ਕੌਣ ਹੈ ਮਿੱਤਲ ਫੈਮਿਲੀ? ਅਦਾਰ ਪੂਨਾਵਾਲਾ ਦੇ ਨਾਲ ਬਣੇ ਰਾਜਸਥਾਨ ਰਾਇਲਜ਼ ਦੇ ਨਵੇਂ ਮਾਲਕ, 15,185 ਕਰੋੜ ਰੁਪਏ ’ਚ ਹੋਈ ਡੀਲ

ਕੀ ਹੈ ਇਹ ਪੂਰੀ ਡੀਲ ਅਤੇ ਹੁਣ ਕਿਸ ਕੋਲ ਹੋਵੇਗੀ ਕਿੰਨੀ ਹਿੱਸੇਦਾਰੀ?

ਇਹ ਡੀਲ ਲਗਪਗ $1.8 ਬਿਲੀਅਨ (ਕਰੀਬ 15,185 ਕਰੋੜ ਰੁਪਏ) ਦੀ ਐਂਟਰਪ੍ਰਾਈਜ਼ ਵੈਲਿਊ 'ਤੇ ਤੈਅ ਹੋਈ ਹੈ। ਇਸ ਸੌਦੇ ਵਿੱਚ ਸਿਰਫ਼ ਆਈ.ਪੀ.ਐੱਲ. ਟੀਮ ਹੀ ਨਹੀਂ, ਸਗੋਂ ਰਾਜਸਥਾਨ ਰਾਇਲਜ਼ ਦੀ ਮਾਲਕੀ ਵਾਲੀ ਦੱਖਣੀ ਅਫਰੀਕਾ ਦੀ 'ਪਾਰਲ ਰਾਇਲਜ਼' ਅਤੇ ਕੈਰੇਬੀਅਨ ਲੀਗ ਦੀ 'ਬਾਰਬਾਡੋਸ ਰਾਇਲਜ਼' ਵੀ ਸ਼ਾਮਲ ਹਨ।

ਡੀਲ ਪੂਰੀ ਹੋਣ ਤੋਂ ਬਾਅਦ ਕਿਸ ਕੋਲ ਹੋਵੇਗੀ ਕਿੰਨੀ ਹਿੱਸੇਦਾਰੀ?

ਇਸ ਵੱਡੇ ਸੌਦੇ ਤੋਂ ਬਾਅਦ ਟੀਮ ਦੀ ਮਾਲਕੀ ਦਾ ਢਾਂਚਾ ਪੂਰੀ ਤਰ੍ਹਾਂ ਬਦਲ ਗਿਆ ਹੈ। ਹੁਣ ਹਿੱਸੇਦਾਰੀ ਇਸ ਤਰ੍ਹਾਂ ਹੋਵੇਗੀ:

ਮਿੱਤਲ ਪਰਿਵਾਰ : ਲਗਪਗ 75% ਹਿੱਸੇਦਾਰੀ

ਅਦਾਰ ਪੂਨਾਵਾਲਾ: ਲਗਪਗ 18% ਹਿੱਸੇਦਾਰੀ

ਮਨੋਜ ਬਡਾਲੇ ਅਤੇ ਹੋਰ ਮੌਜੂਦਾ ਨਿਵੇਸ਼ਕ: ਲਗਪਗ 7% ਹਿੱਸੇਦਾਰੀ

ਡੀਲ ਕਦੋਂ ਤੱਕ ਪੂਰੀ ਹੋਵੇਗੀ ਅਤੇ ਕਿਨ੍ਹਾਂ ਦੀ ਮਨਜ਼ੂਰੀ ਬਾਕੀ ਹੈ?

ਉਮੀਦ ਜਤਾਈ ਜਾ ਰਹੀ ਹੈ ਕਿ ਇਹ ਸੌਦਾ 2026 ਦੀ ਤੀਜੀ ਤਿਮਾਹੀ (Q3) ਤੱਕ ਪੂਰੀ ਤਰ੍ਹਾਂ ਸੰਪੰਨ ਹੋ ਜਾਵੇਗਾ। ਹਾਲਾਂਕਿ, ਇਸ ਨੂੰ ਪੂਰਾ ਕਰਨ ਲਈ ਅਜੇ ਕੁਝ ਰਸਮੀ ਅਤੇ ਰੈਗੂਲੇਟਰੀ ਮਨਜ਼ੂਰੀਆਂ ਦੀ ਲੋੜ ਹੈ, ਜਿਨ੍ਹਾਂ ਵਿੱਚ ਭਾਰਤੀ ਕ੍ਰਿਕਟ ਕੰਟਰੋਲ ਬੋਰਡ (BCCI), ਭਾਰਤੀ ਮੁਕਾਬਲੇਬਾਜ਼ੀ ਕਮਿਸ਼ਨ (CCI) ਅਤੇ ਆਈ.ਪੀ.ਐੱਲ. ਗਵਰਨਿੰਗ ਕੌਂਸਲ ਸ਼ਾਮਲ ਹਨ।

ਫ੍ਰੈਂਚਾਈਜ਼ੀ ਦੇ ਨਵੇਂ ਬੋਰਡ ਵਿੱਚ ਕੌਣ-ਕੌਣ ਸ਼ਾਮਲ ਹੋਵੇਗਾ?

