ਬਾਦਸ਼ਾਹ ਦੇ ਨਵੇਂ ਗਾਣੇ 'ਤੇ ਇੰਨਾ ਵਿਵਾਦ ਕਿਉਂ? ਕੀ ਹੁੰਦਾ ਹੈ 'ਟਟੀਰੀ' ਦਾ ਮਤਲਬ? ਹਰਿਆਣਾ ਨਾਲ ਹੈ ਗਹਿਰਾ ਸਬੰਧ

ਕੀ ਹੈ 'ਟਟੀਰੀ' ਦਾ ਅਰਥ?

ਟਟੀਰੀ ਇੱਕ ਪੰਛੀ ਹੈ, ਜਿਸ ਨੂੰ ਟਟੀਹਰੀ ਵੀ ਕਿਹਾ ਜਾਂਦਾ ਹੈ। ਇਹ ਅਕਸਰ ਖੁੱਲ੍ਹੇ ਮੈਦਾਨਾਂ ਵਿੱਚ ਜ਼ਮੀਨ 'ਤੇ ਹੀ ਆਪਣੇ ਆਂਡੇ ਦਿੰਦੀ ਹੈ। ਹਰਿਆਣਾ ਦੀ ਲੋਕ ਪਰੰਪਰਾ ਵਿੱਚ ਟਟੀਹਰੀ ਦਾ ਵਿਸ਼ੇਸ਼ ਸਥਾਨ ਹੈ ਅਤੇ ਇਸ ਉੱਤੇ ਕਈ ਲੋਕ-ਗੀਤ ਪ੍ਰਚਲਿਤ ਹਨ। ਖ਼ਾਸ ਕਰਕੇ ਔਰਤਾਂ ਆਪਣੀਆਂ ਇੱਛਾਵਾਂ ਅਤੇ ਭਾਵਨਾਵਾਂ ਨੂੰ ਟਟੀਹਰੀ ਦੇ ਪ੍ਰਤੀਕ ਰਾਹੀਂ ਗੀਤਾਂ ਵਿੱਚ ਪ੍ਰਗਟ ਕਰਦੀਆਂ ਹਨ।

ਲੋਕ-ਗੀਤ ਦੀ ਇੱਕ ਪੰਕਤੀ ਇਸ ਤਰ੍ਹਾਂ ਪ੍ਰਚਲਿਤ ਹੈ— "ਜੈ ਰੀ ਟਟੀਰੀ, ਮੇਰਾ ਰੀ ਬਿਆਹ ਹੋ ਜਿਆ, ਤੇਰੀ ਰੀ ਸੋਨੇ ਕੀ ਚੋਂਚ ਘੜਵਾ ਹੂੰ।" (ਭਾਵ: ਹੇ ਟਟੀਰੀ, ਜੇ ਮੇਰਾ ਵਿਆਹ ਹੋ ਜਾਵੇ, ਤਾਂ ਮੈਂ ਤੇਰੀ ਸੋਨੇ ਦੀ ਚੁੰਝ ਬਣਵਾਵਾਂਗੀ)। ਟਟੀਹਰੀ ਨਾਲ ਜੁੜਿਆ ਇੱਕ ਪ੍ਰਸੰਗ ਮਹਾਂਭਾਰਤ ਕਾਲ ਨਾਲ ਵੀ ਸਬੰਧਤ ਮੰਨਿਆ ਜਾਂਦਾ ਹੈ।

ਮਾਨਤਾ ਹੈ ਕਿ ਮਹਾਂਭਾਰਤ ਯੁੱਧ ਦੌਰਾਨ ਰਣਭੂਮੀ ਵਿੱਚ ਰੱਖੇ ਟਟੀਹਰੀ ਦੇ ਆਂਡਿਆਂ ਦੀ ਰੱਖਿਆ ਖੁਦ ਭਗਵਾਨ ਨੇ ਕੀਤੀ ਸੀ। ਇਸੇ ਕਾਰਨ ਲੋਕ-ਵਿਸ਼ਵਾਸ ਹੈ ਕਿ ਟਟੀਹਰੀ ਮਨੋਕਾਮਨਾਵਾਂ ਨੂੰ ਸਿੱਧਾ ਪ੍ਰਮਾਤਮਾ ਤੱਕ ਪਹੁੰਚਾਉਣ ਵਾਲਾ ਇੱਕ ਪ੍ਰਤੀਕਾਤਮਕ ਪੰਛੀ ਮੰਨਿਆ ਜਾਂਦਾ ਹੈ। ਹਰਿਆਣਵੀ ਲੋਕ-ਗੀਤਾਂ ਵਿੱਚ ਇਸਦੀ ਇਸੇ ਧਾਰਮਿਕ ਅਤੇ ਸੱਭਿਆਚਾਰਕ ਮਾਨਤਾ ਕਾਰਨ ਵਿਸ਼ੇਸ਼ ਮਹੱਤਤਾ ਰਹੀ ਹੈ।

