ਇਸ ਬੈਂਕ ਨੇ ਕਰ ਦਿੱਤੀ ਛਾਂਟੀ, 2500 ਮੁਲਾਜ਼ਮਾਂ ਦੀ ਇੱਕ ਝਟਕੇ 'ਚ ਗਈ ਨੌਕਰੀ; ਵਜ੍ਹਾ AI ਜਾਂ ਕੁਝ ਹੋਰ?
ਦਿਲਚਸਪ ਗੱਲ ਇਹ ਹੈ ਕਿ ਇਹ ਛਾਂਟੀ ਅਜਿਹੇ ਸਮੇਂ ਹੋਈ ਹੈ ਜਦੋਂ ਕੰਪਨੀ ਨੇ 2025 ਵਿੱਚ ਰਿਕਾਰਡ 70.6 ਅਰਬ ਡਾਲਰ ਦੀ ਸਾਲਾਨਾ ਆਮਦਨ ਦਰਜ ਕੀਤੀ ਹੈ। 31 ਦਸੰਬਰ 2025 ਤੱਕ ਕੰਪਨੀ ਦੇ 40 ਤੋਂ ਵੱਧ ਦੇਸ਼ਾਂ ਵਿੱਚ ਕੁੱਲ 82,992 ਕਰਮਚਾਰੀ ਕੰਮ ਕਰ ਰਹੇ ਸਨ।
Posted By Sandip Kaur
Publish Date: Thu, 05 Mar 2026 02:16 PM (IST)
Updated Date: Thu, 05 Mar 2026 02:20 PM (IST)
ਆਈ.ਏ.ਐਨ.ਐਸ., ਨਵੀਂ ਦਿੱਲੀ: ਅਮਰੀਕਾ ਦੀ ਪ੍ਰਮੁੱਖ ਨਿਵੇਸ਼ ਬੈਂਕਿੰਗ ਕੰਪਨੀ ਮੋਰਗਨ ਸਟੈਨਲੇ ਨੇ ਆਪਣੇ ਗਲੋਬਲ ਕਰਮਚਾਰੀਆਂ ਵਿੱਚੋਂ ਕਰੀਬ 2,500 ਲੋਕਾਂ ਦੀ ਛਾਂਟੀ ਕੀਤੀ ਹੈ। ਇਹ ਸੰਖਿਆ ਕੰਪਨੀ ਦੇ ਕੁੱਲ ਕਰਮਚਾਰੀਆਂ ਦਾ ਲਗਪਗ 3 ਫੀਸਦੀ ਦੱਸੀ ਜਾ ਰਹੀ ਹੈ। ਮੀਡੀਆ ਰਿਪੋਰਟਾਂ ਅਨੁਸਾਰ, ਇਹ ਛਾਂਟੀ ਮਾਰਚ ਦੀ ਸ਼ੁਰੂਆਤ ਤੋਂ ਸ਼ੁਰੂ ਹੋਈ ਹੈ। ਇਹ ਛਾਂਟੀ ਆਰਟੀਫੀਸ਼ੀਅਲ ਇੰਟੈਲੀਜੈਂਸ (AI) ਨਾਲ ਜੁੜੀ ਕਿਸੇ ਪ੍ਰਕਿਰਿਆ ਕਾਰਨ ਨਹੀਂ ਕੀਤੀ ਗਈ, ਸਗੋਂ ਇਸ ਦੇ ਪਿੱਛੇ ਕੰਪਨੀ ਦੀਆਂ ਬਦਲਦੀਆਂ ਕਾਰੋਬਾਰੀ ਤਰਜੀਹਾਂ, ਗਲੋਬਲ ਪੱਧਰ 'ਤੇ ਨਵੀਂ ਲੋਕੇਸ਼ਨ ਰਣਨੀਤੀ ਅਤੇ ਕਰਮਚਾਰੀਆਂ ਦੇ ਪ੍ਰਦਰਸ਼ਨ ਦੀ ਸਮੀਖਿਆ ਵਰਗੇ ਕਾਰਨ ਦੱਸੇ ਜਾ ਰਹੇ ਹਨ।
ਕਿਹੜੇ ਡਿਵੀਜ਼ਨਾਂ ਵਿੱਚ ਕੀਤੀ ਗਈ ਛਾਂਟੀ?
