ਹਾਕੀ ਦੀ ਗੇਂਦ ਲੱਗਣ ਕਾਰਨ 13 ਸਾਲਾ ਬੱਚੀ ਦੀ ਮੌਤ, ਇੱਕ ਦਿਨ ਬਾਅਦ ਹੋਣੀਆਂ ਸਨ ਸਕੂਲ ਦੀਆਂ ਛੁੱਟੀਆਂ

ਭਰਾ ਤੋਂ ਪ੍ਰੇਰਿਤ ਹੋ ਕੇ ਹਾਕੀ ਖੇਡਣਾ ਸ਼ੁਰੂ ਕੀਤਾ

ਰੁਈਸ਼ਾ ਨੇ ਦੋ ਸਾਲ ਪਹਿਲਾਂ ਆਪਣੇ ਭਰਾ ਸੂਰਜ ਤੋਂ ਪ੍ਰੇਰਿਤ ਹੋ ਕੇ ਹਾਕੀ ਖੇਡਣੀ ਸ਼ੁਰੂ ਕੀਤੀ ਸੀ। ਸੂਰਜ ਨੇ ਪਿਛਲੇ ਮਹੀਨੇ ਬਿਹਾਰ ਵਿੱਚ ਹੋਈ ਸਬ-ਜੂਨੀਅਰ ਨੈਸ਼ਨਲ ਚੈਂਪੀਅਨਸ਼ਿਪ ਵਿੱਚ ਗੋਆ ਦੀ ਟੀਮ ਦੀ ਕਪਤਾਨੀ ਕੀਤੀ ਸੀ। ਟ੍ਰੇਨਿੰਗ ਦੌਰਾਨ ਗੇਂਦ ਲੱਗਣ ਤੋਂ ਬਾਅਦ ਰੁਈਸ਼ਾ ਜ਼ਮੀਨ 'ਤੇ ਡਿੱਗ ਪਈ।

ਸੂਰਜ ਨੇ ਕਿਹਾ, "ਉਹ ਹਮੇਸ਼ਾ ਮੇਰੀ ਹਾਕੀ ਸਟਿਕ ਦੀ ਵਰਤੋਂ ਕਰਦੀ ਸੀ। ਜਦੋਂ ਮੇਰੀ ਮਾਂ ਕੰਮ 'ਤੇ ਸੀ, ਉਦੋਂ ਹੀ ਉਨ੍ਹਾਂ ਨੂੰ ਇੱਕ ਫ਼ੋਨ ਆਇਆ। ਮੈਨੂੰ ਉਸ ਦੀ ਮੌਤ ਬਾਰੇ ਉਦੋਂ ਪਤਾ ਲੱਗਿਆ ਜਦੋਂ ਮਾਂ ਘਰ ਪਹੁੰਚੀ। ਮੈਂ ਸੁੰਨ ਹੋ ਗਿਆ ਸੀ। ਮੈਨੂੰ ਲੱਗਦਾ ਹੈ ਕਿ ਸੈਸ਼ਨ ਖ਼ਤਮ ਹੋਣ ਵਿੱਚ ਸਿਰਫ਼ 10 ਮਿੰਟ ਹੀ ਬਾਕੀ ਸਨ। ਮੈਨੂੰ ਨਹੀਂ ਪਤਾ ਕਿ ਗੇਂਦ ਉਸ ਨੂੰ ਕਿਵੇਂ ਲੱਗੀ ਅਤੇ ਮੈਨੂੰ ਇਹ ਵੀ ਪੱਕਾ ਨਹੀਂ ਪਤਾ ਕਿ ਜਦੋਂ ਉਹ ਡਿੱਗੀ ਤਾਂ ਕੀ ਉਹ ਹੋਸ਼ ਵਿੱਚ ਸੀ।"

ਪੁਲਿਸ ਕਰ ਰਹੀ ਹੈ ਮਾਮਲੇ ਦੀ ਜਾਂਚ

ਐਂਬੂਲੈਂਸ ਦੇ ਆਉਣ ਵਿੱਚ ਦੇਰੀ ਹੋਣ ਕਾਰਨ ਉਸ ਨੂੰ ਇੱਕ ਨਿੱਜੀ ਗੱਡੀ ਰਾਹੀਂ ਤੁਰੰਤ ਹਸਪਤਾਲ ਲਿਜਾਇਆ ਗਿਆ। ਹਸਪਤਾਲ ਪਹੁੰਚਣ 'ਤੇ ਉਸ ਨੂੰ ਮ੍ਰਿਤਕ ਐਲਾਨ ਦਿੱਤਾ ਗਿਆ। ਪੁਲਿਸ ਨੇ ਗ਼ੈਰ-ਕੁਦਰਤੀ ਮੌਤ ਦਾ ਮਾਮਲਾ ਦਰਜ ਕਰ ਲਿਆ ਹੈ। ਪੁਲਿਸ ਨੇ ਦੱਸਿਆ ਕਿ ਪੋਸਟਮਾਰਟਮ ਦੀ ਰਿਪੋਰਟ ਸ਼ੁੱਕਰਵਾਰ ਨੂੰ ਆਉਣ ਦੀ ਉਮੀਦ ਹੈ।