ਭਾਰਤ ਦੀ ਪਹਿਲੀ ਟ੍ਰਾਂਸਜੈਂਡਰ ਅੰਪਾਇਰ ਦੀ ਸੰਘਰਸ਼ਮਈ ਕਹਾਣੀ : IT ਦੀ ਨੌਕਰੀ ਗਈ ਤੇ ਸਟੇਡੀਅਮ ਦੇ ਗੇਟ ਤੋਂ ਵੀ ਹੋਣਾ ਪਿਆ ਜ਼ਲੀਲ

ਸਪੋਰਟਸ ਡੈਸਕ, ਨਵੀਂ ਦਿੱਲੀ: ਕੋਇੰਬਟੂਰ ਦੀ ਰਹਿਣ ਵਾਲੀ 31 ਸਾਲਾ ਰਿਤਿਕਾ ਸ਼੍ਰੀ ਨੇ ਕ੍ਰਿਕਟ ਦੀ ਦੁਨੀਆ ਵਿੱਚ ਇੱਕ ਨਵਾਂ ਇਤਿਹਾਸ ਰਚ ਦਿੱਤਾ ਹੈ। ਉਹ ਭਾਰਤ ਦੀ ਪਹਿਲੀ ਟ੍ਰਾਂਸਜੈਂਡਰ ਅੰਪਾਇਰ ਬਣ ਗਈ ਹੈ। ਰਿਤਿਕਾ ਦਾ ਇਹ ਸਫ਼ਰ ਸਿਰਫ਼ ਉਸ ਦੇ ਨਿੱਜੀ ਵਿਕਾਸ ਦੀ ਕਹਾਣੀ ਨਹੀਂ ਹੈ, ਸਗੋਂ ਭਾਰਤੀ ਖੇਡਾਂ ਦੀ ਮਾਨਸਿਕਤਾ ਵਿੱਚ ਇੱਕ ਵੱਡੀ ਤਬਦੀਲੀ ਦਾ ਸੰਕੇਤ ਹੈ ਪਰ ਇਸ ਮੁਕਾਮ ਤੱਕ ਪਹੁੰਚਣ ਲਈ ਰਿਤਿਕਾ ਨੂੰ ਜੋ ਸੰਘਰਸ਼ ਕਰਨਾ ਪਿਆ, ਉਹ ਰੂਹ ਕੰਬਾਊ ਹੈ।

IT ਦੀ ਨੌਕਰੀ ਤੋਂ ਅੰਪਾਇਰਿੰਗ ਤੱਕ ਦਾ ਸਫ਼ਰ

ਰਿਤਿਕਾ ਨੇ ਮਕੈਨੀਕਲ ਇੰਜੀਨੀਅਰਿੰਗ ਵਿੱਚ ਡਿਪਲੋਮਾ ਕੀਤਾ ਹੈ। ਸਾਲ 2019 ਵਿੱਚ, ਉਹ ਪੰਜਾਬ ਦੇ ਮੋਹਾਲੀ ਵਿੱਚ ਇੱਕ ਬੀਪੀਓ (BPO) ਵਿੱਚ ਕੰਮ ਕਰਦੀ ਸੀ। ਉਸ ਸਮੇਂ ਉਸ ਨੂੰ 'ਮੁਥੂਰਾਜ' ਦੇ ਨਾਮ ਨਾਲ ਜਾਣਿਆ ਜਾਂਦਾ ਸੀ। ਮੋਹਾਲੀ ਵਿੱਚ ਰਹਿੰਦਿਆਂ ਆਈਪੀਐਲ (IPL) ਮੈਚ ਦੇਖਦੇ ਹੋਏ ਉਸ ਦੇ ਮਨ ਵਿੱਚ ਅੰਪਾਇਰ ਬਣਨ ਦੀ ਇੱਛਾ ਜਾਗੀ।

ਕੋਰੋਨਾ ਕਾਲ ਦੌਰਾਨ ਉਸ ਦੀ ਨੌਕਰੀ ਚਲੀ ਗਈ, ਜਿਸ ਤੋਂ ਬਾਅਦ ਉਹ ਆਪਣੇ ਜੱਦੀ ਸ਼ਹਿਰ ਸਲੇਮ ਪਰਤ ਆਈ। ਉੱਥੇ ਉਸ ਨੂੰ ਜ਼ਿਲ੍ਹਾ ਮੁੱਖ ਅੰਪਾਇਰ ਜੈਰਾਮਨ ਦਾ ਸਾਥ ਮਿਲਿਆ। ਜਦੋਂ ਰਿਤਿਕਾ ਨੇ ਆਪਣੀ ਅਸਲੀ ਪਛਾਣ (ਟ੍ਰਾਂਸਜੈਂਡਰ) ਜ਼ਾਹਰ ਕੀਤੀ, ਤਾਂ ਜੈਰਾਮਨ ਨੇ ਉਸ ਨੂੰ ਪੂਰਾ ਸਮਰਥਨ ਦਿੱਤਾ ਅਤੇ ਆਪਣੀ ਕਾਬਲੀਅਤ 'ਤੇ ਧਿਆਨ ਦੇਣ ਦੀ ਸਲਾਹ ਦਿੱਤੀ।

