IPL ਦੇ ਇਤਿਹਾਸ 'ਚ ਵਿਰਾਟ ਕੋਹਲੀ ਦਾ ਧਮਾਕਾ : KKR ਖ਼ਿਲਾਫ਼ ਜੜਿਆ ਇਤਿਹਾਸਕ ਸੈਂਕੜਾ, ਬਣਾ ਦਿੱਤਾ ਕਦੇ ਨਾ ਟੁੱਟਣ ਵਾਲਾ ਰਿਕਾਰਡ

ਸਪੋਰਟਸ ਡੈਸਕ, ਨਵੀਂ ਦਿੱਲੀ : ਕੋਲਕਾਤਾ ਨਾਈਟ ਰਾਈਡਰਜ਼ (KKR) ਖ਼ਿਲਾਫ਼ ਖੇਡੇ ਗਏ ਰੋਮਾਂਚਕ ਮੁਕਾਬਲੇ ਵਿੱਚ ਵਿਰਾਟ ਕੋਹਲੀ ਨੇ ਨਾ ਸਿਰਫ਼ ਆਪਣੀ ਬੱਲੇਬਾਜ਼ੀ ਨਾਲ ਦਰਸ਼ਕਾਂ ਦਾ ਦਿਲ ਜਿੱਤਿਆ, ਸਗੋਂ IPL ਦੇ ਇਤਿਹਾਸ ਵਿੱਚ ਇੱਕ ਅਜਿਹਾ ਕੀਰਤੀਮਾਨ ਸਥਾਪਿਤ ਕਰ ਦਿੱਤਾ ਹੈ, ਜਿਸ ਨੂੰ ਛੂਹਣਾ ਕਿਸੇ ਵੀ ਭਾਰਤੀ ਬੱਲੇਬਾਜ਼ ਲਈ ਇੱਕ ਸੁਪਨੇ ਵਰਗਾ ਹੈ।

ਵਿਰਾਟ ਕੋਹਲੀ ਬਣੇ ਰਨ ਚੇਜ਼ ਦੇ 'ਕਿੰਗ'

ਰੋਇਲ ਚੈਲੇਂਜਰਜ਼ ਬੈਂਗਲੁਰੂ (RCB) ਦੇ ਸਟਾਰ ਬੱਲੇਬਾਜ਼ ਵਿਰਾਟ ਕੋਹਲੀ ਨੇ IPL ਇਤਿਹਾਸ ਵਿੱਚ 'ਰਨ ਚੇਜ਼' (ਟੀਚੇ ਦਾ ਪਿੱਛਾ) ਕਰਦੇ ਹੋਏ ਸਭ ਤੋਂ ਜ਼ਿਆਦਾ ਸੈਂਕੜੇ ਲਗਾਉਣ ਦੇ ਮਾਮਲੇ ਵਿੱਚ ਇੰਗਲੈਂਡ ਦੇ ਜੋਸ ਬਟਲਰ ਦੀ ਬਰਾਬਰੀ ਕਰ ਲਈ ਹੈ। ਵਿਰਾਟ ਨੇ ਇਹ ਰਿਕਾਰਡ KKR ਖ਼ਿਲਾਫ਼ 60 ਗੇਂਦਾਂ ਵਿੱਚ ਨਾਬਾਦ 105 ਦੌੜਾਂ ਦੀ ਪਾਰੀ ਖੇਡ ਕੇ ਬਣਾਇਆ। ਇਸ ਪਾਰੀ ਵਿੱਚ ਉਨ੍ਹਾਂ ਨੇ 11 ਚੌਕੇ ਅਤੇ 3 ਛੱਕੇ ਜੜੇ।

ਅੰਕੜਿਆਂ ਦੀ ਜ਼ਬਾਨੀ ਵਿਰਾਟ ਦੀ ਬਾਦਸ਼ਾਹਤ

ਸੈਂਕੜਿਆਂ ਦੀ ਬਰਾਬਰੀ: ਰਨ ਚੇਜ਼ ਵਿੱਚ ਇਹ ਵਿਰਾਟ ਦਾ ਤੀਜਾ IPL ਸੈਂਕੜਾ ਹੈ। ਹੁਣ ਉਹ ਅਤੇ ਜੋਸ ਬਟਲਰ ਇਸ ਸੂਚੀ ਵਿੱਚ ਸਿਖਰ 'ਤੇ ਹਨ।

ਸ਼ਾਨਦਾਰ ਔਸਤ: ਟੀਚੇ ਦਾ ਪਿੱਛਾ ਕਰਦੇ ਹੋਏ ਵਿਰਾਟ ਨੇ 131 ਪਾਰੀਆਂ ਵਿੱਚ 42.42 ਦੀ ਔਸਤ ਨਾਲ 4285 ਦੌੜਾਂ ਬਣਾਈਆਂ ਹਨ।

ਮੈਚ ਵਿਨਰ: ਜਦੋਂ RCB ਸਫਲਤਾਪੂਰਵਕ ਰਨ ਚੇਜ਼ ਕਰਦੀ ਹੈ ਤਾਂ ਵਿਰਾਟ ਦੀ ਔਸਤ ਵਧ ਕੇ 63.27 ਹੋ ਜਾਂਦੀ ਹੈ।

ਰੋਹਿਤ ਸ਼ਰਮਾ ਦੀ ਕੀਤੀ ਬਰਾਬਰੀ

ਇਸ ਸ਼ਾਨਦਾਰ ਪਾਰੀ ਦੇ ਨਾਲ ਹੀ ਵਿਰਾਟ ਨੇ ਭਾਰਤੀ ਖਿਡਾਰੀਆਂ ਵਿੱਚ ਸਭ ਤੋਂ ਜ਼ਿਆਦਾ 'ਪਲੇਅਰ ਆਫ ਦ ਮੈਚ' ਐਵਾਰਡ ਜਿੱਤਣ ਦੇ ਮਾਮਲੇ ਵਿੱਚ ਰੋਹਿਤ ਸ਼ਰਮਾ ਦੀ ਬਰਾਬਰੀ ਕਰ ਲਈ ਹੈ। ਹੁਣ ਦੋਵਾਂ ਦੇ ਨਾਂ 21-21 ਐਵਾਰਡ ਹਨ। ਇਸ ਤੋਂ ਇਲਾਵਾ ਉਹ 10 ਟੀ-20 ਸੈਂਕੜੇ ਲਗਾਉਣ ਵਾਲੇ ਪਹਿਲੇ ਭਾਰਤੀ ਵੀ ਬਣ ਗਏ ਹਨ।

ਔਰੇਂਜ ਕੈਪ ਦੀ ਰੇਸ 'ਚ ਮਾਰੀ ਛਾਲ

ਵਿਰਾਟ ਕੋਹਲੀ ਹੁਣ IPL 2026 ਦੀ ਔਰੇਂਜ ਕੈਪ ਦੀ ਰੇਸ ਵਿੱਚ ਤੀਜੇ ਨੰਬਰ 'ਤੇ ਪਹੁੰਚ ਗਏ ਹਨ। ਉਨ੍ਹਾਂ ਨੇ 12 ਮੈਚਾਂ ਵਿੱਚ 484 ਦੌੜਾਂ ਬਣਾ ਲਈਆਂ ਹਨ, ਜਿਸ ਵਿੱਚ ਇੱਕ ਸੈਂਕੜਾ ਅਤੇ ਤਿੰਨ ਅਰਧ-ਸੈਂਕੜੇ ਸ਼ਾਮਲ ਹਨ।