ਮੀਡੀਆ ਰਿਪੋਰਟਾਂ ਵਿੱਚ ਕਿਹਾ ਗਿਆ ਹੈ ਕਿ ਇਹ ਛਾਂਟੀ ਬੈਂਕ ਦੇ ਤਿੰਨ ਵੱਡੇ ਡਿਵੀਜ਼ਨਾਂ- ਇੰਸਟੀਚਿਊਸ਼ਨਲ ਸਕਿਓਰਿਟੀਜ਼, ਵੈਲਥ ਮੈਨੇਜਮੈਂਟ ਅਤੇ ਇਨਵੈਸਟਮੈਂਟ ਮੈਨੇਜਮੈਂਟ ਵਿੱਚ ਕੀਤੀ ਗਈ ਹੈ। ਇਸ ਨਾਲ ਫਰੰਟ-ਆਫਿਸ, ਮਾਲੀਏ ਨਾਲ ਜੁੜੇ ਅਹੁਦਿਆਂ ਅਤੇ ਬੈਕ-ਆਫਿਸ ਭੂਮਿਕਾਵਾਂ 'ਤੇ ਅਸਰ ਪਿਆ ਹੈ, ਹਾਲਾਂਕਿ ਵਿੱਤੀ ਸਲਾਹਕਾਰਾਂ ਨੂੰ ਇਸ ਫੈਸਲੇ ਤੋਂ ਬਾਹਰ ਰੱਖਿਆ ਗਿਆ ਹੈ। ਫਿਲਹਾਲ ਮੋਰਗਨ ਸਟੈਨਲੇ ਨੇ ਇਸ ਰਿਪੋਰਟ 'ਤੇ ਅਧਿਕਾਰਤ ਤੌਰ 'ਤੇ ਕੋਈ ਟਿੱਪਣੀ ਨਹੀਂ ਕੀਤੀ ਹੈ।
ਬੈਂਕ ਵਿੱਚ ਕੁੱਲ 82,992 ਕਰਮਚਾਰੀ
ਦਿਲਚਸਪ ਗੱਲ ਇਹ ਹੈ ਕਿ ਇਹ ਛਾਂਟੀ ਅਜਿਹੇ ਸਮੇਂ ਹੋਈ ਹੈ ਜਦੋਂ ਕੰਪਨੀ ਨੇ 2025 ਵਿੱਚ ਰਿਕਾਰਡ 70.6 ਅਰਬ ਡਾਲਰ ਦੀ ਸਾਲਾਨਾ ਆਮਦਨ ਦਰਜ ਕੀਤੀ ਹੈ। 31 ਦਸੰਬਰ 2025 ਤੱਕ ਕੰਪਨੀ ਦੇ 40 ਤੋਂ ਵੱਧ ਦੇਸ਼ਾਂ ਵਿੱਚ ਕੁੱਲ 82,992 ਕਰਮਚਾਰੀ ਕੰਮ ਕਰ ਰਹੇ ਸਨ। ਹਾਲ ਹੀ ਵਿੱਚ ਜਾਰੀ ਆਪਣੀ ਇੱਕ ਰਿਪੋਰਟ ਵਿੱਚ ਮੋਰਗਨ ਸਟੈਨਲੇ ਨੇ ਕਿਹਾ ਸੀ ਕਿ ਨੌਕਰੀਆਂ 'ਤੇ AI ਦਾ ਲੰਬੇ ਸਮੇਂ ਦਾ ਅਸਰ ਉਨਾ ਗੰਭੀਰ ਨਹੀਂ ਹੋ ਸਕਦਾ ਜਿੰਨਾ ਲੋਕ ਮੰਨ ਰਹੇ ਹਨ। ਕੰਪਨੀ ਅਨੁਸਾਰ ਕੁਝ ਨੌਕਰੀਆਂ ਜ਼ਰੂਰ ਆਟੋਮੇਟ ਹੋਣਗੀਆਂ, ਪਰ ਜ਼ਿਆਦਾਤਰ ਕਰਮਚਾਰੀ ਪੂਰੀ ਤਰ੍ਹਾਂ ਬੇਰੁਜ਼ਗਾਰ ਨਹੀਂ ਹੋਣਗੇ।
