Rajpal Yadav Case: ਸਜ਼ਾ ਕੱਟਣ ਤੋਂ ਬਾਅਦ ਮਾਫ਼ ਹੋ ਜਾਣਗੇ 9 ਕਰੋੜ ਜਾਂ ਅਦਾਕਾਰ ਨੂੰ ਚੁਕਾਉਣਾ ਪਵੇਗਾ ਦੁੱਗਣਾ ਪੈਸਾ?
ਬਾਲੀਵੁੱਡ ਅਦਾਕਾਰ-ਕਾਮੇਡੀਅਨ ਰਾਜਪਾਲ ਯਾਦਵ ਇਸ ਵੇਲੇ ਕਰਜ਼ੇ ਦੇ ਮਾਮਲੇ ਵਿੱਚ ਤਿਹਾੜ ਜੇਲ੍ਹ ਵਿੱਚ ਸਜ਼ਾ ਕੱਟ ਰਹੇ ਹਨ। ਲੰਬੇ ਸਮੇਂ ਤੋਂ ਚੱਲ ਰਹੇ ਇਸ ਚੈੱਕ ਬਾਊਂਸ ਮਾਮਲੇ ਵਿੱਚ ਰਾਜਪਾਲ ਨੇ ਆਖ਼ਰਕਾਰ ਆਤਮ-ਸਮਰਪਣ ਕਰ ਦਿੱਤਾ ਅਤੇ ਹੁਣ ਆਪਣੀ ਸਜ਼ਾ ਕੱਟ ਰਹੇ ਹਨ। ਅਜਿਹੇ ਵਿੱਚ ਆਓ ਜਾਣਦੇ ਹਾਂ ਕਿ ਕੀ ਸਜ਼ਾ ਕੱਟਣ ਤੋਂ ਬਾਅਦ ਉਨ੍ਹਾਂ ਨੂੰ ਕਰਜ਼ਾ ਨਹੀਂ ਦੇਣਾ ਪਵੇਗਾ ਜਾਂ ਕੁਝ ਹੋਰ ਹੋਵੇਗਾ?
Posted By Anuradha Bains
Publish Date: Fri, 13 Feb 2026 01:08 PM (IST)
Updated Date: Fri, 13 Feb 2026 01:11 PM (IST)
ਐਂਟਰਟੇਨਮੈਂਟ ਡੈਸਕ, ਨਵੀਂ ਦਿੱਲੀ। ਬਾਲੀਵੁੱਡ ਅਦਾਕਾਰ-ਕਾਮੇਡੀਅਨ ਰਾਜਪਾਲ ਯਾਦਵ ਇਸ ਵੇਲੇ ਕਰਜ਼ੇ ਦੇ ਮਾਮਲੇ ਵਿੱਚ ਤਿਹਾੜ ਜੇਲ੍ਹ ਵਿੱਚ ਸਜ਼ਾ ਕੱਟ ਰਹੇ ਹਨ। ਲੰਬੇ ਸਮੇਂ ਤੋਂ ਚੱਲ ਰਹੇ ਇਸ ਚੈੱਕ ਬਾਊਂਸ ਮਾਮਲੇ ਵਿੱਚ ਰਾਜਪਾਲ ਨੇ ਆਖ਼ਰਕਾਰ ਆਤਮ-ਸਮਰਪਣ ਕਰ ਦਿੱਤਾ ਅਤੇ ਹੁਣ ਆਪਣੀ ਸਜ਼ਾ ਕੱਟ ਰਹੇ ਹਨ। ਅਜਿਹੇ ਵਿੱਚ ਆਓ ਜਾਣਦੇ ਹਾਂ ਕਿ ਕੀ ਸਜ਼ਾ ਕੱਟਣ ਤੋਂ ਬਾਅਦ ਉਨ੍ਹਾਂ ਨੂੰ ਕਰਜ਼ਾ ਨਹੀਂ ਦੇਣਾ ਪਵੇਗਾ ਜਾਂ ਕੁਝ ਹੋਰ ਹੋਵੇਗਾ?
ਕੀ ਹੈ ਪੂਰਾ ਮਾਮਲਾ?