ਸਮਝੌਤੇ ਤੋਂ ਬਾਅਦ, 'ਦਿ ਰਾਜਸਥਾਨ ਰਾਇਲਜ਼' ਦੇ ਨਿਰਦੇਸ਼ਕ ਮੰਡਲ ਵਿੱਚ ਦਿੱਗਜ ਨਾਮਾਂ ਲਕਸ਼ਮੀ ਐੱਨ. ਮਿੱਤਲ, ਆਦਿਤਿਆ ਮਿੱਤਲ, ਵਨੀਸ਼ਾ ਮਿੱਤਲ-ਭਾਟੀਆ ਅਤੇ ਅਦਾਰ ਪੂਨਾਵਾਲਾ ਦੀ ਐਂਟਰੀ ਹੋਵੇਗੀ। ਮਨੋਜ ਬਡਾਲੇ ਫ੍ਰੈਂਚਾਈਜ਼ੀ ਦੇ ਅਤੀਤ ਅਤੇ ਭਵਿੱਚ ਦੇ ਵਿਚਕਾਰ ਇੱਕ ਪੁਲ ਵਜੋਂ ਕੰਮ ਕਰਦੇ ਰਹਿਣਗੇ ਅਤੇ ਕ੍ਰਿਕਟ ਦਾ ਆਪਣਾ ਤਜ਼ਰਬਾ ਟੀਮ ਨੂੰ ਦਿੰਦੇ ਰਹਿਣਗੇ।

ਇਸ ਡੀਲ 'ਤੇ ਨਵੇਂ ਅਤੇ ਪੁਰਾਣੇ ਮਾਲਕਾਂ ਦਾ ਕੀ ਕਹਿਣਾ ਹੈ?

ਆਦਿਤਿਆ ਮਿੱਤਲ: "ਆਈ.ਪੀ.ਐੱਲ. ਬਹੁਤ ਘੱਟ ਸਮੇਂ ਵਿੱਚ ਦੁਨੀਆ ਦੀਆਂ ਸਭ ਤੋਂ ਵੱਡੀਆਂ ਖੇਡ ਲੀਗਾਂ ਵਿੱਚੋਂ ਇੱਕ ਬਣ ਗਿਆ ਹੈ। ਰਾਇਲਜ਼ ਨੂੰ ਨਵੀਆਂ ਪ੍ਰਤਿਭਾਵਾਂ ਨੂੰ ਤਰਾਸ਼ਣ ਲਈ ਜਾਣਿਆ ਜਾਂਦਾ ਹੈ ਅਤੇ ਅਸੀਂ ਉਸ ਵਿਰਾਸਤ ਨੂੰ ਅੱਗੇ ਵਧਾਉਣ ਲਈ ਵਚਨਬੱਧ ਹਾਂ। ਹੱਲਾ ਬੋਲ!"

ਵਨੀਸ਼ਾ ਮਿੱਤਲ-ਭਾਟੀਆ: "ਸਾਡੇ ਪਰਿਵਾਰ ਨੂੰ ਖੇਡਾਂ ਅਤੇ ਭਾਰਤ ਨਾਲ ਪਿਆਰ ਹੈ। ਦੁਨੀਆ ਦੀ ਸਭ ਤੋਂ ਵੱਡੀ ਕ੍ਰਿਕਟ ਲੀਗ ਦੀ ਇਸ ਫ੍ਰੈਂਚਾਈਜ਼ੀ ਦੀ ਭਵਿੱਖ ਦੀ ਸਫਲਤਾ ਦਾ ਹਿੱਸਾ ਬਣਨਾ ਸਾਡੇ ਲਈ ਸਨਮਾਨ ਦੀ ਗੱਲ ਹੈ।"

ਅਦਾਰ ਪੂਨਾਵਾਲਾ: "ਰਾਜਸਥਾਨ ਰਾਇਲਜ਼ ਇੱਕ ਮਜ਼ਬੂਤ ਵਿਰਾਸਤ ਵਾਲੀ ਪ੍ਰੀਮੀਅਰ ਆਈ.ਪੀ.ਐੱਲ. ਫ੍ਰੈਂਚਾਈਜ਼ੀ ਹੈ। ਮੈਂ ਇਸ ਨਿਵੇਸ਼ 'ਤੇ ਆਦਿਤਿਆ ਮਿੱਤਲ ਨਾਲ ਸਹਿਯੋਗ ਕਰਕੇ ਬਹੁਤ ਖੁਸ਼ ਹਾਂ।"

ਮਨੋਜ ਬਡਾਲੇ: ਸਾਲ 2008 ਵਿੱਚ ਇਸ ਟੀਮ ਨੂੰ ਮਹਿਜ਼ $67 ਮਿਲੀਅਨ ਵਿੱਚ ਖਰੀਦਣ ਵਾਲੇ ਬਡਾਲੇ ਨੇ ਕਿਹਾ, "ਰਾਜਸਥਾਨ ਰਾਇਲਜ਼ ਨਾਲ ਜੁੜਨਾ ਜੀਵਨ ਭਰ ਦਾ ਸੁਭਾਗ ਰਿਹਾ ਹੈ। ਅਸੀਂ ਨਵੇਂ ਮਾਲਕਾਂ ਵਜੋਂ ਮਿੱਤਲ ਪਰਿਵਾਰ ਅਤੇ ਅਦਾਰ ਪੂਨਾਵਾਲਾ ਦਾ ਸਵਾਗਤ ਕਰਦੇ ਹੋਏ ਬਹੁਤ ਖੁਸ਼ ਹਾਂ। ਉਨ੍ਹਾਂ ਦੀਆਂ ਰਾਜਸਥਾਨ ਅਤੇ ਭਾਰਤ ਨਾਲ ਜੁੜੀਆਂ ਜੜ੍ਹਾਂ ਉਨ੍ਹਾਂ ਨੂੰ ਅਗਲੇ ਅਧਿਆਏ ਲਈ ਆਦਰਸ਼ ਰੱਖਿਅਕ ਬਣਾਉਂਦੀਆਂ ਹਨ।"