Share Market : ਸ਼ੇਅਰ ਬਾਜ਼ਾਰ 'ਚ ਮਚੀ ਹਾਹਾਕਾਰ: ਈਰਾਨ-ਅਮਰੀਕਾ ਤਣਾਅ ਨੇ ਡੁਬੋਏ ਨਿਵੇਸ਼ਕਾਂ ਦੇ 12 ਲੱਖ ਕਰੋੜ ਰੁਪਏ

ਨਵੀਂ ਦਿੱਲੀ: ਵਧਦੇ ਭੂ-ਰਾਜਨੀਤਿਕ (Geopolitical) ਤਣਾਅ ਕਾਰਨ 9 ਮਾਰਚ ਨੂੰ ਭਾਰਤੀ ਸ਼ੇਅਰ ਬਾਜ਼ਾਰ ਭਾਰੀ ਗਿਰਾਵਟ ਨਾਲ ਖੁੱਲ੍ਹਿਆ, ਜਿਸ ਵਿੱਚ ਨਿਫਟੀ 24000 ਤੋਂ ਹੇਠਾਂ ਆ ਗਿਆ। ਸੈਂਸੇਕਸ 78,918.90 ਦੇ ਮੁਕਾਬਲੇ 77,056.75 'ਤੇ ਖੁੱਲ੍ਹਣ ਤੋਂ ਬਾਅਦ ਸਵੇਰੇ ਸਾਢੇ 9 ਵਜੇ ਦੇ ਕਰੀਬ 2426.30 ਅੰਕ ਜਾਂ 3.07 ਫੀਸਦੀ ਡਿੱਗ ਕੇ 76,492.60 'ਤੇ ਹੈ। ਉੱਥੇ ਹੀ ਨਿਫਟੀ 24450.45 ਦੇ ਮੁਕਾਬਲੇ 23,868.05 'ਤੇ ਖੁੱਲ੍ਹਣ ਤੋਂ ਬਾਅਦ 732.80 ਅੰਕ ਜਾਂ 3 ਫੀਸਦੀ ਟੁੱਟ ਕੇ 23,717.65 'ਤੇ ਹੈ।

ਨਿਫਟੀ 'ਤੇ ਸ਼੍ਰੀਰਾਮ ਫਾਈਨਾਂਸ, ਇੰਟਰਗਲੋਬ ਐਵੀਏਸ਼ਨ, ਏਸ਼ੀਅਨ ਪੇਂਟਸ, L&T, ਅਡਾਨੀ ਪੋਰਟਸ ਵੱਡੇ ਨੁਕਸਾਨ (Losers) ਵਿੱਚ ਹਨ, ਜਦਕਿ ONGC ਅਤੇ ਕੋਲ ਇੰਡੀਆ ਇਸ ਵੇਲੇ ਲਾਭ (Gainers) ਵਿੱਚ ਹਨ।

ਸ਼ੇਅਰ ਬਾਜ਼ਾਰ 'ਚ ਗਿਰਾਵਟ ਦਾ ਸੰਕੇਤ 'ਗਿਫਟ ਨਿਫਟੀ' ਤੋਂ ਵੀ ਮਿਲ ਰਿਹਾ ਸੀ, ਜੋ ਸਵੇਰੇ ਸਾਢੇ 7 ਵਜੇ 765.50 ਅੰਕ ਜਾਂ 3.11 ਫੀਸਦੀ ਦੀ ਭਾਰੀ ਗਿਰਾਵਟ ਨਾਲ 23810.50 'ਤੇ ਸੀ। ਨਿਵੇਸ਼ਕਾਂ ਦੀ ਨਜ਼ਰ ਪੱਛਮੀ ਏਸ਼ੀਆ (West Asia) ਵਿੱਚ ਹੋ ਰਹੀ ਹਲਚਲ ਅਤੇ ਗਲੋਬਲ ਐਨਰਜੀ ਸਪਲਾਈ 'ਤੇ ਉਨ੍ਹਾਂ ਦੇ ਪ੍ਰਭਾਵ 'ਤੇ ਹੈ। ਨਾਲ ਹੀ ਕੱਚੇ ਤੇਲ ਦੀਆਂ ਕੀਮਤਾਂ ਵਿੱਚ ਉਤਾਰ-ਚੜ੍ਹਾਅ ਅਤੇ ਗਲੋਬਲ ਰਿਸਕ ਸੈਂਟੀਮੈਂਟ 'ਤੇ ਵੀ ਫੋਕਸ ਰਹੇਗਾ।

