ਪਿੰਡ ਮਾਲੂਵਾਲ ਦੇ ਛੱਪੜ ’ਚੋਂ ਰੇਤ ਦੀ ਨਾਜਾਇਜ਼ ਮਾਈਨਿੰਗ ਦਾ ਪਿੰਡ ਵਾਸੀਆਂ ਲਗਾਇਆ ਦੋਸ਼

ਤੇਜਿੰਦਰ ਸਿੰਘ ਬੱਬੂ,•ਪੰਜਾਬੀ ਜਾਗਰਣ, ਝਬਾਲ : ਬਲਾਕ ਤਰਨਤਾਰਨ ਅਧੀਨ ਆਉਂਦੇ ਪਿੰਡ ਮਾਲੂਵਾਲ ਵਿਖੇ ਮੰਗਲਵਾਰ ਨੂੰ ਪਿੰਡ ਵਾਸੀਆਂ ਨੇ ਪਿੰਡ ਦੇ ਛੱਪੜ ਵਿੱਚੋਂ ਨਾਜਾਇਜ਼ ਮਾਈਨਿੰਗ ਕੀਤੇ ਜਾਣ ਦਾ ਮਾਮਲਾ ਚੁੱਕਿਆ ਹੈ। ਪਿੰਡ ਵਾਸੀ ਗੁਰਬਾਜ਼ ਸਿੰਘ, ਅੰਗਰੇਜ਼ ਸਿੰਘ, ਇਕਬਾਲ ਸਿੰਘ, ਮਨਜਿੰਦਰ ਸਿੰਘ, ਵਿਰਸਾ ਸਿੰਘ, ਸੰਪੂਰਨ ਸਿੰਘ, ਮੰਗਲ ਸਿੰਘ, ਵੀਰ ਸਿੰਘ, ਅੰਗਰੇਜ਼ ਸਿੰਘ, ਖੁਸ਼ਵੰਤ ਸਿੰਘ ਮੱਲ੍ਹੀ ਆਦਿ ਨੇ ਇਸ ਸਬੰਧੀ ਦੋਸ਼ ਲਗਾਇਆ ਕਿ ਪਿੰਡ ਦੇ ਛੱਪੜ ਨੂੰ ਸਾਫ਼ ਕਰਨ ਦੇ ਨਾਂ ’ਤੇ ਰੇਤ ਦੀ ਮਾਈਨਿੰਗ ਕੀਤੀ ਜਾ ਰਹੀ ਹੈ। ਉਨ੍ਹਾਂ ਨੇ ਕਥਿਤ ਤੌਰ ’ਤੇ ਹੋ ਰਹੀ ਨਾਜਾਇਜ਼ ਮਾਈਨਿੰਗ ਦਿਖਾਉਂਦਿਆਂ ਕਿਹਾ ਕਿ ਪੰਚਾਇਤ ਵੱਲੋਂ ਪੰਚਾਇਤੀ ਛੱਪੜ ’ਚੋਂ ਰੇਤਾ ਕੱਢ ਕੇ ਇੱਟਾਂ ਦੇ ਭੱਠੇ ਅਤੇ ਪਿੰਡ ਦੇ ਕੁਝ ਲੋਕਾਂ ਨੂੰ ਵੇਚੀ ਜਾ ਰਹੀ ਹੈ। ਜਿਸ ਨਾਲ ਛੱਪੜ ਜ਼ਿਆਦਾ ਡੂੰਘਾ ਹੋ ਰਿਹਾ ਹੈ। ਜਿਸ ਵਿਚ ਪਾਣੀ ਭਰਨ ਨਾਲ ਬਰਸਾਤਾਂ ਦੇ ਦਿਨਾਂ ’ਚ ਜੇਕਰ ਕੋਈ ਇਨਸਾਨ ਜਾਂ ਪਸ਼ੂ ਡਿੱਗ ਪਿਆ ਤਾਂ ਉਸਦੇ ਡੁੱਬਣ ਦਾ ਖਦਸ਼ਾ ਹੈ। ਜਦੋਂਕਿ ਪਿੰਡ ਦਾ ਪੀਣ ਵਾਲਾ ਪਾਣੀ ਪ੍ਰਦੂਸ਼ਤ ਹੋਣ ਨਾਲ ਮਹਾਮਾਰੀ ਫੈਲਣ ਦਾ ਡਰ ਹੈ। ਪਿੰਡ ਵਾਸੀਆਂ ਨੇ ਮੌਕੇ ਨਜ਼ਦੀਕੀ ਭੱਠੇ ’ਤੇ ਰੇਤਾ ਵੇਚਣ ਗਈ ਟਰਾਲੀ ਫੜ੍ਹਨ ਤੋਂ ਇਲਾਵਾ ਭੱਠੇ ’ਤੇ ਛੱਪੜ ਵਿਚੋਂ ਰੇਤਾ ਲਿਜਾ ਕੇ ਲੱਗੇ ਢੇਰ ਵੀ ਦਿਖਾਏ। ਪਿੰਡ ਵਾਸੀਆਂ ਨੇ ਡਿਪਟੀ ਕਮਿਸ਼ਨਰ ਕੋਲੋਂ ਮੰਗ ਕੀਤੀ ਕਿ ਪਿੰਡ ਦੇ ਛੱਪੜ ਵਿਚੋਂ ਕੀਤੀ ਜਾ ਰਹੀ ਰੇਤ ਦੀ ਨਾਜਾਇਜ਼ ਮਾਈਨਿੰਗ ਬੰਦ ਕੀਤੀ ਜਾਵੇ। === ਪਿੰਡ ਦੀ ਸਾਂਝੀ ਜਗ੍ਹਾ ’ਤੇ ਵਰਤੀ ਜਾ ਰਹੀ ਹੈ ਰੇਤ - ਪੰਚਾਇਤ ਦੂਸਰੇ ਪਾਸੇ ਪਿੰਡ ਦੇ ਸਰਪੰਚ ਬੀਬੀ ਸਰਬਜੀਤ ਕੌਰ ਦੇ ਪਤੀ ਸਤਨਾਮ ਸਿੰਘ ਨੇ ਮੈਂਬਰ ਪੰਚਾਇਤ ਸੁਖਵਿੰਦਰ ਸਿੰਘ ਅਤੇ ਹਰਦੇਵ ਸਿੰਘ ਦੀ ਹਾਜ਼ਰੀ ਵਿਚ ਛੱਪੜ ਵਿੱਚੋਂ ਰੇਤਾ ਕੱਢ ਕੇ ਵੇਚਣ ਦੇ ਦੋਸ਼ਾਂ ਨੂੰ ਨਕਾਰਦਿਆਂ ਕਿਹਾ ਕਿ ਛੱਪੜ ਵਿੱਚੋਂ ਕੱਢੀ ਗਈ ਰੇਤ ਤੇ ਮਿੱਟੀ ਨੂੰ ਪੰਚਾਇਤ ਨੇ ਪਿੰਡ ਦੀ ਸਾਂਝੀ ਜਗ੍ਹਾ ’ਤੇ ਵਰਤਿਆ ਹੈ। ਜਦੋਂਕਿ ਛੱਪੜ ਵਿਚ ਖੁਦਾਈ ਕਰਨ ਲਈ ਲਿਆਂਦੀ ਗਈ ਜੇਸੀਬੀ ਦੇ ਡਰਾਈਵਰ ਨੂੰ ਚਾਰ-ਪੰਜ ਟਰਾਲੀਆਂ ਮੁਫ਼ਤ ਦਿੱਤੀਆਂ, ਜੋ ਉਸ ਦੇ ਭੱਠੇ ’ਤੇ ਖੜ੍ਹੀਆਂ ਹੋ ਸਕਦੀਆਂ ਹਨ। ਕਿਉਂਕਿ ਅਜੇ ਤੱਕ ਉਸ ਨੂੰ ਲੇਬਰ ਨਹੀਂ ਮਿਲੀ। === ਸਬੰਧਤ ਬੀਡੀਪੀਓ ਕੋਲੋਂ ਕਰਵਾਈ ਜਾਵੇਗੀ ਜਾਂਚ : ਡੀਡੀਪੀਓ ਇਸ ਸਬੰਧੀ ਜਦੋਂ ਜ਼ਿਲ੍ਹਾ ਵਿਕਾਸ ਤੇ ਪੰਚਾਇਤ ਅਫ਼ਸਰ ਪਿਆਰਾ ਸਿੰਘ ਨਾਲ ਗੱਲ ਕੀਤੀ ਤਾਂ ਉਨ੍ਹਾਂ ਕਿਹਾ ਕਿ ਇਹ ਮਾਮਲਾ ਉਨ੍ਹਾਂ ਦੇ ਧਿਆਨ ਵਿਚ ਆ ਗਿਆ ਹੈ ਅਤੇ ਉਹ ਬਲਾਕ ਤਰਨਤਾਰਨ ਦੇ ਬੀਡੀਪੀਓ ਨੂੰ ਮੌਕੇ ’ਤੇ ਭੇਜ ਰਹੇ ਹਨ। ਜੋ ਮੌਕੇ ’ਤੇ ਜਾ ਕੇ ਸਾਰੀ ਘਟਨਾ ਦੀ ਜਾਂਚ ਕਰਨਗੇ ਅਤੇ ਜੇਕਰ ਕੋਈ ਦੋਸ਼ੀ ਪਾਇਆ ਗਿਆ ਤਾਂ ਉਸ ਵਿਰੁੱਧ ਕਾਰਵਾਈ ਕੀਤੀ ਜਾਵੇਗੀ।