'9-5 ਦੀ ਨੌਕਰੀ ’ਚ ਖ਼ੁਸ਼ ਨਹੀਂ ਸੀ...' Aparshakti Khurana ਨੇ ਇੱਕ ਮਹੀਨੇ ’ਚ ਹੀ ਛੱਡ ਦਿੱਤੀ ਸੀ ਨੌਕਰੀ, ਅੱਜ ਹਨ ਮਲਟੀ-ਟੈਲੇਂਟਿਡ ਸਟਾਰ

ਮਾੜੇ ਸਮੇਂ ਵਿੱਚ ਸੰਗੀਤ ਬਣਦਾ ਹੈ ਸਹਾਰਾ

ਅਪਾਰਸ਼ਕਤੀ ਕਹਿੰਦੇ ਹਨ, ‘ਜਦੋਂ ਮੇਰੀ ਜ਼ਿੰਦਗੀ ਵਿੱਚ ਕੋਈ ਮਾੜਾ ਦਿਨ ਚੱਲ ਰਿਹਾ ਹੁੰਦਾ ਹੈ, ਤਾਂ ਮੈਂ ਸੰਗੀਤ ਦਾ ਸਹਾਰਾ ਲੈਂਦਾ ਹਾਂ। ਗਾਣੇ ਸੁਣਨਾ, ਲਿਖਣਾ ਅਤੇ ਉਨ੍ਹਾਂ ਦੀ ਧੁਨ ਬਣਾਉਣਾ ਮੈਨੂੰ ਖ਼ੁਸ਼ੀ ਦਿੰਦਾ ਹੈ। ਇਹ ਸਭ ਮੈਨੂੰ ਉਸ ਮਾੜੇ ਸਮੇਂ ਵਿੱਚੋਂ ਬਾਹਰ ਨਿਕਲਣ ਵਿੱਚ ਮਦਦ ਕਰਦੇ ਹਨ। ਮੈਂ ਕਿਸਮਤ ਵਾਲਾ ਹਾਂ ਕਿ ਮੈਨੂੰ ਇਹ ਸਭ ਕਰਨ ਦਾ ਮੌਕਾ ਮਿਲ ਰਿਹਾ ਹੈ ਅਤੇ ਦਰਸ਼ਕ ਮੇਰੇ ਕੰਮ ਨੂੰ ਪਸੰਦ ਕਰ ਰਹੇ ਹਨ, ਜਿਸ ਲਈ ਮੈਂ ਉਨ੍ਹਾਂ ਦਾ ਸ਼ੁਕਰਗੁਜ਼ਾਰ ਹਾਂ।’

ਬਹੁਤੀ ਪਲੈਨਿੰਗ ਨਹੀਂ ਕਰਦਾ: ਅਪਾਰਸ਼ਕਤੀ ਖੁਰਾਣਾ

ਕੰਮ ਦੀ ਤਰਜੀਹ ਬਾਰੇ ਉਹ ਕਹਿੰਦੇ ਹਨ, ‘ਮੈਂ ਆਪਣੀ ਜ਼ਿੰਦਗੀ ਵਿੱਚ ਬਹੁਤ ਜ਼ਿਆਦਾ ਯੋਜਨਾਵਾਂ ਬਣਾ ਕੇ ਨਹੀਂ ਚੱਲਦਾ। ਜੋ ਵੀ ਚੀਜ਼ਾਂ ਸੁਭਾਵਿਕ ਰੂਪ ਵਿੱਚ ਮੇਰੇ ਸਾਹਮਣੇ ਆਉਂਦੀਆਂ ਹਨ, ਮੈਂ ਉਹ ਕਰਦਾ ਜਾਂਦਾ ਹਾਂ—ਚਾਹੇ ਉਹ ਅਦਾਕਾਰੀ ਹੋਵੇ, ਹੋਸਟਿੰਗ ਹੋਵੇ ਜਾਂ ਸੰਗੀਤ। ਮੈਂ ਬਹੁਤ ਖ਼ੁਸ਼ ਹਾਂ ਕਿ ਮੁੰਬਈ ਵਰਗੇ ਵਿਅਸਤ ਸ਼ਹਿਰ ਵਿੱਚ ਮੈਨੂੰ ਆਪਣੇ ਮਨ ਦਾ ਕੰਮ ਕਰਨ ਦਾ ਮੌਕਾ ਮਿਲ ਰਿਹਾ ਹੈ।’

