'ਅਰਜੁਨ ਬਿਲਕੁਲ ਸਚਿਨ ਵਾਂਗ ਬੈਟਿੰਗ ਕਰਦੈ...', ਯੋਗਰਾਜ ਸਿੰਘ ਨੇ ਕਹੀ ਹੈਰਾਨ ਕਰਨ ਵਾਲੀ ਗੱਲ, ਕੋਚਾਂ 'ਤੇ ਚੁੱਕੇ ਸਵਾਲ

ਸਪੋਰਟਸ ਡੈਸਕ, ਨਵੀਂ ਦਿੱਲੀ : ਭਾਰਤੀ ਕ੍ਰਿਕਟ ਟੀਮ ਦੇ ਮਹਾਨ ਆਲਰਾਊਂਡਰ ਯੁਵਰਾਜ ਸਿੰਘ ਦੇ ਪਿਤਾ ਯੋਗਰਾਜ ਸਿੰਘ ਅਕਸਰ ਆਪਣੇ ਬਿਆਨਾਂ ਕਾਰਨ ਚਰਚਾ 'ਚ ਰਹਿੰਦੇ ਹਨ। ਉਨ੍ਹਾਂ ਹਾਲ ਹੀ 'ਚ ਸਚਿਨ ਤੇਂਦੁਲਕਰ ਦੇ ਬੇਟੇ ਅਰਜੁਨ ਦੀ ਬੈਟਿੰਗ ਨੂੰ ਲੈ ਕੇ ਵੱਡਾ ਬਿਆਨ ਦਿੱਤਾ ਹੈ। ਯੋਗਰਾਜ ਨੇ ਕਿਹਾ ਹੈ ਕਿ ਅਰਜੁਨ ਇਕ ਸ਼ੁੱਧ ਬੱਲੇਬਾਜ਼ ਹੈ ਤੇ ਆਪਣੇ ਪਿਤਾ ਵਾਂਗ ਬੈਟਿੰਗ ਕਰਦਾ ਹੈ, ਪਰ ਕੋਚ ਉਸ ਨੂੰ ਬੱਲੇਬਾਜ਼ੀ ਦਾ ਮੌਕਾ ਨਹੀਂ ਦਿੰਦੇ।

ਅਰਜੁਨ ਨੇ ਯੋਗਰਾਜ ਸਿੰਘ ਦੀ ਅਕੈਡਮੀ 'ਚ ਵੀ ਅਭਿਆਸ ਕੀਤਾ ਹੈ। ਯੋਗਰਾਜ ਨੇ ਉਨ੍ਹਾਂ ਨੂੰ ਕਾਫੀ ਦਿਨ ਟ੍ਰੇਨਿੰਗ ਦਿੱਤੀ ਸੀ। ਯੋਗਰਾਜ ਨੇ ਕਿਹਾ ਕਿ ਜਦੋਂ ਅਰਜੁਨ ਉਨ੍ਹਾਂ ਕੋਲ ਆਇਆ ਸੀ ਤਾਂ ਉਸ ਤੋਂ ਬਾਅਦ ਰਣਜੀ ਟਰਾਫੀ 'ਚ ਜਾ ਕੇ ਉਸ ਨੇ ਸੈਂਕੜਾ ਜੜਿਆ ਸੀ। ਅਰਜੁਨ ਮੁੰਬਈ ਲਈ ਨਹੀਂ ਖੇਡਦਾ, ਉਹ ਘਰੇਲੂ ਕ੍ਰਿਕਟ 'ਚ ਗੋਆ ਲਈ ਖੇਡਦਾ ਹੈ। ਉੱਥੇ ਹੀ IPL 'ਚ ਉਹ ਪਹਿਲਾਂ ਮੁੰਬਈ ਇੰਡੀਅਨਜ਼ ਦਾ ਹਿੱਸਾ ਸੀ, ਪਰ ਇਸ ਸੀਜ਼ਨ 'ਚ ਉਹ ਲਖਨਊ ਸੁਪਰਜਾਇੰਟਸ ਵੱਲੋਂ ਖੇਡੇਗਾ।

