ਼ਰਤ ਰੱਖ ਦਿੱਤੀ। ਰਾਤ ਭਰ ਚੱਲੀ ਪੰਚਾਇਤ ਤੋਂ ਬਾਅਦ ਸਵੇਰੇ ਸਾਢੇ ਪੰਜ ਵਜੇ ਵਰਮਾਲਾ ਹੋਈ। ਇਸ ਤੋਂ ਬਾਅਦ ਲਾੜੀਆਂ ਨੇ ਵਿਆਹ ਦੀਆਂ ਰਸਮਾਂ ਰੋਕ ਦਿੱਤੀਆਂ ਅਤੇ ਅੱਤ ਦੀ ਗਰਮੀ ਵਿੱਚ ਸੜਕ 'ਤੇ ਧਰਨੇ 'ਤੇ ਬਹਿ ਗਈਆਂ। ਉਨ੍ਹਾਂ ਦਾ ਕਹਿਣਾ ਸੀ ਕਿ ਡਾ. ਭੀਮ ਰਾਓ ਅੰਬੇਡਕਰ ਦਾ ਅਪਮਾਨ ਹੋਇਆ ਹੈ, ਇਸ ਲਈ ਜਦੋਂ ਤੱਕ ਇਨਸਾਫ਼ ਨਹੀਂ ਮਿਲਦਾ, ਵਿਆਹ ਅੱਗੇ ਨਹੀਂ ਵਧੇਗਾ। ਕਈ ਘੰਟੇ ਚੱਲੀ ਪੰਚਾਇਤ ਅਤੇ ਸਮਝਾਉਣ ਤੋਂ ਬਾਅਦ ਜਦੋਂ ਉਨ੍ਹਾਂ ਦੀ ਸ਼ਰਤ ਮੰਨੀ ਗਈ, ਉਦੋਂ ਜਾ ਕੇ ਸ਼ਾਮ ਨੂੰ ਲਾਵਾਂ-ਫੇਰੇ ਹੋ ਸਕੇ।
Posted By Anuradha Bains
Publish Date: Fri, 22 May 2026 04:47 PM (IST)
Updated Date: Fri, 22 May 2026 04:49 PM (IST)
ਜਾਗਰਣ ਪ੍ਰਤੀਨਿਧ, ਮਥੁਰਾ। ਨਰਹੌਲੀ ਵਿੱਚ ਬਰਾਤ ਦੌਰਾਨ ਹੋਏ ਹੰਗਾਮੇ ਤੋਂ ਬਾਅਦ ਵੀਰਵਾਰ ਸਵੇਰੇ ਲਾੜੀਆਂ ਨੇ ਇੱਕ ਅਜੀਬ ਸ਼ਰਤ ਰੱਖ ਦਿੱਤੀ। ਰਾਤ ਭਰ ਚੱਲੀ ਪੰਚਾਇਤ ਤੋਂ ਬਾਅਦ ਸਵੇਰੇ ਸਾਢੇ ਪੰਜ ਵਜੇ ਵਰਮਾਲਾ ਹੋਈ। ਇਸ ਤੋਂ ਬਾਅਦ ਲਾੜੀਆਂ ਨੇ ਵਿਆਹ ਦੀਆਂ ਰਸਮਾਂ ਰੋਕ ਦਿੱਤੀਆਂ ਅਤੇ ਅੱਤ ਦੀ ਗਰਮੀ ਵਿੱਚ ਸੜਕ 'ਤੇ ਧਰਨੇ 'ਤੇ ਬਹਿ ਗਈਆਂ।
