ਟੈਰਿਫ 'ਤੇ ਟਰੰਪ ਦੀ ਦੋਹਰੀ ਚਾਲ! ਭਾਰਤ ਨਾਲ ਡੀਲ ਤੋਂ ਬਾਅਦ ਬੰਗਲਾਦੇਸ਼ ਨੂੰ ਦਿੱਤੀ ਰਾਹਤ, 20-20% ਉਛਲਣ ਵਾਲੇ ਸ਼ੇਅਰ ਬੁਰੀ ਤਰ੍ਹਾਂ ਡਿੱਗੇ

ਨਵੀਂ ਦਿੱਲੀ: ਭਾਰਤ ਨਾਲ ਵਪਾਰਕ ਸਮਝੌਤੇ (India-US Trade Deal) ਦੇ ਐਲਾਨ ਤੋਂ ਬਾਅਦ ਅਮਰੀਕਾ ਨੇ ਬੰਗਲਾਦੇਸ਼ ਨਾਲ ਵੀ ਵਪਾਰਕ ਸਮਝੌਤੇ ਦੀ ਘੋਸ਼ਣਾ ਕਰ ਦਿੱਤੀ ਹੈ। ਪਰ, ਅਮਰੀਕੀ ਸਰਕਾਰ ਦਾ ਇਹ ਐਲਾਨ ਭਾਰਤੀ ਟੈਕਸਟਾਈਲ ਕੰਪਨੀਆਂ ਲਈ ਵੱਡਾ ਝਟਕਾ ਸਾਬਤ ਹੋਇਆ, ਜਿਸ ਕਾਰਨ ਭਾਰਤੀ ਟੈਕਸਟਾਈਲ ਕੰਪਨੀਆਂ (Textiles Shares) ਦੇ ਸ਼ੇਅਰਾਂ ਵਿੱਚ ਭਾਰੀ ਗਿਰਾਵਟ ਦਰਜ ਕੀਤੀ ਗਈ। ਇਹਨਾਂ ਵਿੱਚ ਗੋਕਲਦਾਸ ਐਕਸਪੋਰਟਸ ਦੇ ਸ਼ੇਅਰ 5 ਫੀਸਦੀ ਤੋਂ ਵੱਧ ਡਿੱਗ ਕੇ 796.45 ਰੁਪਏ 'ਤੇ ਕਾਰੋਬਾਰ ਕਰ ਰਹੇ ਸਨ, ਜਦਕਿ ਕੇਪੀਆਰ ਮਿੱਲ ਅਤੇ ਅਰਵਿੰਦ ਦੇ ਸ਼ੇਅਰਾਂ ਵਿੱਚ 4 ਫੀਸਦੀ ਤੋਂ ਵੱਧ ਦੀ ਗਿਰਾਵਟ ਆਈ। ਪਰਲ ਗਲੋਬਲ ਇੰਡਸਟਰੀਜ਼ ਦੇ ਸ਼ੇਅਰ 3.5 ਫੀਸਦੀ ਤੋਂ ਵੱਧ ਟੁੱਟ ਚੁੱਕੇ ਹਨ। ਇਸ ਤੋਂ ਪਹਿਲਾਂ ਇਨ੍ਹਾਂ ਸਾਰੇ ਸ਼ੇਅਰਾਂ ਵਿੱਚ ਜ਼ਬਰਦਸਤ ਤੇਜ਼ੀ ਦੇਖਣ ਨੂੰ ਮਿਲੀ ਸੀ।

ਕਿਉਂ ਡਿੱਗੇ ਟੈਕਸਟਾਈਲ ਸ਼ੇਅਰ?

