ਪਟੜੀ 'ਤੇ ਪਰਤੀ ਕਾਰਤਿਕ ਆਰੀਅਨ ਦੀ ਡੱਬਾਬੰਦ ਹੋਈ ਇਹ ਫ਼ਿਲਮ, 5 ਸਾਲ ਬਾਅਦ ਸੱਚੀ ਘਟਨਾ 'ਤੇ ਅਧਾਰਤ ਮੂਵੀ ਦੀ ਤਿਆਰੀ ਸ਼ੁਰੂ!

ਫਿਰ ਬਣ ਰਹੀ ਹੈ ਡੱਬਾਬੰਦ ਹੋਈ ਫ਼ਿਲਮ

ਫ਼ਿਲਮ ਮੇਕਰ ਹੰਸਲ ਮਹਿਤਾ ਨੇ ਸਾਲ 2021 ਵਿੱਚ ਕਾਰਤਿਕ ਆਰੀਅਨ ਦੇ ਨਾਲ ਫ਼ਿਲਮ 'ਕੈਪਟਨ ਇੰਡੀਆ' ਬਣਾਉਣ ਦਾ ਐਲਾਨ ਕੀਤਾ ਸੀ। ਸੱਚੀ ਘਟਨਾ 'ਤੇ ਅਧਾਰਤ ਇਸ ਫ਼ਿਲਮ ਦਾ ਪੋਸਟਰ ਵੀ ਜਾਰੀ ਕਰ ਦਿੱਤਾ ਗਿਆ ਸੀ, ਪਰ ਫਿਰ ਹੰਸਲ, ਨਿਰਮਾਤਾਵਾਂ ਅਤੇ ਕਾਰਤਿਕ ਦੇ ਵਿਚਕਾਰ ਗੱਲ ਨਾ ਬਣੀ ਤਾਂ ਹੰਸਲ ਇਸ ਫ਼ਿਲਮ ਤੋਂ ਵੱਖ ਹੋ ਗਏ।

ਨਵੇਂ ਨਿਰਮਾਤਾਵਾਂ ਦੇ ਨਾਲ ਫ਼ਿਲਮ ਨੂੰ ਦੁਬਾਰਾ ਬਣਾਉਣ ਦੀ ਤਿਆਰੀ

ਉਸ ਤੋਂ ਬਾਅਦ ਨਿਰਮਾਤਾਵਾਂ ਨੇ ਵੀ ਆਪਣੇ ਹੱਥ ਪਿੱਛੇ ਖਿੱਚ ਲਏ ਅਤੇ ਫ਼ਿਲਮ ਠੰਢੇ ਬਸਤੇ ਵਿੱਚ ਚਲੀ ਗਈ। ਹੁਣ ਖ਼ਬਰਾਂ ਹਨ ਕਿ ਕਾਰਤਿਕ ਦੀ ਇਹ ਫ਼ਿਲਮ ਫਿਰ ਤੋਂ ਪਟੜੀ 'ਤੇ ਪਰਤ ਆਈ ਹੈ। ਸਿਨੇਮਾ ਜਗਤ ਦੀਆਂ ਰਿਪੋਰਟਾਂ ਅਨੁਸਾਰ, ਹੁਣ ਇਸ ਫ਼ਿਲਮ ਨੂੰ ਇੱਕ ਨਵੇਂ ਨਿਰਦੇਸ਼ਕ ਅਤੇ ਕੁਝ ਨਵੇਂ ਸਹਿ-ਨਿਰਮਾਤਾਵਾਂ ਦੇ ਨਾਲ ਬਣਾਉਣ ਦੀ ਤਿਆਰੀ ਹੈ। ਪਹਿਲਾਂ ਇਸ ਫ਼ਿਲਮ ਨੂੰ ਨਿਰਮਾਤਾ ਰੋਨੀ ਸਕ੍ਰੂਵਾਲਾ ਅਤੇ ਹਰਮਨ ਬਾਵੇਜਾ ਬਣਾਉਣ ਵਾਲੇ ਸਨ।

ਕਦੋਂ ਤੋਂ ਸ਼ੁਰੂ ਹੋਵੇਗੀ 'ਕੈਪਟਨ ਇੰਡੀਆ' ਦੀ ਸ਼ੂਟਿੰਗ?

ਸਕ੍ਰੂਵਾਲਾ ਨੇ ਫ਼ਿਲਮ ਤੋਂ ਆਪਣੇ ਹੱਥ ਪਿੱਛੇ ਖਿੱਚ ਲਏ ਹਨ। ਹੁਣ ਇਸ ਫ਼ਿਲਮ ਨੂੰ ਬਣਾਉਣ ਵਿੱਚ ਹਰਮਨ ਦਾ ਸਾਥ ਦੇਣ ਲਈ ਨਿਰਮਾਤਾ ਭੂਸ਼ਣ ਕੁਮਾਰ ਅੱਗੇ ਆਏ ਹਨ। ਫ਼ਿਲਮ ਦੇ ਨਿਰਦੇਸ਼ਨ ਦੀ ਵਾਗਡੋਰ ਹੁਣ 'ਅਬ ਤੱਕ ਛੱਪਨ' ਅਤੇ 'ਚੱਕ ਦੇ ਇੰਡੀਆ' ਵਰਗੀਆਂ ਫ਼ਿਲਮਾਂ ਦੇ ਨਿਰਦੇਸ਼ਕ ਸ਼ਿਮਿਤ ਅਮੀਨ ਦੇ ਹੱਥਾਂ ਵਿੱਚ ਹੋਵੇਗੀ। ਫ਼ਿਲਮ ਦੀ ਸ਼ੂਟਿੰਗ ਲਈ ਲੋਕੇਸ਼ਨਾਂ ਦੀ ਚੋਣ ਕਰ ਲਈ ਗਈ ਹੈ ਅਤੇ ਜਲਦੀ ਹੀ ਫ਼ਿਲਮ ਦੀ ਸ਼ੂਟਿੰਗ ਵੀ ਸ਼ੁਰੂ ਹੋ ਸਕਦੀ ਹੈ।

ਫਿਲਹਾਲ, ਮੇਕਰਸ, ਡਾਇਰੈਕਟਰ ਜਾਂ ਐਕਟਰ ਵੱਲੋਂ ਇਸ ਬਾਰੇ ਅਜੇ ਤੱਕ ਕੋਈ ਅਧਿਕਾਰਤ ਪੁਸ਼ਟੀ ਨਹੀਂ ਕੀਤੀ ਗਈ ਹੈ। ਕਾਰਤਿਕ ਆਰੀਅਨ ਇਨੀਂ ਦਿਨੀਂ ਆਪਣੀ ਫ਼ਿਲਮ 'ਨਾਗਜ਼ਿਲਾ' ਦੀ ਸ਼ੂਟਿੰਗ ਵਿੱਚ ਰੁੱਝੇ ਹੋਏ ਹਨ।