ਹੁਣ ਨਹੀਂ ਰਹੇਗਾ 'ਤਾਜ' ਦਾ ਨਾਂ: GVK ਗਰੁੱਪ ਨਾਲ ਟਾਟਾ ਦਾ ਮਾਲਕੀ ਰਿਸ਼ਤਾ ਖ਼ਤਮ, ਜਾਣੋ ਕੀ ਹੋਵੇਗਾ ਅਸਰ
ਹਿੱਸੇਦਾਰੀ ਵੇਚਣ ਤੋਂ ਬਾਅਦ ਹੁਣ ਹੋਟਲ ਕੰਪਨੀ ਆਪਣੇ ਕਾਰਪੋਰੇਟ ਨਾਮ ਤੋਂ "ਤਾਜ" ਸ਼ਬਦ ਹਟਾਉਣ ਦੀ ਪ੍ਰਕਿਰਿਆ ਸ਼ੁਰੂ ਕਰੇਗੀ ਅਤੇ ਇੱਕ ਨਵਾਂ ਨਾਮ ਅਪਣਾਏਗੀ। ਹਾਲਾਂਕਿ IHCL ਨੇ ਸਾਫ਼ ਕੀਤਾ ਹੈ ਕਿ ਉਹ ਪਹਿਲਾਂ ਤੋਂ ਮੌਜੂਦ 'ਹੋਟਲ ਆਪਰੇਟਿੰਗ ਐਗਰੀਮੈਂਟ' ਤਹਿਤ ਤਾਜ GVK ਦੇ ਮੌਜੂਦਾ ਹੋਟਲਾਂ ਦਾ ਪ੍ਰਬੰਧ (Management) ਚਲਾਉਣਾ ਜਾਰੀ ਰੱਖੇਗੀ।
Posted By alisha
Publish Date: Wed, 31 Dec 2025 11:58 AM (IST)
Updated Date: Wed, 31 Dec 2025 12:05 PM (IST)
ਨਵੀਂ ਦਿੱਲੀ: ਟਾਟਾ ਗਰੁੱਪ ਦੀ ਕੰਪਨੀ 'ਇੰਡੀਅਨ ਹੋਟਲਜ਼' (IHCL), ਜੋ ਕਿ ਮਸ਼ਹੂਰ ਤਾਜ ਹੋਟਲਾਂ ਦਾ ਸੰਚਾਲਨ ਕਰਦੀ ਹੈ, ਨੇ ਤਾਜ GVK ਹੋਟਲਜ਼ ਐਂਡ ਰਿਜ਼ੌਰਟਸ (Taj GVK Hotels) ਵਿੱਚ ਆਪਣੀ ਪੂਰੀ ਹਿੱਸੇਦਾਰੀ ਵੇਚ ਦਿੱਤੀ ਹੈ। ਇਸ ਦੇ ਨਾਲ ਹੀ GVK ਗਰੁੱਪ ਨਾਲ ਟਾਟਾ ਦਾ ਮਾਲਕੀ ਵਾਲਾ ਰਿਸ਼ਤਾ ਰਸਮੀ ਤੌਰ 'ਤੇ ਖ਼ਤਮ ਹੋ ਗਿਆ ਹੈ। 30 ਦਸੰਬਰ ਨੂੰ ਬਾਜ਼ਾਰ ਬੰਦ ਹੋਣ ਤੋਂ ਬਾਅਦ ਕੰਪਨੀ ਨੇ ਐਕਸਚੇਂਜ ਫਾਈਲਿੰਗ ਰਾਹੀਂ ਇਹ ਜਾਣਕਾਰੀ ਸਾਂਝੀ ਕੀਤੀ।
ਕੰਪਨੀ ਨੇ ਦੱਸਿਆ ਕਿ ਉਸ ਨੇ ਤਾਜ GVK ਵਿੱਚ ਆਪਣੀ 25.52% ਹਿੱਸੇਦਾਰੀ (ਲਗਪਗ 1.6 ਕਰੋੜ ਸ਼ੇਅਰ) ਸ਼ਾਲਿਨੀ ਭੂਪਾਲ ਨੂੰ 370 ਰੁਪਏ ਪ੍ਰਤੀ ਸ਼ੇਅਰ ਦੀ ਕੀਮਤ 'ਤੇ ਵੇਚ ਦਿੱਤੀ ਹੈ।
ਹੋਟਲ ਦੇ ਨਾਂ ਤੋਂ ਹਟੇਗਾ 'ਤਾਜ' ਸ਼ਬਦ