ਅਲਟਰਾਟੈਕ ਸੀਮੈਂਟ ਨੇ ਕੀਤਾ ਨਵਾਂ ਸਮਝੌਤਾ

ਕੰਪਨੀ ਨੇ ਰਿਨਿਊਏਬਲ ਐਨਰਜੀ ਦੇ ਉਤਪਾਦਨ ਅਤੇ ਟ੍ਰਾਂਸਮਿਸ਼ਨ ਵਿੱਚ ਲੱਗੀ ਕੰਪਨੀ 'ਸਨਸ਼ਿਓਰ ਸੋਲਰਪਾਰਕ ਥਰਟੀ ਏਟ ਪ੍ਰਾਈਵੇਟ ਲਿਮਟਿਡ' ਦੇ 26.20 ਫੀਸਦੀ ਇਕੁਇਟੀ ਸ਼ੇਅਰ ਖਰੀਦਣ ਲਈ ਐਨਰਜੀ ਸਪਲਾਈ ਐਗਰੀਮੈਂਟ, ਸ਼ੇਅਰ ਸਬਸਕ੍ਰਿਪਸ਼ਨ ਐਗਰੀਮੈਂਟ ਅਤੇ ਸ਼ੇਅਰਹੋਲਡਰਜ਼ ਐਗਰੀਮੈਂਟ ਕੀਤਾ ਹੈ। ਇਸ ਡੀਲ ਦਾ ਮਕਸਦ ਕੰਪਨੀ ਦੀ ਗ੍ਰੀਨ ਐਨਰਜੀ ਜ਼ਰੂਰਤਾਂ ਨੂੰ ਪੂਰਾ ਕਰਨਾ ਅਤੇ ਬਿਜਲੀ ਕਾਨੂੰਨਾਂ ਤਹਿਤ ਰੈਗੂਲੇਟਰੀ ਜ਼ਰੂਰਤਾਂ ਦੀ ਪਾਲਣਾ ਕਰਨਾ ਹੈ।

ਸ਼ੇਅਰ ਬਾਜ਼ਾਰ ਵਿੱਚ ਭਾਰੀ ਗਿਰਾਵਟ ਦੇ 4 ਵੱਡੇ ਕਾਰਨ

ਸ਼ੇਅਰ ਬਾਜ਼ਾਰ ਵਿੱਚ 9 ਮਾਰਚ ਨੂੰ ਆਈ ਭਾਰੀ ਗਿਰਾਵਟ ਦੀਆਂ 4 ਵੱਡੀਆਂ ਵਜ੍ਹਾ ਹਨ। ਇਨ੍ਹਾਂ ਵਿੱਚ ਕੱਚੇ ਤੇਲ ਵਿੱਚ ਉਛਾਲ, ਵਿਦੇਸ਼ੀ ਨਿਵੇਸ਼ਕਾਂ ਦੀ ਬਿਕਵਾਲੀ, ਰੁਪਏ ਵਿੱਚ ਕਮਜ਼ੋਰੀ ਅਤੇ ਗਲੋਬਲ ਮਾਰਕੀਟ ਵਿੱਚ ਕਮਜ਼ੋਰੀ ਸ਼ਾਮਲ ਹਨ।