ਸਭ ਤੋਂ ਪਹਿਲਾਂ ਜਾਣ ਲੈਂਦੇ ਹਾਂ ਕਿ ਆਖ਼ਰ ਮਾਮਲਾ ਕੀ ਸੀ। ਦਰਅਸਲ ਰਾਜਪਾਲ ਯਾਦਵ ਨੇ 2010 ਵਿੱਚ ਇੱਕ ਫ਼ਿਲਮ ਬਣਾਉਣ ਲਈ ਦਿੱਲੀ ਦੇ 'ਮੁਰਲੀ ਪ੍ਰੋਜੈਕਟ ਪ੍ਰਾਈਵੇਟ ਲਿਮਟਿਡ' ਤੋਂ 5 ਕਰੋੜ ਰੁਪਏ ਦਾ ਲੋਨ ਲਿਆ ਸੀ। ਇਸ ਫ਼ਿਲਮ ਦਾ ਨਾਂ 'ਅਤਾ-ਪਤਾ ਲਾਪਤਾ' ਸੀ, ਜੋ ਕਿ ਫਲਾਪ ਰਹੀ ਸੀ। ਇਸ ਫ਼ਿਲਮ ਨੇ ਬਾਕਸ ਆਫਿਸ 'ਤੇ ਲਗਪਗ 37 ਲੱਖ ਰੁਪਏ ਦੀ ਕਮਾਈ ਕੀਤੀ ਸੀ, ਜਿਸ ਨਾਲ ਰਾਜਪਾਲ ਦੇ ਪੈਸੇ ਡੁੱਬ ਗਏ ਸਨ। ਇਸ ਤੋਂ ਬਾਅਦ ਉਹ ਲੋਨ ਵੀ ਨਹੀਂ ਚੁਕਾ ਸਕੇ।
2018 ’ਚ ਵੀ ਗਏ ਸਨ ਜੇਲ੍ਹ
ਰਾਜਪਾਲ ਯਾਦਵ ਨੇ ਕਰਜ਼ਾ ਚੁਕਾਉਣ ਲਈ 7 ਚੈੱਕ ਦਿੱਤੇ ਸਨ, ਜੋ ਸਾਰੇ ਬਾਊਂਸ ਹੋ ਗਏ ਅਤੇ ਇਸ ਤੋਂ ਬਾਅਦ ਇਹ ਮਾਮਲਾ ਕਾਨੂੰਨੀ ਪ੍ਰਕਿਰਿਆ ਵਿੱਚ ਚਲਾ ਗਿਆ। ਸਾਲ 2018 ਵਿੱਚ, ਧਾਰਾ 138 ਦੇ ਤਹਿਤ ਰਾਜਪਾਲ ਯਾਦਵ ਅਤੇ ਉਨ੍ਹਾਂ ਦੀ ਪਤਨੀ ਨੂੰ ਦੋਸ਼ੀ ਠਹਿਰਾਇਆ ਗਿਆ ਅਤੇ 6 ਮਹੀਨੇ ਦੀ ਜੇਲ੍ਹ ਦੀ ਸਜ਼ਾ ਸੁਣਾਈ ਗਈ। ਹਾਲਾਂਕਿ, ਬਾਅਦ ਵਿੱਚ ਅਦਾਕਾਰ ਨੂੰ ਜ਼ਮਾਨਤ ਮਿਲ ਗਈ ਸੀ।
ਕੀ ਮਾਫ਼ ਹੋਵੇਗਾ ਕਰਜ਼ਾ?
ਸਾਲ 2024 ਤੱਕ ਇਹ ਕਰਜ਼ਾ ਵਿਆਜ ਸਮੇਤ ਵਧ ਕੇ 9 ਕਰੋੜ ਰੁਪਏ ਹੋ ਗਿਆ। ਅਦਾਲਤ ਨੇ ਕਈ ਵਾਰ ਆਪਸੀ ਸਮਝੌਤਾ ਕਰਨ ਲਈ ਸਮਾਂ ਦਿੱਤਾ, ਪਰ ਅਦਾਕਾਰ ਵੱਲੋਂ ਭੁਗਤਾਨ ਨਹੀਂ ਕੀਤਾ ਗਿਆ। ਅਦਾਲਤ ਨੇ ਇਸ 'ਤੇ ਸਖ਼ਤ ਰੁਖ਼ ਅਖ਼ਤਿਆਰ ਕੀਤਾ ਅਤੇ ਫਿਰ 5 ਫਰਵਰੀ 2026 ਨੂੰ ਅਦਾਕਾਰ ਨੇ ਤਿਹਾੜ ਜੇਲ੍ਹ ਵਿੱਚ ਆਤਮ-ਸਮਰਪਣ ਕਰ ਦਿੱਤਾ। ਹੁਣ ਸਵਾਲ ਇਹ ਉੱਠਦਾ ਹੈ ਕਿ ਕੀ ਸਜ਼ਾ ਕੱਟਣ ਨਾਲ ਰਾਜਪਾਲ ਦਾ ਕਰਜ਼ਾ ਮਾਫ਼ ਹੋ ਜਾਵੇਗਾ?
ਤਾਂ ਇਸ ਦਾ ਜਵਾਬ ਹੈ ਨਹੀਂ। ਕਾਨੂੰਨੀ ਤੌਰ 'ਤੇ ਰਾਜਪਾਲ ਨੂੰ ਸਜ਼ਾ ਕੱਟਣ ਤੋਂ ਬਾਅਦ 9 ਕਰੋੜ ਰੁਪਏ ਤਾਂ ਚੁਕਾਉਣੇ ਹੀ ਪੈਣਗੇ ਜਾਂ ਫਿਰ ਉਨ੍ਹਾਂ ਨੂੰ ਸਮਝੌਤਾ ਕਰਨਾ ਪਵੇਗਾ। ਚੈੱਕ ਬਾਊਂਸ ਮਾਮਲੇ ਵਿੱਚ ਦੋ ਤਰ੍ਹਾਂ ਦੀ ਸਜ਼ਾ ਹੁੰਦੀ ਹੈ- ਕ੍ਰਿਮੀਨਲ (ਜੇਲ੍ਹ ਦੀ ਸਜ਼ਾ ਅਤੇ ਪੈਨਲਟੀ) ਅਤੇ ਸਿਵਲ ਦੇਣਦਾਰੀ (ਮੂਲ ਰਕਮ, ਵਿਆਜ ਅਤੇ ਹਰਜਾਨਾ ਚੁਕਾਉਣਾ ਪਵੇਗਾ)। ਇਸ ਦਾ ਮਤਲਬ ਹੈ ਕਿ ਸਜ਼ਾ ਤੋਂ ਬਾਅਦ ਵੀ ਰਾਜਪਾਲ ਨੂੰ ਕਰਜ਼ਾ ਤਾਂ ਚੁਕਾਉਣਾ ਹੀ ਪਵੇਗਾ। ਦੂਜੇ ਪਾਸੇ, ਜੇਕਰ ਉਹ ਬਾਕੀ ਰਹਿੰਦੀ ਰਕਮ ਚੁਕਾ ਦਿੰਦੇ ਹਨ, ਤਾਂ ਉਨ੍ਹਾਂ ਦੀ ਸਜ਼ਾ ਮੁਅੱਤਲ (ਸਸਪੈਂਡ) ਵੀ ਹੋ ਸਕਦੀ ਹੈ।