ਸਿਰਫ਼ ਗੇਂਦਬਾਜ਼ੀ 'ਤੇ ਦਿੱਤਾ ਜਾ ਰਿਹਾ ਹੈ ਧਿਆਨ

ਯੋਗਰਾਜ ਨੇ ਇੱਕ ਯੂਟਿਊਬ ਚੈਨਲ 'ਤੇ ਗੱਲਬਾਤ ਕਰਦਿਆਂ ਕਿਹਾ ਕਿ ਸਾਰੇ ਕੋਚ ਅਰਜੁਨ ਦੀ ਗੇਂਦਬਾਜ਼ੀ 'ਤੇ ਧਿਆਨ ਦੇ ਰਹੇ ਹਨ, ਜਦਕਿ ਉਹ ਇੱਕ ਪਿਓਰ ਬੱਲੇਬਾਜ਼ ਹੈ। ਉਨ੍ਹਾਂ ਕਿਹਾ, "ਉਹ ਲੋਕ ਉਸ ਦੀ ਗੇਂਦਬਾਜ਼ੀ 'ਤੇ ਫੋਕਸ ਕਰ ਰਹੇ ਹਨ। ਮੈਨੂੰ ਨਹੀਂ ਪਤਾ ਕਿ ਕੋਚਾਂ ਨੂੰ ਕੀ ਹੋਇਆ। ਉਹ ਇੱਕ ਬੱਲੇਬਾਜ਼ ਹੈ। ਜਦੋਂ ਉਹ ਮੇਰੀ ਅਕੈਡਮੀ 'ਚ ਆਇਆ ਸੀ ਤਾਂ ਮੈਨੂੰ ਉਸ ਦਾ ਖ਼ਿਆਲ ਰੱਖਣ ਲਈ ਕਿਹਾ ਗਿਆ ਸੀ। ਇਕ ਦਿਨ ਉਸ ਦੇ ਗੇਂਦ ਲੱਗ ਗਈ ਸੀ ਅਤੇ ਮੈਂ ਉਸ ਨੂੰ ਹਸਪਤਾਲ ਲੈ ਗਿਆ। ਜਦੋਂ ਉਹ ਠੀਕ ਹੋਇਆ ਤਾਂ ਮੈਂ ਉਸ ਨੂੰ ਪੈਡ ਪਹਿਨਣ ਲਈ ਕਿਹਾ, ਉਸ ਨੇ ਦੱਸਿਆ ਕਿ ਉਹ ਲੋਕ ਉਸ ਨੂੰ ਬੈਟਿੰਗ ਨਹੀਂ ਦਿੰਦੇ।"

ਮੁੰਬਈ ਇੰਡੀਅਨਜ਼ ਨੂੰ ਕੀਤੀ ਸੀ ਅਪੀਲ

ਯੋਗਰਾਜ ਨੇ ਦੱਸਿਆ ਕਿ ਉਨ੍ਹਾਂ ਮੁੰਬਈ ਇੰਡੀਅਨਜ਼ ਨੂੰ ਵੀ ਅਪੀਲ ਕੀਤੀ ਸੀ ਕਿ ਅਰਜੁਨ ਨੂੰ ਓਪਨਿੰਗ (ਪਾਰੀ ਦੀ ਸ਼ੁਰੂਆਤ) ਲਈ ਭੇਜਿਆ ਜਾਵੇ। ਉਨ੍ਹਾਂ ਕਿਹਾ, "ਮੈਂ ਉਸ ਨੂੰ ਕਦੇ ਬੈਟਿੰਗ ਕਰਦੇ ਨਹੀਂ ਸੀ ਦੇਖਿਆ। ਜਦੋਂ ਅਸੀਂ ਇਨਡੋਰ ਨੈੱਟਸ 'ਚ ਗਏ ਤਾਂ ਉਸ ਨੇ ਹਰ ਪਾਸੇ ਸ਼ਾਟ ਮਾਰੇ। ਮੈਂ ਉਸ ਦੇ ਕੋਚ ਨੂੰ ਪੁੱਛਿਆ ਕਿ ਤੁਸੀਂ ਉਸ ਨੂੰ ਬੱਲੇਬਾਜ਼ੀ ਦਾ ਮੌਕਾ ਕਿਉਂ ਨਹੀਂ ਦਿੰਦੇ? ਪਰ ਉਹ ਬਹਾਨੇ ਬਣਾਉਣ ਲੱਗੇ। ਮੈਂ ਉਨ੍ਹਾਂ ਨੂੰ ਕਿਹਾ ਕਿ ਉਹ ਇਕ ਪ੍ਰੋਪਰ ਬੱਲੇਬਾਜ਼ ਹੈ ਅਤੇ ਆਪਣੇ ਪਿਤਾ ਦੀ ਤਰ੍ਹਾਂ ਬੈਟਿੰਗ ਕਰਦਾ ਹੈ। ਜਦੋਂ ਉਹ ਮੁੰਬਈ ਇੰਡੀਅਨਜ਼ ਲਈ ਖੇਡ ਰਿਹਾ ਸੀ, ਉਦੋਂ ਮੈਂ ਮੈਨੇਜਮੈਂਟ ਨੂੰ ਕਿਹਾ ਸੀ ਕਿ ਉਸ ਤੋਂ ਕੁਝ ਮੈਚਾਂ 'ਚ ਓਪਨਿੰਗ ਕਰਵਾਓ, ਪਰ ਉਨ੍ਹਾਂ ਨੇ ਗੱਲ ਨਹੀਂ ਸੁਣੀ।"