ਕੁਲਦੀਪ ਯਾਦਵ ਦੇ ਵਿਆਹ 'ਚ ਪਹੁੰਚਣਗੇ ਰੋਹਿਤ-ਵਿਰਾਟ; ਮਸੂਰੀ 'ਚ ਹੋਵੇਗਾ ਸਮਾਗਮ, ਜਾਣੋ ਕੌਣ ਹੈ ਕੁਲਦੀਪ ਦੀ ਹੋਣ ਵਾਲੀ ਪਤਨੀ

ਸਪੋਰਟਸ ਡੈਸਕ, ਨਵੀਂ ਦਿੱਲੀ: ਭਾਰਤੀ ਟੀਮ ਦੇ ਸਪਿਨਰ ਕੁਲਦੀਪ ਯਾਦਵ ਜਲਦ ਹੀ ਵਿਆਹ ਦੇ ਬੰਧਨ ਵਿੱਚ ਬੱਝਣ ਵਾਲੇ ਹਨ। ਉਹ ਆਪਣੀ ਬਚਪਨ ਦੀ ਦੋਸਤ ਵੰਸ਼ਿਕਾ ਨਾਲ ਵਿਆਹ ਕਰਨਗੇ। ਉਨ੍ਹਾਂ ਦਾ ਵਿਆਹ 14 ਮਾਰਚ ਨੂੰ ਮਸੂਰੀ ਵਿੱਚ ਹੋਣ ਵਾਲਾ ਹੈ, ਜਿੱਥੇ ਤਿਆਰੀਆਂ ਜ਼ੋਰਾਂ-ਸ਼ੋਰਾਂ ਨਾਲ ਚੱਲ ਰਹੀਆਂ ਹਨ। ਇਸ ਦੌਰਾਨ ਵੱਡੀ ਖ਼ਬਰ ਸਾਹਮਣੇ ਆ ਰਹੀ ਹੈ ਕਿ ਕੁਲਦੀਪ ਦੇ ਵਿਆਹ ਵਿੱਚ ਕ੍ਰਿਕਟ ਜਗਤ ਦੇ ਕਈ ਦਿੱਗਜ ਖਿਡਾਰੀ ਸ਼ਾਮਲ ਹੋ ਸਕਦੇ ਹਨ। ਯਾਦਵ ਦਾ ਵਿਆਹ 'ਸੇਵੋਏ ਹੋਟਲ' ਵਿੱਚ ਹੋਣ ਜਾ ਰਿਹਾ ਹੈ।

ਇਹ ਹੋਟਲ ਤਿੰਨ ਦਿਨਾਂ ਲਈ ਪੂਰੀ ਤਰ੍ਹਾਂ ਬੁੱਕ ਹੋ ਚੁੱਕਾ ਹੈ। ਹੁਣ ਜਾਣਕਾਰੀ ਸਾਹਮਣੇ ਆ ਰਹੀ ਹੈ ਕਿ ਰੋਹਿਤ ਸ਼ਰਮਾ ਅਤੇ ਵਿਰਾਟ ਕੋਹਲੀ ਵਰਗੇ ਦਿੱਗਜ ਕੁਲਦੀਪ ਦੇ ਵਿਆਹ ਵਿੱਚ ਸ਼ਾਮਲ ਹੋ ਸਕਦੇ ਹਨ। ਇਸ ਦੇ ਸੰਕੇਤ ਇਸ ਗੱਲ ਤੋਂ ਵੀ ਮਿਲੇ ਹਨ ਕਿ ਸੇਵੋਏ ਹੋਟਲ ਦੇ ਆਸ-ਪਾਸ ਕਈ ਹੋਰ ਲਗਜ਼ਰੀ ਹੋਟਲ ਵੀ ਬੁੱਕ ਕੀਤੇ ਗਏ ਹਨ।

ਵਿਰਾਟ ਕੋਹਲੀ ਅਤੇ ਰੋਹਿਤ ਸ਼ਰਮਾ ਲੈ ਸਕਦੇ ਹਨ ਹਿੱਸਾ

ਸਮਾਚਾਰ ਏਜੰਸੀ ਪੀ.ਟੀ.ਆਈ (PTI) ਦੀ ਇੱਕ ਰਿਪੋਰਟ ਮੁਤਾਬਕ ਵਿਰਾਟ ਕੋਹਲੀ, ਰੋਹਿਤ ਸ਼ਰਮਾ ਅਤੇ ਜਸਪ੍ਰੀਤ ਬੁਮਰਾਹ ਦੇ ਵੀ ਵਿਆਹ ਵਿੱਚ ਪਹੁੰਚਣ ਦੀ ਉਮੀਦ ਹੈ। ਹੋਟਲ ਮੈਨੇਜਮੈਂਟ ਨੇ ਪੁਸ਼ਟੀ ਕੀਤੀ ਹੈ ਕਿ 'ਦ ਸੇਵੋਏ ਹੋਟਲ' ਦੇ ਲਗਪਗ 80 ਕਮਰੇ ਬੁੱਕ ਕਰ ਲਏ ਗਏ ਹਨ। ਇਸ ਦੇ ਨਾਲ ਹੀ ਪਰਿਵਾਰ ਅਤੇ ਸੁਰੱਖਿਆ ਕਰਮਚਾਰੀਆਂ ਦੇ ਠਹਿਰਣ ਲਈ ਆਸ-ਪਾਸ ਦੇ ਕਈ ਲਗਜ਼ਰੀ ਘਰਾਂ ਨੂੰ ਵੀ ਬੁੱਕ ਕੀਤਾ ਗਿਆ ਹੈ।

