WhatsApp ਯੂਜ਼ਰਸ ਲਈ ਵੱਡੀ ਖੁਸ਼ਖਬਰੀ: ਬਿਨਾਂ ਨੰਬਰ ਸੇਵ ਕੀਤੇ ਤੇ ਬਿਨਾਂ ਅਕਾਊਂਟ ਦੇ ਹੋਵੇਗੀ ਗੱਲਬਾਤ, ਬਸ ਇੱਕ ਲਿੰਕ 'ਤੇ ਹੋਵੇਗਾ ਕੰਮ

ਟੈਕਨਾਲੋਜੀ ਡੈਸਕ, ਨਵੀਂ ਦਿੱਲੀ: ਮੈਸੇਜਿੰਗ ਐਪ ਵਟ੍ਹਸਐਪ ਇੱਕ ਨਵਾਂ ਅਤੇ ਦਿਲਚਸਪ ਫੀਚਰ ਰੋਲਆਊਟ ਕਰ ਰਿਹਾ ਹੈ, ਜਿਸ ਦਾ ਨਾਮ 'ਗੇਸਟ ਚੈਟਸ' (Guest Chats) ਹੈ। ਇਸ ਫੀਚਰ ਦੀ ਮਦਦ ਨਾਲ ਹੁਣ ਯੂਜ਼ਰਸ ਉਨ੍ਹਾਂ ਲੋਕਾਂ ਨੂੰ ਵੀ ਮੈਸੇਜ ਭੇਜ ਸਕਣਗੇ ਜਿਨ੍ਹਾਂ ਕੋਲ ਵਟ੍ਹਸਐਪ ਅਕਾਊਂਟ ਨਹੀਂ ਹੈ। ਯਾਨੀ ਸਾਹਮਣੇ ਵਾਲੇ ਵਿਅਕਤੀ ਨੂੰ ਐਪ ਡਾਊਨਲੋਡ ਕਰਨ ਜਾਂ ਅਕਾਊਂਟ ਬਣਾਉਣ ਦੀ ਲੋੜ ਨਹੀਂ ਪਵੇਗੀ।

WABetaInfo ਦੀ ਰਿਪੋਰਟ ਮੁਤਾਬਕ, ਇਹ ਫੀਚਰ ਫਿਲਹਾਲ ਕੁਝ ਐਂਡਰਾਇਡ ਅਤੇ iOS ਬੀਟਾ ਯੂਜ਼ਰਸ ਲਈ ਉਪਲਬਧ ਹੈ। ਗੇਸਟ ਚੈਟਸ ਰਾਹੀਂ ਯੂਜ਼ਰਸ ਇੱਕ ਖ਼ਾਸ ਲਿੰਕ ਜਨਰੇਟ ਕਰ ਸਕਦੇ ਹਨ, ਜਿਸ ਨੂੰ ਕਿਸੇ ਵੀ ਵਿਅਕਤੀ ਨਾਲ ਸ਼ੇਅਰ ਕੀਤਾ ਜਾ ਸਕਦਾ ਹੈ। ਜਿਵੇਂ ਹੀ ਉਹ ਵਿਅਕਤੀ ਲਿੰਕ 'ਤੇ ਕਲਿੱਕ ਕਰਦਾ ਹੈ, ਉਹ ਸਿੱਧਾ ਚੈਟ ਵਿੱਚ ਜੁੜ ਜਾਂਦਾ ਹੈ ਅਤੇ ਮੈਸੇਜ ਭੇਜ ਤੇ ਪ੍ਰਾਪਤ ਕਰ ਸਕਦਾ ਹੈ।

ਸੁਰੱਖਿਆ ਅਤੇ ਨਿੱਜਤਾ (Privacy)

ਇਸ ਫੀਚਰ ਦੀ ਖ਼ਾਸ ਗੱਲ ਇਹ ਹੈ ਕਿ ਇਸ ਵਿੱਚ ਵੀ ਐਂਡ-ਟੂ-ਐਂਡ ਐਨਕ੍ਰਿਪਸ਼ਨ ਮਿਲੇਗੀ, ਜਿਸ ਨਾਲ ਚੈਟ ਸੁਰੱਖਿਅਤ ਰਹੇਗੀ। ਹਰ ਗੇਸਟ ਯੂਜ਼ਰ ਲਈ ਇੱਕ 'ਯੂਨੀਕ ਆਈਡੀ' ਬਣਾਈ ਜਾਂਦੀ ਹੈ, ਜਿਸ ਰਾਹੀਂ ਐਨਕ੍ਰਿਪਸ਼ਨ ਕੀਤੀ ਜਾਂਦੀ ਹੈ। ਇਸ ਨਾਲ ਯੂਜ਼ਰ ਦੀ ਪ੍ਰਾਈਵੇਸੀ ਬਣੀ ਰਹਿੰਦੀ ਹੈ।