ਉਨ੍ਹਾਂ ਦਾ ਕਹਿਣਾ ਸੀ ਕਿ ਡਾ. ਭੀਮ ਰਾਓ ਅੰਬੇਡਕਰ ਦਾ ਅਪਮਾਨ ਹੋਇਆ ਹੈ, ਇਸ ਲਈ ਜਦੋਂ ਤੱਕ ਇਨਸਾਫ਼ ਨਹੀਂ ਮਿਲਦਾ, ਵਿਆਹ ਅੱਗੇ ਨਹੀਂ ਵਧੇਗਾ। ਕਈ ਘੰਟੇ ਚੱਲੀ ਪੰਚਾਇਤ ਅਤੇ ਸਮਝਾਉਣ ਤੋਂ ਬਾਅਦ ਜਦੋਂ ਉਨ੍ਹਾਂ ਦੀ ਸ਼ਰਤ ਮੰਨੀ ਗਈ, ਉਦੋਂ ਜਾ ਕੇ ਸ਼ਾਮ ਨੂੰ ਲਾਵਾਂ-ਫੇਰੇ ਹੋ ਸਕੇ।
ਹਾਈਵੇਅ ਥਾਣਾ ਖੇਤਰ ਦੇ ਅਧੀਨ ਪੈਂਦੇ ਨਰਹੌਲੀ ਚੌਕ 'ਤੇ ਬੁੱਧਵਾਰ ਰਾਤ ਬਰਾਤ ਦੌਰਾਨ ਹੋਏ ਵਿਵਾਦ ਅਤੇ ਪੱਥਰਬਾਜ਼ੀ ਤੋਂ ਬਾਅਦ ਮਾਹੌਲ ਪੂਰੀ ਤਰ੍ਹਾਂ ਤਣਾਅਪੂਰਨ ਬਣਿਆ ਰਿਹਾ। ਪੂਰੀ ਰਾਤ ਪੰਚਾਇਤ ਅਤੇ ਪ੍ਰਸ਼ਾਸਨਿਕ ਪੱਧਰ 'ਤੇ ਗੱਲਬਾਤ ਚੱਲਦੀ ਰਹੀ।
ਨੁਕਸਾਨੇ ਗਏ ਟਰੈਕਟਰ ਦੀ ਜਗ੍ਹਾ ਨਵਾਂ ਟਰੈਕਟਰ ਦਿਵਾਉਣ ਅਤੇ ਤਾਰਸੀ ਚੌਕੀ ਇੰਚਾਰਜ ਨਿਤਿਨ ਰਾਠੀ ਖ਼ਿਲਾਫ਼ ਕਾਰਵਾਈ ਦੀ ਮੰਗ ਨੂੰ ਲੈ ਕੇ ਲਾੜੀ ਪੱਖ ਦੇ ਲੋਕਾਂ ਨੇ ਵਿਆਹ ਦੀਆਂ ਰਸਮਾਂ ਅੱਗੇ ਵਧਾਉਣ ਤੋਂ ਨਾਂਹ ਕਰ ਦਿੱਤੀ।
ਏ.ਡੀ.ਐੱਮ. ਐੱਫ.ਆਰ. ਡਾ. ਪੰਕਜ ਕੁਮਾਰ, ਐੱਸ.ਡੀ.ਐੱਮ. ਸਦਰ ਆਦੇਸ਼ ਕੁਮਾਰ, ਐੱਸ.ਪੀ. ਦਿਹਾਤੀ ਸੁਰੇਸ਼ ਚੰਦਰ ਰਾਵਤ, ਐੱਸ.ਪੀ. ਸਿਟੀ ਰਾਜੀਵ ਕੁਮਾਰ ਸਿੰਘ, ਸੀ.ਓ. ਰਿਫਾਇਨਰੀ ਅਨਿਲ ਕੁਮਾਰ ਕਪਰਵਾਨ ਦੀ ਕਈ ਵਾਰ ਪਰਿਵਾਰ ਵਾਲਿਆਂ ਨਾਲ ਗੱਲਬਾਤ ਹੋਈ। ਕਈ ਵਾਰ ਗੱਲ ਬਣੀ, ਪਰ ਫਿਰ ਵਿਗੜ ਗਈ।
