ਸਾਬਕਾ ਅਗਨੀਵੀਰਾਂ ਲਈ ਖ਼ੁਸ਼ਖਬਰੀ: ਦਿੱਲੀ ਪੁਲਿਸ ਭਰਤੀ 'ਚ ਮਿਲੇਗਾ 20% ਰਾਖਵਾਂਕਰਨ; ਉਮਰ ਹੱਦ ਤੇ PET'ਚ ਵੀ ਵੱਡੀ ਛੋਟ

ਪੀ.ਟੀ.ਆਈ., ਨਵੀਂ ਦਿੱਲੀ: ਦਿੱਲੀ ਪੁਲਿਸ ਵਿੱਚ ਹੁਣ ਕਾਂਸਟੇਬਲ (ਐਗਜ਼ੀਕਿਊਟਿਵ) ਦੇ ਅਹੁਦਿਆਂ 'ਤੇ ਸਾਬਕਾ ਅਗਨੀਵੀਰਾਂ ਲਈ 20 ਫ਼ੀਸਦੀ ਰਾਖਵਾਂਕਰਨ ਲਾਗੂ ਕੀਤਾ ਜਾਵੇਗਾ, ਜਿਸ ਵਿੱਚ ਉਹਨਾਂ ਨੂੰ ਫਿਜ਼ੀਕਲ ਐਫੀਸ਼ੀਐਂਸੀ ਟੈਸਟ (PET) ਤੋਂ ਛੋਟ ਅਤੇ ਉਪਰਲੀ ਉਮਰ ਸੀਮਾ ਵਿੱਚ ਢਿੱਲ ਦਿੱਤੀ ਜਾਵੇਗੀ।

ਕੇਂਦਰੀ ਗ੍ਰਹਿ ਮੰਤਰਾਲੇ (MHA) ਵੱਲੋਂ ਜਾਰੀ ਨੋਟੀਫਿਕੇਸ਼ਨ ਅਨੁਸਾਰ, ਭਰਤੀ ਨਿਯਮਾਂ ਵਿੱਚ ਸੋਧ ਕਰਕੇ ਇਸ ਵਿਵਸਥਾ ਨੂੰ ਰਸਮੀ ਰੂਪ ਦੇ ਦਿੱਤਾ ਗਿਆ ਹੈ। ਇਹ ਤਬਦੀਲੀ ਦਿੱਲੀ ਪੁਲਿਸ (ਨਿਯੁਕਤੀ ਅਤੇ ਭਰਤੀ) ਨਿਯਮ, 1980 ਵਿੱਚ ਸੋਧ ਦੇ ਤਹਿਤ ਕੀਤੀ ਗਈ ਹੈ। ਇਸ ਦਾ ਉਦੇਸ਼ ਕੇਂਦਰ ਸਰਕਾਰ ਦੀ ਉਸ ਵਿਆਪਕ ਯੋਜਨਾ ਨੂੰ ਲਾਗੂ ਕਰਨਾ ਹੈ, ਜਿਸ ਦੇ ਤਹਿਤ ਚਾਰ ਸਾਲ ਦੀ ਸੇਵਾ ਪੂਰੀ ਕਰਨ ਵਾਲੇ ਅਗਨੀਵੀਰਾਂ ਨੂੰ ਸੁਰੱਖਿਆ ਬਲਾਂ ਵਿੱਚ ਸ਼ਾਮਲ ਕੀਤਾ ਜਾਵੇਗਾ।

ਉਮਰ ਸੀਮਾ ਵਿੱਚ ਛੋਟ

ਨੋਟੀਫਿਕੇਸ਼ਨ ਅਨੁਸਾਰ, ਸਾਬਕਾ ਅਗਨੀਵੀਰਾਂ ਨੂੰ ਕਾਂਸਟੇਬਲ ਭਰਤੀ ਵਿੱਚ ਵੱਧ ਤੋਂ ਵੱਧ ਉਮਰ ਸੀਮਾ ਵਿੱਚ 3 ਸਾਲ ਦੀ ਛੋਟ ਦਿੱਤੀ ਜਾਵੇਗੀ। ਵਰਤਮਾਨ ਵਿੱਚ ਇਹ ਸੀਮਾ 18 ਤੋਂ 25 ਸਾਲ ਹੈ। ਉੱਥੇ ਹੀ, ਅਗਨੀਵੀਰ ਯੋਜਨਾ ਦੇ ਪਹਿਲੇ ਬੈਚ ਦੇ ਉਮੀਦਵਾਰਾਂ ਨੂੰ 5 ਸਾਲ ਦੀ ਵਾਧੂ ਛੋਟ ਵੀ ਮਿਲੇਗੀ, ਜਿਸ ਨਾਲ ਉਹਨਾਂ ਦੀ ਵੱਧ ਤੋਂ ਵੱਧ ਉਮਰ ਸੀਮਾ ਵਧ ਕੇ 30 ਸਾਲ ਤੱਕ ਹੋ ਜਾਵੇਗੀ।

