ਵੈਭਵ ਸੂਰਿਆਵੰਸ਼ੀ ਨੂੰ ਸਾਬਕਾ ਭਾਰਤੀ ਕਪਤਾਨ ਨੇ ਦੱਸਿਆ ਅਗਲਾ 'ਕ੍ਰਿਕਟ ਦਾ ਭਗਵਾਨ', ਹੁਣ ਤਕ ਡੈਬਿਊ ਨਾ ਹੋਣ 'ਤੇ ਅਗਰਕਰ ਨੂੰ ਪਾਈ ਝਾੜ

ਸਪੋਰਟਸ ਡੈਸਕ, ਨਵੀਂ ਦਿੱਲੀ : ਭਾਰਤ ਦੇ ਉੱਭਰਦੇ ਸਿਤਾਰੇ ਵੈਭਵ ਸੂਰਿਆਵੰਸ਼ੀ ਨੇ ਮਹਿਜ਼ 14 ਸਾਲ ਦੀ ਉਮਰ 'ਚ ਆਪਣੀ ਪ੍ਰਤਿਭਾ ਨਾਲ ਸਾਰਿਆਂ ਨੂੰ ਹੈਰਾਨ ਕਰ ਦਿੱਤਾ ਸੀ। ਇਸ ਤੋਂ ਬਾਅਦ ਆਈਪੀਐਲ 2026 'ਚ ਉਨ੍ਹਾਂ ਨੇ ਜਸਪ੍ਰੀਤ ਬੁਮਰਾਹ ਵਿਰੁੱਧ ਪਹਿਲੀ ਹੀ ਗੇਂਦ 'ਤੇ ਛੱਕਾ ਜੜਕੇ ਸੁਰਖੀਆਂ ਬਟੋਰੀਆਂ। ਹੁਣ ਉਨ੍ਹਾਂ ਨੂੰ ਭਾਰਤੀ ਟੀਮ 'ਚ ਲਿਆਉਣ ਦੀਆਂ ਗੱਲਾਂ ਚੱਲ ਰਹੀਆਂ ਹਨ ਤੇ ਭਾਰਤ ਦੇ ਸਾਬਕਾ ਕਪਤਾਨ ਕ੍ਰਿਸ ਸ੍ਰੀਕਾਂਤ ਨੇ ਵੀ ਇਸ ਦਾ ਸਮਰਥਨ ਕੀਤਾ ਹੈ। ਸ੍ਰੀਕਾਂਤ ਦਾ ਕਹਿਣਾ ਹੈ ਕਿ ਸੂਰਿਆਵੰਸ਼ੀ ਨੂੰ ਜਲਦੀ ਤੋਂ ਜਲਦੀ ਟੀਮ ਇੰਡੀਆ 'ਚ ਮੌਕਾ ਦੇਣਾ ਚਾਹੀਦਾ ਹੈ।

ਸਾਬਕਾ ਕਪਤਾਨ ਦਾ ਮੰਨਣਾ ਹੈ ਕਿ ਸੂਰਿਆਵੰਸ਼ੀ ਭਾਰਤ ਲਈ ਅਗਲਾ ਸਚਿਨ ਤੇਂਦੁਲਕਰ ਸਾਬਤ ਹੋ ਸਕਦਾ ਹੈ। ਦੱਸ ਦੇਈਏ ਕਿ ਸਚਿਨ ਨੇ ਵੀ 16 ਸਾਲ ਦੀ ਉਮਰ ਵਿੱਚ ਇੰਟਰਨੈਸ਼ਨਲ ਕ੍ਰਿਕਟ ਵਿੱਚ ਆਪਣਾ ਡੈਬਿਊ ਕੀਤਾ ਸੀ। ਵੈਭਵ ਵੀ 15 ਸਾਲ ਦੇ ਹਨ ਅਤੇ ਉਹ ਜਿਸ ਤਰ੍ਹਾਂ ਬੱਲੇਬਾਜ਼ੀ ਕਰ ਰਹੇ ਹਨ, ਅਜਿਹਾ ਲੱਗ ਰਿਹਾ ਹੈ ਕਿ ਉਹ ਇੰਟਰਨੈਸ਼ਨਲ ਕ੍ਰਿਕਟ ਲਈ ਪੂਰੀ ਤਰ੍ਹਾਂ ਤਿਆਰ ਹਨ। ਇਸੇ ਕਾਰਨ ਸ੍ਰੀਕਾਂਤ ਨੇ ਉਨ੍ਹਾਂ ਨੂੰ ਤੁਰੰਤ ਭਾਰਤੀ ਟੀਮ ਵਿੱਚ ਸ਼ਾਮਲ ਕਰਨ ਦੀ ਗੱਲ ਕਹੀ ਹੈ।

