ਪਿਓ-ਪੁੱਤ ਦੇ ਵਿਵਾਦ ਨੇ ਬਦਲੀ ਜ਼ਿੰਦਗੀ ਦੀ ਕਹਾਣੀ: 12 ਹਜ਼ਾਰ ਕਰੋੜ ਦੇ ਮਾਲਕ ਸਿੰਘਾਨੀਆ ਦਾ 'ਅਰਸ਼ ਤੋਂ ਫਰਸ਼' ਤੱਕ ਦਾ ਦਰਦਨਾਕ ਸਫਰ

ਨਵੀਂ ਦਿੱਲੀ: ਰੇਮੰਡ ਗਰੁੱਪ ਦੇ ਸਾਬਕਾ ਚੇਅਰਮੈਨ ਵਿਜੇਪਤ ਸਿੰਘਾਨੀਆ ਦਾ ਕੱਲ੍ਹ ਮੁੰਬਈ ਵਿੱਚ 87 ਸਾਲ ਦੀ ਉਮਰ ਵਿੱਚ ਦੇਹਾਂਤ ਹੋ ਗਿਆ। ਉਹ 1980 ਤੋਂ ਸਾਲ 2000 ਤੱਕ ਰੇਮੰਡ ਗਰੁੱਪ ਦੇ ਚੇਅਰਮੈਨ ਰਹੇ। ਇਸ ਤੋਂ ਬਾਅਦ ਉਨ੍ਹਾਂ ਨੇ ਰੇਮੰਡ ਦੀ ਕਮਾਨ ਆਪਣੇ ਬੇਟੇ ਗੌਤਮ ਸਿੰਘਾਨੀਆ ਨੂੰ ਸੌਂਪ ਦਿੱਤੀ। ਪਰ ਕਈ ਕਾਰਨਾਂ ਕਰਕੇ ਪਿਤਾ ਅਤੇ ਪੁੱਤਰ ਵਿਚਕਾਰ ਵਿਵਾਦ ਰਿਹਾ। ਵਿਵਾਦ ਇੰਨਾ ਵਧਿਆ ਕਿ ਵਿਜੇਪਤ ਨੇ ਗੌਤਮ 'ਤੇ ਪਰਿਵਾਰਕ ਘਰ 'JK House' ਵਿੱਚ ਜਗ੍ਹਾ ਨਾ ਦੇਣ ਤੱਕ ਦਾ ਦੋਸ਼ ਲਗਾਇਆ ਅਤੇ ਉਨ੍ਹਾਂ ਨੂੰ ਮਜਬੂਰੀ ਵਿੱਚ ਕਿਰਾਏ ਦੇ ਮਕਾਨ ਵਿੱਚ ਰਹਿਣਾ ਪਿਆ।

ਸਭ ਤੋਂ ਅਮੀਰ ਉਦਯੋਗਪਤੀਆਂ ਵਿੱਚੋਂ ਇੱਕ

ਆਪਣੇ ਕਰੀਅਰ ਦੇ ਸਿਖਰ 'ਤੇ, ਵਿਜੇਪਤ ਸਿੰਘਾਨੀਆ ਭਾਰਤ ਦੇ ਸਭ ਤੋਂ ਅਮੀਰ ਉਦਯੋਗਪਤੀਆਂ ਵਿੱਚੋਂ ਇੱਕ ਸਨ। ਸਾਲ 2012 ਦੇ ਆਲੇ-ਦੁਆਲੇ, ਉਨ੍ਹਾਂ ਦੀ ਕੁੱਲ ਦੌਲਤ ਲਗਭਗ 1.4 ਬਿਲੀਅਨ ਡਾਲਰ ਮੰਨੀ ਗਈ ਸੀ। ਇਹ ਜਾਇਦਾਦ ਰੇਮੰਡ ਅਤੇ ਰੀਅਲ ਐਸਟੇਟ ਦੇ ਨਾਲ-ਨਾਲ ਹੋਰ ਨਿਵੇਸ਼ਾਂ ਕਾਰਨ ਬਣੀ ਸੀ।

2015 ਤੋਂ ਬਦਲੇ ਹਾਲਾਤ

2015 ਵਿੱਚ ਹਾਲਾਤ ਬਦਲਣ ਲੱਗੇ, ਅਤੇ ਉਸ ਸਾਲ ਨੇ ਉਨ੍ਹਾਂ ਦੀ ਜ਼ਿੰਦਗੀ ਦੀ ਦਿਸ਼ਾ ਹੀ ਬਦਲ ਦਿੱਤੀ। ਸਭ ਤੋਂ ਪਹਿਲਾਂ, ਉਨ੍ਹਾਂ ਦੀ ਪਤਨੀ ਮਾਧੁਰੀ ਨਾਲ ਉਨ੍ਹਾਂ ਦਾ ਤਲਾਕ ਹੋਇਆ, ਜਿਸ ਦੇ ਨਿਪਟਾਰੇ ਵਜੋਂ ਉਨ੍ਹਾਂ ਨੂੰ ਲਗਪਗ 400 ਮਿਲੀਅਨ ਡਾਲਰ (3794 ਕਰੋੜ ਰੁਪਏ) ਦੇਣੇ ਪਏ।