ਹਿੱਸੇਦਾਰੀ ਵੇਚਣ ਤੋਂ ਬਾਅਦ ਹੁਣ ਹੋਟਲ ਕੰਪਨੀ ਆਪਣੇ ਕਾਰਪੋਰੇਟ ਨਾਮ ਤੋਂ "ਤਾਜ" ਸ਼ਬਦ ਹਟਾਉਣ ਦੀ ਪ੍ਰਕਿਰਿਆ ਸ਼ੁਰੂ ਕਰੇਗੀ ਅਤੇ ਇੱਕ ਨਵਾਂ ਨਾਮ ਅਪਣਾਏਗੀ। ਹਾਲਾਂਕਿ IHCL ਨੇ ਸਾਫ਼ ਕੀਤਾ ਹੈ ਕਿ ਉਹ ਪਹਿਲਾਂ ਤੋਂ ਮੌਜੂਦ 'ਹੋਟਲ ਆਪਰੇਟਿੰਗ ਐਗਰੀਮੈਂਟ' ਤਹਿਤ ਤਾਜ GVK ਦੇ ਮੌਜੂਦਾ ਹੋਟਲਾਂ ਦਾ ਪ੍ਰਬੰਧ (Management) ਚਲਾਉਣਾ ਜਾਰੀ ਰੱਖੇਗੀ।
ਪੁਰਾਣੇ ਸਮਝੌਤੇ ਹੋਏ ਰੱਦ
ਇਸ ਸੌਦੇ ਦੇ ਨਾਲ ਹੀ IHCL, ਸ਼ਾਲਿਨੀ ਭੂਪਾਲ ਅਤੇ GVK ਪ੍ਰਮੋਟਰ ਪਰਿਵਾਰ ਵਿਚਕਾਰ ਇੱਕ 'ਟਰਮੀਨੇਸ਼ਨ ਐਗਰੀਮੈਂਟ' ਸਾਈਨ ਕੀਤਾ ਗਿਆ ਹੈ।
2011 ਵਿੱਚ ਹੋਇਆ ਸ਼ੇਅਰਹੋਲਡਰ ਸਮਝੌਤਾ ਰੱਦ ਕਰ ਦਿੱਤਾ ਗਿਆ ਹੈ।
2007 ਵਿੱਚ ਸਾਈਨ ਕੀਤਾ ਗਿਆ 'ਟ੍ਰੇਡਮਾਰਕ ਲਾਇਸੰਸ ਐਗਰੀਮੈਂਟ' ਵੀ ਖ਼ਤਮ ਕਰ ਦਿੱਤਾ ਗਿਆ ਹੈ।
ਅਧਿਕਾਰੀਆਂ ਦੇ ਅਸਤੀਫ਼ੇ ਤੇ ਨਵਾਂ ਮਾਡਲ
ਇਸ ਬਦਲਾਅ ਦੇ ਵਿਚਕਾਰ, ਤਾਜ GVK ਦੇ ਬੋਰਡ ਵਿੱਚ IHCL ਵੱਲੋਂ ਨਾਮਜ਼ਦ ਕੀਤੇ ਗਏ ਸਾਰੇ ਡਾਇਰੈਕਟਰਾਂ ਨੇ ਆਪਣੇ ਅਹੁਦਿਆਂ ਤੋਂ ਅਸਤੀਫ਼ਾ ਦੇ ਦਿੱਤਾ ਹੈ। ਹੁਣ GVK-ਭੂਪਾਲ ਪਰਿਵਾਰ 74.99% ਹਿੱਸੇਦਾਰੀ ਦੇ ਨਾਲ ਮੁੱਖ ਪ੍ਰਮੋਟਰ ਬਣਿਆ ਰਹੇਗਾ।
ਟਾਟਾ ਦੀ ਕੰਪਨੀ IHCL ਨੇ ਕਿਹਾ ਕਿ ਇਹ ਕਦਮ ਉਨ੍ਹਾਂ ਦੀ 'ਕੈਪੀਟਲ-ਲਾਈਟ ਗਰੋਥ' (Capital-Light Growth) ਰਣਨੀਤੀ ਦਾ ਹਿੱਸਾ ਹੈ। ਉਹ ਮਾਲਕੀ ਤੋਂ ਪਿੱਛੇ ਹਟ ਕੇ ਹੁਣ ਸਿਰਫ਼ ਮੈਨੇਜਮੈਂਟ ਮਾਡਲ 'ਤੇ ਧਿਆਨ ਦੇਣਗੇ, ਜਿਸ ਤਹਿਤ ਉਹ ਮੌਜੂਦਾ ਛੇ ਹੋਟਲਾਂ ਅਤੇ ਬੈਂਗਲੁਰੂ ਵਿੱਚ ਆਉਣ ਵਾਲੀ ਇੱਕ ਨਵੀਂ ਪ੍ਰਾਪਰਟੀ ਦਾ ਪ੍ਰਬੰਧ ਸੰਭਾਲਦੇ ਰਹਿਣਗੇ।