PSL ਦੇ ਨਿਯਮ ਤੋੜਨੇ ਪਏ ਭਾਰੀ, ਸ਼ਾਹੀਨ ਅਫਰੀਦੀ 'ਤੇ PCB ਨੇ ਲਾਇਆ 10 ਲੱਖ ਦਾ ਜੁਰਮਾਨਾ

ਸਪੋਰਟਸ ਡੈਸਕ, ਨਵੀਂ ਦਿੱਲੀ: ਪਾਕਿਸਤਾਨੀ ਸਟਾਰ ਤੇਜ਼ ਗੇਂਦਬਾਜ਼ ਸ਼ਾਹੀਨ ਸ਼ਾਹ ਅਫਰੀਦੀ 'ਤੇ ਪੀਸੀਬੀ (PCB) ਨੇ 10 ਲੱਖ ਪਾਕਿਸਤਾਨੀ ਰੁਪਏ ਦਾ ਜੁਰਮਾਨਾ ਲਗਾਇਆ ਹੈ। ਲਾਹੌਰ ਕਲੰਦਰਜ਼ ਟੀਮ ਦੇ ਕਪਤਾਨ ਨੂੰ ਟੀਮ ਹੋਟਲ ਵਿੱਚ ਸੁਰੱਖਿਆ ਪ੍ਰੋਟੋਕੋਲ ਦੀ ਉਲੰਘਣਾ ਦਾ ਦੋਸ਼ੀ ਪਾਇਆ ਗਿਆ ਹੈ। ਅੰਦਰੂਨੀ ਜਾਂਚ ਤੋਂ ਬਾਅਦ ਪੀਸੀਬੀ ਵੱਲੋਂ ਇਹ ਕਾਰਵਾਈ ਕੀਤੀ ਗਈ ਹੈ।

ਇਸ ਘਟਨਾ ਵਿੱਚ ਲਾਹੌਰ ਕਲੰਦਰਜ਼ ਲਈ ਖੇਡਣ ਵਾਲੇ ਜ਼ਿੰਬਾਬਵੇ ਦੇ ਖਿਡਾਰੀ ਸਿਕੰਦਰ ਰਜ਼ਾ ਵੀ ਸ਼ਾਮਲ ਸਨ। ਸ਼ਾਹੀਨ ਅਤੇ ਸਿਕੰਦਰ ਨੇ ਹੋਟਲ ਵਿੱਚ 4 ਬਾਹਰੀ ਮਹਿਮਾਨਾਂ ਨੂੰ ਬੁਲਾਇਆ ਸੀ, ਜਿਸ ਕਾਰਨ ਹੁਣ ਉਨ੍ਹਾਂ ਨੂੰ ਇਹ ਸਜ਼ਾ ਮਿਲੀ ਹੈ।

ਸ਼ਾਹੀਨ ਅਫਰੀਦੀ 'ਤੇ ਕਿਉਂ ਲੱਗਿਆ 10 ਲੱਖ ਦਾ ਜੁਰਮਾਨਾ?

ਇਹ ਘਟਨਾ ਉਸ ਸਮੇਂ ਦੀ ਹੈ ਜਦੋਂ ਸ਼ਾਹੀਨ ਅਤੇ ਸਿਕੰਦਰ ਰਜ਼ਾ 'ਤੇ ਹੋਟਲ ਵਿੱਚ ਬਾਹਰੀ ਮਹਿਮਾਨਾਂ ਨੂੰ ਬੁਲਾਉਣ ਦੇ ਦੋਸ਼ ਲੱਗੇ। ਰਿਪੋਰਟਾਂ ਅਨੁਸਾਰ, ਕਮਰੇ ਵਿੱਚ 4 ਬਾਹਰੀ ਮਹਿਮਾਨਾਂ ਨੂੰ ਲਿਆਉਣ ਦੀ ਇਜਾਜ਼ਤ ਮੰਗੀ ਗਈ ਸੀ, ਜਿਸ ਨੂੰ ਪੀਸੀਬੀ ਅਤੇ ਸੁਰੱਖਿਆ ਅਧਿਕਾਰੀਆਂ ਨੇ ਸੁਰੱਖਿਆ ਕਾਰਨਾਂ ਕਰਕੇ ਸਿਰੇ ਤੋਂ ਖਾਰਜ ਕਰ ਦਿੱਤਾ ਸੀ। ਇਸ ਦੇ ਬਾਵਜੂਦ, ਸ਼ਾਹੀਨ ਅਤੇ ਰਜ਼ਾ ਕਥਿਤ ਤੌਰ 'ਤੇ ਉਨ੍ਹਾਂ ਮਹਿਮਾਨਾਂ ਨੂੰ ਰਾਤ ਕਰੀਬ 11 ਵਜੇ ਆਪਣੇ ਨਾਲ ਕਮਰੇ ਵਿੱਚ ਲੈ ਗਏ, ਜੋ ਦੇਰ ਰਾਤ 1:25 ਵਜੇ ਤੱਕ ਉੱਥੇ ਮੌਜੂਦ ਰਹੇ।