1) ਕੱਚੇ ਤੇਲ ਵਿੱਚ ਉਛਾਲ: ਬ੍ਰੈਂਟ ਕਰੂਡ ਦੀ ਕੀਮਤ ਸ਼ੁਰੂਆਤੀ ਕਾਰੋਬਾਰ ਵਿੱਚ ਲਗਪਗ 26 ਫ਼ੀਸਦੀ ਵਧ ਕੇ ਲਗਭਗ 119 ਅਮਰੀਕੀ ਡਾਲਰ ਪ੍ਰਤੀ ਬੈਰਲ ਹੋ ਗਈ, ਜੋ ਜੁਲਾਈ 2022 ਤੋਂ ਬਾਅਦ ਦਾ ਉੱਚਤਮ ਪੱਧਰ ਹੈ। ਇਰਾਕ ਅਤੇ ਕੁਵੈਤ ਨੇ ਤੇਲ ਉਤਪਾਦਨ ਵਿੱਚ ਕਟੌਤੀ ਸ਼ੁਰੂ ਕਰ ਦਿੱਤੀ ਹੈ।

2) ਕਮਜ਼ੋਰ ਗਲੋਬਲ ਸੰਕੇਤ: ਏਸ਼ੀਆਈ ਬਾਜ਼ਾਰਾਂ ਵਿੱਚ ਵੀ ਭਾਰੀ ਬਿਕਵਾਲੀ ਦੇਖੀ ਗਈ। ਦੱਖਣੀ ਕੋਰੀਆ ਦਾ ਕੋਸਪੀ (KOSPI) ਸੂਚਕਾਂਕ 7 ਫ਼ੀਸਦੀ ਤੋਂ ਵੱਧ ਗਿਰ ਗਿਆ ਅਤੇ ਜਾਪਾਨ ਦਾ ਨਿੱਕੇਈ 225 (Nikkei 225) ਸੂਚਕਾਂਕ 6.5 ਫ਼ੀਸਦੀ ਹੇਠਾਂ ਆ ਗਿਆ। ਚੀਨ ਦਾ ਸ਼ੰਘਾਈ ਐੱਸ.ਐੱਸ.ਈ. ਕੰਪੋਜ਼ਿਟ ਅਤੇ ਹਾਂਗਕਾਂਗ ਦਾ ਹੈਂਗ ਸੇਂਗ ਸੂਚਕ ਅੰਕ ਵੀ ਹੇਠਲੇ ਪੱਧਰ 'ਤੇ ਕਾਰੋਬਾਰ ਕਰ ਰਹੇ ਸਨ।

3) ਲਗਾਤਾਰ ਵਿਦੇਸ਼ੀ ਸੰਸਥਾਗਤ ਨਿਵੇਸ਼ਕਾਂ ਦੀ ਨਿਕਾਸੀ: ਵਿਦੇਸ਼ੀ ਸੰਸਥਾਗਤ ਨਿਵੇਸ਼ਕਾਂ (FIIs) ਨੇ ਸ਼ੁੱਕਰਵਾਰ ਨੂੰ 6,030.38 ਕਰੋੜ ਰੁਪਏ ਦੇ ਸ਼ੇਅਰ ਵੇਚ ਕੇ ਆਪਣੀ ਵਿਕਰੀ ਜਾਰੀ ਰੱਖੀ।

4) ਕਮਜ਼ੋਰ ਰੁਪਿਆ: ਕੱਚੇ ਤੇਲ ਦੀਆਂ ਕੀਮਤਾਂ ਵਿੱਚ ਉਛਾਲ ਅਤੇ ਅਮਰੀਕੀ ਮੁਦਰਾ ਦੇ ਮਜ਼ਬੂਤ ਹੋਣ ਦੇ ਵਿਚਕਾਰ, ਰੁਪਿਆ ਸੋਮਵਾਰ ਨੂੰ ਸ਼ੁਰੂਆਤੀ ਕਾਰੋਬਾਰ ਵਿੱਚ ਅਮਰੀਕੀ ਡਾਲਰ ਦੇ ਮੁਕਾਬਲੇ 46 ਪੈਸੇ ਗਿਰ ਕੇ 92.28 'ਤੇ ਆ ਗਿਆ, ਜੋ ਸਰਵਕਾਲੀ ਹੇਠਲਾ ਪੱਧਰ (All-time low) ਹੈ।