ਇਹ ਹੈ ਈਰਾਨ ਦਾ ਸਭ ਤੋਂ ਅਮੀਰ ਆਦਮੀ, ਤੇਲ ਨਹੀਂ ਤਕਨੀਕ ਦੇ ਬਿਜ਼ਨੈੱਸ ਤੋਂ ਕਮਾਇਆ ਬੇਸ਼ੁਮਾਰ ਪੈਸਾ, ਅਮਰੀਕਾ 'ਚ ਲਿਖੀ ਤਕਦੀਰ
ਸਾਲ 2002 'ਚ eBay ਨੇ ਆਨਲਾਈਨ ਪੇਮੈਂਟ ਕੰਪਨੀ PayPal ਨੂੰ ਖਰੀਦ ਲਿਆ। ਹਾਲਾਂਕਿ, ਸਾਲ 2020 'ਚ ਉਹ eBay ਦੇ ਬੋਰਡ ਤੋਂ ਵੱਖ ਹੋ ਗਏ। eBay ਦੀ ਮਾਰਕੀਟ ਵੈਲਿਊ 40.71 ਬਿਲੀਅਨ ਡਾਲਰ ਦੇ ਪਾਰ ਪਹੁੰਚ ਚੁੱਕੀ ਹੈ। ਫੋਰਬਸ ਬਿਲੀਨੇਅਰਜ਼ ਦੀ ਲਿਸਟ ਮੁਤਾਬਕ ਓਮਿਡਿਆਰ ਦੀ ਨਿੱਜੀ ਸੰਪਤੀ 11.3 ਅਰਬ ਡਾਲਰ ਦੇ ਪਾਰ ਹੋ ਚੁੱਕੀ ਹੈ।
Posted By Seema Anand
Publish Date: Fri, 06 Mar 2026 04:57 PM (IST)
Updated Date: Fri, 06 Mar 2026 05:02 PM (IST)
ਨਵੀਂ ਦਿੱਲੀ : ਈਰਾਨ ਅਤੇ ਅਮਰੀਕਾ-ਇਜ਼ਰਾਈਲ (Iran-US War) ਦੀ ਜੰਗ ਨੇ ਪੂਰੀ ਦੁਨੀਆ ਦਾ ਧਿਆਨ ਆਪਣੇ ਵੱਲ ਖਿੱਚ ਲਿਆ ਹੈ। ਅਜਿਹੇ 'ਚ ਈਰਾਨ ਨਾਲ ਜੁੜੀਆਂ ਖ਼ਬਰਾਂ ਅਤੇ ਸ਼ਖਸੀਅਤਾਂ ਬਾਰੇ ਕਈ ਹੈਰਾਨ ਕਰਨ ਵਾਲੀਆਂ ਕਹਾਣੀਆਂ ਸਾਹਮਣੇ ਆ ਰਹੀਆਂ ਹਨ। ਕੀ ਤੁਸੀਂ ਜਾਣਦੇ ਹੋ ਈਰਾਨ ਦਾ ਸਭ ਤੋਂ ਅਮੀਰ ਸ਼ਖਸ ਕੌਣ ਹੈ? ਹੈਰਾਨੀ ਦੀ ਗੱਲ ਹੈ ਕਿ ਇਸ ਵਿਅਕਤੀ ਨੇ ਤੇਲ-ਗੈਸ ਵਰਗੀ ਖਣਿਜ ਸੰਪਦਾ ਤੋਂ ਨਹੀਂ, ਸਗੋਂ ਤਕਨੀਕ ਦੀ ਦੌਲਤ ਨਾਲ ਬੇਸ਼ੁਮਾਰ ਪੈਸਾ ਕਮਾਇਆ ਹੈ। ਇਕ ਹੋਰ ਦਿਲਚਸਪ ਗੱਲ ਇਹ ਵੀ ਹੈ ਕਿ ਇਸ ਸ਼ਖਸ ਨੇ ਈਰਾਨ 'ਚ ਨਹੀਂ, ਸਗੋਂ ਅਮਰੀਕਾ 'ਚ ਰਹਿ ਕੇ ਨਾਮ ਕਮਾਇਆ ਹੈ।
ਅਸੀਂ ਗੱਲ ਕਰ ਰਹੇ ਹਾਂ ਈਰਾਨੀ ਮੂਲ ਦੇ ਉਸ ਸ਼ਖਸ ਦੀ, ਜਿਸ ਦੀ ਗਿਣਤੀ ਅਮਰੀਕਾ ਦੇ ਟੈਕ ਦਿੱਗਜਾਂ 'ਚ ਹੁੰਦੀ ਹੈ। ਇਸ ਵਿਅਕਤੀ ਦਾ ਨਾਂ ਹੈ ਪੀਅਰੇ ਓਮਿਡਿਆਰ, ਜੋ ਈ-ਬੇਅ (eBay) ਦੇ ਸੰਸਥਾਪਕ ਹਨ। 58 ਸਾਲਾ ਪੀਅਰੇ, ਈਰਾਨੀ ਮੂਲ ਦੇ ਸਭ ਤੋਂ ਅਮੀਰ ਵਿਅਕਤੀ ਹਨ ਅਤੇ ਇਨ੍ਹਾਂ ਦੀ ਕੁੱਲ ਸੰਪਤੀ 8.68 ਲੱਖ ਕਰੋੜ ਰੁਪਏ ਦੱਸੀ ਜਾਂਦੀ ਹੈ।
