'ਕੁਆਲੀਫਾਈ ਨਹੀਂ ਕਰ ਸਕੇ...', KKR ਦੇ IPL 2026 ਤੋਂ ਬਾਹਰ ਹੁੰਦੇ ਹੀ ਕਪਤਾਨ Ajinkya Rahane ਦਾ ਛਲਕਿਆ ਦਰਦ; ਰਿਟਾਇਰਮੈਂਟ 'ਤੇ ਤੋੜੀ ਚੁੱਪ
ਕੇਕੇਆਰ ਨੇ ਆਪਣੇ ਆਈਪੀਐਲ 2026 ਦਾ ਸਫ਼ਰ ਹਾਰ ਦੇ ਨਾਲ ਖ਼ਤਮ ਕੀਤਾ। ਈਡਨ ਗਾਰਡਨਜ਼ ਵਿੱਚ ਖੇਡੇ ਗਏ ਮੈਚ ਵਿੱਚ ਕੇਕੇਆਰ ਨੂੰ ਦਿੱਲੀ ਕੈਪੀਟਲਸ ਹੱਥੋਂ ਹਾਰ ਦਾ ਸਾਹਮਣਾ ਕਰਨਾ ਪਿਆ। 204 ਦੌੜਾਂ ਦੇ ਟੀਚੇ ਦਾ ਪਿੱਛਾ ਕਰਦਿਆਂ ਇੱਕ ਸਮੇਂ ਕੇਕੇਆਰ ਕਾਫ਼ੀ ਮਜ਼ਬੂਤ ਸਥਿਤੀ ਵਿੱਚ ਸੀ।
Posted By Anuradha Bains
Publish Date: Mon, 25 May 2026 10:44 AM (IST)
Updated Date: Mon, 25 May 2026 10:47 AM (IST)
ਸਪੋਰਟਸ ਡੈਸਕ, ਨਵੀਂ ਦਿੱਲੀ। Ajinkya Rahane IPL: ਕੇਕੇਆਰ ਨੇ ਆਪਣੇ ਆਈਪੀਐਲ 2026 ਦਾ ਸਫ਼ਰ ਹਾਰ ਦੇ ਨਾਲ ਖ਼ਤਮ ਕੀਤਾ। ਈਡਨ ਗਾਰਡਨਜ਼ ਵਿੱਚ ਖੇਡੇ ਗਏ ਮੈਚ ਵਿੱਚ ਕੇਕੇਆਰ ਨੂੰ ਦਿੱਲੀ ਕੈਪੀਟਲਸ ਹੱਥੋਂ ਹਾਰ ਦਾ ਸਾਹਮਣਾ ਕਰਨਾ ਪਿਆ। 204 ਦੌੜਾਂ ਦੇ ਟੀਚੇ ਦਾ ਪਿੱਛਾ ਕਰਦਿਆਂ ਇੱਕ ਸਮੇਂ ਕੇਕੇਆਰ ਕਾਫ਼ੀ ਮਜ਼ਬੂਤ ਸਥਿਤੀ ਵਿੱਚ ਸੀ।
ਇੱਕ ਸਮੇਂ 14ਵੇਂ ਓਵਰ ਵਿੱਚ ਉਨ੍ਹਾਂ ਦਾ ਸਕੋਰ 128/3 ਸੀ। ਹਾਲਾਂਕਿ, ਇਸੇ ਸਕੋਰ 'ਤੇ ਜਿਵੇਂ ਹੀ ਰਹਾਣੇ ਦੀ ਵਿਕਟ ਡਿੱਗੀ, ਪੂਰੀ ਟੀਮ ਤਾਸ਼ ਦੇ ਪੱਤਿਆਂ ਵਾਂਗ ਬਿਖਰ ਗਈ। 128/4 ਤੋਂ ਕੇਕੇਆਰ ਦੀ ਟੀਮ 163 ਦੌੜਾਂ 'ਤੇ ਆਲਆਊਟ ਹੋ ਗਈ ਅਤੇ ਡੀਸੀ ਨੇ ਇਹ ਮੈਚ 40 ਦੌੜਾਂ ਨਾਲ ਆਪਣੇ ਨਾਂ ਕਰ ਲਿਆ। ਕੇਕੇਆਰ ਨੇ 13 ਅੰਕਾਂ ਦੇ ਨਾਲ 7ਵੇਂ ਸਥਾਨ 'ਤੇ ਆਪਣਾ ਸਫ਼ਰ ਖ਼ਤਮ ਕੀਤਾ। ਆਖਰੀ ਲੀਗ ਮੈਚ ਵਿੱਚ ਮਿਲੀ ਹਾਰ ਤੋਂ ਬਾਅਨ ਕੇਕੇਆਰ ਦੇ ਕਪਤਾਨ ਅਜਿੰਕਿਆ ਰਹਾਣੇ ਕਾਫ਼ੀ ਨਿਰਾਸ਼ ਨਜ਼ਰ ਆਏ।
Ajinkya Rahane ਨੇ IPL 2026 ਤੋਂ ਬਾਹਰ ਹੁੰਦੇ ਹੀ ਕੀ ਕਿਹਾ?
