ਤੇਲ ਦੀਆਂ ਵਧਦੀਆਂ ਕੀਮਤਾਂ ਦੀ ਮਾਰ : ਆਟਾ-ਦਾਲ ਸਮੇਤ ਰੋਜ਼ਾਨਾ ਵਰਤੋਂ ਦਾ ਸਾਮਾਨ ਹੋਵੇਗਾ ਮਹਿੰਗਾ, FMCG ਕੰਪਨੀਆਂ ਨੇ ਖਿੱਚੀ ਤਿਆਰੀ

ਨਵੀਂ ਦਿੱਲੀ : ਆਉਣ ਵਾਲੇ ਮਹੀਨਿਆਂ ਵਿੱਚ ਆਮ ਆਦਮੀ ਦੀ ਰਸੋਈ ਅਤੇ ਘਰੇਲੂ ਬਜਟ 'ਤੇ ਮਹਿੰਗਾਈ ਦਾ ਵੱਡਾ ਹਮਲਾ ਹੋ ਸਕਦਾ ਹੈ। ਆਟਾ, ਦਾਲ, ਪੈਕਡ ਫੂਡ ਅਤੇ ਹੋਰ ਰੋਜ਼ਾਨਾ ਵਰਤੋਂ ਦੀਆਂ ਚੀਜ਼ਾਂ (FMCG Products) ਮਹਿੰਗੀਆਂ ਹੋਣ ਦੀ ਪੂਰੀ ਸੰਭਾਵਨਾ ਹੈ। ਪੱਛਮੀ ਏਸ਼ੀਆ ਵਿੱਚ ਚੱਲ ਰਹੇ ਤਣਾਅ ਦਰਮਿਆਨ ਬਾਲਣ (Fuel) ਦੀਆਂ ਵਧਦੀਆਂ ਕੀਮਤਾਂ ਨੇ ਕੰਪਨੀਆਂ ਦੀ ਸਪਲਾਈ ਚੇਨ ਅਤੇ ਉਤਪਾਦਨ ਲਾਗਤ ਨੂੰ ਬਹੁਤ ਵਧਾ ਦਿੱਤਾ ਹੈ, ਜਿਸ ਦਾ ਸਿੱਧਾ ਅਸਰ ਹੁਣ ਖਪਤਕਾਰਾਂ ਦੀ ਜੇਬ 'ਤੇ ਪੈਣ ਜਾ ਰਿਹਾ ਹੈ।

ਸੂਤਰਾਂ ਮੁਤਾਬਕ, ਮਾਰਕੀਟ ਦੀਆਂ ਵੱਡੀਆਂ ਕੰਪਨੀਆਂ ਹੁਣ ਚੋਣਵੇਂ ਉਤਪਾਦਾਂ ਦੀਆਂ ਕੀਮਤਾਂ ਵਧਾਉਣ ਜਾਂ ਫਿਰ ਪੈਕੇਟ ਦਾ ਵਜ਼ਨ (Grammage) ਘਟਾਉਣ 'ਤੇ ਗੰਭੀਰਤਾ ਨਾਲ ਵਿਚਾਰ ਕਰ ਰਹੀਆਂ ਹਨ।

ਭਾੜਾ ਤੇ ਉਤਪਾਦਨ ਲਾਗਤ ਵਧਣ ਨਾਲ ਕੰਪਨੀਆਂ 'ਤੇ ਦਬਾਅ

ਕੰਪਨੀ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਤੇਲ ਦੀਆਂ ਦਰਾਂ ਵਿੱਚ ਵਾਧੇ ਕਾਰਨ ਮਾਲ ਢੋਆ-ਢੁਆਈ (Freight) ਅਤੇ ਸਪਲਾਈ ਦਾ ਖਰਚਾ ਕਾਫ਼ੀ ਵਧੇਗਾ। ਇਹ ਉਨ੍ਹਾਂ ਕੰਪਨੀਆਂ ਦੇ ਮੁਨਾਫ਼ੇ (Margin) ਨੂੰ ਹੋਰ ਪ੍ਰਭਾਵਿਤ ਕਰੇਗਾ, ਜੋ ਪਹਿਲਾਂ ਹੀ 8-10% ਦੀ ਮਹਿੰਗਾਈ ਨਾਲ ਜੂਝ ਰਹੀਆਂ ਹਨ।