ਏ.ਡੀ.ਐੱਮ. ਐੱਫ.ਆਰ. ਨੇ ਪਰਿਵਾਰ ਨੂੰ ਏਜੰਸੀ ਤੋਂ ਨੁਕਸਾਨਿਆ ਟਰੈਕਟਰ ਬਦਲਵਾ ਕੇ ਨਵਾਂ ਦਿਵਾਉਣ ਦਾ ਭਰੋਸਾ ਦੇ ਕੇ ਮਨਾਇਆ। ਇਸ ਤੋਂ ਬਾਅਦ ਵੀਰਵਾਰ ਸਵੇਰੇ ਕਰੀਬ ਸਾਢੇ ਪੰਜ ਵਜੇ ਪ੍ਰਸ਼ਾਸਨ ਦੀ ਮੌਜੂਦਗੀ ਵਿੱਚ ਵਰਮਾਲਾ ਦੀ ਰਸਮ ਕਰਵਾਈ ਗਈ, ਪਰ ਬਾਅਦ ਵਿੱਚ ਮਾਮਲਾ ਫਿਰ ਉਲਝ ਗਿਆ। ਲਾੜੀਆਂ ਲਕਸ਼ਮੀ ਅਤੇ ਪੂਨਮ ਨੇ ਵਿਆਹ ਦੀਆਂ ਬਾਕੀ ਰਸਮਾਂ ਕਰਨ ਤੋਂ ਇਨਕਾਰ ਕਰ ਦਿੱਤਾ।
ਸਵੇਰੇ 11 ਵਜੇ ਦੋਵੇਂ ਲਾੜੀਆਂ ਪਰਿਵਾਰ ਸਮੇਤ ਤਪਦੀ ਧੁੱਪ ਵਿੱਚ ਸੜਕ 'ਤੇ ਧਰਨੇ 'ਤੇ ਬੈਠ ਗਈਆਂ। ਉਨ੍ਹਾਂ ਦਾ ਕਹਿਣਾ ਸੀ ਕਿ ਬਰਾਤ ਵਿੱਚ ਡਾ. ਭੀਮ ਰਾਓ ਅੰਬੇਡਕਰ ਦੀ ਤਸਵੀਰ ਤੋੜ ਕੇ ਉਨ੍ਹਾਂ ਦਾ ਅਪਮਾਨ ਕੀਤਾ ਗਿਆ ਹੈ। ਜਦੋਂ ਤੱਕ ਸਨਮਾਨ ਪੂਰਵਕ ਦੁਬਾਰਾ ਬਰਾਤ ਨਹੀਂ ਚੜ੍ਹੇਗੀ, ਉਦੋਂ ਤੱਕ ਉਹ ਫੇਰੇ ਨਹੀਂ ਲੈਣਗੀਆਂ।
ਕਈ ਵਾਰ ਹੋਈਆਂ ਪੰਚਾਇਤਾਂ ਤੋਂ ਬਾਅਦ ਲਾੜੀਆਂ ਨੇ ਪ੍ਰਸ਼ਾਸਨ ਅਤੇ ਪੰਚਾਇਤ ਦੇ ਸਾਹਮਣੇ ਸ਼ਰਤ ਰੱਖੀ ਕਿ ਬਰਾਤ ਦੁਬਾਰਾ ਕੱਢੀ ਜਾਵੇਗੀ। ਇਸ ਵਿੱਚ ਸਾਰੇ ਲੋਕਾਂ ਦੇ ਹੱਥਾਂ ਵਿੱਚ ਡਾ. ਅੰਬੇਡਕਰ ਦੀ ਤਸਵੀਰ ਹੋਵੇਗੀ ਅਤੇ ਡੀ.ਜੇ. 'ਤੇ ਉਨ੍ਹਾਂ ਦੇ ਗੀਤ ਵਜਾਏ ਜਾਣਗੇ। ਇਸ ਮੰਗ ਨੂੰ ਲੈ ਕੇ ਕਈ ਘੰਟਿਆਂ ਤੱਕ ਪੰਚਾਇਤ ਚੱਲਦੀ ਰਹੀ।
ਪਿੰਡ ਦੇ ਲੋਕ, ਲਾੜਾ ਤੇ ਲਾੜੀ ਪੱਖ ਦੇ ਲੋਕ ਅਤੇ ਪ੍ਰਸ਼ਾਸਨਿਕ ਅਧਿਕਾਰੀ ਸਮਝੌਤੇ ਦੀ ਕੋਸ਼ਿਸ਼ ਵਿੱਚ ਜੁਟੇ ਰਹੇ। ਮਾਹੌਲ ਇੱਕ ਵਾਰ ਫਿਰ ਗਰਮਾਉਣ ਲੱਗਾ ਤਾਂ ਪੁਲਿਸ ਅਤੇ ਪ੍ਰਸ਼ਾਸਨ ਨੇ ਦਖਲ ਦਿੱਤਾ। ਕਾਫੀ ਸਮਝਾਉਣ ਅਤੇ ਗੱਲਬਾਤ ਤੋਂ ਬਾਅਦ ਪ੍ਰਸ਼ਾਸਨ ਨੇ ਲਾੜੀਆਂ ਦੀ ਮੰਗ ਮੰਨ ਲਈ। ਐੱਸ.ਡੀ.ਐੱਮ. ਨੇ ਕਿਹਾ ਕਿ ਲਾੜੀਆਂ ਦੀ ਡੋਲੀ ਡੀ.ਜੇ. ਦੇ ਨਾਲ ਹੀ ਉਠਾਈ ਜਾਵੇਗੀ।