ਰੈਪਰ ਬਾਦਸ਼ਾਹ ਦੇ ਗੀਤ 'ਟਟੀਰੀ' ਵਿੱਚ ਆਵਾਜ਼ ਦੇਣ ਵਾਲੀ ਕੈਥਲ ਦੀ ਸਿਮਰਨ ਜਾਗਲਾਨ ਵੀ ਪਹਿਲਾਂ ਰਵਾਇਤੀ ਰੂਪ ਵਿੱਚ ਇਹ ਲੋਕ-ਗੀਤ ਗਾ ਚੁੱਕੀ ਹੈ। ਬਾਦਸ਼ਾਹ ਦੀ ਟੀਮ ਨੇ ਉਨ੍ਹਾਂ ਨਾਲ ਸੰਪਰਕ ਕਰਕੇ ਇਸੇ ਹਰਿਆਣਵੀ ਲੋਕ-ਧੁਨ ਵਿੱਚ ਰੈਪ ਸ਼ੈਲੀ ਜੋੜੀ। ਇੱਕ ਮਾਰਚ ਨੂੰ ਜਾਰੀ ਹੋਏ ਇਸ ਗੀਤ ਨੂੰ ਯੂਟਿਊਬ 'ਤੇ ਹੁਣ ਤੱਕ 20 ਲੱਖ ਤੋਂ ਵੱਧ ਵਾਰ ਦੇਖਿਆ ਜਾ ਚੁੱਕਾ ਹੈ।

ਰੋਡਵੇਜ਼ ਬੱਸ ਦਿਖਾਉਣ 'ਤੇ ਵਿਭਾਗ ਨੇ ਦਰਜ ਕਰਵਾਇਆ ਕੇਸ

ਦੂਜੇ ਪਾਸੇ, ਹਰਿਆਣਾ ਰਾਜ ਟ੍ਰਾਂਸਪੋਰਟ ਜੀਂਦ ਦੇ ਜਨਰਲ ਮੈਨੇਜਰ ਵੱਲੋਂ ਪੁਲਿਸ ਨੂੰ ਭੇਜੇ ਪੱਤਰ ਵਿੱਚ ਕਿਹਾ ਗਿਆ ਹੈ ਕਿ 'ਟਟੀਰੀ' ਗੀਤ ਦੀ ਵੀਡੀਓ ਵਿੱਚ ਹਰਿਆਣਾ ਰੋਡਵੇਜ਼ ਦੀ ਬੱਸ ਅਤੇ ਵਿਭਾਗ ਨਾਲ ਜੁੜੇ ਪ੍ਰਤੀਕਾਂ ਦੀ ਵਰਤੋਂ ਬਿਨਾਂ ਇਜਾਜ਼ਤ ਕੀਤੀ ਗਈ ਹੈ। ਵਿਭਾਗ ਦਾ ਕਹਿਣਾ ਹੈ ਕਿ ਇਸ ਲਈ ਕੋਈ ਪਹਿਲਾਂ ਤੋਂ ਮਨਜ਼ੂਰੀ ਨਹੀਂ ਲਈ ਗਈ ਸੀ। ਇਸ ਦੇ ਨਾਲ ਹੀ, ਇਤਰਾਜ਼ਯੋਗ ਸਮੱਗਰੀ ਕਾਰਨ ਰੋਡਵੇਜ਼ ਦੇ ਅਕਸ ਨੂੰ ਵੀ ਨੁਕਸਾਨ ਪਹੁੰਚਿਆ ਹੈ।