ਸੁਨੀਲ ਗਾਵਸਕਰ ਦੀ BCCI ਨੂੰ ਮੰਗ, IPL ਤੋਂ ਨਾਂ ਵਾਪਸ ਲੈਣ ਵਾਲੇ ਖਿਡਾਰੀਆਂ 'ਤੇ ਕੱਸਿਆ ਜਾਵੇ ਸ਼ਿਕੰਜਾ; 2 ਸਾਲ ਦੀ ਪਾਬੰਦੀ ਕਾਫ਼ੀ ਨਹੀਂ

ਸਪੋਰਟਸ ਡੈਸਕ, ਨਵੀਂ ਦਿੱਲੀ: ਇੰਡੀਅਨ ਪ੍ਰੀਮੀਅਰ ਲੀਗ (IPL) ਇਕ ਅਜਿਹੀ ਲੀਗ ਹੈ ਜਿੱਥੇ ਖੇਡਣ ਦਾ ਸੁਪਨਾ ਹਰ ਖਿਡਾਰੀ ਦੇਖਦਾ ਹੈ। ਪਰ ਜਦੋਂ ਕੋਈ ਖਿਡਾਰੀ ਆਖਰੀ ਸਮੇਂ 'ਤੇ ਟੂਰਨਾਮੈਂਟ ਤੋਂ ਹਟ ਜਾਂਦਾ ਹੈ ਤਾਂ ਇਹ ਨਾ ਸਿਰਫ਼ ਟੀਮਾਂ ਲਈ ਮੁਸ਼ਕਲਾਂ ਖੜ੍ਹੀਆਂ ਕਰਦਾ ਹੈ ਬਲਕਿ ਪ੍ਰਸ਼ੰਸਕਾਂ ਨੂੰ ਵੀ ਨਿਰਾਸ਼ ਕਰਦਾ ਹੈ। ਹਾਲ ਹੀ 'ਚ ਇੰਗਲੈਂਡ ਦੇ ਬੱਲੇਬਾਜ਼ ਬੇਨ ਡਕੇਟ (Ben Duckett) ਦੇ ਅਜਿਹੇ ਫੈਸਲੇ ਨੇ ਇਕ ਨਵੀਂ ਬਹਿਸ ਛੇੜ ਦਿੱਤੀ ਹੈ ਜਿਸ 'ਤੇ ਭਾਰਤੀ ਕ੍ਰਿਕਟ ਦੇ ਦਿੱਗਜ ਸੁਨੀਲ ਗਾਵਸਕਰ ਨੇ ਸਖ਼ਤ ਪ੍ਰਤੀਕਿਰਿਆ ਦਿੱਤੀ ਹੈ।

ਗਾਵਸਕਰ ਨੇ ਆਈਪੀਐਲ ਤੋਂ ਆਖਰੀ ਸਮੇਂ 'ਤੇ ਨਾਂ ਵਾਪਸ ਲੈਣ ਵਾਲੇ ਖਿਡਾਰੀਆਂ ਖਿਲਾਫ ਸਖ਼ਤ ਕਾਰਵਾਈ ਦੀ ਮੰਗ ਕੀਤੀ ਹੈ। ਸਾਬਕਾ ਭਾਰਤੀ ਕਪਤਾਨ ਦਾ ਮੰਨਣਾ ਹੈ ਕਿ ਮੌਜੂਦਾ ਦੋ ਸਾਲ ਦੀ ਪਾਬੰਦੀ ਦਾ ਨਿਯਮ ਖਿਡਾਰੀਆਂ ਨੂੰ ਨਿਲਾਮੀ 'ਚ ਚੁਣੇ ਜਾਣ ਤੋਂ ਬਾਅਦ ਟੂਰਨਾਮੈਂਟ ਤੋਂ ਹਟਣ ਤੋਂ ਰੋਕਣ ਲਈ ਕਾਫ਼ੀ ਨਹੀਂ ਹੈ।

ਬੇਨ ਡਕੇਟ ਨੇ ਦਿੱਲੀ ਕੈਪੀਟਲਸ ਨੂੰ ਦਿੱਤਾ 'ਧੋਖਾ'

ਆਈਪੀਐਲ 2026 ਲਈ ਦਿੱਲੀ ਕੈਪੀਟਲਸ ਦੀ ਟੀਮ ਨੇ ਬੇਨ ਡਕੇਟ ਨੂੰ 2 ਕਰੋੜ ਰੁਪਏ 'ਚ ਖਰੀਦਿਆ ਸੀ। ਉਮੀਦ ਕੀਤੀ ਜਾ ਰਹੀ ਸੀ ਕਿ ਡਕੇਟ ਟੀਮ ਲਈ ਓਪਨਿੰਗ ਕਰਨਗੇ, ਪਰ ਟੂਰਨਾਮੈਂਟ ਸ਼ੁਰੂ ਹੋਣ ਤੋਂ ਠੀਕ ਪਹਿਲਾਂ ਉਨ੍ਹਾਂ ਨੇ ਆਪਣਾ ਨਾਂ ਵਾਪਸ ਲੈ ਕੇ ਸਭ ਨੂੰ ਹੈਰਾਨ ਕਰ ਦਿੱਤਾ। ਡਕੇਟ ਨੇ ਆਪਣੇ ਅੰਤਰਰਾਸ਼ਟਰੀ ਕਰੀਅਰ 'ਤੇ ਧਿਆਨ ਦੇਣ ਲਈ ਇਹ ਫੈਸਲਾ ਲਿਆ। ਹਾਲਾਂਕਿ, ਇਸ ਕਦਮ ਨਾਲ ਟੀਮ ਦੀਆਂ ਤਿਆਰੀਆਂ ਨੂੰ ਵੱਡਾ ਝਟਕਾ ਲੱਗਾ ਹੈ ਕਿਉਂਕਿ ਆਖਰੀ ਸਮੇਂ 'ਤੇ ਕਿਸੇ ਖਿਡਾਰੀ ਦਾ ਹਟਣਾ ਟੀਮ ਦੇ ਸੰਤੁਲਨ ਨੂੰ ਵਿਗਾੜ ਦਿੰਦਾ ਹੈ।

