ਤੀਜੀ ਤਿਮਾਹੀ ਦੀ GDP 'ਚ ਆ ਸਕਦੈ ਉਛਾਲ, ਕੀ ਹੈ ਕਾਰਨ; ਰਿਪੋਰਟ ਤੋਂ ਜਾਣੋ ਸਭ ਕੁਝ

ਨਵੀਂ ਦਿੱਲੀ (ਏਜੰਸੀ) : ਮੌਜੂਦਾ ਵਿੱਤੀ ਸਾਲ ਦੀ ਤੀਜੀ ਤਿਮਾਹੀ ਵਿੱਚ ਭਾਰਤ ਦੀ ਕੁੱਲ ਘਰੇਲੂ ਉਤਪਾਦ (GDP) ਦੀ ਵਿਕਾਸ ਦਰ 8.3 ਪ੍ਰਤੀਸ਼ਤ ਤਕ ਰਹਿ ਸਕਦੀ ਹੈ। ਇਹ ਵਾਧਾ ਵਸਤੂ ਅਤੇ ਸੇਵਾਵਾਂ ਟੈਕਸ (GST) ਦਰਾਂ 'ਚ ਕਟੌਤੀ ਕਾਰਨ ਵਧੀ ਮੰਗ ਕਰਕੇ ਸੰਭਵ ਹੈ, ਹਾਲਾਂਕਿ ਪਿਛਲੇ ਸਾਲ ਦੇ ਉੱਚੇ ਆਧਾਰ (Base Effect) ਦਾ ਅਸਰ ਵੀ ਦੇਖਣ ਨੂੰ ਮਿਲੇਗਾ।

ਯੂਨੀਅਨ ਬੈਂਕ ਆਫ ਇੰਡੀਆ ਦੀ ਰਿਪੋਰਟ ਵਿੱਚ ਕਿਹਾ ਗਿਆ ਹੈ ਕਿ ਵਿੱਤੀ ਸਾਲ 2026 ਦੀ ਤੀਜੀ ਤਿਮਾਹੀ ਵਿੱਚ ਕੁੱਲ ਮੁੱਲ ਵਾਧਾ (GVA) ਵਿਕਾਸ ਦਰ 8 ਪ੍ਰਤੀਸ਼ਤ ਤੱਕ ਪਹੁੰਚ ਸਕਦੀ ਹੈ, ਜੋ ਪਿਛਲੇ ਸਾਲ ਦੀ ਇਸੇ ਤਿਮਾਹੀ ਦੇ 6.5 ਪ੍ਰਤੀਸ਼ਤ ਨਾਲੋਂ ਵੱਧ ਹੈ। ਹਾਲਾਂਕਿ, ਇਹ ਦੂਜੀ ਤਿਮਾਹੀ ਦੀ 8.1 ਪ੍ਰਤੀਸ਼ਤ ਦੀ ਦਰ ਨਾਲੋਂ ਥੋੜ੍ਹੀ ਘੱਟ ਹੋ ਸਕਦੀ ਹੈ।

ਰਿਪੋਰਟ ਮੁਤਾਬਕ 27 ਫਰਵਰੀ ਨੂੰ ਜਾਰੀ ਹੋਣ ਵਾਲੇ ਵਿੱਤੀ ਸਾਲ 2026 ਦੀ ਤੀਜੀ ਤਿਮਾਹੀ ਦੇ ਜੀਡੀਪੀ ਅੰਕੜੇ 8.3 ਪ੍ਰਤੀਸ਼ਤ ਰਹਿ ਸਕਦੇ ਹਨ, ਜੋ ਪਿਛਲੇ ਸਾਲ ਦੀ ਇਸੇ ਮਿਆਦ ਦੇ 6.4 ਪ੍ਰਤੀਸ਼ਤ ਨਾਲੋਂ ਕਾਫ਼ੀ ਜ਼ਿਆਦਾ ਹਨ।

ਰਿਪੋਰਟ ਅਨੁਸਾਰ, ਨੌਮੀਨਲ ਜੀਡੀਪੀ (Nominal GDP) ਵਿਕਾਸ ਦਰ ਘਟ ਕੇ 8.5 ਪ੍ਰਤੀਸ਼ਤ ਰਹਿਣ ਦਾ ਅਨੁਮਾਨ ਹੈ, ਜੋ ਦੂਜੀ ਤਿਮਾਹੀ ਦੇ 8.7 ਪ੍ਰਤੀਸ਼ਤ ਅਤੇ ਪਿਛਲੇ ਸਾਲ ਦੀ ਇਸੇ ਮਿਆਦ ਦੇ 10.3 ਪ੍ਰਤੀਸ਼ਤ ਤੋਂ ਘੱਟ ਹੈ। ਇਸ ਦਾ ਮੁੱਖ ਕਾਰਨ ਮਹਿੰਗਾਈ ਵਿੱਚ ਕਮੀ ਕਾਰਨ 'ਜੀਡੀਪੀ ਡਿਫਲੇਟਰ' ਵਿੱਚ ਆਈ ਗਿਰਾਵਟ ਨੂੰ ਦੱਸਿਆ ਗਿਆ ਹੈ।