ਵੈਭਵ ਸੂਰਿਆਵੰਸ਼ੀ ਨੂੰ ਤੁਰੰਤ ਮੌਕਾ ਮਿਲੇ: ਸ੍ਰੀਕਾਂਤ

'ਦਿ ਵੀਕ' ਨਾਲ ਗੱਲ ਕਰਦੇ ਹੋਏ ਸ੍ਰੀਕਾਂਤ ਨੇ ਕਿਹਾ, "ਵੈਭਵ ਸੂਰਿਆਵੰਸ਼ੀ, ਇਹ ਲੜਕਾ ਦੇਖੋ ਸ਼ਾਟਸ ਕਿਵੇਂ ਖੇਡਦਾ ਹੈ। ਉਹ ਸੱਚਮੁੱਚ ਅਸਾਧਾਰਨ ਤੇ ਪ੍ਰਤਿਭਾਸ਼ਾਲੀ ਹੈ। ਮੈਂ ਅਜੀਤ (ਅਗਰਕਰ) ਨੂੰ ਕਹਿ ਰਿਹਾ ਹਾਂ ਕਿ ਇਸ ਨੂੰ ਤੁਰੰਤ ਮੌਕਾ ਦੇਣਾ ਚਾਹੀਦਾ ਹੈ। ਅਗਲੀ ਸੀਰੀਜ਼ 'ਚ ਉਸ ਨੂੰ ਖੇਡਣਾ ਚਾਹੀਦਾ ਹੈ। ਮੈਂ ਪਹਿਲਾਂ ਵੀ ਇਹੀ ਕਹਿ ਰਿਹਾ ਸੀ ਕਿ ਉਨ੍ਹਾਂ ਨੂੰ ਤੁਰੰਤ ਮੌਕਾ ਮਿਲਣਾ ਚਾਹੀਦਾ ਸੀ। ਇੱਥੋਂ ਤਕ ਕਿ ਟੀ-20 ਵਰਲਡ ਕੱਪ 'ਚ ਵੀ ਉਸ ਨੂੰ ਸ਼ਾਮਲ ਹੋਣਾ ਚਾਹੀਦਾ ਸੀ। ਉਸ ਨੂੰ ਸਿੱਧਾ ਪਲੇਇੰਗ 11 'ਚ ਸ਼ਾਮਲ ਕਰਨ ਦੀ ਲੋੜ ਨਹੀਂ ਹੈ, ਪਹਿਲਾਂ ਉਸ ਨੂੰ ਮਾਹੌਲ ਸਮਝਣ ਦਿਓ ਅਤੇ ਇੰਟਰਨੈਸ਼ਨਲ ਕ੍ਰਿਕਟ ਦਾ ਅਨੁਭਵ ਲੈਣ ਦਿਓ।"

1983 ਵਿਸ਼ਵ ਕੱਪ ਜੇਤੂ ਟੀਮ ਦਾ ਹਿੱਸਾ ਰਹੇ ਸਾਬਕਾ ਕ੍ਰਿਕਟਰ ਨੇ ਕਿਹਾ, "ਮੈਨੂੰ ਇਹੀ ਲੱਗਦਾ ਹੈ ਕਿ ਸੂਰਿਆਵੰਸ਼ੀ ਨੂੰ ਤੁਰੰਤ ਮੌਕਾ ਦੇਣਾ ਚਾਹੀਦਾ ਹੈ। ਉਸ ਨੂੰ ਹੁਣ ਸਮਾਂ ਦੇ ਕੇ ਲਗਾਤਾਰ ਚੰਗਾ ਪ੍ਰਦਰਸ਼ਨ ਕਰਨ ਦਾ ਸਵਾਲ ਹੀ ਪੈਦਾ ਨਹੀਂ ਹੁੰਦਾ। ਉਹ ਇੱਕ ਪਲ ਵਿੱਚ ਹੀ ਮੈਚ ਦਾ ਰੁਖ ਬਦਲ ਸਕਦਾ ਹੈ। ਉਸ ਨੇ ਬੁਮਰਾਹ ਦੀ ਪਹਿਲੀ ਗੇਂਦ 'ਤੇ ਛੱਕਾ ਲਗਾਇਆ ਅਤੇ ਫਿਰ ਹੇਜ਼ਲਵੁੱਡ ਦੀ ਵੀ ਕੁਟਾਈ ਕੀਤੀ। ਉਸ ਨੂੰ ਇਸ ਗੱਲ ਨਾਲ ਕੋਈ ਫਰਕ ਨਹੀਂ ਪੈਂਦਾ ਕਿ ਸਾਹਮਣੇ ਵਾਲਾ ਗੇਂਦਬਾਜ਼ ਕੌਣ ਹੈ।"

ਕ੍ਰਿਕਟ ਦੇ ਭਗਵਾਨ ਬਣ ਸਕਦੇ ਹਨ ਸੂਰਿਆਵੰਸ਼ੀ

ਸਾਬਕਾ ਭਾਰਤੀ ਕਪਤਾਨ ਦਾ ਮੰਨਣਾ ਹੈ ਕਿ ਜੇਕਰ ਸਚਿਨ ਤੇਂਦੁਲਕਰ ਕ੍ਰਿਕਟ ਦੇ ਭਗਵਾਨ ਹਨ ਤਾਂ ਸੂਰਿਆਵੰਸ਼ੀ 'ਡੇਮੀ ਗੌਡ' (ਅਰਧ-ਭਗਵਾਨ) ਬਣ ਸਕਦੇ ਹਨ। ਉਨ੍ਹਾਂ ਕਿਹਾ, "ਜਦੋਂ ਮੈਂ 1989 ਵਿੱਚ ਟੀਮ ਦਾ ਕਪਤਾਨ ਸੀ, ਤਾਂ ਇੱਕ 16 ਸਾਲ ਦਾ ਸਚਿਨ ਤੇਂਦੁਲਕਰ ਵਿਲੱਖਣ ਪ੍ਰਤਿਭਾ ਵਾਲਾ ਖਿਡਾਰੀ ਸੀ। ਅੱਜ ਉਹ ਕ੍ਰਿਕਟ ਦੇ ਭਗਵਾਨ ਹਨ। ਅਜਿਹਾ ਹੀ ਇਹ ਲੜਕਾ ਵੀ ਕ੍ਰਿਕਟ ਦਾ ਅਗਲਾ ਡੇਮੀ ਗੌਡ ਬਣ ਸਕਦਾ ਹੈ।"