PET ਤੋਂ ਛੋਟ, ਪਰ ਮਾਪਦੰਡ ਰਹਿਣਗੇ ਲਾਗੂ

ਸਾਬਕਾ ਅਗਨੀਵੀਰਾਂ ਨੂੰ ਭਰਤੀ ਪ੍ਰਕਿਰਿਆ ਦੇ ਇੱਕ ਅਹਿਮ ਪੜਾਅ, ਫਿਜ਼ੀਕਲ ਐਫੀਸ਼ੀਐਂਸੀ ਟੈਸਟ (PET) ਤੋਂ ਛੋਟ ਦਿੱਤੀ ਜਾਵੇਗੀ। PET ਵਿੱਚ ਆਮ ਤੌਰ 'ਤੇ ਦੌੜ ਵਰਗੇ ਸਰੀਰਕ ਸਹਿਣਸ਼ੀਲਤਾ ਨਾਲ ਜੁੜੇ ਟੈਸਟ ਸ਼ਾਮਲ ਹੁੰਦੇ ਹਨ। ਹਾਲਾਂਕਿ, ਉਹਨਾਂ ਲਈ ਨਿਰਧਾਰਿਤ ਸਰੀਰਕ ਮਾਪਦੰਡ ਅਤੇ ਮੈਡੀਕਲ ਮਿਆਰਾਂ ਨੂੰ ਪੂਰਾ ਕਰਨਾ ਲਾਜ਼ਮੀ ਹੋਵੇਗਾ।

ਵੱਖਰੇ ਤੌਰ 'ਤੇ ਜਾਰੀ ਹੋਣਗੇ ਭਰਤੀ ਦਿਸ਼ਾ-ਨਿਰਦੇਸ਼

ਭਰਤੀ ਪ੍ਰਕਿਰਿਆ ਦੇ ਵਿਸਤ੍ਰਿਤ ਦਿਸ਼ਾ-ਨਿਰਦੇਸ਼, ਜਿਵੇਂ ਕਿ ਲਿਖਤੀ ਪ੍ਰੀਖਿਆ ਅਤੇ ਸਰੀਰਕ ਮਾਪਦੰਡਾਂ ਦੀ ਪ੍ਰਕਿਰਿਆ, ਦਿੱਲੀ ਪੁਲਿਸ ਕਮਿਸ਼ਨਰ ਦੁਆਰਾ ਵੱਖਰੇ ਤੌਰ 'ਤੇ ਜਾਰੀ ਕੀਤੇ ਜਾਣਗੇ।

ਹੁਣ ਤੱਕ ਦਿੱਲੀ ਪੁਲਿਸ ਵਿੱਚ ਕਾਂਸਟੇਬਲ ਅਹੁਦਿਆਂ 'ਤੇ 100 ਫ਼ੀਸਦੀ ਸਿੱਧੀ ਭਰਤੀ ਹੁੰਦੀ ਸੀ। ਇਹ ਨਵੀਂ ਵਿਵਸਥਾ ਪਹਿਲਾਂ ਲਏ ਗਏ ਉਸ ਫੈਸਲੇ ਨੂੰ ਲਾਗੂ ਕਰਦੀ ਹੈ, ਜਿਸ ਨੂੰ ਤਤਕਾਲੀ ਉਪ-ਰਾਜਪਾਲ ਵੀ. ਕੇ. ਸਕਸੈਨਾ ਨੇ ਮਨਜ਼ੂਰੀ ਦਿੱਤੀ ਸੀ। ਇਹ ਕਦਮ ਸਾਬਕਾ ਅਗਨੀਵੀਰਾਂ ਨੂੰ ਰੁਜ਼ਗਾਰ ਦੇ ਮੌਕੇ ਦੇਣ ਦੇ ਨਾਲ-ਨਾਲ ਸੁਰੱਖਿਆ ਬਲਾਂ ਵਿੱਚ ਉਹਨਾਂ ਦੇ ਤਜ਼ਰਬੇ ਦਾ ਲਾਭ ਉਠਾਉਣ ਦੀ ਦਿਸ਼ਾ ਵਿੱਚ ਅਹਿਮ ਮੰਨਿਆ ਜਾ ਰਿਹਾ ਹੈ।