ਈਰਾਨੀ ਮੂਲ ਦੇ ਸਭ ਤੋਂ ਦੌਲਤਮੰਦ ਸ਼ਖਸ
ਫੋਰਬਸ ਅਨੁਸਾਰ, ਪੀਅਰੇ ਓਮਿਡਿਆਰ ਨੂੰ ਈਰਾਨੀ ਮੂਲ ਦੇ ਸਭ ਤੋਂ ਅਮੀਰ ਵਿਅਕਤੀ ਵਜੋਂ ਜਾਣਿਆ ਜਾਂਦਾ ਹੈ ਅਤੇ ਇਨ੍ਹਾਂ ਦੀ ਅੰਦਾਜ਼ਨ ਸੰਪਤੀ 8.68 ਲੱਖ ਕਰੋੜ ਰੁਪਏ ਹੈ। ਪੀਅਰੇ ਓਮਿਡਿਆਰ ਦੇ ਮਾਤਾ-ਪਿਤਾ ਈਰਾਨੀ ਹਨ। ਉਨ੍ਹਾਂ ਦੀ ਮਾਂ ਮਸ਼ਹੂਰ ਸਿੱਖਿਆ ਸ਼ਾਸਤਰੀ ਅਤੇ ਪਿਤਾ ਡਾਕਟਰ ਹਨ।
ਪੀਅਰੇ ਓਮਿਡਿਆਰ ਦੇ ਦਾਦਾ, ਜਨਰਲ ਮਹਿਮੂਦ ਮੀਰ-ਦਜਲਾਲੀ ਨੇ 20ਵੀਂ ਸਦੀ ਦੌਰਾਨ ਈਰਾਨ ਦੇ ਸ਼ੁਰੂਆਤੀ ਰੱਖਿਆ ਉਦਯੋਗ (Defense Industry) ਦੇ ਵਿਕਾਸ 'ਚ ਮਹੱਤਵਪੂਰਨ ਭੂਮਿਕਾ ਨਿਭਾਈ ਸੀ। ਪੀਅਰੇ ਓਮਿਡਿਆਰ ਦੀਆਂ ਜੜ੍ਹਾਂ ਈਰਾਨ ਨਾਲ ਜੁੜੀਆਂ ਹਨ, ਪਰ ਉਨ੍ਹਾਂ ਦਾ ਜਨਮ ਫਰਾਂਸ 'ਚ ਹੋਇਆ ਤੇ ਪਰਵਰਿਸ਼ ਅਮਰੀਕਾ 'ਚ ਹੋਈ।
1995 'ਚ ਬਣਾਇਆ eBay
ਪੀਅਰੇ ਓਮਿਡਿਆਰ ਨੇ ਸਾਲ 1995 'ਚ ਮਹਿਜ਼ 28 ਸਾਲ ਦੀ ਉਮਰ 'ਚ ਇਕ ਛੋਟੀ ਜਿਹੀ ਵੈੱਬਸਾਈਟ ਲਈ ਕੋਡ ਲਿਖਣਾ ਸ਼ੁਰੂ ਕੀਤਾ, ਜੋ ਲੋਕਾਂ ਨੂੰ ਆਨਲਾਈਨ ਸਾਮਾਨ ਨੀਲਾਮ ਕਰਨ ਦੀ ਸਹੂਲਤ ਦਿੰਦੀ ਸੀ ਤੇ ਹੌਲੀ-ਹੌਲੀ ਇਸ ਨੂੰ ਰਿਟੇਲ ਈ-ਕਾਮਰਸ ਵਜੋਂ ਸਥਾਪਿਤ ਕੀਤਾ। ਅੱਜ ਤੋਂ 30 ਸਾਲ ਪਹਿਲਾਂ ਆਨਲਾਈਨ ਪੇਮੈਂਟ ਦਾ ਨਾਮੋ-ਨਿਸ਼ਾਨ ਨਹੀਂ ਸੀ, ਅਜਿਹੇ 'ਚ ਲੋਕ ਇੰਟਰਨੈੱਟ ਨਾਲ ਜੁੜੇ ਲੈਣ-ਦੇਣ 'ਤੇ ਭਰੋਸਾ ਨਹੀਂ ਕਰਦੇ ਸਨ। ਇਸ ਤੋਂ ਬਾਅਦ ਉਨ੍ਹਾਂ ਨੇ ਬਿਨਾਂ ਕਿਸੇ ਵੱਡੇ ਨਿਵੇਸ਼ ਦੇ ਪਹਿਲਾ ਆਨਲਾਈਨ ਰਿਟੇਲ ਮਾਰਕੀਟਪਲੇਸ eBay ਬਣਾਇਆ।
ਸਾਲ 2002 'ਚ eBay ਨੇ ਆਨਲਾਈਨ ਪੇਮੈਂਟ ਕੰਪਨੀ PayPal ਨੂੰ ਖਰੀਦ ਲਿਆ। ਹਾਲਾਂਕਿ, ਸਾਲ 2020 'ਚ ਉਹ eBay ਦੇ ਬੋਰਡ ਤੋਂ ਵੱਖ ਹੋ ਗਏ। eBay ਦੀ ਮਾਰਕੀਟ ਵੈਲਿਊ 40.71 ਬਿਲੀਅਨ ਡਾਲਰ ਦੇ ਪਾਰ ਪਹੁੰਚ ਚੁੱਕੀ ਹੈ। ਫੋਰਬਸ ਬਿਲੀਨੇਅਰਜ਼ ਦੀ ਲਿਸਟ ਮੁਤਾਬਕ ਓਮਿਡਿਆਰ ਦੀ ਨਿੱਜੀ ਸੰਪਤੀ 11.3 ਅਰਬ ਡਾਲਰ ਦੇ ਪਾਰ ਹੋ ਚੁੱਕੀ ਹੈ।