ਇਸ ਤੋਂ ਬਾਅਦ, ਉਨ੍ਹਾਂ ਨੇ ਰੇਮੰਡ ਵਿੱਚ ਆਪਣੇ 37 ਫੀਸਦੀ ਸ਼ੇਅਰ (ਜਿਨ੍ਹਾਂ ਦੀ ਕੀਮਤ 1,000 ਕਰੋੜ ਰੁਪਏ ਤੋਂ ਵੀ ਜ਼ਿਆਦਾ ਸੀ) ਆਪਣੇ ਬੇਟੇ ਗੌਤਮ ਦੇ ਨਾਮ ਕਰ ਦਿੱਤੇ। ਇਸ ਕਦਮ ਨਾਲ ਕੰਪਨੀ ਦਾ ਪੂਰਾ ਕੰਟਰੋਲ ਉਨ੍ਹਾਂ ਦੇ ਬੇਟੇ ਦੇ ਹੱਥਾਂ ਵਿੱਚ ਚਲਾ ਗਿਆ। ਉਸ ਸਮੇਂ, ਇਹ ਸਭ ਕੁਝ ਇੱਕ ਫੈਮਿਲੀ ਬਿਜ਼ਨਸ ਟ੍ਰਾਂਸਿਸ਼ਨ ਵਰਗਾ ਲੱਗ ਰਿਹਾ ਸੀ। ਪਰ ਸਮਾਂ ਬੀਤਣ ਦੇ ਨਾਲ, ਇਸ ਫੈਸਲੇ ਦਾ ਨਤੀਜਾ ਕੁਝ ਅਜਿਹਾ ਨਿਕਲਿਆ ਜਿਸਦੀ ਉਨ੍ਹਾਂ ਨੇ ਕਦੇ ਕਲਪਨਾ ਵੀ ਨਹੀਂ ਸੀ ਕੀਤੀ।

ਕਿਰਾਏ ਦੇ ਮਕਾਨ ਵਿੱਚ ਰਹੇ

ਜੀਵਨ ਦੇ ਆਖ਼ਰੀ ਸਾਲਾਂ ਵਿੱਚ ਦੇਖਿਆ ਗਿਆ ਕਿ ਵਿਜੇਪਤ ਦੇ ਲਾਈਫਸਟਾਈਲ ਵਿੱਚ ਇੱਕ ਵੱਡੀ ਤਬਦੀਲੀ ਆਈ। ਰਿਪੋਰਟਾਂ ਅਨੁਸਾਰ, ਜਿੱਥੇ ਇੱਕ ਪਾਸੇ ਉਨ੍ਹਾਂ ਕੋਲ ਲਗਭਗ 12,000 ਕਰੋੜ ਰੁਪਏ ਦੀ ਜਾਇਦਾਦ ਮੌਜੂਦ ਸੀ, ਉੱਥੇ ਹੀ ਦੂਜੇ ਪਾਸੇ ਉਹ ਹੁਣ ਪਰਿਵਾਰ ਦੇ ਆਲੀਸ਼ਾਨ ਘਰ ਵਿੱਚ ਨਹੀਂ ਰਹਿ ਰਹੇ ਸਨ। ਇਸ ਦੀ ਬਜਾਏ, ਉਨ੍ਹਾਂ ਨੇ ਆਪਣੇ ਜੀਵਨ ਦੇ ਅੰਤਿਮ ਸਾਲ ਇੱਕ ਕਿਰਾਏ ਦੇ ਮਕਾਨ ਵਿੱਚ ਬਿਤਾਏ।

ਸ਼ੇਅਰਾਂ ਦਾ ਟ੍ਰਾਂਸਫਰ ਕਿਉਂ ਹੋਇਆ?