ਜ਼ਿੰਦਗੀ ਦੇ ਉਹ ਪੰਨੇ, ਜਿਨ੍ਹਾਂ ਨੂੰ ਕਦੇ ਨਹੀਂ ਖੋਲ੍ਹਣਾ ਚਾਹਾਂਗਾ

ਜਦੋਂ ਉਨ੍ਹਾਂ ਨੂੰ ਪੁੱਛਿਆ ਗਿਆ ਕਿ ਉਹ ਆਪਣੀ ਜ਼ਿੰਦਗੀ ਦਾ ਕਿਹੜਾ ਹਿੱਸਾ ਲੁਕਾ ਕੇ ਰੱਖਣਾ ਚਾਹੁੰਦੇ ਹਨ, ਤਾਂ ਉਨ੍ਹਾਂ ਦੱਸਿਆ, ‘ਮੈਂ ਖ਼ੁਦ ਕਾਨੂੰਨ xਦੀ ਪੜ੍ਹਾਈ ਕੀਤੀ ਹੈ ਅਤੇ ਦਿੱਲੀ ਹਾਈਕੋਰਟ ਵਿੱਚ ਪ੍ਰੈਕਟਿਸ ਕਰਦਾ ਸੀ। ਮੇਰੀ ਜ਼ਿੰਦਗੀ ਦਾ ਉਹ ਇੱਕ ਸਾਲ ਦਾ ਸਮਾਂ, ਜਦੋਂ ਮੈਂ ਵਕਾਲਤ ਕਰ ਰਿਹਾ ਸੀ, ਮੈਂ ਉਨ੍ਹਾਂ ਪੰਨਿਆਂ ਨੂੰ ਕਦੇ ਨਹੀਂ ਖੋਲ੍ਹਣਾ ਚਾਹਾਂਗਾ। ਮੈਨੂੰ ਲੱਗਦਾ ਹੈ ਕਿ ਮੈਂ ਉਸ ਕੰਮ ਲਈ ਨਹੀਂ ਬਣਿਆ ਸੀ। ਜੇਕਰ ਕਿਸੇ ਕੰਮ ਵਿੱਚ ਤੁਹਾਡਾ ਮਨ ਨਹੀਂ ਲੱਗਦਾ, ਤਾਂ ਤੁਸੀਂ ਦਿਨ ਵਿੱਚ 18 ਘੰਟੇ ਲਗਾ ਕੇ ਵੀ ਚੰਗੇ ਨਤੀਜੇ ਨਹੀਂ ਦੇ ਸਕਦੇ।’

ਇੱਕ ਮਹੀਨੇ ਵਿੱਚ ਹੀ ਛੱਡ ਦਿੱਤੀ ਸੀ ਨੌਕਰੀ

ਨੌਕਰੀ ਛੱਡ ਕੇ ਅਦਾਕਾਰੀ ਚੁਣਨ ਬਾਰੇ ਅਪਾਰਸ਼ਕਤੀ ਦੱਸਦੇ ਹਨ, ‘ਮੈਂ 21-22 ਸਾਲ ਦੀ ਉਮਰ ਵਿੱਚ ਨੌਕਰੀ ਸ਼ੁਰੂ ਕੀਤੀ ਸੀ ਅਤੇ ਇੱਕ ਮਹੀਨੇ ਬਾਅਦ ਹੀ ਛੱਡ ਦਿੱਤੀ ਸੀ। ਹੁਣ ਜੋ ਮੈਂ (ਅਦਾਕਾਰੀ, ਹੋਸਟਿੰਗ ਅਤੇ ਗਾਇਕੀ) ਕਰ ਰਿਹਾ ਹਾਂ, ਉਹ ਮੈਨੂੰ ਕਦੇ ਵੀ "ਕੰਮ" ਨਹੀਂ ਲੱਗਦਾ। ਮੈਂ ਇਸ ਇੰਡਸਟਰੀ ਵਿੱਚ ਲਗਾਤਾਰ 48 ਘੰਟੇ ਵੀ ਬਿਨਾਂ ਕਿਸੇ ਸ਼ਿਕਾਇਤ ਦੇ ਕੰਮ ਕਰ ਸਕਦਾ ਹਾਂ, ਕਿਉਂਕਿ ਮੈਨੂੰ ਇਸ ਵਿੱਚ ਆਤਮ-ਸੰਤੁਸ਼ਟੀ ਅਤੇ ਖ਼ੁਸ਼ੀ ਮਿਲਦੀ ਹੈ।’