ਦੱਸਣਯੋਗ ਹੈ ਕਿ ਪਿਛਲੇ ਸਾਲ ਜੀ.ਐਸ.ਟੀ. (GST) ਦਰਾਂ ਵਿੱਚ ਕਟੌਤੀ ਤੋਂ ਬਾਅਦ ਬਾਜ਼ਾਰ ਵਿੱਚ ਮੰਗ ਸੁਧਰਨੀ ਸ਼ੁਰੂ ਹੋਈ ਸੀ ਅਤੇ ਨੇਸਲੇ (Nestle) ਤੇ ਹਿੰਦੁਸਤਾਨ ਯੂਨੀਲੀਵਰ (HUL) ਵਰਗੀਆਂ ਦਿੱਗਜ ਕੰਪਨੀਆਂ ਨੇ ਚੌਥੀ ਤਿਮਾਹੀ ਵਿੱਚ ਸ਼ਾਨਦਾਰ ਪ੍ਰਦਰਸ਼ਨ ਦਰਜ ਕੀਤਾ ਸੀ, ਪਰ ਹੁਣ ਮਹਿੰਗਾਈ ਦੇ ਨਵੇਂ ਦੌਰ ਨੇ ਚਿੰਤਾਵਾਂ ਵਧਾ ਦਿੱਤੀਆਂ ਹਨ।

2 ਤੋਂ 5 ਫ਼ੀਸਦੀ ਤੱਕ ਵਧ ਚੁੱਕੀਆਂ ਨੇ ਕੀਮਤਾਂ, ਅਗਲੇ ਵਾਧੇ ਦੀ ਤਿਆਰੀ

ਲਾਗਤ ਵਿੱਚ ਹੋਏ ਵਾਧੇ ਦੀ ਭਰਪਾਈ ਲਈ ਹਿੰਦੁਸਤਾਨ ਯੂਨੀਲੀਵਰ, ਮੈਰੀਕੋ ਅਤੇ ਡਾਬਰ ਵਰਗੀਆਂ ਕੰਪਨੀਆਂ ਨੇ ਪਹਿਲਾਂ ਹੀ ਕੀਮਤਾਂ ਵਿੱਚ 2-5% ਦਾ ਵਾਧਾ ਕਰ ਦਿੱਤਾ ਹੈ, ਅਤੇ ਹੁਣ ਅਗਲੇ ਦੌਰ ਦੇ ਵਾਧੇ ਦਾ ਮੁਲਾਂਕਣ ਕੀਤਾ ਜਾ ਰਿਹਾ ਹੈ।

ਡਾਬਰ ਇੰਡੀਆ ਦੇ ਗਲੋਬਲ ਸੀ.ਈ.ਓ. ਮੋਹਿਤ ਮਲਹੋਤਰਾ ਨੇ ਕਿਹਾ, "ਅਸੀਂ ਆਪਣੇ ਕਾਰੋਬਾਰ ਦੇ ਕਈ ਹਿੱਸਿਆਂ ਵਿੱਚ ਪਹਿਲਾਂ ਹੀ 4% ਦੀ ਕੀਮਤ ਵਧਾ ਚੁੱਕੇ ਹਾਂ। ਇਸ ਵਿੱਤੀ ਸਾਲ ਵਿੱਚ 10% ਦੀ ਮਹਿੰਗਾਈ ਸਾਨੂੰ ਪ੍ਰਭਾਵਿਤ ਕਰ ਰਹੀ ਹੈ, ਜਿਸ ਕਰਕੇ ਕੀਮਤਾਂ ਵਿੱਚ ਇੱਕ ਹੋਰ ਵਾਧੇ ਬਾਰੇ ਸੋਚਣਾ ਪਵੇਗਾ।"

