ਕੀ ਹੁਣ ਮਹਿੰਗਾ ਹੋਵੇਗਾ ਸਟੀਲ? NMDC ਦਾ ਵੱਡਾ ਝਟਕਾ; ਕੱਚਾ ਲੋਹਾ (Iron Ore) 11.1% ਤਕ ਹੋਇਆ ਮਹਿੰਗਾ
ਕੰਪਨੀ ਦੀ ਸੂਚਨਾ ਅਨੁਸਾਰ, ਬੈਲਾਡੀਲਾ ਖਾਣਾਂ (ਛੱਤੀਸਗੜ੍ਹ) ਤੋਂ ਪੈਦਾ ਹੋਣ ਵਾਲੇ ਉੱਚ ਗੁਣਵੱਤਾ ਵਾਲੇ ਬਾਯਲਾ ਲੰਪ (65.5 ਫੀਸਦੀ ਲੋਹ ਅੰਸ਼) ਦੀ ਕੀਮਤ 'ਚ 10.4 ਫੀਸਦੀ ਦਾ ਵਾਧਾ ਕੀਤਾ ਗਿਆ ਹੈ। ਉੱਥੇ ਹੀ ਬਾਯਲਾ ਫਾਈਨਸ (64 ਫੀਸਦੀ ਲੋਹ ਅੰਸ਼) ਦੀਆਂ ਕੀਮਤਾਂ 'ਚ 11.1 ਫੀਸਦੀ ਦਾ ਵਾਧਾ ਕੀਤਾ ਗਿਆ ਹੈ।
Posted By Seema Anand
Publish Date: Mon, 06 Apr 2026 03:16 PM (IST)
Updated Date: Mon, 06 Apr 2026 03:20 PM (IST)
ਨਵੀਂ ਦਿੱਲੀ : ਸਰਕਾਰੀ ਮਲਕੀਅਤ ਵਾਲੀ NMDC ਨੇ ਕੱਚੇ ਲੋਹੇ (Iron Ore) ਦੀਆਂ ਕੀਮਤਾਂ 'ਚ 11.1 ਫੀਸਦੀ ਤਕ ਦਾ ਵਾਧਾ ਕੀਤਾ ਹੈ। ਕੰਪਨੀ ਨੇ ਸ਼ੇਅਰ ਬਾਜ਼ਾਰ ਨੂੰ ਇਹ ਜਾਣਕਾਰੀ ਦਿੱਤੀ। ਦੇਸ਼ ਦੀ ਸਭ ਤੋਂ ਵੱਡੀ ਕੱਚਾ ਲੋਹਾ ਉਤਪਾਦਕ ਕੰਪਨੀ ਨੇ ਦੱਸਿਆ ਕਿ ਨਵੀਆਂ ਕੀਮਤਾਂ 5 ਅਪ੍ਰੈਲ 2026 ਤੋਂ ਲਾਗੂ ਹੋ ਗਈਆਂ ਹਨ।
ਕਿਸ ਪ੍ਰੋਡਕਟ 'ਤੇ ਕਿੰਨਾ ਵਾਧਾ ਹੋਇਆ?
ਕੰਪਨੀ ਦੀ ਸੂਚਨਾ ਅਨੁਸਾਰ, ਬੈਲਾਡੀਲਾ ਖਾਣਾਂ (ਛੱਤੀਸਗੜ੍ਹ) ਤੋਂ ਪੈਦਾ ਹੋਣ ਵਾਲੇ ਉੱਚ ਗੁਣਵੱਤਾ ਵਾਲੇ ਬਾਯਲਾ ਲੰਪ (65.5 ਫੀਸਦੀ ਲੋਹ ਅੰਸ਼) ਦੀ ਕੀਮਤ 'ਚ 10.4 ਫੀਸਦੀ ਦਾ ਵਾਧਾ ਕੀਤਾ ਗਿਆ ਹੈ। ਉੱਥੇ ਹੀ ਬਾਯਲਾ ਫਾਈਨਸ (64 ਫੀਸਦੀ ਲੋਹ ਅੰਸ਼) ਦੀਆਂ ਕੀਮਤਾਂ 'ਚ 11.1 ਫੀਸਦੀ ਦਾ ਵਾਧਾ ਕੀਤਾ ਗਿਆ ਹੈ। ਬਾਯਲਾ ਫਾਈਨਸ 10 ਮਿਲੀਮੀਟਰ ਤੋਂ ਘੱਟ ਆਕਾਰ ਦਾ ਉੱਚ ਗੁਣਵੱਤਾ ਵਾਲਾ ਕੱਚਾ ਲੋਹਾ ਉਤਪਾਦ ਹੈ ਜੋ ਬੈਲਾਡੀਲਾ ਖੇਤਰ ਦੀਆਂ ਖਾਣਾਂ ਤੋਂ ਪ੍ਰਾਪਤ ਹੁੰਦਾ ਹੈ।