ਕੌਣ ਹੈ ਕੁਲਦੀਪ ਦੀ ਹੋਣ ਵਾਲੀ ਪਤਨੀ?

ਕੁਲਦੀਪ ਯਾਦਵ ਦੀ ਹੋਣ ਵਾਲੀ ਪਤਨੀ ਵੰਸ਼ਿਕਾ ਉਨ੍ਹਾਂ ਦੇ ਬਚਪਨ ਦੀ ਦੋਸਤ ਹੈ। ਇਹ ਦੋਵੇਂ ਕਾਨਪੁਰ ਵਿੱਚ ਵੱਡੇ ਹੋਏ ਹਨ ਅਤੇ ਉੱਥੇ ਦੋਵਾਂ ਦੇ ਘਰਾਂ ਦੀ ਦੂਰੀ ਕੇਵਲ 3 ਕਿਲੋਮੀਟਰ ਹੈ। ਕੁਲਦੀਪ ਯਾਦਵ 'ਲਾਲ ਬੰਗਲਾ' ਇਲਾਕੇ ਦੇ ਰਹਿਣ ਵਾਲੇ ਹਨ, ਜਦਕਿ ਵੰਸ਼ਿਕਾ 'ਸ਼ਿਆਮ ਨਗਰ' ਵਿੱਚ ਰਹਿੰਦੀ ਹੈ। ਵੰਸ਼ਿਕਾ LIC ਵਿੱਚ ਕੰਮ ਕਰਦੀ ਹੈ ਅਤੇ ਉਨ੍ਹਾਂ ਨੇ ਮੈਲਬੋਰਨ (ਆਸਟ੍ਰੇਲੀਆ) ਤੋਂ ਪੜ੍ਹਾਈ ਕੀਤੀ ਹੈ। ਦੱਸ ਦੇਈਏ ਕਿ ਇਸ ਜੋੜੇ ਨੇ 4 ਜੂਨ ਨੂੰ ਲਖਨਊ ਵਿੱਚ ਮੰਗਣੀ ਕੀਤੀ ਸੀ। ਪਹਿਲਾਂ ਇਹ ਵਿਆਹ ਨਵੰਬਰ ਵਿੱਚ ਹੋਣਾ ਸੀ ਪਰ ਟੀ-20 ਵਰਲਡ ਕੱਪ 2026 ਕਰਕੇ ਇਸ ਨੂੰ ਅੱਗੇ ਪਾ ਦਿੱਤਾ ਗਿਆ ਸੀ। ਹੁਣ 14 ਮਾਰਚ ਨੂੰ ਦੋਵੇਂ ਵਿਆਹ ਦੇ ਬੰਧਨ ਵਿੱਚ ਬੱਝ ਜਾਣਗੇ।

17 ਮਾਰਚ ਨੂੰ ਵਿਆਹ ਦਾ ਰਿਸੈਪਸ਼ਨ

14 ਮਾਰਚ ਨੂੰ ਮਸੂਰੀ ਵਿੱਚ ਵਿਆਹ ਤੋਂ ਬਾਅਦ 17 ਮਾਰਚ ਨੂੰ ਲਖਨਊ ਵਿੱਚ ਰਿਸੈਪਸ਼ਨ ਹੋਵੇਗਾ। ਇਹ ਰਿਸੈਪਸ਼ਨ 'ਹੋਟਲ ਸੈਂਟਰਮ' ਵਿੱਚ ਕੀਤਾ ਜਾਵੇਗਾ, ਜਿਸ ਵਿੱਚ ਉੱਤਰ ਪ੍ਰਦੇਸ਼ ਦੇ ਮੁੱਖ ਮੰਤਰੀ ਯੋਗੀ ਆਦਿੱਤਿਆਨਾਥ ਸ਼ਾਮਲ ਹੋ ਸਕਦੇ ਹਨ। ਵਿਆਹ ਤੋਂ ਪਹਿਲਾਂ ਕੁਲਦੀਪ ਨੇ ਸੀ.ਐੱਮ ਯੋਗੀ ਨਾਲ ਮੁਲਾਕਾਤ ਕੀਤੀ ਸੀ ਅਤੇ ਉਨ੍ਹਾਂ ਨੂੰ ਵਿਆਹ ਦਾ ਸੱਦਾ ਵੀ ਦਿੱਤਾ ਸੀ।