ਦਰਅਸਲ, ਅਜਿੰਕਿਆ ਰਹਾਣੇ ਨੇ ਪਲੇਆਫ ਦੀ ਦੌੜ ਤੋਂ ਬਾਹਰ ਹੋਣ ਦੇ ਬਾਵਜੂਦ ਆਪਣੀ ਟੀਮ ਦੇ ਖਿਡਾਰੀਆਂ ਦੇ ਪ੍ਰਦਰਸ਼ਨ ਦੀ ਤਾਰੀਫ਼ ਕੀਤੀ। ਸ਼ੁਰੂਆਤੀ ਸਮੀਕਰਨਾਂ ਅਨੁਸਾਰ, ਲੀਗ ਸਟੇਜ ਦੇ ਆਖਰੀ ਦਿਨ ਕੇਕੇਆਰ ਕੋਲ ਪਲੇਆਫ ਵਿੱਚ ਪਹੁੰਚਣ ਦਾ ਮੌਕਾ ਸੀ, ਪਰ ਐਤਵਾਰ ਨੂੰ ਹੋਏ ਪਹਿਲੇ ਮੈਚ ਵਿੱਚ ਆਰਆਰ ਦੀ ਜਿੱਤ ਨੇ ਡੀਸੀ ਦੇ ਖ਼ਿਲਾਫ਼ ਕੇਕੇਆਰ ਦਾ ਆਖਰੀ ਲੀਗ ਮੈਚ ਸ਼ੁਰੂ ਹੋਣ ਤੋਂ ਪਹਿਲਾਂ ਹੀ ਉਨ੍ਹਾਂ ਦੀਆਂ ਉਮੀਦਾਂ ਤੋੜ ਦਿੱਤੀਆਂ ਸਨ।
ਇਸ ਨਿਰਾਸ਼ਾ ਦਾ ਅਸਰ ਟੀਮ ਦੀ ਖੇਡ 'ਤੇ ਵੀ ਦੇਖਣ ਨੂੰ ਮਿਲਿਆ ਅਤੇ ਡੀਸੀ ਹੱਥੋਂ ਉਨ੍ਹਾਂ ਨੂੰ 40 ਦੌੜਾਂ ਦੀ ਹਾਰ ਦੇ ਨਾਲ ਟੂਰਨਾਮੈਂਟ ਤੋਂ ਬਾਹਰ ਹੋਣਾ ਪਿਆ।
204 ਦੌੜਾਂ ਦੇ ਟੀਚੇ ਦਾ ਪਿੱਛਾ ਕਰਦਿਆਂ ਕੇਕੇਆਰ ਦੀ ਟੀਮ ਅਜਿੰਕਿਆ ਰਹਾਣੇ ਦੀਆਂ 39 ਗੇਂਦਾਂ ਵਿੱਚ 63 ਦੌੜਾਂ ਦੀ ਪਾਰੀ ਦੇ ਬਾਵਜੂਦ 18.4 ਓਵਰਾਂ ਵਿੱਚ 163 ਦੌੜਾਂ 'ਤੇ ਢੇਰ ਹੋ ਗਈ। ਦਿੱਲੀ ਵੱਲੋਂ ਲੁੰਗੀ ਐਨਗਿਡੀ ਨੇ ਸ਼ਾਨਦਾਰ ਗੇਂਦਬਾਜ਼ੀ ਕਰਦਿਆਂ ਤਿੰਨ ਵਿਕਟਾਂ ਝਟਕਾਈਆਂ। ਇਸ ਤੋਂ ਪਹਿਲਾਂ, ਦਿੱਲੀ ਕੈਪੀਟਲਸ ਨੇ ਕੇਐਲ ਰਾਹੁਲ ਦੀਆਂ 30 ਗੇਂਦਾਂ ਵਿੱਚ 60 