ਇਸ ਤੋਂ ਬਾਅਦ ਮਾਹੌਲ ਸ਼ਾਂਤ ਹੋਇਆ ਅਤੇ ਸ਼ਾਮ ਕਰੀਬ ਚਾਰ ਵਜੇ ਦੋਵਾਂ ਲਾੜੀਆਂ ਨੇ ਵਿਆਹ ਦੇ ਫੇਰੇ ਲਏ। ਪਰਿਵਾਰ ਨੇ ਕੰਨਿਆਦਾਨ ਕੀਤਾ। ਇਸ ਪੂਰੇ ਘਟਨਾਕ੍ਰਮ ਕਾਰਨ ਦਿਨ ਭਰ ਇਲਾਕੇ ਵਿੱਚ ਤਣਾਅ ਦੀ ਸਥਿਤੀ ਬਣੀ ਰਹੀ।
ਹੰਗਾਮੇ ਕਾਰਨ ਫਿੱਕੀ ਪਈ ਵਿਆਹ ਦੀ ਰੌਣਕ, ਸੋਫ਼ਿਆਂ 'ਤੇ ਰਾਤ ਕੱਟਦੇ ਰਹੇ ਲਾੜੇ
ਨਰਹੌਲੀ ਵਿੱਚ ਬਰਾਤ ਦੌਰਾਨ ਹੋਏ ਵਿਵਾਦ ਅਤੇ ਪੱਥਰਬਾਜ਼ੀ ਨੇ ਵਿਆਹ ਦੀਆਂ ਖ਼ੁਸ਼ੀਆਂ ਨੂੰ ਪੂਰੀ ਤਰ੍ਹਾਂ ਤਣਾਅ ਵਿੱਚ ਬਦਲ ਦਿੱਤਾ। ਵਿਵਾਦ ਇੰਨਾ ਵਧ ਗਿਆ ਕਿ ਲਾੜਿਆਂ ਅਤੇ ਬਰਾਤੀਆਂ ਦੇ ਨਾਲ-ਨਾਲ ਪੁਲਿਸ ਤੇ ਪ੍ਰਸ਼ਾਸਨ ਦੇ ਅਧਿਕਾਰੀਆਂ ਨੂੰ ਵੀ ਪੂਰੀ ਰਾਤ ਜਾਗ ਕੇ ਲੰਘਾਉਣੀ ਪਈ।
ਹਾਲਾਤ ਅਜਿਹੇ ਬਣ ਗਏ ਕਿ ਲਾੜੇ ਅਸ਼ੋਕ ਅਤੇ ਕੁਲਦੀਪ ਥਕਾਵਟ ਕਾਰਨ ਵਿਆਹ ਦੀਆਂ ਰਸਮਾਂ ਦਾ ਇੰਤਜ਼ਾਰ ਕਰਦੇ-ਕਰਦੇ ਸੋਫ਼ਿਆਂ 'ਤੇ ਹੀ ਸੌਂ ਗਏ, ਜਦਕਿ ਕਈ ਬਰਾਤੀਆਂ ਨੇ ਦਾਜ ਦੇ ਸਾਮਾਨ ਦੇ ਵਿਚਕਾਰ ਬੈਠ ਕੇ ਰਾਤ ਬਿਤਾਈ। ਵੀਰਵਾਰ ਤੜਕੇ ਤੱਕ ਵਿਆਹ ਨੂੰ ਲੈ ਕੇ ਭੰਬਲਭੂਸਾ ਬਣਿਆ ਰਿਹਾ। ਬਰਾਤੀਆਂ ਨੂੰ ਇਹ ਵੀ ਨਹੀਂ ਸੀ ਪਤਾ ਕਿ ਵਿਆਹ ਹੋਵੇਗਾ ਵੀ ਜਾਂ ਨਹੀਂ।