ਲਾਹੌਰ ਕਲੰਦਰਜ਼ ਵੱਲੋਂ ਜਾਰੀ ਬਿਆਨ:

"ਅਨੁਸ਼ਾਸਨ ਬਣਾਈ ਰੱਖਣ ਅਤੇ ਜਵਾਬਦੇਹੀ ਤੈਅ ਕਰਨ ਦੇ ਉਦੇਸ਼ ਨਾਲ, ਫਰੈਂਚਾਈਜ਼ੀ ਨੇ ਸ਼ਾਹੀਨ ਸ਼ਾਹ ਅਫਰੀਦੀ 'ਤੇ 10 ਲੱਖ ਪਾਕਿਸਤਾਨੀ ਰੁਪਏ (PKR) ਦਾ ਜੁਰਮਾਨਾ ਲਗਾਇਆ ਹੈ। ਲਾਹੌਰ ਕਲੰਦਰਜ਼ ਨੇ ਇਸ ਮਾਮਲੇ 'ਤੇ ਆਪਣੀ ਰਿਪੋਰਟ ਪਾਕਿਸਤਾਨ ਕ੍ਰਿਕਟ ਬੋਰਡ ਨੂੰ ਭੇਜ ਦਿੱਤੀ ਹੈ। ਫਰੈਂਚਾਈਜ਼ੀ ਨੇ ਸਪੱਸ਼ਟ ਕੀਤਾ ਹੈ ਕਿ ਇਹ ਮਾਮਲਾ ਜਾਣਬੁੱਝ ਕੇ ਕੀਤੀ ਉਲੰਘਣਾ ਦੀ ਬਜਾਏ ਇੱਕ ਗਲਤਫਹਿਮੀ ਕਾਰਨ ਹੋਇਆ ਸੀ।"

ਸਿਕੰਦਰ ਰਜ਼ਾ 'ਤੇ ਨਹੀਂ ਹੋਈ ਕਾਰਵਾਈ

ਸ਼ਾਹੀਨ ਅਫਰੀਦੀ 'ਤੇ ਤਾਂ ਜੁਰਮਾਨਾ ਲੱਗ ਗਿਆ, ਪਰ ਸਿਕੰਦਰ ਰਜ਼ਾ ਵਿਰੁੱਧ ਕੋਈ ਅਧਿਕਾਰਤ ਅਨੁਸ਼ਾਸਨੀ ਕਾਰਵਾਈ ਨਹੀਂ ਕੀਤੀ ਗਈ। ਇੱਕ ਪ੍ਰੈੱਸ ਕਾਨਫਰੰਸ ਵਿੱਚ ਸਿਕੰਦਰ ਰਜ਼ਾ ਨੇ ਪੂਰੀ ਜ਼ਿੰਮੇਵਾਰੀ ਆਪਣੇ ਸਿਰ ਲੈਂਦਿਆਂ ਕਿਹਾ ਕਿ ਇਸ ਮਾਮਲੇ ਲਈ ਉਹ ਜ਼ਿੰਮੇਵਾਰ ਹਨ ਅਤੇ ਸ਼ਾਹੀਨ ਨੂੰ ਇਸ ਲਈ ਦੋਸ਼ੀ ਨਹੀਂ ਠਹਿਰਾਇਆ ਜਾਣਾ ਚਾਹੀਦਾ।