ਦੌੜਾਂ ਦੀ ਤੂਫ਼ਾਨੀ ਪਾਰੀ ਦੀ ਬਦੌਲਤ 20 ਓਵਰਾਂ ਵਿੱਚ 5 ਵਿਕਟਾਂ ਗੁਆ ਕੇ 203 ਦੌੜਾਂ ਬਣਾਈਆਂ ਸਨ। ਉੱਥੇ ਹੀ, ਕੇਕੇਆਰ ਵੱਲੋਂ ਸੌਰਭ ਦੂਬੇ ਨੇ ਦੋ ਵਿਕਟਾਂ ਲਈਆਂ।
ਮੈਚ ਵਿੱਚ ਮਿਲੀ ਹਾਰ ਤੋਂ ਬਾਅਦ ਪੋਸਟ ਮੈਚ ਪ੍ਰੈਜ਼ੈਂਟੇਸ਼ਨ ਦੌਰਾਨ ਕਪਤਾਨ ਰਹਾਣੇ ਨੇ ਕਿਹਾ,
"ਸਾਡਾ ਇਹ ਸੀਜ਼ਨ ਜਿਹੋ ਜਿਹਾ ਵੀ ਰਿਹਾ, ਮੈਨੂੰ ਟੀਮ ਦੇ ਹਰ ਇੱਕ ਖਿਡਾਰੀ 'ਤੇ ਬਹੁਤ ਮਾਣ ਹੈ। ਸ਼ੁਰੂਆਤੀ 6 ਮੈਚਾਂ ਤੋਂ ਬਾਅਦ ਅਸੀਂ ਜਿਸ ਸਥਿਤੀ ਵਿੱਚ ਸੀ, ਉੱਥੋਂ ਵਾਪਸੀ ਕਰਨਾ, ਟੂਰਨਾਮੈਂਟ ਵਿੱਚ ਖੁਦ ਨੂੰ ਬਣਾਈ ਰੱਖਣਾ ਅਤੇ ਇਸ ਤਰ੍ਹਾਂ ਦੀ ਕ੍ਰਿਕਟ ਖੇਡਣਾ, ਇਸ ਦੇ ਲਈ ਮਜ਼ਬੂਤ ਚਰਿੱਤਰ, ਸਹੀ ਰਵੱਈਏ ਅਤੇ ਜਜ਼ਬੇ ਦੀ ਲੋੜ ਸੀ। ਮੈਂ ਹਰ ਇੱਕ ਨਿੱਜੀ ਕੋਸ਼ਿਸ਼ ਦੀ ਦਿਲੋਂ ਸ਼ਲਾਘਾ ਕਰਦਾ ਹਾਂ। ਸੀਜ਼ਨ ਦੇ ਪਹਿਲੇ ਹਾਫ਼ ਵਿੱਚ ਕੁਝ ਅਜਿਹੇ ਮਹੱਤਵਪੂਰਨ ਮੋੜ ਆਏ ਜਿੱਥੇ ਅਸੀਂ ਮੈਚ ਹਾਰ ਰਹੇ ਸੀ, ਅਤੇ ਉਸ ਤੋਂ ਬਾਅਦ ਵਾਪਸੀ ਕਰਨਾ ਕਦੇ ਸੌਖਾ ਨਹੀਂ ਹੁੰਦਾ।
