Dhurandhar ਦੀ ਸਫਲਤਾ ਤੋਂ ਕਿਉਂ ਖੁਸ਼ ਨਹੀਂ ਹਨ ਆਮਿਰ ਖਾਨ? 'ਮਿਸਟਰ ਪਰਫੈਕਸ਼ਨਿਸਟ' ਨੂੰ ਖਲੀ ਇਸ ਗੱਲ ਦੀ ਕਮੀ

ਇੱਕ ਇੰਟਰਵਿਊ ਦੌਰਾਨ ਗੱਲ ਕਰਦਿਆਂ ਆਮਿਰ ਨੇ ਕਿਹਾ, 'ਭਾਰਤ ਇੱਕ ਬਹੁਤ ਵੱਡਾ ਦੇਸ਼ ਹੈ, ਇਹ ਇੱਕ ਮਹਾਂਦੀਪ ਵਰਗਾ ਹੈ। ਇਹ ਬਹੁਤ ਵਿਸ਼ਾਲ ਹੈ ਅਤੇ ਹਰ ਰਾਜ ਦੀ ਆਪਣੀ ਭਾਸ਼ਾ, ਆਪਣੀ ਸੰਸਕ੍ਰਿਤੀ ਅਤੇ ਆਪਣੀਆਂ ਫ਼ਿਲਮਾਂ ਹਨ। ਇਸ ਲਈ, ਮੈਨੂੰ ਸੱਚਮੁੱਚ ਲੱਗਦਾ ਹੈ ਕਿ ਭਾਰਤ ਵਰਗੇ ਦੇਸ਼ ਵਿੱਚ, ਸਾਨੂੰ ਹੋਰ ਵੀ ਬਹੁਤ ਸਾਰੇ ਸਿਨੇਮਾ ਹਾਲ ਅਤੇ ਜ਼ਿਆਦਾ ਆਊਟਲੇਟ ਚਾਹੀਦੇ ਹਨ, ਤਾਂ ਜੋ ਅਸੀਂ ਵੱਧ ਤੋਂ ਵੱਧ ਲੋਕਾਂ ਤੱਕ ਪਹੁੰਚ ਸਕੀਏ। ਜੇਕਰ ਤੁਸੀਂ ਚੀਨ ਨਾਲ ਮੁਕਾਬਲਾ ਕਰਨਾ ਚਾਹੁੰਦੇ ਹੋ, ਉਦਾਹਰਣ ਵਜੋਂ, ਉਨ੍ਹਾਂ ਕੋਲ ਮੈਨੂੰ ਲੱਗਦਾ ਹੈ ਕਿ ਇੱਕ ਲੱਖ ਸਕ੍ਰੀਨਾਂ ਹਨ।'

ਚੀਨ ਨਾਲ ਕੀਤੀ ਤੁਲਨਾ

ਆਮਿਰ ਨੇ ਅੱਗੇ ਕਿਹਾ, 'ਸਾਡੇ ਕੋਲ 9,000 ਸਕ੍ਰੀਨਾਂ ਹਨ। ਇਹ ਕਿਹੜਾ ਮੁਕਾਬਲਾ ਹੈ? ਆਊਟਲੇਟਸ ਦੇ ਮਾਮਲੇ ਵਿੱਚ ਅਸੀਂ ਉਨ੍ਹਾਂ ਦੇ ਆਕਾਰ ਦਾ ਦਸਵਾਂ ਹਿੱਸਾ ਹਾਂ। ਇਸੇ ਲਈ ਚੀਨ ਵਿੱਚ ਇੱਕ ਵੱਡੀ ਫ਼ਿਲਮ ਬਹੁਤ ਵੱਡਾ ਕਾਰੋਬਾਰ ਕਰਦੀ ਹੈ, ਉਹ ਸਿਰਫ਼ ਚੀਨ ਵਿੱਚ ਹੀ ਦੋ ਬਿਲੀਅਨ ਅਮਰੀਕੀ ਡਾਲਰ ਦਾ ਕਾਰੋਬਾਰ ਕਰ ਲੈਂਦੀ ਹੈ। ਸਿਰਫ਼ ਚੀਨ ਵਿੱਚ ਵੱਡੀਆਂ ਫ਼ਿਲਮਾਂ ਇਸ ਤਰ੍ਹਾਂ ਦਾ ਕਾਰੋਬਾਰ ਕਰਦੀਆਂ ਹਨ। ਉੱਥੋਂ ਦੀਆਂ ਵੱਡੀਆਂ ਫ਼ਿਲਮਾਂ ਅਰਬਾਂ ਡਾਲਰ ਕਮਾਉਂਦੀਆਂ ਹਨ। ਇਸ ਲਈ, ਜਦੋਂ ਅਸੀਂ ਆਪਣੀਆਂ ਸਕ੍ਰੀਨਾਂ ਦੀ ਗਿਣਤੀ ਵਧਾਵਾਂਗੇ, ਤਾਂ ਤੁਸੀਂ ਦੇਖੋਗੇ ਕਿ ਤੁਹਾਡੇ ਪਿਰਾਮਿਡ ਦਾ ਆਧਾਰ ਹੋਰ ਚੌੜਾ ਹੋ ਜਾਵੇਗਾ।'

'ਧੁਰੰਧਰ' ਬਾਰੇ ਕੀ ਬੋਲੇ ਆਮਿਰ ਖਾਨ?