ਕੰਪਨੀ ਨੇ BSE ਨੂੰ ਦਿੱਤੀ ਜਾਣਕਾਰੀ ਵਿੱਚ ਦੱਸਿਆ ਕਿ 5 ਅਪ੍ਰੈਲ 2026 ਤੋਂ ਕੱਚੇ ਲੋਹੇ ਦੀਆਂ ਕੀਮਤਾਂ ਇਸ ਤਰ੍ਹਾਂ ਤੈਅ ਕੀਤੀਆਂ ਗਈਆਂ ਹਨ:
ਬਾਯਲਾ ਲੰਪ (65.5%, 10-40 ਮਿਮੀ): 5,300 ਰੁਪਏ ਪ੍ਰਤੀ ਟਨ
ਬਾਯਲਾ ਫਾਈਨਸ (64%, 10 ਮਿਮੀ ਤੋਂ ਘੱਟ): 4,500 ਰੁਪਏ ਪ੍ਰਤੀ ਟਨ
ਬਿਨਾਂ ਟੈਕਸਾਂ ਦੇ ਹਨ ਇਹ ਕੀਮਤਾਂ
ਸੋਧੀਆਂ ਹੋਈਆਂ ਕੀਮਤਾਂ 'ਫ੍ਰੀ-ਆਨ-ਰੇਲ' (FOR) ਅਧਾਰ 'ਤੇ ਹਨ ਅਤੇ ਇਨ੍ਹਾਂ ਵਿਚ ਰਾਇਲਟੀ, ਜ਼ਿਲ੍ਹਾ ਖਣਿਜ ਫਾਊਂਡੇਸ਼ਨ (DMF) ਫੀਸ, ਰਾਸ਼ਟਰੀ ਖਣਿਜ ਖੋਜ ਟਰੱਸਟ (NMET) ਯੋਗਦਾਨ, ਜੀਐਸਟੀ (GST), ਵਾਤਾਵਰਨ ਸੈੱਸ ਅਤੇ ਹੋਰ ਟੈਕਸਾਂ ਵਰਗੇ ਕਾਨੂੰਨੀ ਖਰਚੇ ਸ਼ਾਮਲ ਨਹੀਂ ਹਨ। NMDC ਨੇ ਹਾਲ ਹੀ 'ਚ ਖਤਮ ਹੋਏ ਵਿੱਤੀ ਸਾਲ 2025-26 ਵਿੱਚ ਰਿਕਾਰਡ 5.3 ਕਰੋੜ ਟਨ ਕੱਚੇ ਲੋਹੇ ਦਾ ਉਤਪਾਦਨ ਕੀਤਾ ਅਤੇ 5.02 ਕਰੋੜ ਟਨ ਦੀ ਵਿਕਰੀ ਦਰਜ ਕੀਤੀ ਸੀ।
ਕੀ ਮਹਿੰਗਾ ਹੋਵੇਗਾ ਸਟੀਲ?
ਬਾਯਲਾ ਲੰਪ ਅਤੇ ਬਾਯਲਾ ਫਾਈਨਸ ਦੀ ਵਰਤੋਂ ਸਟੀਲ ਬਣਾਉਣ 'ਚ ਕੀਤੀ ਜਾਂਦੀ ਹੈ। ਜੇਕਰ ਕੱਚਾ ਮਾਲ (Raw Material) ਹੀ ਮਹਿੰਗਾ ਹੋ ਜਾਵੇਗਾ ਤਾਂ ਇਸ ਦਾ ਅਸਰ ਅੰਤਿਮ ਉਤਪਾਦ 'ਤੇ ਵੀ ਪਵੇਗਾ। ਇਸ ਤਰ੍ਹਾਂ ਆਮ ਜਨਤਾ ਨੂੰ ਵੀ ਸਟੀਲ ਦਾ ਸਾਮਾਨ ਮਹਿੰਗਾ ਮਿਲ ਸਕਦਾ ਹੈ।
(ਪੀਟੀਆਈ ਇਨਪੁਟ ਦੇ ਨਾਲ)