IPL 2026 : ਸਟਾਰ ਬੱਲੇਬਾਜ਼ ਨੇ ਤੋੜਿਆ ਪ੍ਰਸ਼ੰਸਕਾਂ ਦਾ ਦਿਲ, ਅਚਾਨਕ ਕੀਤਾ ਸੰਨਿਆਸ ਦਾ ਐਲਾਨ

ਸਪੋਰਟਸ ਡੈਸਕ, ਨਵੀਂ ਦਿੱਲੀ: ਆਈਪੀਐਲ 2026 ਦੇ ਚੱਲਦਿਆਂ ਕ੍ਰਿਕਟ ਜਗਤ ਤੋਂ ਇੱਕ ਵੱਡੀ ਖ਼ਬਰ ਸਾਹਮਣੇ ਆਈ ਹੈ। ਦੱਖਣੀ ਅਫ਼ਰੀਕਾ ਦੇ 37 ਸਾਲਾ ਅਨੁਭਵੀ ਬੱਲੇਬਾਜ਼ ਰਾਸੀ ਵਾਨ ਡਰ ਡੂਸੈਨ (Rassie Van Der Dussen) ਨੇ ਅੰਤਰਰਾਸ਼ਟਰੀ ਕ੍ਰਿਕਟ ਤੋਂ ਸੰਨਿਆਸ ਲੈਣ ਦਾ ਐਲਾਨ ਕਰ ਦਿੱਤਾ ਹੈ। ਇਸ ਦੇ ਨਾਲ ਹੀ ਉਨ੍ਹਾਂ ਨੇ ਆਪਣੇ ਸਾਢੇ ਸੱਤ ਸਾਲ ਦੇ ਸ਼ਾਨਦਾਰ ਕੌਮਾਂਤਰੀ ਕਰੀਅਰ ਨੂੰ ਅਲਵਿਦਾ ਕਹਿ ਦਿੱਤਾ ਹੈ।

ਸੰਨਿਆਸ ਤੋਂ ਬਾਅਦ ਰਾਸੀ ਨੇ ਕਿਹਾ ਕਿ ਉਹ ਘਰੇਲੂ ਕ੍ਰਿਕਟ ਵਿੱਚ 'ਦ ਲਾਇੰਸ' ਲਈ ਖੇਡਣਾ ਜਾਰੀ ਰੱਖਣਗੇ। ਉਨ੍ਹਾਂ ਇਹ ਵੀ ਕਿਹਾ ਕਿ ਉਹ ਦੱਖਣੀ ਅਫ਼ਰੀਕਾ ਦੀ ਅਗਲੀ ਪੀੜ੍ਹੀ ਦੇ ਕ੍ਰਿਕਟਰਾਂ ਨੂੰ ਸਿਖਾਉਣ ਅਤੇ ਮੈਂਟਰਿੰਗ ਰਾਹੀਂ ਖੇਡ ਵਿੱਚ ਯੋਗਦਾਨ ਪਾਉਣ ਲਈ ਵਚਨਬੱਧ ਹਨ।

ਵਾਨ ਡਰ ਡੂਸੈਨ ਦਾ ਅੰਤਰਰਾਸ਼ਟਰੀ ਸਫ਼ਰ

ਰਾਸੀ ਵਾਨ ਡਰ ਡੂਸੈਨ ਨੇ ਸਾਲ 2018 ਵਿੱਚ ਜ਼ਿੰਬਾਬਵੇ ਵਿਰੁੱਧ ਟੀ-20I ਰਾਹੀਂ ਆਪਣਾ ਡੇਬਿਊ ਕੀਤਾ ਸੀ।

ਵਨਡੇ (ODI): 71 ਮੈਚਾਂ ਵਿੱਚ 50.13 ਦੀ ਸ਼ਾਨਦਾਰ ਔਸਤ ਨਾਲ 2,657 ਰਨ ਬਣਾਏ, ਜਿਸ ਵਿੱਚ 6 ਸੈਂਕੜੇ ਅਤੇ 17 ਅਰਧ-ਸੈਂਕੜੇ ਸ਼ਾਮਲ ਹਨ। ਆਪਣੇ ਪਹਿਲੇ ਹੀ ਮੈਚ ਵਿੱਚ ਪਾਕਿਸਤਾਨ ਵਿਰੁੱਧ 93 ਦੌੜਾਂ ਬਣਾ ਕੇ ਉਨ੍ਹਾਂ ਨੇ ਸਭ ਦਾ ਧਿਆਨ ਖਿੱਚਿਆ ਸੀ।