ਕੁਝ ਸੀਮਾਵਾਂ (Limitations)

ਹਾਲਾਂਕਿ, ਗੇਸਟ ਚੈਟਸ ਵਿੱਚ ਕੁਝ ਪਾਬੰਦੀਆਂ ਵੀ ਹਨ:

ਇਸ ਵਿੱਚ ਗਰੁੱਪ ਚੈਟ, ਫੋਟੋ-ਵੀਡੀਓ ਸ਼ੇਅਰਿੰਗ, ਡੌਕੂਮੈਂਟ, GIF, ਸਟਿੱਕਰ ਅਤੇ ਵੌਇਸ ਮੈਸੇਜ ਵਰਗੀਆਂ ਸਹੂਲਤਾਂ ਨਹੀਂ ਮਿਲਣਗੀਆਂ।

ਇਸ ਤੋਂ ਇਲਾਵਾ ਵੌਇਸ ਅਤੇ ਵੀਡੀਓ ਕਾਲਿੰਗ ਦਾ ਆਪਸ਼ਨ ਵੀ ਉਪਲਬਧ ਨਹੀਂ ਹੋਵੇਗਾ।

ਇਹ ਫੀਚਰ ਸਿਰਫ਼ ਬੇਸਿਕ ਟੈਕਸਟ ਮੈਸੇਜਿੰਗ ਲਈ ਬਣਾਇਆ ਗਿਆ ਹੈ।

ਲਿੰਕ ਅਤੇ ਐਕਸਪਾਇਰੀ

ਯੂਜ਼ਰਸ ਇਸ ਲਿੰਕ ਨੂੰ SMS, ਈਮੇਲ ਜਾਂ ਕਿਸੇ ਦੂਜੇ ਐਪ ਰਾਹੀਂ ਸ਼ੇਅਰ ਕਰ ਸਕਦੇ ਹਨ। ਨਾਲ ਹੀ, ਜੇਕਰ ਲੋੜ ਪਵੇ ਤਾਂ ਗੇਸਟ ਯੂਜ਼ਰ ਨੂੰ ਬਲੌਕ ਵੀ ਕੀਤਾ ਜਾ ਸਕਦਾ ਹੈ। ਇੱਕ ਹੋਰ ਅਹਿਮ ਗੱਲ ਇਹ ਹੈ ਕਿ ਇਹ ਚੈਟ ਹਮੇਸ਼ਾ ਲਈ ਨਹੀਂ ਰਹਿੰਦੀ; ਜੇਕਰ 10 ਦਿਨਾਂ ਤੱਕ ਕੋਈ ਐਕਟੀਵਿਟੀ ਨਹੀਂ ਹੁੰਦੀ, ਤਾਂ ਚੈਟ ਆਪਣੇ ਆਪ ਖ਼ਤਮ (Expire) ਹੋ ਜਾਂਦੀ ਹੈ ਅਤੇ ਫਿਰ ਨਵਾਂ ਲਿੰਕ ਬਣਾਉਣਾ ਪੈਂਦਾ ਹੈ।

ਇਹ ਕਹਿਣਾ ਗਲਤ ਨਹੀਂ ਹੋਵੇਗਾ ਕਿ ਵਟਸਐਪ ਦਾ ਇਹ ਨਵਾਂ ਫੀਚਰ ਉਨ੍ਹਾਂ ਲੋਕਾਂ ਲਈ ਕਾਫੀ ਕੰਮ ਦਾ ਸਾਬਤ ਹੋ ਸਕਦਾ ਹੈ ਜੋ ਬਿਨਾਂ ਐਪ ਇੰਸਟਾਲ ਕੀਤੇ ਜਲਦੀ ਨਾਲ ਕਿਸੇ ਨਾਲ ਗੱਲ ਕਰਨਾ ਚਾਹੁੰਦੇ ਹਨ।