NCERT ਦਾ ਵੱਡਾ ਫੈਸਲਾ: ਹੁਣ ਨੌਵੀਂ ਜਮਾਤ 'ਚ ਹੀ ਪੜ੍ਹਾਏ ਜਾਣਗੇ ਅਰਥਮੈਟਿਕ ਤੇ ਜੀਓਮੈਟ੍ਰਿਕ ਪ੍ਰੋਗਰੈਸ਼ਨ, ਨਵੇਂ ਸੈਸ਼ਨ ਲਈ ਸੋਧੇ ਹੋਏ ਸਿਲੇਬਸ ਦੀ ਰੂਪ ਰੇਖਾ ਜਾਰੀ

ਜਾਗਰਣ ਸੰਵਾਦਦਾਤਾ, ਮੇਰਠ : ਰਾਸ਼ਟਰੀ ਵਿੱਦਿਅਕ ਖੋਜ ਤੇ ਸਿਖਲਾਈ ਕੌਂਸਲ (ਐੱਨਸੀਈਆਰਟੀ) ਨੇ ਰਾਸ਼ਟਰੀ ਪਾਠਕ੍ਰਮ ਰੂਪਰੇਖਾ (ਐੱਨਸੀਐੱਫ-ਐੱਸਈ 2023) ਦੇ ਆਧਾਰ ’ਤੇ ਅੱਠਵੀਂ ਜਮਾਤ ਤੱਕ ਦਾ ਨਵਾਂ ਸਿਲੇਬਸ ਜਾਰੀ ਕਰਨ ਤੋਂ ਬਾਅਦ ਹੁਣ ਨੌਵੀਂ ਲਈ ਸੋਧਿਆ ਡ੍ਰਾਫਟ ਸਿਲੇਬਸ ਜਾਰੀ ਕੀਤਾ ਹੈ। ਇਸੇ ਹਫਤੇ ਜਾਰੀ ਸਿਲੇਬਸ ’ਚ ਵਿਗਿਆਨ ਦੇ ਨਾਲ ਹੀ ਗਣਿਤ ਸਮੇਤ ਹੋਰਨਾਂ ਵਿਸ਼ਿਆਂ ’ਚ ਵੀ ਅਹਿਮ ਬਦਲਾਅ ਕੀਤੇ ਗਏ ਹਨ।

ਗਣਿਤ ’ਚ ਐਪਲੀਕੇਸ਼ਨ ਭਾਵ ਅਨੁਪ੍ਰਯੋਗ ਤੇ ਤਰਕਸੰਗਤ ਸੋਚ ’ਤੇ ਜ਼ਿਆਦਾ ਜ਼ੋਰ ਦਿੱਤਾ ਗਿਆ ਹੈ। ਇਸ ਵਿਚ ਗਣਿਤ ਨੂੰ ਅਸਲ ਜੀਵਨ ਦੀਆਂ ਸਮੱਸਿਆਵਾਂ ਨਾਲ ਜੋੜਨ ਤੇ ਬੀਜਗਿਣਤਕ ਸੋਚ ਵਿਕਸਿਤ ਕਰਨ ’ਤੇ ਜ਼ੋਰ ਦਿੱਤਾ ਗਿਆ ਹੈ। ਵਿਦਿਆਰਥੀਆਂ ਨੂੰ ਪਹਿਲਾਂ 10ਵੀਂ ਤੇ 11ਵੀਂ ’ਚ ਪੜ੍ਹਾਏ ਜਾਣ ਵਾਲੇ ਅਰਥਮੈਟਿਕ ਪ੍ਰੋਗਰੈਸ਼ਨ (ਏਪੀ) ਤੇ ਜੀਓਮੈਟ੍ਰਿਕ ਪ੍ਰੋਗਰੈਸ਼ਨ (ਜੇਪੀ) ਵਰਗੇ ਟੌਪਿਕ ਹੁਣ ਨੌਵੀਂ ਜਮਾਤ ’ਚ ਹੀ ਪੜ੍ਹਾਏ ਜਾਣਗੇ। ਇਸ ਤੋਂ ਇਲਾਵਾ ਫਾਈਨਾਂਸ਼ੀਅਲ ਮੈਥਸ ਰਾਹੀਂ ਵਾਧਾ ਤੇ ਨੁਕਸਾਨ ਦੇ ਪੈਟਰਨ ਤੇ ਪ੍ਰੋਬੇਬਿਲਟੀ ’ਤੇ ਇਕ ਵੱਖਰਾ ਅਧਿਆਏ ਜੋੜਿਆ ਗਿਆ ਹੈ।

ਐੱਨਸੀਈਆਰਟੀ ਵੱਲੋਂ ਜਾਰੀ ਸਿਲੇਬਸ ਨੂੰ ਸੈਸ਼ਨ 2026-27 ’ਚ ਲਾਗੂ ਕੀਤਾ ਜਾਣਾ ਹੈ। ਨੌਵੀਂ ਜਮਾਤ ਦੇ ਗਣਿਤ ਸਿਲੇਬਸ ’ਚ ਕੁੱਲ 15 ਅਧਿਆਏ ਹੋਣਗੇ। ਗਣਿਤ ਵਿਸ਼ੇ ’ਚ ਉਕਤ ਤਬਦੀਲੀਆਂ ਦੇ ਨਾਲ ਹੀ ਕੰਸਟਰੱਕਸ਼ਨ ਤੇ ਪੈਰਲਲੋਗ੍ਰਾਮ ਤੇ ਤ੍ਰਿਭੁਜ ਦੇ ਖੇਤਰਫਲ ਨਾਲ ਜੁੜੇ ਅਧਿਆਏ ਹਟਾਏ ਗਏ ਹਨ।