ਮਾਧੁਰੀ ਦੀਕਸ਼ਿਤ ਦਾ 38 ਸਾਲ ਪੁਰਾਣਾ ਗੀਤ, 24 ਘੰਟੇ ਸ਼ੂਟ ਕਰਦੇ-ਕਰਦੇ ਪੈਰਾਂ 'ਚੋਂ ਨਿਕਲਣ ਵਾਲਾ ਸੀ ਖ਼ੂਨ; ਲਾਈਵ ਆਡੀਅੰਸ ਸੀ ਮੌਜੂਦ

ਮਾਧੁਰੀ ਦੇ ਪੈਰਾਂ 'ਚੋਂ ਨਿਕਲਣ ਵਾਲਾ ਸੀ ਖ਼ੂਨ

ਇਹ ਗੀਤ ਸਾਲ 1988 ਵਿੱਚ ਰਿਲੀਜ਼ ਹੋਈ ਐਨ. ਚੰਦਰਾ ਦੇ ਨਿਰਦੇਸ਼ਨ ਵਾਲੀ ਫ਼ਿਲਮ 'ਤੇਜ਼ਾਬ' ਦਾ ਹੈ। 'ਏਕ ਦੋ ਤੀਨ ਚਾਰ' ਨਾਮ ਦੇ ਇਸ ਗੀਤ ਨੂੰ ਅਲਕਾ ਯਾਗਨਿਕ ਨੇ ਗਾਇਆ ਸੀ। ਇਸ ਗੀਤ ਵਿੱਚ ਮਾਧੁਰੀ ਦੀਕਸ਼ਿਤ ਦੇ ਡਾਂਸ ਸਟੈਪਸ ਨੂੰ ਬਹੁਤ ਪਸੰਦ ਕੀਤਾ ਗਿਆ ਸੀ ਅਤੇ ਅੱਜ ਵੀ ਇਹ ਓਨੇ ਹੀ ਮਸ਼ਹੂਰ ਹਨ। ਇੱਕ ਇੰਟਰਵਿਊ ਵਿੱਚ ਜਦੋਂ ਮਾਧੁਰੀ ਨੂੰ ਪੁੱਛਿਆ ਗਿਆ ਕਿ ਇਸ ਗੀਤ ਵਿੱਚ ਕਿੰਨੇ ਨੰਬਰ ਹਨ, ਤਾਂ ਅਦਾਕਾਰਾ ਨੇ ਦੱਸਿਆ ਕਿ ਗੀਤ ਵਿੱਚ ਕੁੱਲ 30 ਤੱਕ ਗਿਣਤੀ ਹੈ।

ਇਸ ਗੀਤ ਨੂੰ ਮਸ਼ਹੂਰ ਕੋਰੀਓਗ੍ਰਾਫਰ ਸਰੋਜ ਖ਼ਾਨ ਨੇ ਕੋਰੀਓਗ੍ਰਾਫ ਕੀਤਾ ਸੀ। 'ਮਸ਼ੇਬਲ' ਨਾਲ ਗੱਲਬਾਤ ਦੌਰਾਨ ਜਦੋਂ ਪੁੱਛਿਆ ਗਿਆ ਕਿ ਸਰੋਜ ਖ਼ਾਨ ਨੇ ਦੱਸਿਆ ਸੀ ਕਿ ਸ਼ੂਟਿੰਗ ਦੌਰਾਨ ਤੁਹਾਡੇ ਪੈਰਾਂ 'ਚੋਂ ਖ਼ੂਨ ਨਿਕਲਣ ਲੱਗ ਪਿਆ ਸੀ, ਤਾਂ ਮਾਧੁਰੀ ਨੇ ਸਪੱਸ਼ਟ ਕਰਦਿਆਂ ਕਿਹਾ ਕਿ ਖ਼ੂਨ ਨਿਕਲਣ ਹੀ ਵਾਲਾ ਸੀ। ਅਦਾਕਾਰਾ ਨੇ ਕਿਹਾ, "ਨਹੀਂ, ਖ਼ੂਨ ਆ ਸਕਦਾ ਸੀ ਕਿਉਂਕਿ ਇਹ ਬਹੁਤ ਵੱਡਾ ਗੀਤ ਸੀ।"

ਗੀਤ ਵਿੱਚ ਸ਼ਾਮਲ ਸੀ 'ਲਾਈਵ ਆਡੀਅੰਸ'

ਮਾਧੁਰੀ ਦੀਕਸ਼ਿਤ ਨੇ ਅੱਗੇ ਦੱਸਿਆ, "ਨਿਰਦੇਸ਼ਕ ਐਨ. ਚੰਦਰਾ ਨੇ ਪੂਰਾ ਮਹਿਬੂਬ ਸਟੂਡੀਓ ਭਰ ਦਿੱਤਾ ਸੀ। ਉਨ੍ਹਾਂ ਕੋਲ ਸਿਰਫ਼ ਪਹਿਲੀਆਂ 5-6 ਲਾਈਨਾਂ ਵਿੱਚ ਹੀ ਜੂਨੀਅਰ ਆਰਟਿਸਟ ਸਨ। ਫਿਰ ਉਨ੍ਹਾਂ ਨੂੰ ਮਹਿਸੂਸ ਹੋਇਆ ਕਿ ਸਟੂਡੀਓ ਨੂੰ ਪੂਰਾ ਭਰ ਕੇ ਇੱਕ 'ਟੌਪ ਸ਼ਾਟ' ਲੈਣਾ ਚਾਹੀਦਾ ਹੈ। ਇਸ ਲਈ ਉਨ੍ਹਾਂ ਨੇ ਸੜਕ 'ਤੇ ਖੜ੍ਹੇ ਲੋਕਾਂ ਨੂੰ ਕਿਹਾ, 'ਫ਼ਿਲਮ 'ਚ ਕੰਮ ਕਰਨਾ ਹੈ? ਅੰਦਰ ਆ ਜਾਓ।' ਇਸ ਤਰ੍ਹਾਂ ਉਨ੍ਹਾਂ ਨੇ ਬਹੁਤ ਸਾਰੇ ਆਮ ਲੋਕਾਂ ਨੂੰ ਗਲੀ-ਮੋੜ ਤੋਂ ਬੁਲਾ ਕੇ ਸਟੂਡੀਓ ਵਿੱਚ ਇਕੱਠਾ ਕਰ ਲਿਆ ਸੀ।"