ਬੈਂਕ ਨੇ ਸਪੱਸ਼ਟ ਕੀਤਾ ਕਿ ਉਸ ਦੇ ਅਨੁਮਾਨ ਪੁਰਾਣੇ ਆਧਾਰ ਸਾਲ (Base Year) 'ਤੇ ਅਧਾਰਤ ਹਨ, ਕਿਉਂਕਿ ਅੰਕੜਾ ਅਤੇ ਪ੍ਰੋਗਰਾਮ ਲਾਗੂਕਰਨ ਮੰਤਰਾਲੇ (MoSPI) ਵੱਲੋਂ ਆਧਾਰ ਸਾਲ ਵਿੱਚ ਕੀਤੇ ਗਏ ਬਦਲਾਅ ਤੋਂ ਬਾਅਦ ਜੀਡੀਪੀ ਅੰਕੜਿਆਂ 'ਤੇ ਪੈਣ ਵਾਲੇ ਪ੍ਰਭਾਵ ਬਾਰੇ ਅਜੇ ਪੂਰੀ ਸਪੱਸ਼ਟਤਾ ਨਹੀਂ ਹੈ।

ਰਿਪੋਰਟ ਵਿੱਚ ਕਿਹਾ ਗਿਆ ਹੈ ਕਿ ਵਿੱਤੀ ਸਾਲ 2026 ਲਈ ਵਿਕਾਸ ਦਾ ਅਨੁਮਾਨ ਫਿਲਹਾਲ ਮਜ਼ਬੂਤ ਬਣਿਆ ਹੋਇਆ ਹੈ ਅਤੇ ਵਿੱਤੀ ਸਾਲ 2027 ਦੇ ਸ਼ੁਰੂਆਤੀ ਸੰਕੇਤ ਵੀ ਸਕਾਰਾਤਮਕ ਹਨ। ਪਰ ਨਵੇਂ ਆਧਾਰ ਸਾਲ ਬਾਰੇ ਸਥਿਤੀ ਸਪੱਸ਼ਟ ਹੋਣ ਤੋਂ ਬਾਅਦ ਸਾਲਾਨਾ ਅਨੁਮਾਨਾਂ ਦੀ ਦੁਬਾਰਾ ਸਮੀਖਿਆ ਕਰਨੀ ਪਵੇਗੀ।

ਅੰਕੜਾ ਅਤੇ ਪ੍ਰੋਗਰਾਮ ਸੰਚਾਲਨ ਮੰਤਰਾਲਾ (MoSPI) ਸ਼ੁੱਕਰਵਾਰ ਨੂੰ 2022-23 ਦੇ ਸੋਧੇ ਹੋਏ ਆਧਾਰ ਸਾਲ ਦੇ ਨਾਲ ਜੀਡੀਪੀ ਅੰਕੜੇ ਜਾਰੀ ਕਰੇਗਾ। ਸਰਕਾਰ ਨੇ ਪਹਿਲਾਂ ਦੱਸਿਆ ਸੀ ਕਿ ਨਵੀਂ ਸੀਰੀਜ਼ ਲਈ ਵਿੱਤੀ ਸਾਲ 2022-23 ਨੂੰ ਆਧਾਰ ਸਾਲ ਚੁਣਿਆ ਗਿਆ ਹੈ। ਨਵੇਂ ਇਨਪੁਟਸ ਰਾਹੀਂ ਸੰਸਥਾਗਤ ਖੇਤਰਾਂ, ਖਾਸ ਕਰਕੇ ਨਿੱਜੀ ਕੰਪਨੀਆਂ ਅਤੇ MSME ਨਾਲ ਜੁੜੇ ਖੇਤਰਾਂ ਵਿੱਚ ਜੀਡੀਪੀ ਅਨੁਮਾਨਾਂ ਨੂੰ ਹੋਰ ਮਜ਼ਬੂਤ ਬਣਾਉਣ ਦੀ ਕੋਸ਼ਿਸ਼ ਕੀਤੀ ਗਈ ਹੈ, ਜਿੱਥੇ ਲੰਬੇ ਸਮੇਂ ਤੋਂ ਡਾਟਾ ਦੀ ਕਮੀ ਰਹੀ ਸੀ।