YRF ਨੇ ਠੁਕਰਾਈ ਨੈੱਟਫਲਿਕਸ ਦੀ 215 ਕਰੋੜ ਦੀ ਡੀਲ, ਆਲੀਆ ਭੱਟ ਦੀ 'ਅਲਫ਼ਾ' ਨੂੰ ਲੈ ਕੇ ਦਿੱਤਾ ਸੀ ਆਫਰ

ਐਂਟਰਟੇਨਮੈਂਟ ਡੈਸਕ, ਨਵੀਂ ਦਿੱਲੀ : ਪਿਛਲੇ ਦਿਨੀਂ ਅਜਿਹੀਆਂ ਅਫ਼ਵਾਹਾਂ ਉੱਡੀਆਂ ਸਨ ਕਿ ਯਸ਼ ਰਾਜ ਫਿਲਮਜ਼ (YRF) ਦੇ ਸਪਾਈ ਯੂਨੀਵਰਸ ਦੀ ਅਗਲੀ ਫਿਲਮ 'ਅਲਫ਼ਾ' (Alpha) ਨੂੰ ਸਿੱਧਾ ਓਟੀਟੀ (OTT) 'ਤੇ ਰਿਲੀਜ਼ ਕੀਤਾ ਜਾਵੇਗਾ। ਚਰਚਾ ਸੀ ਕਿ 'ਵਾਰ 2' ਨੂੰ ਮਿਲੀ-ਜੁਲੀ ਪ੍ਰਤੀਕਿਰਿਆ ਤੋਂ ਬਾਅਦ ਇਹ ਫੈਸਲਾ ਲਿਆ ਗਿਆ ਹੈ ਪਰ ਹੁਣ 'ਵੈਰਾਇਟੀ ਇੰਡੀਆ' ਦੀ ਰਿਪੋਰਟ ਮੁਤਾਬਕ, YRF ਨੇ ਨੈੱਟਫਲਿਕਸ ਦੇ ਇੱਕ ਵੱਡੇ ਆਫਰ ਨੂੰ ਠੁਕਰਾ ਕੇ ਇਹ ਸਾਫ਼ ਕਰ ਦਿੱਤਾ ਹੈ ਕਿ ਇਹ ਫਿਲਮ ਸਿਨੇਮਾਘਰਾਂ ਵਿੱਚ ਹੀ ਰਿਲੀਜ਼ ਹੋਵੇਗੀ।

ਕਿੰਨੇ ਕਰੋੜ ਦਾ ਸੀ ਆਫਰ

ਜਾਣਕਾਰੀ ਅਨੁਸਾਰ, ਨੈੱਟਫਲਿਕਸ ਇੰਡੀਆ ਨੇ 'ਅਲਫ਼ਾ' ਦੀ ਸਿੱਧੀ ਡਿਜੀਟਲ ਰਿਲੀਜ਼ ਲਈ 215 ਕਰੋੜ ਰੁਪਏ ਦੀ ਡੀਲ ਪੇਸ਼ ਕੀਤੀ ਸੀ ਪਰ YRF ਦੇ ਬੁਲਾਰੇ ਨੇ ਇਨ੍ਹਾਂ ਗੱਲਾਂ ਨੂੰ ਅਫ਼ਵਾਹ ਦੱਸਦਿਆਂ ਕਿਹਾ, "ਇਹ ਸਭ ਅਫ਼ਵਾਹਾਂ ਹਨ ਕਿ 'ਅਲਫ਼ਾ' ਸਿੱਧੀ ਸਟ੍ਰੀਮਿੰਗ 'ਤੇ ਆਵੇਗੀ। ਅਜਿਹੀਆਂ ਗੱਲਾਂ ਫੀਮੇਲ ਲੀਡ ਫਿਲਮ ਨੂੰ ਗਲਤ ਤਰੀਕੇ ਨਾਲ ਪੇਸ਼ ਕਰਨ ਲਈ ਕੀਤੀਆਂ ਜਾ ਰਹੀਆਂ ਹਨ। ਯਸ਼ ਰਾਜ ਫਿਲਮਜ਼ ਆਪਣੀਆਂ ਸਿਨੇਮਾ ਰਿਲੀਜ਼ ਵਾਲੀਆਂ ਫਿਲਮਾਂ ਨੂੰ ਕਦੇ ਵੀ ਸਿੱਧਾ ਓਟੀਟੀ 'ਤੇ ਨਹੀਂ ਪਾਉਂਦੀ। ਸਾਨੂੰ ਸਿਨੇਮਾਈ ਅਨੁਭਵ ਪ੍ਰਦਾਨ ਕਰਨ ਵਿੱਚ ਮਾਣ ਮਹਿਸੂਸ ਹੁੰਦਾ ਹੈ ਅਤੇ 'ਅਲਫ਼ਾ' ਸਾਡੀ ਕੰਪਨੀ ਦੀ ਇੱਕ ਬਹੁਤ ਮਹੱਤਵਪੂਰਨ ਫਿਲਮ ਹੈ।"