AI ਬਦਲੇਗਾ ਕੰਮ ਕਰਨ ਦਾ ਤਰੀਕਾ
ਬੈਂਕ ਦਾ ਮੰਨਣਾ ਹੈ ਕਿ AI ਕੰਮ ਕਰਨ ਦੇ ਤਰੀਕੇ ਨੂੰ ਬਦਲੇਗਾ, ਪਰ ਨੌਕਰੀਆਂ ਨੂੰ ਪੂਰੀ ਤਰ੍ਹਾਂ ਖ਼ਤਮ ਨਹੀਂ ਕਰੇਗਾ। ਇਸੇ ਦੌਰਾਨ, ਜੈਕ ਡੋਰਸੀ ਦੁਆਰਾ ਸਥਾਪਿਤ ਪੇਮੈਂਟ ਕੰਪਨੀ 'ਬਲਾਕ' ਨੇ ਵੀ ਹਾਲ ਹੀ ਵਿੱਚ AI ਨਾਲ ਜੁੜੇ ਬਦਲਾਅ ਕਾਰਨ ਆਪਣੇ ਕਰਮਚਾਰੀਆਂ ਦੀ ਗਿਣਤੀ ਲਗਭਗ ਅੱਧੀ ਕਰਨ ਦਾ ਐਲਾਨ ਕੀਤਾ ਹੈ। ਕੰਪਨੀ ਆਪਣੇ ਕਰਮਚਾਰੀਆਂ ਦੀ ਗਿਣਤੀ 10,000 ਤੋਂ ਘਟਾ ਕੇ ਕਰੀਬ 6,000 ਕਰਨ ਦੀ ਯੋਜਨਾ ਬਣਾ ਰਹੀ ਹੈ।
ਟੈਕ ਇੰਡਸਟਰੀ ਦੇ ਕਈ ਮਾਹਿਰਾਂ ਦਾ ਮੰਨਣਾ ਹੈ ਕਿ ਕੰਪਿਊਟਰ ਅਧਾਰਤ ਜ਼ਿਆਦਾਤਰ 'ਵਾਈਟ-ਕਾਲਰ' ਨੌਕਰੀਆਂ ਅਗਲੇ 12 ਤੋਂ 18 ਮਹੀਨਿਆਂ ਵਿੱਚ ਆਟੋਮੇਸ਼ਨ ਵੱਲ ਵਧ ਸਕਦੀਆਂ ਹਨ। ਰਿਪੋਰਟਾਂ ਮੁਤਾਬਕ ਐਮਾਜ਼ੋਨ ਨੇ ਵੀ ਆਪਣੇ ਰੋਬੋਟਿਕਸ ਡਿਵੀਜ਼ਨ ਵਿੱਚ ਛਾਂਟੀ ਕੀਤੀ ਹੈ। ਇਸ ਤੋਂ ਪਹਿਲਾਂ ਜਨਵਰੀ ਵਿੱਚ ਕੰਪਨੀ ਨੇ ਕਰੀਬ 16,000 ਨੌਕਰੀਆਂ ਵਿੱਚ ਕਟੌਤੀ ਕੀਤੀ ਸੀ। ਉੱਥੇ ਹੀ, ਅਮਰੀਕੀ ਟੈਕ ਕੰਪਨੀ ਓਰੇਕਲ (Oracle) ਵੀ ਆਪਣੇ AI ਡੇਟਾ ਸੈਂਟਰ ਦੀ ਸਮਰੱਥਾ ਵਧਾਉਣ ਲਈ 20,000 ਤੋਂ 30,000 ਕਰਮਚਾਰੀਆਂ ਦੀ ਛਾਂਟੀ ਦੀ ਯੋਜਨਾ ਬਣਾ ਰਹੀ ਹੈ।