ਜਦੋਂ ਸੁਰੱਖਿਆ ਗਾਰਡ ਨੇ ਸਟੇਡੀਅਮ 'ਚ ਵੜਨ ਤੋਂ ਰੋਕਿਆ

ਰਿਤਿਕਾ ਨੇ ਆਪਣਾ ਦੁੱਖ ਸਾਂਝਾ ਕਰਦਿਆਂ ਦੱਸਿਆ ਕਿ ਪਿਛਲੇ ਸਾਲ ਸਤੰਬਰ ਵਿੱਚ ਕੋਇੰਬਟੂਰ ਦੇ ਇੱਕ ਸਟੇਡੀਅਮ ਵਿੱਚ ਗਾਰਡ ਨੇ ਉਸ ਨੂੰ ਅੰਦਰ ਜਾਣ ਤੋਂ ਰੋਕ ਦਿੱਤਾ ਅਤੇ ਬਾਹਰ ਭਜਾ ਦਿੱਤਾ।

ਰਿਤਿਕਾ ਨੇ ਕਿਹਾ, "ਮੈਂ ਉਸ ਨੂੰ ਦੱਸਿਆ ਕਿ ਮੈਂ ਇੱਥੇ ਭੀਖ ਮੰਗਣ ਨਹੀਂ, ਸਗੋਂ ਅੰਪਾਇਰਿੰਗ ਕਰਨ ਆਈ ਹਾਂ।"

ਕਾਫੀ ਜੱਦੋ-ਜਹਿਦ ਅਤੇ ਫੋਨ ਕਾਲਾਂ ਤੋਂ ਬਾਅਦ ਉਸ ਨੂੰ 45 ਮਿੰਟ ਬਾਅਦ ਅੰਦਰ ਜਾਣ ਦੀ ਇਜਾਜ਼ਤ ਮਿਲੀ। ਰਿਤਿਕਾ ਉਸ ਸਮੇਂ ਕਾਫੀ ਭਾਵੁਕ ਹੋ ਗਈ ਸੀ ਕਿ ਕਿਉਂ ਇੱਕ ਟ੍ਰਾਂਸਜੈਂਡਰ ਨੂੰ ਸਨਮਾਨਜਨਕ ਜ਼ਿੰਦਗੀ ਜਿਉਣ ਲਈ ਇੰਨਾ ਅਪਮਾਨ ਸਹਿਣਾ ਪੈਂਦਾ ਹੈ।

ਹੁਣ ਖਿਡਾਰੀ ਕਹਿੰਦੇ ਹਨ 'ਮੈਮ'

ਕੋਇੰਬਟੂਰ ਕ੍ਰਿਕਟ ਐਸੋਸੀਏਸ਼ਨ ਅਤੇ ਸੀਨੀਅਰ ਅੰਪਾਇਰਾਂ ਦੇ ਸਹਿਯੋਗ ਸਦਕਾ ਅੱਜ ਰਿਤਿਕਾ ਮੈਦਾਨ 'ਤੇ ਪੂਰੇ ਆਤਮ-ਵਿਸ਼ਵਾਸ ਨਾਲ ਖੜ੍ਹੀ ਹੁੰਦੀ ਹੈ। ਉਸ ਨੇ ਦੱਸਿਆ ਕਿ ਹੁਣ ਕ੍ਰਿਕਟਰ ਉਸ ਨੂੰ ਸਨਮਾਨ ਨਾਲ 'ਮੈਮ' ਕਹਿ ਕੇ ਬੁਲਾਉਂਦੇ ਹਨ।

ਅਸਲੀ ਚੈਂਪੀਅਨ ਹੈ 'ਮਾਂ'

ਰਿਤਿਕਾ ਆਪਣੀ ਸਫਲਤਾ ਦਾ ਸਿਹਰਾ ਆਪਣੀ ਮਾਂ ਨੂੰ ਦਿੰਦੀ ਹੈ, ਜਿਸ ਨੇ ਇਕੱਲੇ ਹੀ 6 ਭੈਣ-ਭਰਾਵਾਂ ਨੂੰ ਪਾਲਿਆ। ਰਿਤਿਕਾ ਦਾ ਸੁਪਨਾ ਹੁਣ ਸਿਰਫ਼ ਜ਼ਿਲ੍ਹਾ ਮੈਚਾਂ ਤੱਕ ਸੀਮਤ ਨਹੀਂ ਹੈ, ਉਹ ਆਈਪੀਐਲ ਅਤੇ ਅੰਤਰਰਾਸ਼ਟਰੀ ਕ੍ਰਿਕਟ ਮੈਦਾਨਾਂ 'ਤੇ ਅੰਪਾਇਰਿੰਗ ਕਰਨ ਦਾ ਜਜ਼ਬਾ ਰੱਖਦੀ ਹੈ।

ਰਿਤਿਕਾ ਸ਼੍ਰੀ ਨੇ ਸਾਬਿਤ ਕਰ ਦਿੱਤਾ ਹੈ ਕਿ ਜੇਕਰ ਮਿਹਨਤ ਸੱਚੀ ਹੋਵੇ ਅਤੇ ਇਰਾਦੇ ਮਜ਼ਬੂਤ ਹੋਣ, ਤਾਂ ਸਮਾਜ ਦੀਆਂ ਬੰਦਿਸ਼ਾਂ ਵੀ ਤੁਹਾਡਾ ਰਾਹ ਨਹੀਂ ਰੋਕ ਸਕਦੀਆਂ।