ਰਿਲੀਜ਼ ਡੇਟ 'ਚ ਕਿਉਂ ਹੋਈ ਦੇਰੀ

'ਅਲਫ਼ਾ' ਪਹਿਲਾਂ ਦਸੰਬਰ 2025 ਵਿੱਚ ਰਿਲੀਜ਼ ਹੋਣੀ ਸੀ ਪਰ ਵਿਜ਼ੂਅਲ ਇਫੈਕਟਸ (VFX) ਦੇ ਕੰਮ ਵਿੱਚ ਦੇਰੀ ਕਾਰਨ ਇਸ ਦੀ ਤਰੀਕ ਅੱਗੇ ਵਧਾ ਦਿੱਤੀ ਗਈ। ਫਿਲਮ ਦੀ ਰਿਲੀਜ਼ ਲਈ ਪਹਿਲਾਂ 17 ਅਪ੍ਰੈਲ 2026 ਤੈਅ ਕੀਤੀ ਗਈ ਸੀ। ਰਿਪੋਰਟਾਂ ਮੁਤਾਬਕ, ਹੁਣ ਇਹ ਅਪ੍ਰੈਲ ਵਿੱਚ ਵੀ ਰਿਲੀਜ਼ ਨਹੀਂ ਹੋਵੇਗੀ ਕਿਉਂਕਿ ਉਸੇ ਸਮੇਂ ਸਲਮਾਨ ਖਾਨ ਦੀ ਫਿਲਮ 'ਬੈਟਲ ਆਫ ਗਲਵਾਨ' ਰਿਲੀਜ਼ ਹੋਣ ਦੀ ਸੰਭਾਵਨਾ ਹੈ।

ਮੁੱਖ ਕਾਸਟ

ਇਸ ਫਿਲਮ ਵਿੱਚ ਪਹਿਲੀ ਵਾਰ ਸਪਾਈ ਯੂਨੀਵਰਸ ਵਿੱਚ ਮਹਿਲਾ ਜਾਸੂਸਾਂ ਦੀ ਕਹਾਣੀ ਵਿੱਚ ਆਲੀਆ ਭੱਟ (ਮੁੱਖ ਭੂਮਿਕਾ), ਸ਼ਰਵਰੀ ਵਾਘ, ਬੌਬੀ ਦਿਓਲ (ਵਿਰੋਧੀ ਭੂਮਿਕਾ/ਵਿਲੇਨ) ਦਿਖਾਈ ਜਾਵੇਗੀ। ਸ਼ਿਵ ਰਵੈਲ ਵੱਲੋਂ ਨਿਰਦੇਸ਼ਿਤ ਇਹ ਫਿਲਮ YRF ਦੇ ਸਪਾਈ ਯੂਨੀਵਰਸ ਦਾ ਇੱਕ ਅਹਿਮ ਹਿੱਸਾ ਹੈ, ਜਿਸ ਵਿੱਚ ਪਹਿਲਾਂ 'ਏਕ ਥਾ ਟਾਈਗਰ', 'ਪਠਾਨ' ਅਤੇ 'ਵਾਰ' ਵਰਗੀਆਂ ਬਲਾਕਬਸਟਰ ਫਿਲਮਾਂ ਆ ਚੁੱਕੀਆਂ ਹਨ।