LPG Gas Crisis: ਪਿੰਡਾਂ 'ਚ 25 ਨਹੀਂ ਹੁਣ 45 ਦਿਨਾਂ ਬਾਅਦ ਬੁੱਕ ਹੋਵੇਗਾ ਸਿਲੰਡਰ! ਸੰਕਟ ਦੇ ਵਿਚਕਾਰ ਗੈਸ ਕੰਪਨੀਆਂ ਦਾ ਵੱਡਾ ਫੈਸਲਾ

ਨਵੀਂ ਦਿੱਲੀ। ਮਿਡਲ ਈਸਟ ਵਿੱਚ ਵਧਦੇ ਜੰਗੀ ਤਣਾਅ ਦਾ ਅਸਰ ਹੁਣ ਭਾਰਤੀ ਰਸੋਈ ਤੱਕ ਪਹੁੰਚਦਾ ਦਿਖਾਈ ਦੇ ਰਿਹਾ ਹੈ। ਗੈਸ ਸਪਲਾਈ ਨੂੰ ਲੈ ਕੇ ਬਣੀ ਅਨਿਸ਼ਚਿਤਤਾ ਦੇ ਵਿਚਕਾਰ ਕੇਂਦਰ ਸਰਕਾਰ ਨੇ ਐਲਪੀਜੀ (LPG) ਸਿਲੰਡਰ ਬੁਕਿੰਗ ਦੇ ਨਿਯਮਾਂ ਵਿੱਚ ਵੱਡਾ ਬਦਲਾਅ ਕੀਤਾ ਹੈ, ਜਿਸ ਤਹਿਤ ਪੇਂਡੂ ਅਤੇ ਸ਼ਹਿਰੀ ਖੇਤਰਾਂ ਲਈ ਵੱਖ-ਵੱਖ ਸਮਾਂ ਤੈਅ ਕੀਤਾ ਗਿਆ ਹੈ।

ਨਵੀਂ ਵਿਵਸਥਾ ਦੇ ਅਨੁਸਾਰ, ਪੇਂਡੂ ਇਲਾਕਿਆਂ ਵਿੱਚ ਹੁਣ ਐਲਪੀਜੀ ਸਿਲੰਡਰ 45 ਦਿਨਾਂ ਬਾਅਦ ਹੀ ਬੁੱਕ ਕਰਵਾਇਆ ਜਾ ਸਕੇਗਾ, ਜਦੋਂ ਕਿ ਸ਼ਹਿਰੀ ਖੇਤਰਾਂ ਵਿੱਚ ਬੁਕਿੰਗ ਦਾ ਅੰਤਰਾਲ 25 ਦਿਨ ਰਹੇਗਾ। ਇਸ ਤੋਂ ਪਹਿਲਾਂ ਦੇਸ਼ ਭਰ ਵਿੱਚ ਬੁਕਿੰਗ ਦਾ ਸਮਾਂ 21 ਦਿਨ ਸੀ, ਜਿਸ ਨੂੰ ਹਾਲ ਹੀ ਵਿੱਚ ਵਧਾ ਕੇ 25 ਦਿਨ ਕੀਤਾ ਗਿਆ ਸੀ।

ਆਖਰ ਕਿਉਂ ਬਦਲੇ ਗਏ ਨਿਯਮ?