2015 ਵਿੱਚ ਸ਼ੇਅਰ ਟ੍ਰਾਂਸਫਰ ਤੋਂ ਬਾਅਦ ਵਿਜੇਪਤ ਸਿੰਘਾਨੀਆ ਅਤੇ ਗੌਤਮ ਸਿੰਘਾਨੀਆ ਦੇ ਰਿਸ਼ਤੇ ਚੰਗੇ ਨਹੀਂ ਰਹੇ। ਬਾਅਦ ਵਿੱਚ ਵਿਜੇਪਤ ਨੇ ਕਿਹਾ ਕਿ ਸ਼ੇਅਰਾਂ ਦਾ ਟ੍ਰਾਂਸਫਰ ਪੂਰੀ ਤਰ੍ਹਾਂ ਉਨ੍ਹਾਂ ਦੀ ਮਰਜ਼ੀ ਨਾਲ ਨਹੀਂ ਹੋਇਆ ਸੀ। ਉਨ੍ਹਾਂ ਦਾ ਮੰਨਣਾ ਸੀ ਕਿ ਇਹ ਭਾਵਨਾਤਮਕ ਦਬਾਅ ਹੇਠ ਹੋਇਆ ਸੀ। ਸਥਿਤੀ ਉਦੋਂ ਹੋਰ ਗੰਭੀਰ ਹੋ ਗਈ ਜਦੋਂ ਉਨ੍ਹਾਂ ਨੇ ਮੁੰਬਈ ਵਿੱਚ ਪਰਿਵਾਰ ਦੇ ਮਸ਼ਹੂਰ ਘਰ, JK ਹਾਊਸ ਵਿੱਚ ਇੱਕ ਡੁਪਲੈਕਸ ਅਪਾਰਟਮੈਂਟ ਦੇਣ ਦੇ ਵਾਅਦੇ ਨੂੰ ਲੈ ਕੇ ਚਿੰਤਾ ਜਤਾਈ। ਵਿਜੇਪਤ ਨੇ ਦਾਅਵਾ ਕੀਤਾ ਕਿ ਉਹ ਘਰ ਵਿੱਚ ਦਾਖਲ ਨਹੀਂ ਹੋ ਸਕਦੇ ਕਿਉਂਕਿ ਉਨ੍ਹਾਂ ਲਈ ਘਰ ਵਿੱਚ ਜਾਣਾ ਮਨ੍ਹਾ ਹੈ।

ਜਾਰੀ ਰਿਹਾ ਵਿਵਾਦ

ਮਾਰਚ 2024 ਵਿੱਚ ਇਕੱਠੇ ਖਿੱਚੀ ਗਈ ਇੱਕ ਤਸਵੀਰ ਨਾਲ ਅਟਕਲਾਂ ਲੱਗੀਆਂ ਕਿ ਗੌਤਮ ਅਤੇ ਉਨ੍ਹਾਂ ਦੇ ਪਿਤਾ ਵਿਜੇਪਤ ਸਿੰਘਾਨੀਆ ਦੇ ਵਿਚਕਾਰ ਲੰਬੇ ਸਮੇਂ ਤੋਂ ਚੱਲ ਰਿਹਾ ਵਿਵਾਦ ਸੁਲਝ ਗਿਆ ਹੈ। ਪਰ ਵਿਜੇਪਤ ਨੇ ਕਿਹਾ ਕਿ ਇਹ ਮੁਲਾਕਾਤ ਸੁਲ੍ਹਾ ਲਈ ਨਹੀਂ ਸੀ। ਉਨ੍ਹਾਂ ਕਿਹਾ ਸੀ ਕਿ ਜਾਇਦਾਦ ਅਤੇ ਸ਼ੇਅਰਾਂ ਨੂੰ ਲੈ ਕੇ ਵਿਵਾਦ ਅਜੇ ਵੀ ਜਾਰੀ ਹੈ।

ਕਾਨਪੁਰ ਵਿੱਚ ਹੋਇਆ ਸੀ ਜਨਮ

ਵਿਜੇਪਤ ਸਿੰਘਾਨੀਆ ਦਾ ਜਨਮ 4 ਅਕਤੂਬਰ, 1938 ਨੂੰ ਕਾਨਪੁਰ ਵਿੱਚ ਹੋਇਆ ਸੀ। ਉਹ JK ਗਰੁੱਪ ਪਰਿਵਾਰ ਨਾਲ ਸਬੰਧ ਰੱਖਦੇ ਸਨ। ਉਨ੍ਹਾਂ ਨੇ ਬਹੁਤ ਛੋਟੀ ਉਮਰ ਵਿੱਚ ਹੀ ਆਪਣੇ ਕਰੀਅਰ ਦੀ ਸ਼ੁਰੂਆਤ ਕਰ ਦਿੱਤੀ ਸੀ। ਉਨ੍ਹਾਂ ਦੇ ਕਾਰੋਬਾਰੀ ਗਿਆਨ ਦਾ ਵਿਕਾਸ ਮੁੰਬਈ ਦੇ ਸਿਡੇਨਹਮ ਕਾਲਜ ਵਿੱਚ ਪੜ੍ਹਾਈ ਦੌਰਾਨ ਹੋਇਆ। ਆਪਣੀ ਸਕੂਲੀ ਸਿੱਖਿਆ ਪੂਰੀ ਕਰਨ ਤੋਂ ਬਾਅਦ, ਉਨ੍ਹਾਂ ਨੇ ਆਪਣੇ ਪਰਿਵਾਰਕ ਬਿਜ਼ਨਸ ਵਿੱਚ ਕੰਮ ਕੀਤਾ, ਜਿੱਥੇ ਉਹ ਹੌਲੀ-ਹੌਲੀ ਕਾਮਯਾਬੀ ਦੀਆਂ ਪੌੜੀਆਂ ਚੜ੍ਹਦੇ ਰਹੇ।