ਸੁਨੀਲ ਗਾਵਸਕਰ ਨੇ ਸਖ਼ਤ ਕਦਮ ਚੁੱਕਣ ਦੀ ਕੀਤੀ ਮੰਗ

ਇਸ ਸਬੰਧ 'ਚ ਸੁਨੀਲ ਗਾਵਸਕਰ ਨੇ ਬੀਸੀਸੀਆਈ (BCCI) ਦੀ ਨੀਤੀ 'ਤੇ ਸਵਾਲ ਉਠਾਏ ਅਤੇ ਕਿਹਾ ਕਿ ਮੌਜੂਦਾ ਦੋ ਸਾਲ ਦੀ ਪਾਬੰਦੀ ਦਾ ਨਿਯਮ ਕਾਫ਼ੀ ਨਹੀਂ ਹੈ। ਉਨ੍ਹਾਂ ਦਾ ਮੰਨਣਾ ਹੈ ਕਿ ਜੇਕਰ ਖਿਡਾਰੀ ਆਖਰੀ ਸਮੇਂ 'ਤੇ ਆਈਪੀਐਲ ਤੋਂ ਹਟਦੇ ਰਹਿਣਗੇ ਅਤੇ ਉਨ੍ਹਾਂ 'ਤੇ ਕੋਈ ਸਖ਼ਤ ਅਸਰ ਨਹੀਂ ਪਵੇਗਾ ਤਾਂ ਇਹ ਸਮੱਸਿਆ ਬਣੀ ਰਹੇਗੀ। ਗਾਵਸਕਰ ਨੇ ਕਿਹਾ, "ਇਸ 'ਤੇ ਬੀਸੀਸੀਆਈ ਨੂੰ ਵਿਚਾਰ ਕਰਨ ਦੀ ਲੋੜ ਹੈ ਕਿਉਂਕਿ ਦੋ ਸਾਲ ਦੀ ਪਾਬੰਦੀ ਸਪੱਸ਼ਟ ਤੌਰ 'ਤੇ ਕੰਮ ਨਹੀਂ ਕਰ ਰਹੀ। ਤੁਹਾਨੂੰ ਅਜਿਹੀ ਸਜ਼ਾ ਬਾਰੇ ਸੋਚਣਾ ਪਵੇਗਾ ਜਿਸਦਾ ਖਿਡਾਰੀਆਂ 'ਤੇ ਅਸਰ ਪਵੇ। ਜਦੋਂ ਤਕ ਕਿਸੇ ਖਿਡਾਰੀ ਲਈ ਆਈਪੀਐਲ 'ਚ ਵਾਪਸੀ ਦੀ ਸੰਭਾਵਨਾ 'ਤੇ ਅਸਰ ਨਹੀਂ ਪਵੇਗਾ, ਉਦੋਂ ਤਕ ਇਹ ਨਿਯਮ ਕਿਸੇ ਕੰਮ ਦਾ ਨਹੀਂ ਹੋਵੇਗਾ।"

ਕੀ ਹੈ ਮੌਜੂਦਾ ਨਿਯਮ?

ਨਿਯਮ ਇਹ ਹੈ ਕਿ ਜੇਕਰ ਕੋਈ ਵਿਦੇਸ਼ੀ ਖਿਡਾਰੀ ਨਿਲਾਮੀ 'ਚ ਚੁਣੇ ਜਾਣ ਤੋਂ ਬਾਅਦ ਟੂਰਨਾਮੈਂਟ ਤੋਂ ਹਟਦਾ ਹੈ ਤਾਂ ਉਸ ਨੂੰ ਦੋ ਸੀਜ਼ਨਾਂ ਤਕ ਆਈਪੀਐਲ ਅਤੇ ਭਵਿੱਖ ਦੀਆਂ ਨਿਲਾਮੀਆਂ ਤੋਂ ਬਾਹਰ ਰੱਖਿਆ ਜਾ ਸਕਦਾ ਹੈ। ਹਾਲਾਂਕਿ, ਜੇਕਰ ਖਿਡਾਰੀ ਦੀ ਸੱਟ ਜਾਂ ਡਾਕਟਰੀ ਕਾਰਨ ਸਹੀ ਪਾਏ ਜਾਂਦੇ ਹਨ ਤਾਂ ਉਸ ਨੂੰ ਇਸ ਨਿਯਮ ਤੋਂ ਛੋਟ ਮਿਲ ਸਕਦੀ ਹੈ। ਦੱਸ ਦੇਈਏ ਕਿ ਡਕੇਟ ਤੋਂ ਪਹਿਲਾਂ ਹੈਰੀ ਬਰੂਕ ਵੀ ਇਸੇ ਤਰ੍ਹਾਂ ਆਈਪੀਐਲ ਤੋਂ ਹਟ ਚੁੱਕੇ ਹਨ ਅਤੇ ਫਿਲਹਾਲ ਪਾਬੰਦੀ ਦਾ ਸਾਹਮਣਾ ਕਰ ਰਹੇ ਹਨ।