ਸਰਕਾਰ ਦਾ ਕਹਿਣਾ ਹੈ ਕਿ ਪਿਛਲੇ ਦਿਨੀਂ ਗੈਸ ਦੀ ਕਿੱਲਤ ਦੀਆਂ ਅਫਵਾਹਾਂ ਕਾਰਨ ਲੋਕ ਲੋੜ ਤੋਂ ਪਹਿਲਾਂ ਹੀ ਸਿਲੰਡਰ ਬੁੱਕ ਕਰਨ ਲੱਗ ਪਏ ਸਨ। ਰਿਪੋਰਟਾਂ ਮੁਤਾਬਕ, ਜੋ ਗਾਹਕ ਪਹਿਲਾਂ ਲਗਪਗ 55 ਦਿਨਾਂ ਵਿੱਚ ਸਿਲੰਡਰ ਬੁੱਕ ਕਰਦੇ ਸਨ, ਉਹ ਹੁਣ ਸਿਰਫ਼ 15 ਦਿਨਾਂ ਦੇ ਅੰਤਰਾਲ ਵਿੱਚ ਬੁਕਿੰਗ ਕਰਨ ਲੱਗੇ ਸਨ। ਇਸ ਨਾਲ ਜਮ੍ਹਾਂਖੋਰੀ ਅਤੇ ਕਾਲਾਬਾਜ਼ਾਰੀ ਦੀ ਸੰਭਾਵਨਾ ਵੱਧ ਗਈ ਸੀ। ਇਸ ਨੂੰ ਰੋਕਣ ਲਈ ਹੀ ਬੁਕਿੰਗ ਦਾ ਅੰਤਰਾਲ ਵਧਾਇਆ ਗਿਆ ਹੈ।

ਜੰਗ ਦਾ ਗੈਸ ਸਪਲਾਈ 'ਤੇ ਕੀ ਅਸਰ?

ਈਰਾਨ, ਅਮਰੀਕਾ ਅਤੇ ਇਜ਼ਰਾਈਲ ਵਿਚਕਾਰ ਵਧੇ ਤਣਾਅ ਕਾਰਨ ਮੱਧ ਏਸ਼ੀਆ ਦੇ ਮਹੱਤਵਪੂਰਨ ਸਮੁੰਦਰੀ ਰਸਤੇ ਹੋਰਮੁਜ਼ ਜਲਡਮਰੂ ਮੱਧ (Strait of Hormuz) 'ਤੇ ਖ਼ਤਰਾ ਵੱਧ ਗਿਆ ਹੈ। ਭਾਰਤ ਆਪਣੀ ਲਗਭਗ 60% ਐਲਪੀਜੀ ਲੋੜ ਦਰਾਮਦ (Import) ਰਾਹੀਂ ਪੂਰੀ ਕਰਦਾ ਹੈ ਅਤੇ ਇਸ ਵਿੱਚੋਂ ਲਗਪਗ 90% ਗੈਸ ਇਸੇ ਰਸਤੇ ਰਾਹੀਂ ਆਉਂਦੀ ਹੈ।

ਸਰਕਾਰ ਨੇ ਵਧਾਇਆ ਉਤਪਾਦਨ

ਪੈਟਰੋਲੀਅਮ ਮੰਤਰਾਲੇ ਨੇ ਸਪੱਸ਼ਟ ਕੀਤਾ ਹੈ ਕਿ ਦੇਸ਼ ਵਿੱਚ ਫਿਲਹਾਲ ਗੈਸ ਦੀ ਕੋਈ ਕਮੀ ਨਹੀਂ ਹੈ। ਘਰੇਲੂ ਰਿਫਾਇਨਰੀ ਕੰਪਨੀਆਂ ਨੇ ਉਤਪਾਦਨ ਵਿੱਚ 25% ਤੱਕ ਵਾਧਾ ਕਰ ਦਿੱਤਾ ਹੈ। ਇਸ ਤੋਂ ਇਲਾਵਾ, ਉਦਯੋਗਿਕ ਖੇਤਰ ਦੀ ਸਪਲਾਈ ਵਿੱਚ ਕਟੌਤੀ ਕਰਕੇ ਘਰੇਲੂ ਖਪਤਕਾਰਾਂ ਨੂੰ ਪਹਿਲ ਦਿੱਤੀ ਜਾ ਰਹੀ ਹੈ ਤਾਂ ਜੋ 33 ਕਰੋੜ ਤੋਂ ਵੱਧ ਘਰਾਂ ਤੱਕ ਰਸੋਈ ਗੈਸ ਦੀ ਸਪਲਾਈ ਨਿਯਮਤ ਬਣੀ ਰਹੇ।