ਅਸਲੀ ਸੀ ਗੀਤ ਦਾ 'ਆਈਕੋਨਿਕ ਸੀਨ'

ਮਾਧੁਰੀ ਦੀਕਸ਼ਿਤ ਨੇ ਦੱਸਿਆ, "ਜਦੋਂ ਗੀਤ ਦੀ ਸ਼ੂਟਿੰਗ ਚੱਲ ਰਹੀ ਸੀ, ਤਾਂ ਸਟੂਡੀਓ ਵਿੱਚ ਮੌਜੂਦ ਆਮ ਲੋਕਾਂ ਨੂੰ ਇਹ ਬਹੁਤ ਪਸੰਦ ਆ ਰਿਹਾ ਸੀ। ਉਤਸ਼ਾਹ ਵਿੱਚ ਆ ਕੇ ਇੱਕ ਜਣੇ ਨੇ ਸ਼ੂਟ ਦੇ ਵਿਚਕਾਰ ਹੀ ਆਪਣੀ ਸ਼ਰਟ ਉਤਾਰ ਕੇ ਹਵਾ ਵਿੱਚ ਸੁੱਟ ਦਿੱਤੀ। ਜਦੋਂ ਨਿਰਦੇਸ਼ਕ ਐਨ. ਚੰਦਰਾ ਜੀ ਨੇ ਇਹ ਦੇਖਿਆ, ਤਾਂ ਉਨ੍ਹਾਂ ਨੂੰ ਇਹ ਬਹੁਤ ਵਧੀਆ ਲੱਗਿਆ। ਉਨ੍ਹਾਂ ਨੇ ਤੁਰੰਤ ਕਿਹਾ— 'ਭਰਾਵੋ, ਸਾਰੇ ਜਾਣੇ ਆਪਣੀਆਂ ਸ਼ਰਟਾਂ ਉਤਾਰ ਕੇ ਹਵਾ ਵਿੱਚ ਸੁੱਟ ਦਿਓ।' ਸ਼ੂਟਿੰਗ ਦੇ ਆਖਰੀ ਦਿਨ ਇੰਨਾ ਜ਼ਿਆਦਾ ਦਬਾਅ ਸੀ ਕਿ ਕੰਮ ਖ਼ਤਮ ਕਰਨਾ ਹੀ ਪੈਣਾ ਸੀ, ਕਿਉਂਕਿ ਅਗਲੇ ਦਿਨ ਸੈੱਟ ਤੋੜਿਆ ਜਾਣਾ ਸੀ।"

ਥਕਾਵਟ ਦਾ ਬਹਾਨਾ ਵੀ ਨਹੀਂ ਆਇਆ ਸੀ ਕੰਮ

ਮਾਧੁਰੀ ਦੀਕਸ਼ਿਤ ਨੇ ਦੱਸਿਆ ਕਿ ਉਨ੍ਹਾਂ ਨੇ ਲਗਾਤਾਰ 24 ਘੰਟੇ ਸ਼ੂਟਿੰਗ ਕੀਤੀ ਸੀ। ਉਨ੍ਹਾਂ ਕਿਹਾ, "ਅਸੀਂ ਪੂਰਾ ਦਿਨ ਅਤੇ ਪੂਰੀ ਰਾਤ ਸ਼ੂਟ ਕੀਤਾ ਅਤੇ ਅਗਲੇ ਦਿਨ ਸਵੇਰੇ ਸਾਢੇ 10 ਵਜੇ ਪੈਕਅੱਪ ਹੋਇਆ। ਮੈਂ ਬਹੁਤ ਥੱਕ ਗਈ ਸੀ ਅਤੇ ਚਾਹੁੰਦੀ ਸੀ ਕਿ ਕਿਸੇ ਤਰ੍ਹਾਂ ਸ਼ੂਟਿੰਗ ਰੁਕ ਜਾਵੇ। ਮੈਂ ਚੰਦਰਾ ਜੀ ਕੋਲ ਗਈ ਅਤੇ ਕਿਹਾ ਕਿ ਮੈਂ ਬਹੁਤ ਥੱਕ ਗਈ ਹਾਂ, ਤੁਸੀਂ ਕਲੋਜ਼-ਅੱਪ ਸ਼ਾਟ ਲੈ ਰਹੇ ਹੋ ਅਤੇ ਮੇਰੀ ਥਕਾਵਟ ਸਾਫ਼ ਦਿਖੇਗੀ। ਪਰ ਉਨ੍ਹਾਂ ਨੇ ਮੁਸਕਰਾ ਕੇ ਕਿਹਾ— 'ਅੱਛਾ, ਫਿਰ ਲੌਂਗ ਸ਼ਾਟ ਲੈ ਲੈਂਦੇ ਹਾਂ।' ਇਸ ਤਰ੍ਹਾਂ ਉਨ੍ਹਾਂ ਨੇ ਕੰਮ ਨਹੀਂ ਰੋਕਿਆ ਅਤੇ ਅਸੀਂ ਪੂਰਾ ਗੀਤ ਮੁਕੰਮਲ ਕੀਤਾ।"