ਆਪਣੀ ਗੱਲ ਨੂੰ ਅੱਗੇ ਵਧਾਉਂਦੇ ਹੋਏ ਆਮਿਰ ਨੇ 'ਧੁਰੰਧਰ' ਦੀ ਮਿਸਾਲ ਦਿੰਦਿਆਂ ਕਿਹਾ, 'ਚਲੋ ਧੁਰੰਧਰ ਦੀ ਉਦਾਹਰਣ ਲੈਂਦੇ ਹਾਂ, ਜਿਸ ਨੇ ਲਗਪਗ 1,000 ਕਰੋੜ ਰੁਪਏ ਕਮਾਏ ਹਨ। ਹੁਣ ਸੋਚੋ, ਜੇਕਰ ਇਹ 5,000 ਸਕ੍ਰੀਨਾਂ ਦੀ ਬਜਾਏ 15,000 ਸਕ੍ਰੀਨਾਂ 'ਤੇ ਰਿਲੀਜ਼ ਹੁੰਦੀ, ਤਾਂ ਨਤੀਜਾ ਹੈਰਾਨੀਜਨਕ ਹੁੰਦਾ! ਮੈਂ ਇਹੀ ਕਹਿਣਾ ਚਾਹ ਰਿਹਾ ਹਾਂ ਕਿ ਅਸਲੀ ਬਦਲਾਅ ਉਦੋਂ ਆਵੇਗਾ ਜਦੋਂ ਸਕ੍ਰੀਨਾਂ ਦੀ ਗਿਣਤੀ ਵਧੇਗੀ, ਕਿਉਂਕਿ ਅਜੇ ਵੀ ਭਾਰਤ ਵਿੱਚ ਕਈ ਅਜਿਹੇ ਜ਼ਿਲ੍ਹੇ ਹਨ ਜਿੱਥੇ ਇੱਕ ਵੀ ਸਿਨੇਮਾ ਸਕ੍ਰੀਨ ਨਹੀਂ ਹੈ।'

ਆਮਿਰ ਖਾਨ ਦਾ ਵਰਕਫਰੰਟ

ਪ੍ਰੋਫੈਸ਼ਨਲ ਫਰੰਟ ਦੀ ਗੱਲ ਕਰੀਏ ਤਾਂ ਆਮਿਰ ਖਾਨ ਹਾਲ ਹੀ ਵਿੱਚ ਫ਼ਿਲਮ 'ਹੈਪੀ ਪਟੇਲ: ਖ਼ਤਰਨਾਕ ਜਾਸੂਸ' ਵਿੱਚ ਨਜ਼ਰ ਆਏ ਸਨ, ਜਿਸ ਵਿੱਚ ਉਨ੍ਹਾਂ ਨੇ ਕੈਮਿਓ ਕੀਤਾ ਸੀ ਅਤੇ ਉਹ ਫ਼ਿਲਮ ਦੇ ਨਿਰਮਾਤਾ ਵੀ ਸਨ।

ਖ਼ਬਰਾਂ ਮੁਤਾਬਕ ਆਮਿਰ ਖਾਨ, ਰਾਜਕੁਮਾਰ ਹਿਰਾਨੀ ਦੇ ਨਿਰਦੇਸ਼ਨ ਹੇਠ ਬਣਨ ਵਾਲੀ ਇੱਕ ਬਾਇਓਪਿਕ ਵਿੱਚ ਮਹਾਨ ਫ਼ਿਲਮ ਨਿਰਮਾਤਾ ਦਾਦਾਸਾਹਿਬ ਫਾਲਕੇ ਦਾ ਕਿਰਦਾਰ ਨਿਭਾਉਣ ਵਾਲੇ ਹਨ, ਹਾਲਾਂਕਿ ਅਜੇ ਤੱਕ ਇਸ ਦੀ ਕੋਈ ਅਧਿਕਾਰਤ ਪੁਸ਼ਟੀ ਨਹੀਂ ਹੋਈ ਹੈ।

ਉਨ੍ਹਾਂ ਨੇ ਇਹ ਵੀ ਪੁਸ਼ਟੀ ਕੀਤੀ ਹੈ ਕਿ 'ਮਹਾਭਾਰਤ' 'ਤੇ ਆਧਾਰਿਤ ਉਨ੍ਹਾਂ ਦੇ ਲੰਬੇ ਸਮੇਂ ਤੋਂ ਚੱਲ ਰਹੇ ਡ੍ਰੀਮ ਪ੍ਰੋਜੈਕਟ 'ਤੇ ਕੰਮ ਸ਼ੁਰੂ ਹੋ ਗਿਆ ਹੈ।