ਐਚ.ਯੂ.ਐਲ. (HUL) ਅਤੇ ਬ੍ਰਿਟਾਨੀਆ ਨੇ ਵੀ ਸੰਕੇਤ ਦਿੱਤੇ ਹਨ ਕਿ ਜੇਕਰ ਮਹਿੰਗਾਈ ਦਾ ਦਬਾਅ ਇਵੇਂ ਹੀ ਬਣਿਆ ਰਿਹਾ, ਤਾਂ ਰੇਟ ਵਧਾਉਣ ਤੋਂ ਇਲਾਵਾ ਕੋਈ ਚਾਰਾ ਨਹੀਂ ਬਚੇਗਾ।

ਕਦੋਂ ਤੇ ਕਿੰਨੀ ਵਧੇਗੀ ਕੀਮਤ

ਪਾਰਲੇ ਪ੍ਰੋਡਕਟਸ ਦੇ ਚੀਫ਼ ਮਾਰਕੀਟਿੰਗ ਅਫ਼ਸਰ ਮਯੰਕ ਸ਼ਾਹ ਮੁਤਾਬਕ, "ਕੀਮਤਾਂ ਦਾ ਵਧਣਾ ਤੈਅ ਹੈ ਪਰ ਕਿੰਨਾ ਵਾਧਾ ਹੋਵੇਗਾ, ਇਸ ਦਾ ਅੰਦਾਜ਼ਾ ਲਗਾਇਆ ਜਾ ਰਿਹਾ ਹੈ। ਕੱਚੇ ਤੇਲ ਦੀਆਂ ਕੀਮਤਾਂ ਵਿੱਚ ਅਸਥਿਰਤਾ ਸਾਡੇ ਲਈ ਸਭ ਤੋਂ ਵੱਡੀ ਚਿੰਤਾ ਹੈ।"

ਆਰਥਿਕ ਮਾਹਿਰਾਂ ਦਾ ਕਹਿਣਾ ਹੈ ਕਿ ਜੇਕਰ ਤੇਲ ਦੀਆਂ ਕੀਮਤਾਂ ਲੰਬੇ ਸਮੇਂ ਤੱਕ ਉੱਚੀਆਂ ਰਹਿੰਦੀਆਂ ਹਨ, ਤਾਂ ਕੰਪਨੀਆਂ ਹੌਲੀ-ਹੌਲੀ ਕੀਮਤਾਂ ਵਧਾਉਣਗੀਆਂ ਜਾਂ ਪੈਕਟ ਦਾ ਸਾਈਜ਼ ਛੋਟਾ ਕਰਨਗੀਆਂ (ਭਾਵ ਪੈਸੇ ਓਨੇ ਹੀ ਰਹਿਣਗੇ ਪਰ ਸਾਮਾਨ ਘੱਟ ਮਿਲੇਗਾ)। ਇਸ ਦਾ ਸਭ ਤੋਂ ਮਾੜਾ ਅਸਰ ਪੇਂਡੂ ਬਾਜ਼ਾਰਾਂ (Rural Markets) 'ਤੇ ਪਵੇਗਾ, ਜੋ ਕੀਮਤਾਂ ਨੂੰ ਲੈ ਕੇ ਬਹੁਤ ਸੰਵੇਦਨਸ਼ੀਲ ਹੁੰਦੇ ਹਨ। ਨੇਸਲੇ ਦੇ ਸੀ.ਐਮ.ਡੀ. ਮਨੀਸ਼ ਤਿਵਾਰੀ ਨੇ ਕਿਹਾ ਕਿ ਉਹ ਸਥਿਤੀ 'ਤੇ ਨੇੜਿਓਂ ਨਜ਼ਰ ਰੱਖ ਰਹੇ ਹਨ ਅਤੇ ਕੀਮਤਾਂ ਵਧਾਉਣਾ ਉਨ੍ਹਾਂ ਦਾ ਆਖਰੀ ਆਪਸ਼ਨ ਹੋਵੇਗਾ।