ਆਈਪੀਐਲ ਇੱਕ ਲੰਮਾ ਟੂਰਨਾਮੈਂਟ ਹੈ ਜਿਸ ਵਿੱਚ ਕਾਫ਼ੀ ਦਬਾਅ ਅਤੇ ਹਾਈ-ਪ੍ਰੈਸ਼ਰ ਹਾਲਾਤ ਹੁੰਦੇ ਹਨ। ਪਰ ਇਸ ਦੇ ਬਾਵਜੂਦ ਖੁਦ ਨੂੰ ਮਜ਼ਬੂਤ ਰੱਖਣਾ, ਹਰ ਮੈਚ ਵਿੱਚ ਉਹ ਜਜ਼ਬਾ ਤੇ ਰਵੱਈਆ ਦਿਖਾਉਣਾ ਅਤੇ ਟੀਮ ਲਈ ਆਪਣਾ ਸਰਵੋਤਮ ਦੇਣਾ, ਡਰੈਸਿੰਗ ਰੂਮ ਦੇ ਅੰਦਰ ਅਸੀਂ ਸਾਰੇ ਇਸ ਗੱਲ ਤੋਂ ਬੇਹੱਦ ਖੁਸ਼ ਸੀ।
ਜਿਵੇਂ ਕਿ ਮੈਂ ਕਿਹਾ, ਹਰ ਖਿਡਾਰੀ ਨੇ ਮੈਦਾਨ 'ਤੇ ਜਾ ਕੇ ਆਪਣੀ ਵੱਲੋਂ ਪੂਰਾ ਜ਼ੋਰ ਲਾਇਆ। ਇਹ ਸੀਜ਼ਨ ਸਾਡੇ ਪੱਖ ਵਿੱਚ ਨਹੀਂ ਰਿਹਾ ਅਤੇ ਅਸੀਂ ਕੁਆਲੀਫਾਈ ਨਹੀਂ ਕਰ ਸਕੇ, ਜੋ ਕਿ ਨਿਰਾਸ਼ਾਜਨਕ ਹੈ, ਪਰ ਮੈਨੂੰ ਹਰ ਕਿਸੇ 'ਤੇ ਅਤੇ ਸਾਡੇ ਵੱਲੋਂ ਕੀਤੀਆਂ ਗਈਆਂ ਕੋਸ਼ਿਸ਼ਾਂ 'ਤੇ ਮਾਣ ਹੈ।"
— ਰਹਾਣੇ
ਰਿਟਾਇਰਮੈਂਟ 'ਤੇ ਵੀ ਕੀਤਾ ਸਾਫ਼
ਰਹਾਣੇ ਨੇ ਇਹ ਵੀ ਸਾਫ਼ ਕਰ ਦਿੱਤਾ ਕਿ ਉਨ੍ਹਾਂ ਦਾ ਕ੍ਰਿਕਟ ਤੋਂ ਸੰਨਿਆਸ ਲੈਣ ਦਾ ਅਜੇ ਕੋਈ ਇਰਾਦਾ ਨਹੀਂ ਹੈ। ਉਹ ਜਲਦ ਹੀ ਮੁੰਬਈ ਦੀ ਲੋਕਲ ਲੀਗ ਵਿੱਚ ਖੇਡਦੇ ਨਜ਼ਰ ਆਉਣਗੇ। ਰਹਾਣੇ ਨੇ ਕਿਹਾ,
"ਮੇਰੇ ਲਈ ਬੱਸ 2 ਦਿਨਾਂ ਦਾ ਬ੍ਰੇਕ ਹੈ। ਮੈਂ ਮੁੰਬਈ ਵਿੱਚ ਆਪਣੀ ਲੋਕਲ ਲੀਗ ਖੇਡਣ ਜਾ ਰਿਹਾ ਹਾਂ, ਜਿਸ ਦੇ ਲਈ ਮੈਂ ਬਹੁਤ ਉਤਸ਼ਾਹਿਤ ਹਾਂ। ਜਦੋਂ ਤੱਕ ਮੈਂ ਕ੍ਰਿਕਟ ਖੇਡ ਰਿਹਾ ਹਾਂ, ਖੁਸ਼ ਹਾਂ। ਤਾਂ ਹਾਂ, ਬੱਸ 2 ਦਿਨਾਂ ਦਾ ਬ੍ਰੇਕ ਅਤੇ ਫਿਰ ਵਾਪਸ ਕ੍ਰਿਕਟ ਵਿੱਚ।"