ਟੀ-20I: 57 ਮੈਚਾਂ ਵਿੱਚ 1,406 ਰਨ ਬਣਾਏ।

ਟੈਸਟ ਕ੍ਰਿਕਟ: 18 ਮੈਚਾਂ ਵਿੱਚ 905 ਰਨ ਬਣਾਏ। ਟੈਸਟ ਵਿੱਚ ਉਨ੍ਹਾਂ ਦਾ ਉੱਚਤਮ ਸਕੋਰ 98 ਰਿਹਾ, ਜਿੱਥੇ ਉਹ ਇੰਗਲੈਂਡ ਵਿਰੁੱਧ ਆਪਣੇ ਸੈਂਕੜੇ ਤੋਂ ਖੁੰਝ ਗਏ ਸਨ।

ਸੰਨਿਆਸ ਮੌਕੇ ਭਾਵੁਕ ਹੋਏ ਡੂਸੈਨ

ਆਪਣੇ ਬਿਆਨ ਵਿੱਚ ਡੂਸੈਨ ਨੇ ਕਿਹਾ: "ਮੈਂ ਬੜੇ ਮਾਣ ਅਤੇ ਸ਼ੁਕਰਗੁਜ਼ਾਰੀ ਨਾਲ ਅੰਤਰਰਾਸ਼ਟਰੀ ਕ੍ਰਿਕਟ ਤੋਂ ਸੰਨਿਆਸ ਦਾ ਐਲਾਨ ਕਰਦਾ ਹਾਂ। 'ਪ੍ਰੋਟੀਜ਼' (Proteas) ਦੀ ਜਰਸੀ ਪਹਿਨਣਾ ਮੇਰੇ ਜੀਵਨ ਦਾ ਸਭ ਤੋਂ ਵੱਡਾ ਸਨਮਾਨ ਰਿਹਾ ਹੈ। ਇਹ ਸਫ਼ਰ ਸਾਲਾਂ ਦੀਆਂ ਕੁਰਬਾਨੀਆਂ ਨਾਲ ਬਣਿਆ ਹੈ, ਪਰ ਆਪਣੇ ਦੇਸ਼ ਦੀ ਨੁਮਾਇੰਦਗੀ ਕਰਨ ਦਾ ਹਰ ਪਲ ਸਾਰਥਕ ਸੀ।"

ਉਨ੍ਹਾਂ ਨੇ ਆਪਣੇ ਪ੍ਰਸ਼ੰਸਕਾਂ, ਕੋਚਾਂ, ਮੈਨੇਜਰਾਂ ਅਤੇ ਖਾਸ ਕਰਕੇ ਆਪਣੇ ਪਰਿਵਾਰ ਦਾ ਧੰਨਵਾਦ ਕੀਤਾ। ਆਪਣੀ ਪਤਨੀ ਲਾਰਾ ਲਈ ਉਨ੍ਹਾਂ ਕਿਹਾ, "ਤੁਸੀਂ ਇਸ ਸਫ਼ਰ ਦੇ ਹਰ ਕਦਮ 'ਤੇ ਮੇਰੇ ਨਾਲ ਰਹੇ ਹੋ। ਤੁਹਾਡੇ ਬਿਨਾਂ ਮੈਂ ਇਹ ਸਭ ਨਹੀਂ ਕਰ ਸਕਦਾ ਸੀ।"

ਵੱਡੇ ਟੂਰਨਾਮੈਂਟਾਂ ਵਿੱਚ ਪ੍ਰਦਰਸ਼ਨ

ਡੂਸੈਨ 2019 ਅਤੇ 2023 ਦੇ ਵਨਡੇ ਵਿਸ਼ਵ ਕੱਪ ਅਤੇ 2021 ਦੇ ਟੀ-20 ਵਿਸ਼ਵ ਕੱਪ ਦਾ ਹਿੱਸਾ ਰਹੇ। 2023 ਦੇ ਵਿਸ਼ਵ ਕੱਪ ਵਿੱਚ ਨਿਊਜ਼ੀਲੈਂਡ ਵਿਰੁੱਧ ਉਨ੍ਹਾਂ ਦੀ 133 ਦੌੜਾਂ ਦੀ ਪਾਰੀ ਹਮੇਸ਼ਾ ਯਾਦ ਰੱਖੀ ਜਾਵੇਗੀ। ਉਨ੍ਹਾਂ ਨੇ 2024 ਵਿੱਚ ਵੈਸਟਇੰਡੀਜ਼ ਵਿਰੁੱਧ ਟੀ-20 ਸੀਰੀਜ਼ ਵਿੱਚ ਦੱਖਣੀ ਅਫ਼ਰੀਕਾ ਦੀ ਕਪਤਾਨੀ ਵੀ ਕੀਤੀ ਸੀ।