ਅਮਰੀਕਾ ਅਤੇ ਬੰਗਲਾਦੇਸ਼ ਵਿਚਾਲੇ ਹੋਏ ਸਮਝੌਤੇ ਤਹਿਤ, ਯੂ.ਐੱਸ. ਨੇ ਅਜਿਹਾ ਸਿਸਟਮ ਬਣਾਉਣ ਦੀ ਵਚਨਬੱਧਤਾ ਜਤਾਈ ਹੈ ਜਿਸ ਨਾਲ ਬੰਗਲਾਦੇਸ਼ ਤੋਂ ਆਯਾਤ ਕੀਤੇ ਜਾਣ ਵਾਲੇ ਕੁਝ ਕੱਪੜਿਆਂ ਅਤੇ ਗਾਰਮੈਂਟਸ 'ਤੇ ਜ਼ੀਰੋ ਰੈਸੀਪ੍ਰੋਕਲ ਟੈਰਿਫ (Zero Reciprocal Tariff) ਲਾਗੂ ਹੋ ਸਕੇਗਾ। ਅਮਰੀਕਾ ਵੱਲੋਂ ਜਾਰੀ ਬਿਆਨ ਵਿੱਚ ਕਿਹਾ ਗਿਆ ਹੈ, "ਇਸ ਸਿਸਟਮ ਤਹਿਤ ਬੰਗਲਾਦੇਸ਼ ਤੋਂ ਆਯਾਤ ਕੀਤੇ ਕੱਪੜਿਆਂ ਦੀ ਇੱਕ ਨਿਸ਼ਚਿਤ ਮਾਤਰਾ ਅਮਰੀਕਾ ਵਿੱਚ ਘੱਟ ਡਿਊਟੀ 'ਤੇ ਪ੍ਰਵੇਸ਼ ਕਰ ਸਕੇਗੀ, ਪਰ ਇਹ ਮਾਤਰਾ ਅਮਰੀਕਾ ਤੋਂ ਨਿਰਯਾਤ ਹੋਣ ਵਾਲੇ ਕੱਪੜਿਆਂ ਦੀ ਮਾਤਰਾ ਦੇ ਅਧਾਰ 'ਤੇ ਨਿਰਧਾਰਤ ਕੀਤੀ ਜਾਵੇਗੀ, ਜਿਵੇਂ ਕਿ ਅਮਰੀਕਾ ਵਿੱਚ ਪੈਦਾ ਹੋਈ ਕਪਾਹ ਅਤੇ ਮਨੁੱਖ ਦੁਆਰਾ ਬਣਾਏ ਫਾਈਬਰ ਕੱਪੜੇ।"

ਇਸ ਤੋਂ ਪਹਿਲਾਂ ਭਾਰਤ ਤੇ ਅਮਰੀਕਾ ਵਿਚਾਲੇ ਹੋਈ ਡੀਲ ਮੁਤਾਬਕ, ਅਮਰੀਕਾ ਭਾਰਤੀ ਟੈਕਸਟਾਈਲ ਐਕਸਪੋਰਟ 'ਤੇ ਟੈਰਿਫ ਨੂੰ ਮੌਜੂਦਾ 50 ਫੀਸਦੀ ਤੋਂ ਘਟਾ ਕੇ 18 ਫੀਸਦੀ ਕਰ ਦੇਵੇਗਾ। ਇਸ ਨਾਲ ਭਾਰਤੀ ਨਿਰਯਾਤਕਾਂ ਨੂੰ ਰਾਹਤ ਤਾਂ ਮਿਲੇਗੀ, ਪਰ ਉਨ੍ਹਾਂ ਨੂੰ ਸਖ਼ਤ ਮੁਕਾਬਲੇ ਦਾ ਸਾਹਮਣਾ ਕਰਨਾ ਪਵੇਗਾ ਕਿਉਂਕਿ ਬੰਗਲਾਦੇਸ਼ੀ ਨਿਰਯਾਤਕਾਂ ਨੂੰ ਕੁਝ ਸ਼੍ਰੇਣੀਆਂ ਵਿੱਚ ਕੋਈ ਟੈਰਿਫ ਨਹੀਂ ਦੇਣਾ ਪਵੇਗਾ।

ਟੈਰਿਫ ਦਾ ਗਣਿਤ

ਹਾਲਾਂਕਿ, ਬੰਗਲਾਦੇਸ਼ੀ ਨਿਰਯਾਤ 'ਤੇ ਅਮਰੀਕਾ ਦਾ ਕੁੱਲ ਟੈਰਿਫ ਘਟ ਕੇ 19 ਫੀਸਦੀ ਹੋ ਗਿਆ ਹੈ, ਜੋ ਭਾਰਤ ਦੇ 18 ਫੀਸਦੀ ਤੋਂ ਥੋੜ੍ਹਾ ਜਿਹਾ ਜ਼ਿਆਦਾ ਹੈ। ਦੋਵਾਂ ਦੇਸ਼ਾਂ ਨੇ ਆਪਣੇ ਸਾਂਝੇ ਬਿਆਨ ਵਿੱਚ ਕਿਹਾ, “ਇਹ ਸਮਝੌਤਾ ਅਮਰੀਕੀ ਅਤੇ ਬੰਗਲਾਦੇਸ਼ੀ ਨਿਰਯਾਤਕਾਂ ਨੂੰ ਇੱਕ-ਦੂਜੇ ਦੇ ਬਾਜ਼ਾਰਾਂ ਤੱਕ ਬੇਮਿਸਾਲ ਪਹੁੰਚ ਪ੍ਰਦਾਨ ਕਰੇਗਾ। ਇਹ ਸਾਡੇ ਲੰਬੇ ਸਮੇਂ ਦੇ ਆਰਥਿਕ ਸਬੰਧਾਂ ਨੂੰ ਹੋਰ ਮਜ਼ਬੂਤ ਕਰੇਗਾ।”